______________________
* ثم ماذا بعد ان تدحرج الوصيف الى بطولة الترضية.
* ثم ماذا بعد ان عادت العرجا لي مراحا.
* ثم ماذا بعد ان اصبحت الكون فدرالية الامل والرجاء.
* ثم ماذا بعد ان تبخرت كل الاحلام الوردية وتناثرت في الهواء كففاقيع الصابون.
* ثم ماذا بعد ان فشل اخوان علاء والعجب في اسعاد شعب المريخ المغلوب على امره.
* ثم ماذا بعد ان عادت ريما لحالتها القديمة.
* ثم ماذا بعد ان تركوا الجنيد الجندي المجهول واتوا بمشجعي الحيرة.
* ثم ماذا .. وثم ماذا .. ثم ماذا !!؟؟
لاشئ البتة ففي النهاية لايصح الا الصحيح والني للنار والماعنده قدره في الدنيا دي يرضي بي قسمته مهما اجتهد وتطاول في البنيان لانه اي زول في الدنيا دي بيعرف قدر نفسه مفروض يمد كرعينه على قد لحافه ومايتطاول في البنيان ويقعد يعاين لي فوق لمن يقع الحكاية ماكويسه ومالايقة ومامقبولة ومامعقولة وبتودي الزول في ستين داهية زي ماحصل للوصايفه يعني وبصريح العبارة لما فريق زي الهلال السوداني هلال العز البهز ويرز يصل الى مرافئ المجموعات اكثر من عشرة مرات ويصل الى النهائي مرتين ويكون اول فريق سوداني يصل الى دور الاربعة في هذه المسابقة القارية الكبرى في بواكير فترة الستينيات الميلادية اي قبل مايزيد عن نصف القرن من عمر الزمان الكلام زي ده لما يحصل بيكون شى عادي ومافيه مفاجاءات ولا حالات استغراب او دهشة ولما فريق زي الاهلي القاهري نادي القرن يصل النهائي ويحقق البطولة القارية مرة واثنتين وثلاثة وسبعه هسه في زول جاب سيرة الوحدات برضه الامر بيكون عادي ولما الزمالك المصري او الترجي التونسي او مازيمبي الكنغولي يتحولوا من دور الستة عشر الى دوري المجموعات برضه الامر منطقي ومقبول وبيدخل الى العقل لانه هذه الفرق فرق متمرسة وعريقة وتعودت على منصات التتويج"
* لكن واه من لكن هذه لما فريق زي المريخ السوداني يخرج من دور الستة عشر ويفشل في الوصول الى دوري المجموعات هل هنالك مايدعو الى الحزن والاسى وفقر الفاه وانتحار البعض وتسمم البعض الاخر وانتشار حالات الطلاق في اوساط المريخاب لالشئ سوى ان الزوجات ينطقن اسم السطايفة بطريقة غير مباشرة تعود بهن الى اسوار منازل اولياء امورهن اي نوع من السذاجه هذه الذي انتابت اهلنا الوصفاء فخروج المريخ وتدحرجه الى بطولة الترضية شئ عادي ومتوقع وهو امر ليس بالغريب والفريق واللاعبين ومجالس الادارات المتعاقبة والجماهير الصابرة المكلومة متعودة على ذلك (( متعودة دايما)) ولكن الغير معقول والغير متعود عليه ان يصل الوصيف الواهن الضعيف الى دوري المجموعات على نحو ماحدث في الموسم السابق والذي جاء كصحبة راكب كما اشرنا بالأمس وهو شئ يحدث كل ربع قرن او مايزيد عنه ففي تلك الحالة تبدو الغرابة وتبدو الدهشة ويبدأ فقر الفاه اما في حالة التحول الطبيعي الذي حدث امام السطايفة المتواضعين فالامر طبيعي لانه لافرق بين احمد وحاج احمد فلا الوصيف مؤهل للتقدم قي هذه البطولة ولا السطايفة مؤهلين ولو انهم اي السطايفة والوصفاء التقوا اندية لها وزنها في الدور التمهيدي لما وصلوا اصلا الى دور الستة عشر فللمتباكين على اللبن المسكوب من جماهير الوصيف ولاولئك الحالمين بتكرار انجازات الهلال في هذه البطولة نقول لهم ده بعدكم ولسه بدري عليكم واولويات الهلال من الصعب ان تصلوا اليها الا بعد ان يرث الله الارض بهلالها ووصيفها وعشان كده نقول ليكم خليكم ناس عاقلين واعرفوا مواطئ اقدامكم ولاتحاولوا مجرد محاولة ان تضعوا رأسكم برأس هلال العز فالبون شاسع وكبير ومجال المقارنة معدوم وشن جاب لي جاب وشن لما الثرى مع الثريا بل شن لما القمري مع السنبر فالزعيم يبقى زعيما والوصيف يبقى وصيفا وهل يمكن للسيكافيين ان يتخطوا حواجز السيكافية ويحققوا البطولة القارية معقولة ياناس بالطبع لا وألف لا أذن خليكم في طموحاتكم السيكافية وارضوا بما قسمه الله لكم وكل زول في الدنيا دي بيأخذ قسمته واحمدوا الله انكم وصلتوا دور الستة عشر .. قال ايه قال دوري مجموعات هي الدنيا سايبة مجموعات قال يلا بلا لمه احمدوا الله على الكون فدرالية دي وبرضه كتيره عليكم وربي مايفضحكم فيها فقد اشبعتمونا فضائخ وانكسارات من زمن سانت جورج والى سباعيات الوحدات ونهاية برباعية الصفاقصي في الحفرة والساقية لسه مدوره ومدد ياسيدنا الشيخ ولانامت أعين الحبناء"
بجري المدينة وابو قلبا ميت
* هسه عليكم الله يااخوان مليارات بجري المدينة الثلاثة دي الناس دي يحللوها منه كيفن ثلاثة مليارات ولاعب جراي زي بجري المدينة لايقوى على اختراق دفاع هش زي دفاع الوفاق ده لاعب زي ده شن فايته ودفاع الوفاق الشفناه ده بالامانة ناس بيكيه وضفر اخير منه طيب دفاع تعبان وهلكان وكله عواجيز زي دفاع الوفاق ده بجري المدينة ماقادر يجيب فيهه قون تاني حايجيب قون بتين انتو بجري المدينة ده دفعتوا ليه المليارات الثلاثة ديل عشان يجيب ليكم اقوان في الامير البحراوي ونيل شندي والنسور واهلي الخرطوم معقولة يااخوان الكوره كلها بجري المدينة ده مايشوت الا كوره واحده بس وكمان الكوره تمشي بره القون لاعب زي ده عبد الرحمن برمبل ود عمتي اخير منه على الاقل عبد الرحمن برمبل بيلعب دبل كيك بي حرفنه وبجيب منها اقوان وعبد الرحمن برمبل ده شهادته اخذها من ديم الصغير الله يرحمه هسه لو ماكان اعتزل كان اخير ليكم من بجري المدينة ابو ثلاثة مريارات زي مابيقول اخونا احمد الشفيع وبالطبع فان تراوري ابو 20 ألف دولار في الشهر مايعادل 80 الف ريال سعودي فهو ليس احسن من بجري في شئ فهذا اللاعب الذي يتقاضى راتب 3 دكاترة استشاريين مفروض تاخذوا المباريات معاهو مقاولة يعني ياتراوري المباراة الدولية دايرين منك قونين والمباراة المحلية قون واحد واي مباراة تطلع منها بدون اقوان يتم الحسم من راتبك بما يعادل 1000 دولار لكل مباراة يخرج منها بدون اقوان .. يعني هسه ابو 3 مريارات ده وابو 20 ألف دولار ده شنو الفارق الفني اللي عملوهوا في المباراتين ذهابا وايابا اتحدى واحد يقول لي بجري المدينة ده سوى حاجه حتى البرطعة اللي اشتهر بيها ماشفناها وتراوري التررللي بتاعكم ده كان قاعد ((ستنق ساكت)) طيب اذا ده حالم وده مستواهم لزوم البعزقه للفلوس شنو؟؟ طيب يااخوانا سؤال برئ اوكرا ده بياخد كم الافريقي المسكين ده وهو الذي يصول ويجول ويصنع الفارق الفني والبدني هسه تلقاهو بياخد ملاليم لاتتعدى ال 5000 ألف دولار في الشهر في حين ان ابو قلبا ميت ياخذ لكه على قلبه ليه يااخوانا ليه دايما اللاعب اللي بيجي من الهلال مميز عندكم وسعره غالي ومهره بالدولار والمريارات بينما غيره من الذين ياتوا على باب الله ياخذوا حسب نياتم صدقوني ايها الوصفاء مالم تسود دولة العدل بين اروقتكم فلن تقوم لكم قائمة لي يوم القيامة وخلو بجري المدينه وتراوري التررلي ده ينفعوكم في الكون فدرالية لو فيهم رجا"
التمريرة ... الأخيرة
* الاكسبريس موقعة لاتقل اهمية عن موقعة الفهود والفوز فيها سيعزز من حظوظنا في التربع على صدارة الدورة الاولى من الدوري في الطريق لاستعادة اللقب المسروق والكابتن ابوشنب الذي قاد الفريق للفوز على فهو الشمال مطالب بالعودة الى الخرطوم بالنمرة الكاملة من عاصمة الحديد والنار ولن نرضى باي نتيجة غير الفوز وحصد النقاط الثلاثة كما اننا تواقين الى ان يمارس المهاجمين ادوارهم في مغازلة الشباك وتبادل الادوار في احراز الاهداف على نحو مافعلوا امام مريخ السلاطين ولانريد بالطبع ان نعود الى المربع الاول الذي كنا ننتظر فيه الهبات من لاعبي الوسط والمدافعين على نحو مافعل عمار الدمازين في لقاء الامل الماضي فانقذ الموقف في غياب الصحوة الهجومية وتبعا لذلك فنحن لانريد ان ندخل في نفق اللحظات الحرجة فلتحسموا الموقعة الليلة من عصرا بدري وقبل ان تشتعل الكشافات الاربع ولكاريكا وجكسا والجزولي وولاء الدين والشعلة نسوق الحديث املا في ان يكونوا في الموعد ويسعدوا الانصار بفوز باهر بعيد عن حرق الاعصاب والانتظار الممل"
ود الحاج
وعاملين فاهمين وكتاب كمان
والله اخر زمن وفيه العجب العجاب
إختشو الله لايوفقكم
ود الحاج
اما ان تجمع الهليل المهلهل بالفرق الكبيره لانه تاهل بعض المرات لمرحلة المجموعات فهو ما يذكرني بقصة القراده التي سألت عن سر غيبتها فقالت انها ذهبت مع الجمل لجلب العيش من القضارف والجميع يعلم موقع القراده من جسد الجمل .
مشكلتكم انكم ناس حاقدين وقلوبكن سوداء وما عندكم غيره على شعاركم (شعار عصمت ) وهمكم كلو انو تتكالبوا على كل راسمالي يراس الهلال عشان تشيلوا المعلوم .
من يقرأ كتاباتك السابقه عن الكاردينال يستحي ممن يريق ماء وجهه امام الرجال ويغير قناعاته بلا مبرر ويتحول مائه وثمانين درجه لشئ يعلمه وحده رغم بؤس الحال اكثر من السابق .
بكل الصدق نرى الاستاذه فاطمه الصادق اشجع صحفي هلالي لانها متمسكه بقناعتها ان الكاردينال افضل ولم تغير هذه القناعه بل استطاعت ان تقود رجاله بشنبات ان يسيروا في اثرها آكلين من فتاتها .
خليك مع الفهود والاكسبريس والحاجات دي نحن ما فاضين ليها عندنا مهام خارجيه وبعدين الولد بقش في الاخر هههههههه