• ×
الجمعة 29 مارس 2024 | 03-28-2024
معاذ ابو مؤيد

الكونفدرالية علي الابواب

معاذ ابو مؤيد

 0  0  1320
معاذ ابو مؤيد

والتسجيلات محتاجة نفرة ياشباب


نقفل باب الإشادة بالاداء ونفتح باب الولاء ،،،
يلا ياناس نرفع شعار الولاء الولاء هنا لحب الكيان وناس الحارة وناس امة المريخ يلا عشان نحمس نفسنا لنفرة التسجيلات ،،،
لو انتظرنا التسيير الضحك شرطنا
والله بكلمكم جد المنتظر التسير تسجل لاعب يكون في كوكب آخر كوكب من كواكب سبيستون،،،
الممكن يعملوه يمشو كريم الحسن ويدخل الوك مكانه غير كدة حنوقف محلك سر!!
عشان كدة التسجيلات تبدأ يوم عشرة كل قروب يجهز مالو للنفرة وللدفرة !!
والكونفدرالية السنة دي شكلها نار منقد عشان نزلوا فيها الكبار،،،
خاناتنا محددة ومعروفة ان شاء الله نملأها لاعبين من الدوري المحلي يكونوا إضافة مش ناس تقعد في الكنبة ،،،،
القاعدين ذيادة عدد كتااااار ومستهلكين أولادنا في التوليف !!
يعني القاعد كنبة دا ماكل شارب وذيادة عدد !!!
عشان كدة الكنبة ذاتها حنضفها من ناس كنبة وراء ونخليها تنافس الفي الميدان ،،،،
الناس القاعدة كنبة وراء ماسكين مقاعد سااااكت !!



ناس التسير كتر خيركم ماقصرتو بعد دا سلمونا التيم لحدي هنا وشكر الله سعيكم ...
معقولة لكن امبارح تشيلو حالنا بالشعار كدة !!!
انت قايلنو فريق حلة ولاشنو ...
كان تخلوهم بالشعار الاخضر بتاع الاحماء بدل البشتنة دي
دي سقطة إدارية لمجلسكم المؤقر والقطاع الرياضي القاعد في السهلة ساكت ....
ماعارف لو لاعب فنلتو انشرطت ساكت حتلبسوه شنو يلعب بفنلة حمالات ولا ترشوه بوهيه بخاخ احمر!!!
عليكم الله سلمونا الفريق لحدي هنا وارحلوا...
مجلسكم دا مامتفق في نفسو عايزننا نتفق عليكم كيف !!!
ماعارف اللاعبين ديل لو مابشتروا باقي معداتهم براهم كنتو تلبسوهم شدة ومعاها شراب!!



وناس الاتحاد العام تقول برضو ناس تسيير كل يوم برمجة جديدة وبرمجة مقصودة ترهق الزعيم
عاد دا كلام دا كل ثلاث ايام مباراة وفي ولايات مختلفة انتو قايلنها حملة تطعيم حتدشنوها في الولايات عشان تعملوا المباريات كدة!!!
لو مرشح انتخابات مابلف الولايات كدة في الزمن القصير دا!!
جيبو معتصم جعفر وقول ليه اعمل حملة ترشيحات في الولايات في الزمن دا كان مالقيتوه واقع في الواطة من التعب ،،،
انتو قايلين اللاعبين ديل شنو شرايح موبايل بس يدخلوا الميدان يتفعل خدمتهم !!
غايتو سويتوها ظاهرة لكن بعد دا المريخ مابنهار ومابقع ليكم !!!
وحقنا دا عند رب العباد

جون سينا اترجل العاقبة للباقين قادر ياكريم ،،
عايزين ناس من المدرج يقودوا المرحلة عشان الزمن زمن الشفوت
بالله مشجعين سافروا من حر مالهم وشجعوا في المدرجات وناس الإدارة يحضروها خلف الشاشات
بالله دا يسموه شنو؟؟
بركة الماسافرتو كان جبتو احباط ليهم ذيادة !!
مجلسكم فيه ناس كتلتو فيهم الطموح والرغبة في العطاء بفعل فاعل مع سبق الاصرار والترصد،،
لكن نقول شنو !!
لاقادرين تسيروا النادي ولاقادرين تساعدونا باستقالات مبكرة ،،،
انتو قايلين يوم سبعة وعشرين بعيد والله قريب لكن حددتوه بعد فوات الاوان !!
لكن املنا في الاقطاب تدارك التسجيلات وإضافة أربعة خانات كل واحد من الجلابة يمسك ليه ملف لاعب وتخلو للجمهور ملف لاعب ،،،،
اصلو الاقطاب الداعمين ثلاثة والباقي قاعد يتفرج،،،
كل قطب منكم يتكفل لينا بلاعب واحد بس في التسجيلات تكونوا ماقصرتوا خالص ،،،،
يلا ياشفوت علينا اللاعب الرابع حافز تسجيلوا مسؤليتنا برانا ،،
وبرانا برانا نشيل الشيلة

ختاما
ساعدونا بالرحيل المبكر عشان كوكبنا محتاج تجديد وناس دفيعة وجلابة،،،،،،

ونحن علي المدرج ندعم ونشجع ونتفرج
و المرة دي دفعنا حيكون مختلف وللتسجيلات فقط !!
دفع يقوى شوكة الزعيم
ولو فضل باقي قريشات نوديه لبند الرواتب،،
وزعيمنا حيصل اليوم الخميس الساعه ١١ ص وعندنا شفوت منتظرين الاسود لرفع الروح المعنوية ...
المطار حيستقبل الشفوت والاسود واصلا في شفوت معاهم من الجزائر في المدرجات ،،،
كمان شفوت المدرجات بتوصوا

همسة أخيرة
الحاضر يكلم الغائب التسجيلات باقي ليها كم يوم والشيلة شيلتنا برانا وخزينتنا فاضية !!
عشان كدة جنيه بيفرق معانا وممكن يملأ لينا الخانة،،
جنيه وجنيهين وخمسة بتجيب لينا صانع الالعاب المعذبنا دا ومخلي كفتنا دايما مايله جنيهك دا بجيب لينا الزول البوصلنا للقون ،،
عشان تاني المذيع بدل يقول هو والقون يقول هو والجنيه هو والجنيه،،،،
سمعتوني ياشفوتنا مريخنا محتاج لتكملة الخانات وجنيهات بتساعد الكيان

خارج النص
نعدي الشهر دا بمبارياتو وتسجيلاتو ونفرات مدرجاتو
ونجهز حالنا للانتخابات
نعدى الايام العصيبة دي عشان القادم اجمل ....
نتجاوز الدور المكرر وبعديها صينية رمضان قدامك والزعيم قدامك يصارع في افريقيا ...
تحلل صيامك وتحلل هتافك شفتو المتعة كيف ...
المدرج محتاج لينا ونحن محتاجين ليه
وقدامنا عشرة يوم عصيبة !!
ناس الولايات الزعيم جايكم ماتقصروا شفوت الولايات الدور دوركم ،،،،،
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019