• ×
الإثنين 1 مارس 2021 | 02-28-2021
شوربجي

الجزائريين كشفوا مريخ ضربات الجزاء

شوربجي

 9  0  1827
شوربجي


((())) الهلال رهيب يا رجاله :

جارنا المشجع الهلالابي اتصل بي تلفونيا وقال :

يا سلام شفت الهلال كيف انه فريق عالمي

وكيف فاز علي هلال الفاشر ٣ صفر

بصراحه الهلال رهيب وعجيب

وتصدق يا ابو حسن الهلال امام هلال الفاشر لعب زي الريال

وكاريكا كان احسن ميسي صال وجال في الملعب

لقد فاز علي هلال الفاشر يا رجاله انا مش مصدق نفسي

عملتوها كيف يا جماعه

العشري يا اخوانا مدرب عالمي

لقد اعاد الهلال الي سكة الانتصارات

والمجنني ليه ما عملها مع النيل شندي

اكيد كانت في مؤامرة تحكيميه

وهدف صحيح رفضوا الحكم

يا اخي التحكيم ظالم

قلت لصديقنا الهلالابي

الله يكون في عونك

الهلال يمر باوقات عصيبه

ومن مدرب لمدرب

ويجب ان لا نحكم علي الهلال بمستواه امام الفرق الضعيفه

وبصراحة الهلال المحلي ليس بحاجة لمدرب اجنبي

يا اخي مبارك سليمان يكفينا

ويا ريت صلاح احمد آدم

وياريت الفاتح النقر

لا حاجة للهلال بهؤلاء المحترفين الاجانب في الدوري المحلي

فالدوري المحلي لا يستحق كل هذه الدولارات المهدره

يكفي اللعب بالشباب

اطهر والثعلب ووليد ومحمد عبد الرحمن وبشه الصغير ويونس الطيب

لا نريد ان نفرح كثيرا بفوز الهلال في المحلي

فتفوق الهلال علي هلال الفاشر تحكمه فرق الخبره

لا نريد ان يكون الهلال اسد علي وفي الحروب نعامة


((())) الجزائريين كشفوا حقيقة المريخ :

اشارت صحيفة الهداف الجزائرية الي ان وفاق سطيف حقق نتيجة ايجابية امام مضيف المريخ بأم درمان .. وذكرت ان المريخ لا يفوز في غياب ركلات الجزاء حيث وجد الحكم البتسواني الذي ادار المباراة احتجاجات عنيفة من انصار المريخ السوداني بسبب اداءه الذي لم يرضي السودانيين لعدم احتسابه ركلة جزاء حسب اراءهم.

حتي اخوانا الجزائرين عرفوا ان المريخ يعتمد علي ضربات الجزاء وقد لاحظوا ذلك في عام ٢٠١٥ وحين حصل المريخ علي كم هائل من ضربات الجزاء في الجزائر والخرطوم ضد الفرق الجزائريه وبمعدل ضربة جزاء في كل مباراة

وصدق اخوانا الجزائرين في اقوالهم فالمريخ قد طوع حتي التحكيم في الدوري الممتاز ليصطف معه

وفي مباراة وفاق سطيف حاول كل من بكري المدينه وتراوري الحصول علي ضربة جزاء وسقطوا كثيرا ولكن حظهم العاثر اوقعهم مع الحكم البتسواني الشاطر والذي لم يستجيب للسمليشن


((())) لو كانت الاماني حصينا لركبها الفقراء :

امنيات اهل المريخ ان يتأهلوا من الجزائر

وهذا من حقهم ولكن هل بالاماني وحدها تتحقق المعجزات

المريخ فرط في التأهل علي ملعبه

وصرح عقلائهم انهم قد فقدوا فرصة التأهل

فجاء رد مزمل انهم سينتقلوا من بطولة لاخري

ونسي مزمل ان مازيمبي الخطير ناوي علي الكنفدراليه هذا العام وقد خرج مهزوما ٢ صفر في آخر مباراة

يا جماعه خليكم عاقلين فلولا لطف الله لشهدنا فضيحه كرويه في ملعب المريخ

(بيكيه) ومع الاعتذار لذلك اللاعب الاسطوره هو وحده تسبب في هزيمة المريخ امام الوفاق

نرجو ان لا يبالغ اعلام المريخ السالب ويتحدث عن تأهل المريخ من الجزائر


((())) دعونا نستمتع بهذه المجادعه الزرقاء الجميله :

مجادعة ثلاثي الهلال عن مباراة كشف الحال

( ود المجذوب ووود البشري سوهندا عبد الوهاب) ..

==

سوهندا

سلام ي الاحمدين .. انا كنت ياخ مافيشه

والديجتل خرب.. شفعنا ،،، شالو الفيشه

سامعابا النجوم ،،، (زاقالو) ،، جاد تفنيشا

وراها الخراب ،،،،في القلعه ،،،، نتف ريشا

...

ود المجذوب

معقول يا سوهندا ،،،،، تفوتك التقريشة ؟

(جابو ) الما خمج ،،،درش الجماعة دريشة

الوزن الثقيل ،،،، شفناهو لاقي الريشة

استمتعنا غايتو مع ،،، الوصيف الكيشة

....

ود البشري

نجمة سيدة يوم داك ،،، اصبحت ماافيشة

واولاد الجزااير ،،،،،،، كرهوها ،،،، العييشة

ماا تخاف يا وفاق ،،،، نجمتنا اصلا ،، كيشة

كان غمضت سااااكت في الضلام ،، بتنيشا

....

سوهندا

النجمه البدت برلومه ،،، جات تتشابى

وراها الوفاق ،،،،،، الليله دق ،،، اليابا

الطيران خلاص،،، قالولي دقدق بابا

(زاقالو )الحريف ،،، في نار ملهلبه ،، سابا

...

ود المجذوب

الشي المحير ،،،،، (جابو )،،،، لمن جابا

الناس الفصاح سست فجأة قلبو غلابة

ما شفتي اب جريشة ودمعتو المنسابة

كالعادة انفعل ،،،،،،، فكالو كم درابة

...

ود البشري

جد برلومة ،،، في درب الكبار ،،،،، ياااا دابا

عملت فيها تفتيحة ،،،،، وكمان ،،،، لعااااابة

جمهورهم هتف ،،دخانو ،،،، سوا ،،، سحابة

بس نادي الوفاق ،،،جاها وحرق ،، اعصابا

....

سوهندا

مسكينه النجيمه ،،،، العامله ست الساحه

يوم حضر الوفاق ،،، شهاها طعم الراحه

ياحليلا إنطفت الفي الوهم ،،،،،، منداحه

والإعصار ضرب ،،، وإسطيف بدا الكتاحه

...

ودالمجذوب :

قبل الكورة نقة ،،،، وفوق عليها فصاحة

بعد الضربة جابت.. يا سوهندا مناحة

عندي سؤال صريح محتاج اجابتو صراحة

ماشين الجزائر ؟؟؟؟ ولا ماخدين راحة ؟

...

ود البشري

مبسوطة وتبرطع ،،،،، في الحمام ،،، منداحة

قايلة القصة سااهلة ،،،، وكل حاجة متاااااحة

بس يوم داكا ،،،، لاقو ،،، العقرب ،،، النتاحة

بي قونين ظراااف ،،،،، دقوها ، ذادو جراحا

....

سوهندا

ي اخوي السفرمعروف فوائدو عديده

فيه يشوفوفن واهداف تملي جديده

الطيران اكيد من بره والتغريده

والاسطيف حلف للنجمه قال ح يبيدا

.....

ود المجذوب :

اوعي من الجزائر ،،، ومن فضيحة جديدة

الوحدات زمان ،،،،، كانت حكاية فريدة

لازم يقتنع ..والنجمة ،،،، غايتو عنيدة

ما يقومو السطايفة يسوو ليها ،،،، مكيدة

....

ودالبشرى

كونو النجمة تخسر ،،،،،، غايتو ماااها جديدة

هابط مستواها ،،،،، وكل خطوطا ،،، بعيدة

يوم داك الوفاق ،،،،، اداها ،،،، علقة ،،، شديدة

خايفين بكرة يا سوهندا تاااااني ،،،،،،،، يزيدا


محمد حسن شوربجي





امسح للحصول على الرابط
بواسطة : شوربجي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    ياسر عبد الله محمد طه 04-12-2016 11:0
    بسم الله الرحمن الرحيم
    الاخ المحترم : محمد الحسن شوربجى
    السلام عليكم ورحمة الله وبركاته
    نحن المريخاب الحمد لله رب العالمين لم نحقد عليكم ولم نكره الهلال لكن الهلالاب يكرهون المريخ اكثر من حبهم للهلال
    والحمد لله رب العالمين المريخ ربنا تبارك وتعالى رزقه بكاسات محمولة من الخارج جوا
    ونسال الله تبارك وتعالى لنا ولكم الهداية والبعد من الفتن والحقد
    والسلام عليكم ورحمة الله وبركاته
    ياسر عبد الله محمد طه // ليبيا // بنغازى
  • #2
    كمبارس أفريقيا وصفرها 04-12-2016 09:0
    خخخخخخ
    1-أول فريق فى أفريقيا يدير له حكام هجين مبارياته
    2-آخر مباراةوأول لكم دورى ال32 حصلتم على ضربتى جزاء
    الزمن ده بقى صعب رغيفتين ما بشبعو *** وبلنتين ما بأهلو
  • #3
    أب شرارة 04-12-2016 02:0
    ههههههههههههه .. يلا يا شوربة أحرق بني دلقون خليهم يعرفو مكانم الطبيعي
  • #4
    محمد التهامى 04-12-2016 02:0
    يا شوربة انت قلت مازمبى الخطير ناوى للكنفرالية بمنطقك نحن برضو ناوين ليها. انتم نوين على شتو . وانت ماشى بحر جدة بتين
    الله لا يشفيك من الحقد
  • #6
    جون سينا 04-12-2016 10:0
    ياود الحاج عاجبك إسلوب كتاب المريخ يعنى هم من الناس المتزنين شغالين شماتة وسخرية وشتل وفبركة وتلفيق أخبار فى الهلال والمعاملة بالمثل أديهم ياشوربجى كيل ليهم - أرمى بالتقيل على الكفوة
  • #7
    سامي 04-12-2016 10:0
    ياسيد شوربجي زيد ليهم العيار شوية وإذا هم مغبونين من كتاباتك خليهم يشوفوا إيه الي بكتبوه مزمل وسلك عن الهلال وواحد متصوحف اسمو كابو
  • #9
    ود الحاج 04-12-2016 08:0
    الله يكشف حالك يا أبو راسا فاضى
    والله يكشف حال كل كاذب ومارق
    ولن ينصلح حال كقر ووتر طالما تفسح
    المجال لأمثالك الحاقدين بالكتابة هتا
    قول لينا جدة كيف ؟
    ود الحاج
       الرد على زائر
    • 9 - 1
      أبو ناهد 04-12-2016 03:0
      أمسك اعصابك يا ود الحاج
    • 9 - 2
      بلح الشام 04-12-2016 12:0
      لا تلوموه على الحقد والكراهية للمريخ وجمهوره
      أصلو في مريخابي قام بإجراء اللازم ولم يدفع المعلوم
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019