• ×
الجمعة 25 يونيو 2021 | 06-25-2021
معاذ ابو مؤيد

شفوتنا جهزوا لينا الدارة ونفرتنا القادمة استقالة الإدارة

معاذ ابو مؤيد

 0  0  537
معاذ ابو مؤيد

====================

شكرا لكل شفت دخل الاستاد
شكرا لكل زول قاعد في القروبات ومافات
شكرا جماهير الولايات
شكرا لكم زلزال الملاعب
شكرا قناة الملاعب
شكرا لكل من شارك بمجهود
شكرا لكل لاعب قاتل واوفى بالعهود
تاني مافي شكر لزول
لانو البقية كانوا ذيادة عدد
====================
مدرجاتنا كل يوم تولد لينا شفت جديد
والقطاع الرياضي حكرا للاخ العميد
معقولة كل خسائرنا واحباطنا مرتبط بيك
ماتفك الدفة وادها غيرك
لازم تمسك في البيرك
عذبتنا وكرهتنا وجننتنا
شلليات وفتن وتصريحات!!
واخرتها عدم انضباط في المعسكرات!!
مخلي المعسكر تكية يالحبيب
تشاكل في شنو ولي شنو!!

معسكر في القاهرة وتفاصيل معسكرك منقول في قناة الهدف في الجزائر
مباراة تفاصيلها تناقش في القنوات الجزائرية
معسكر لشنو
انت ماصارف رواتب ومعسكر خارجي!!
عايز تعمل الحيشان سراميك وبيتك مبني بالجالوص!!!
اسمع لي اقلام الصحف كويس!!

فاتح معسكر الخرطوم علي مصرعيه لكل من هب ودب
فاضل شنو ولاعبي الفريق همهم يتصوروا سلفي !!
ووجبات الغداء منقولة مباشرة علي جوالات الجماهير!!

لاعبين يطلبون الدولار ومستواهم في هبوط الجنيه السوداني!!
مدرب من ابطال الافلام الأمريكيه
لاقادر يحافظ علي ماورثه من الموسم الفات لاقادر يطور اي لاعبي في الفريق!!
تعرفوا فته الفول
امبارح فريق عبارة عن فته فول !!
ماتفرق الجبنة من زيت السمسم من موية الفول !!
هرجلة في كل شي !!
وسعادتك عايز تشاكل بالله ماتختشي!!

روح الفريق موجودة لكن البوظفها منو !!
واكتر من حلقوم يكورك في الدكة
ماقادرين نفرز المدرب من مساعدو من مدير القطاع الرياضي!!
جمال المدرج رااااااح مع سعادتكم!!
الناس كلها لابسة لبس خمسة وانتو لابسين الكاروهات!!
معقولة بس !!
انتو جاين وين ميدان كورة ولا حفلة الشاب خالد!!
اموت واعرف حاتم محمد احمد خانتو شنو في الرصة بتاعتكم !!

انجزنا بمجهودنا ثلاثه نفرات
نفرة المال وتوفير الدولار
نفرة الحضور الجماهيري
نفرة التيفو والزي الموحد
باقية لينا نفرات وماحنتنازل منها...
نفرة استقالة الإدارة ونفرة الإقالة
نفرة تطهير الإعلام ...
كنكشتو مافيه الكفاية ريحونا بالله عليكم
اشكال جاسمة علي صدورنا من سنين وسنين كفاية اتحملانكم مافيه الكفاية
الشفوت القدرو ينظموا حشد خمسين الف متفرج قادرين يكونوا مجلس إدارة وقطاع اداري..

ختاما
ارحمونا يرحمكم الله وحلو عن سمانا
كرهنا تكرار الوجوه خاصه في القطاع الرياضي

ونحن علي المدرج ومدرجنا كان امس غير شفوت يملوا العين
شفوت لاكلو ولاملو
شفوت جاين من الولايات
قعدو جمب شفوت امبدات
و المحصلة حماس يثلج الصدر
شكرا لكل شفت فيكم متعتونا اكتر من تفاصيل المباراة!!

همسة اخيرة
مافقدنا الامل في الفريق لكن املنا فيكم راااااح مع تخبطاتكم وتعنتكم
منتظرين شنو!!!
الحمد لله للمرة الثامنة لم ننهزم علي ملعبنا بسبب مجهود وخبرة بعض اللاعبين !!
لم تعملوا ولافتفوتة في الوصول للمرحلة دي!!!
بالله غادرونا قبل مباراة الاياب
خلونا في فراغ اداري مستعدين نتحمل المسؤلية
شن سويتو غير الشو الاعلامي والوجاهة في الفارغة والمقدودة
لن نتطرق للمباراة من قريب او بعيد عشان عارفين اسباب التدهور الفني ..

لنا عودة لكل التفاصيل الحصلت قبل المباراة!!!!!!!!!!!!!!!!!!!!!!
ولنا عودة للهدر المالي الحاصل
ولنا عودة للحاصل في الخفاء من اموال وحاويات
ما قام به سعادة الوريث الوحيد للقطاع الرياضي ودائرة الكرة لا يشبه المريخ وما قام به لا يصدر من مشجع متهور ناهيك عن من يشغل دائرة الكرة لكن مين يقول البغلة في الابريق..
وحق للشفوت معرفة أين صرفت أموال النفرة واللعيبة الأجانب واعتراضهم علي تأخر المرتبات بمعسكر القاهرة نقل علي الأسفير عبر المواقع والمنتديات


نفرة استقالة واقالة الادارة وملحقاتها من غدا
جاهزين ياشفوووت...
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019