• ×
الأربعاء 27 أكتوبر 2021 | 10-26-2021
شوربجي

هو في بطوله افريقيه ؟

شوربجي

 16  0  1815
شوربجي

((())) ياتو بطوله وياتو مريخ :

قلت لصديقي الساخر : مباراة المريخ ووفاق سطيف متين في بطولة افريقيا

قال لي : المريخ ياتو مريخ كوستي والا مريخ الفاشر واصلا في بطولة افريقيا اليومين ديل

قلت ليهو : يأ اخي المريخ العاصمي وبطولة افريقيا ٢٠١٦

قال لي : هو المريخ اتأهل السنه دي يعني ما خرج من التمهيدي زي العاده

قلت ليهو : انت بصراحه بره الشبكه

قال لي : العاده بتقول ان المريخ دايما بيطلع من التمهيدي كيف اتأهل و قام ليهو ريش ؟

قلت ليهو : يا زول الناس دي اتأهلت وماشاء الله يمكن يفوزوا بالكاس

قال لي : الناس دي ما اتأهلت الا بفضل لاعبي الهلال اللي اتسجلوا في المريخ بكري وتراوري وعبده جابر واراهن لو ما المريخ ده يجينا راجع ايد وراء وايد قدام

قلت ليهو : يا اخي حرام عليك خليك وطني وانا سوداني انا - المريخ هو الممثل للكرة السودانيه في الابطال

قال لي : الناس دي وجعوا راسنا بالفشخرة الكضابه والمريخ العالمي وووووو..

قلت ليهو : يمكن صاح - الناس دي ما قالت انها فازت بكاس افريقي

قال لي : ده كضب - ده كله كلام جرايد ساي والكاسات دي اصلا راقده في كل المحلات الرياضيه - والحكايه الظاهر كلها فوتوشوب مظبط

قلت ليهو : دليلك شنو يا زول ؟

قال لي : يا اخي الكاس ده ما ليهو اي توثيق في الفيفا و المهم نرجع لبطولة افريقيا والمريخ - نحن اصلا ما متابعين بطولة افريقيا مما الهلال طلع منها وبقت مسيخه شديد وما ليها اي طعم

قلت ليهو : يعني ما بتخش معانا الوفاق لتشجيع بطل السودان

قال لي : وفاق شنو وبطل شنو الله يبارك في الشكاوي والخمسه نقاط وسمير فضل

قلت ليهو : يا زول انسي الماضي الاليم واتحاد معتصم واللقيمات السمحه

تفرقنا وصديقي وانا اضحك علي صاحبي اللي ما متابع مشاركة المريخ في بطولة افريقيا

صحبي ده ما عارف اسم الفريق الذي سيباري المريخ

و ما عارف مواعيد المباراة الجايه

وما عارف ياتو مريخ في بطولة افريقيا


((())) فعلا الكاردينال يستحق الشكر :

مخطئ من يتهمنا بالنفاق ( وكسير التلج ) حين نصطف مع كردنه في كثير قضاياه

فما يقوم به الرجل علي الملأ لا تخطئه الا عين اصابها العمش والرمد

رئيس يبني ملعبا جديدا للهلال ماذا تقولون عنه

رئيس يقيم اكاديميه لنادي الهلال ماذا ستقولون عنه

رئيس غير كل كشافات الهلال ماذا ستقولون عنه

رئيس ومن حر ماله استجلب محترفين حتي لو غير موفقين ماذا ستقولون عنه

هل هو غلطان لانه قد تكفل بكل التكاليف والبقيه فراجه

ماذا قدم اقطاب الهلال الاخرون مع احترامنا الشديد لهم

لم يقدموا شيئا يذكر لقلعة الهلال

وفوق هذا وذاك يسلقون الرجل بالسنة غلاظ ( بعضهم )

ويشيعون التشكيك والاستخفاف في كل انجازات الرجل (بعضهم )

وحقيقه فاننا ندافع عن الرجل لانه يعمل من اجل الهلال

لا تهمنا كلماته التي تفلت منه في مؤتمراته الصحفيه

ولا تهمنا قفشاته الكثيره واخطائه التعبيريه

ما يهمنا هو ان يكون للهلال صرح كبير يفرح الاسياد

وما يهمنا هو ان يكون للهلال ملعب يليق به

وما يهمنا هو ان يكون للهلال كشافات راقيه

ما يهمنا هو ان تكون للهلال اكاديميه حديثه

هذا الرجل قد دخل تاريخ الهلال من اوسع ابوابه

وسطر اسمه باحرف من نور

يجب علينا كهلالاب ان نرد له الجميل احتراما وتقديرا

ما حدث في استاد المريخ من هتافات وهتافات مضاده هو شيئ محزن بكل المقاييس

مطلوب من جماهير الهلال الوفيه الالتفاف حول هذا الرجل تقديرا لما يقدم

علينا ان نقدر تكلفة الجوهرة الباهظه ونحن مرور قربها

كل سيخه كل طابوقه كل شكارة اسمنت - جيوش العاملين من صينيين وسودانيين

كم القندرانات والقلابات التي تزأر في الموقع - الرمل المويه الكهرباء الرواتب

عمل ضخم جدا يجب ان ننحني له قليلا

لماذا نبخس الرجل كل تضحياته التي يقدمها للهلال

صدقوني وانا مرور قرب القلعه هالني منظرها الاسمنتي فسألت صديقي

معقول الكاردينال سيدفع كل هذه القيمه بمفرده هديه لجماهير الهلال كما قال نعم الرجل يتحمل كل هذه التكلفه بمفرده

والمشكله ان الذين يفترض ان يساهموا مع الرجل لا يتركونه يعمل

يا اخوانا نقطونا بسكاتكم حتي تكتمل القلعه

بطولات افريقيا ملحوقه

بطولات الدوري ملحوقه

بطولات الكاس ملحوقه

لكن الغير ملحوق هو ان تجد رئيسا يبني لك ملعبا

والغير ملحوق ان تجد رئيسا يقيم لك اكاديميه

والغير ملحوق ان تجد رئيسا يدفع ويدفع دون كلل او ملل

كردنه وان خرجنا من بطولات افريقيا فهو رئيس ناجح

لان كرة القدم غالب ومغلوب

سذج من يفضلون نجاحات الفريق عن النجاحات في المنشآت

ان تكون للهلال قلعة زرقاء جميله افضل مئه مره من كاس افريقي


((())) تعليقات في سطور :

**** ابو جريشه يقول انهم لن يسجلوا مشاطيب الهلال

التعليق : مشاطيب الهلال هم من يصنعون الانتصارات لفريق المريخ وما في اصلا لاعب مريخابي سجل ليهو هدف كل الاهداف يسجلها لاعبين الهلال السابقين تراوري وبكري وعبده جابر


**** قضية الدكاكين حولها بعض الذين يصطادون في الماء العكر الي قضية رأي عام وظلم للناس في وقت يحتاج الهلال لهذه الساحات لاكمال مشاريعه الكبيره - ادارة الهلال لن تظلم احدا وسوف يمنح اصحاب الدكاكين التعويضات اللازمه وحسب اللوائح والقوانين - اما الرفض باخلاء تلك الدكاكين فهو تعطيل لمشاريع الهلال - يا اخي خذ تعويضك وافتح دكانك في مكان آخر


****ادارة المريخ تلقي اللوم علي جمال سالم وتتهمه بالتمرد - طيب يا جماعه ادفعوا للراجل حقوقه اولا وقبل ان تلقوا عليه اللوم - هذا لاعب محترف ولا يملك مصدر رزق آخر - وكمان قالوا انهم سيجتمعون به لكي يعتذر - يا جماعه اعطوا الاجير حقه قبل ان يجف عرقه وفعلا اللي اختشوا ماتوا


****خوفي ان تؤثر الشتول المريخيه الخطيره علي اداء الفريق - فهي تصور وفاق سطيف بالفريق التعبان بعد هزيمته من المولوديه وقد هلل المدرب البلجيكي فرحا والرئيس استقال ووفاق في ترتيب متأخر - خوفي ان يركن لاعبو المريخ لمثل هذه القصص وتقع الفأس علي الرأس ويتلقي المريخ علقة سخنه داخل الديار


*** اجمل ما يمكن قوله هو انحسار تلك التعليقات البذيئه من علي صفحات الجميله (كفر ووتر) والتي ظلت تؤذي الكثير من الكتاب - برافو ايها الشباب انتو كده حلوين وما في احلي من الكلمات النظيفه التي تعكس المعدن الحقيقي للشخص - التحيه لكم جميعا


محمد حسن شوربجي
امسح للحصول على الرابط
بواسطة : شوربجي
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    جمال الدين هاشم 04-07-2016 11:0
    النيل شندي كيف خليك من بطولات يا حليك يا ابيكو
  • #2
    كمبارس أفريقيا 04-07-2016 09:0
    http://video.alnilin.com/25848

    انتقد الشيخ السوداني المثير للجدل أبو بكر آداب الشعار الذي يحمله نادي الهلال السوداني وهو (الله الوطن الهلال) وأعتبر أن هذا الشعار فيه شرك بالله ومخالف للعقيدة.
    وذلك من خلال سؤال وجه له احد الحاضرين في هذه المحاضرة.
    وتعجب الشيخ أبو بكر من الأحداث التي تحدث في الرياضة, ووصف البعض بأن لهم عقيدة في الرياضة, كما انتقد البعض من الجمهور الهلالي في المقولة التي يطلقونها ويفاخرون بها.
    حيث ذكر أن بعض مشجعي الهلال يقولون أن الناس تصوم وتفطر بالهلال, وقال أن مثل هذه الأقوال لا يجوز أن تقال لأن الجميع يصوم ويفطر بهلال رمضان وهلال العيد وليس بالهلال الذي يشجعوه.
  • #3
    Abu Siddiq 04-07-2016 02:0
    والله انتا انسان غرييييييييب لكن انشاء الله الزعيم متاهل للمجموعات يا شوربه خليك انتا ورا الكاردينال واترك المريخ لاهله يعني بالعربي كدا نقطتنا بي سكاتك وخليك بره الموضوع ركز علي سيكافا والنيل شندي والدوري واتفررررررج وانتا ساكت
  • #4
    Abu Siddiq 04-07-2016 02:0
    والله انتا انسان غرييييييييب لكن انشاء الله الزعيم متاهل للمجموعات يا شوربه خليك انتا ورا الكاردينال واترك المريخ لاهله يعني بالعربي كدا نقطتنا بي سكاتك وخليك بره الموضوع ركز علي سيكافا والنيل شندي والدوري واتفررررررج وانتا ساكت
  • #5
    توفيق احمد 04-07-2016 01:0
    يا راجل خليك من قصصك الخيالية البتقول فيها دي وخليك مع هلالك الله يعينكم علي مصائبكم
    خلي المريخ وناسوا في حالهم
  • #6
    محمد التهامى 04-07-2016 01:0
    شربجى قلت التعليقات اليذيئة انحسرت حبيبنا انت البتكتب فيه ده مريخابى وهلالابى ما عاجبو لكن تاكد تماما اذا وجدت عشرة يعلقون تاكد ان العدد الحقيقى اضعاف والكل عارف التعليقات مابتنشر ليه وبكل اسف عمودك بينشر
  • #7
    الاسر جمالك 04-07-2016 12:0
    مافي بطولة افريقية ،، بس في شوربة و فتة ضربوها ناس الغنودي ،، قوم لف و شوف جماعتك الغنوداب في سيكافا مالك و مال البطولة الافريقية
  • #8
    nasr 04-07-2016 11:0
    سؤال واحد فقط اجب عليه لماذا تركتم بكري وتراوي وعبده جابر وهم بهذا المستوي ؟ اذا كان بكري ملك لكم فبكري كان لاعب لنادي قبل ان ياتيكم وكذلك تراوري وعبده ولاعب الكرة لا ملك لنادي معين يا صحفي يا رياضي من الذي اعطاك شهادة صحفي
  • #9
    الهلالي 04-07-2016 10:0
    نحن هلاالاب لكن انت اكتب كلام موضوغي انت لا تخاطب اطفال الاهلي المصري ما عندو ملعب وهو زعيم القارة بلا منافس
  • #10
    مريخابي أبها 04-07-2016 10:0
    هو يعني الصفر ما شافش ولا حتى سمع هههههههههههههههههههههه
  • #11
    على محمد على 04-07-2016 10:0
    الفرق بين صحافة المريخ وصحافة الهلال كبيير صحافة الهلال تبخس وتشتم المريخ
    وصحافة المريخ تمجد المريخ اذا انجز وتنتقده اذا احتاج النقد وتشجعه ولاتذكر الهلال بسوء
    اما صاحب هذه المقال حقيقة ليس هو بصحفى والصحافة السودانية العريقة تتبرا منه واتمنى ان لا يعرف شى عن المريخ ناهيك عن مبارة مجدوله عالميا رضى ام ابى
    وهو ليس بالهلالبى المحترم هو فقط كاردينالى كشافاتى
  • #12
    ودعقيده خلف 04-07-2016 10:0
    الناس في شنو وانت في شنو ياصفرابي خليك فراجي بس لحدي نهايه العام
  • #13
    ود البلد 04-07-2016 10:0
    هو في كسير ثلج أكثر من البتكتب فيهو دا ؟؟ ياخي انت كسرت للكارينال القطب الشمالي زاتو !!!
  • #15
    ابوبكري 04-07-2016 09:0
    سامحك الله بالله عليك بكري المدينة في المريخ ذي بكري المدينة في الهلال وكذلك عبده و تراوري
  • #16
    جلابي.الدوحه .قطر 04-07-2016 08:0
    كما سبق وقلت لك ان جرة قلم او سطر في مقال لم ولن يغير التاريخ فشموخ المريخ يرفرف عاليا وحيدا في سماء هذا الوطن ..وكل نفس بما كسبت رهينه ...
    اليوم يلعب الهلال في شندي وهي مباراة تحتاج لجهد نفسي كبير ..والجهد النفسي ياتي من الصحافه بزرع الهمم والحماس في قلوب اللاعبين وهو امر تعودنا عليه من كل كاتب هلالي حق ..ولكن للاسف وجدناك تعشق الكسكته اكثر من الفريق وتهوي الكشافات اكثر من الكيان ..فماذا نقول وانت تحشر الكلمات في مقالك تمومه فقط لتضع بين الكلمات كردنه والكشافات واستغفر الله العظيم وصلت بك الحال الي درجة العباده ...هداك الله وهدي قلمك لتكتب شيئا يعود عليك بالنفع والفائده للقراء ويجعل لك طريق في التاريخ مادام العمر يجري ومازلتم صحافه وفريق في صفر كبير
    اللهم امين
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019