• ×
الأربعاء 29 سبتمبر 2021 | 09-28-2021
محمد كامل سعيد

عاطفيتنا.. وقصة جمال..!!

محمد كامل سعيد

 14  0  2338
محمد كامل سعيد

* أورد الموقع الرسمي لنادي مصر المقاصة خبر مباراته الودية امام المريخ وكشف الموقع ان المقاصة قابل المريخ في الشوط الأول بالبدلاء.. وفي الشوط الثاني دفع الجهاز الفني بمجموعة من الناشئين على اعتبار ان الفريق لعب أول أمس دورياً..!!

* اجهزة الاعلام السودانية ـ خاصة الحمراء ـ تناولت الخبر دون الاشارة الى تلك الحقيقة وصورت لنا الموقف وكأن المريخ قد خاض تجربة قوية وكبيرة امام المقاصة ممثل مصر في كأس الاتحاد الافريقي (الكونفدرالية) مع ان الحقيقة غير ذلك تماماً..!!

* نعود لتفاصيل ما قالته بعض الاصدارات عن احداث التجربة الودية والتي وصفها السواد الأعظم بالخشونة وأكدوا ان لاعبي المقاصة ـ والحقيقة انهم ناشئي المقاصة ـ اعتمدوا على الضرب والركل وتسببوا في اصابة بكري المدينة.. (يا حراااام)..!!

* وقبل ان يأخذنا الجميع الى دائرة ان اصابة بكري المدينة انما هي عمل يندرج تحت بند المؤامرات الزرقاء لتعطيل مسيرة المريخ الظافرة في مسابقة رابطة ابطال افريقيا اذا بالكابتن ابو جريشة يفاجئنا بالحقيقة كاملة وبدون رتوش..!!

* قال ابو جريشة ان الاصابة التي تعرض لها بكري اثناء مباراة ناشئي المقاصة نتجت من وقوعه في (حفرة غير مرئية) وبارادته ودون اي خشونة او ضرب او تعدي او ملاكمة كما حاول البعض تصوير المشهد بنوع من الأكشن بهدف الاثارة..!!

* ان ذلك وغيره من الحقائق التي يتهرب من تناولها البعض في الصحف الموالية لا يتم الاّ اعتقاداً منهم ان ذلك الأسلوب من شأنه ان يثبت نظرية المؤامرة او يفتح الباب لإيجاد التبريرات المناسبة للتعامل مع النتيجة السلبية التي ربما تنتهي عليها مباراة السبت..!!

* نترك (الهجلبة) المتعلقة بنتجية مباراة المقاصة وهوية الفريق الذي نازل المريخ ودياً في معسكر القاهرة ونتحول الى قصة أخرى أكثر تأثيراً عنوانها العاطفة وبطلها الأول والمحوري الحارس جمال سالم تابعنا تفاصيلها في معظم صحف الأمس..!!

* ملخص الحوارات التي اجريت مع الحارس جمال تمثلت في انه ـ اي الحارس ـ استند في تأخره ومماطلته العودة الى الخرطوم في الوقت المناسب على (وصية ست الحبايب) والدته والتي قالت له متهكمة (انت ماشي ليييه طالما ما بيدوك قروش)..؟!!

* ولزيادة عزوبة الألحان ولمزيد من العزف على الاوتار الحساسة تابعنا العبارات الثابتة التي (تدغدغ) المشاعر على شاكلة (ان بحب المريخ.. وما عندي مانع ممكن أقعد احتياطي.. وساشجع المعز اذا تم اختياره للمشاركة اساسياً امام الوفاق.. والخ الخ)..!!

* والله يا جماعة جمال ده (بكانا عدييييل كده وقطّع مصارينا وخلانا نفتح ليهو باب الدخول الى التشكيلة الاساسية الى الابد).. وفكرنا ارسال تذاكر لـ(ست الحبايب) عشان تجي تقعد هنا على نفقة المريخ.. وأهو يبقى (جناها) قريب منها تشوفو ويشوفها..!!

* خلاص يا جماعة خلو جمال يشارك لان المعز ما جاهز وعلى الرغم من ان المريخ تعاقد معه بمليار الاّ ان القصد من تلك الخطوة كان لممارسة المكاواة مع ناس الهلال.. ثم يعني شنو مليار يضيع والفريق ما لاقي حق السفر..؟! استغفر الله العظيم..!!

* تخريمة أولى: والله يا جماعة قصص الاحتراف دي (شعراً ما عندنا ليهو رقبة) في السودان.. وعليه من الأفضل ان ننسى حكاية الهيبة التي لا تتماشي مع تعاملنا العاطفي لأنها تتعارض مع ابرز ثوابت الشئ المسمى بـ(الاحتراف)..!!

* تخريمة ثانية: الحقيقة ان هيبة نادي المريخ ضاعت امام اللاعبين سواء الوطنيين او الأجانب منذ ايام رئاسة جمال الوالي عندما تفنن البيه عصام الحضري وتمادى في اهاناته للكيان بمباركة المبهورين سواء مطبلاتية او اداريين..!!

* تخريمة ثالثة: لقد حدث ما توقعناه.. فقد عاد جمال سالم وتم الحاقه بمعسكر القاهرة في آخر ساعاته.. وسيشارك في مباراة السبت امام وفاق سطيف الجزائري.. وربنا يجيب العواقب سليمة عشان ما نقعد (....).. ونسمع (....)..!!
امسح للحصول على الرابط
بواسطة : محمد كامل سعيد
 14  0
التعليقات ( 14 )
الترتيب بـ
الأحدث
الأقدم
الملائم
  • #1
    bebo bebo 04-07-2016 10:0
    يا أستاذ . اقصد يا إنت ياخي ركز شوية وشوف ليك مواضيع هادفة ترفع من اسهمك ككاتب . اتمني لو يوم القاك كاتب عمود با مفردات خاصة بيك . تتوقع نتيجة سلبية إنت كاتب ولا فني . قال هيبة نادي المريخ ضاعة من ايام الوالي . المريخ كيان هيبة وجمال . أنت الوحيد النشاذ والنقطة السوداء التي تشوه وجه المريخ المشرق . جيتنا من وين إنت ؟ والله ما بتشبهنا
  • #2
    عمر 04-06-2016 07:0
    دا نص تعليق موقع مصر المقاصة عن المباراة :

    خسر فريق المقاصة امام المريخ السودانى بهدف دون مقابل في المباراة الودية التي أقيمت بينهما اليوم الاثنين على ملعب فندق موفنبيك وجاء الهدف الوحيد عن طريق اللاعب الغاني اوكرا في الدقيقة 89 من عمر المباراة

    جاء الشوط الأول قويا من جانب الفريقين وظهر فريق المقاصة بصورة جيدة ولكن لم يتمكن من تسجيل الاهداف

    ومع بداية الشوط الثاني دفع الجهاز الفني للمقاصة بعدد من اللاعبين الناشئين في اللقاء لتجربتهم، لتنتهي المباراة بفوز المريخ بهدف دون رد .

    نفسي اعرف انت من وين جبت معلومة انو المقاصة بدأ المباراة بالشباب ؟؟؟؟؟
  • #3
    أبوبكر مختار 04-06-2016 04:0
    نفسي أعرف مصطلح (هجلبة ) دي الجابوا شنو هنا
    ياخ والله العظيم أنت ماعارف نفسك بتسوووي في شنو
  • #4
    essam 04-06-2016 01:0
    يا خي حتى غلاة الصحافيين الهلالاب ما قالوا المريخ لعب ضد رديف وناشيء مصر المقاصة .. انت مشكلتك شنو بالضبط مع المريخ ؟؟؟؟ وعايز تصل لي شنو ؟؟ عربية قلنا ليك مافي ... وبعدين لما تتكلم عن الوالي طوالي كدة بمناسبة وبدون مناسبة الناس بتضحك عليك .. يا خي الراجل مشى بسسبك انت بالذات العامل فيها مريخابي وانت بتكره المريخ اكتر من الموت ذاته وبعدين عيب تتكلم على الرجل القامة بدون حتى ألقاب ولا حتى السيد جمال الوالي او الدكتور جمال الوالي .. غايتو جنس وهم !!!
  • #5
    احمد ابراهيم 04-06-2016 01:0
    غايتو يوم بتقتل ليك زول ، جماعتك نوع كلامك الدغري ده ما بنفع معاهم ،
  • #6
    ابوالفاضل 04-06-2016 12:0
    اول امشي ساهم في النفرة زي الرجال وبعدين تعال اتحفنا بي غثاءك ده.
  • #8
    جلابي.الدوحه .قطر 04-06-2016 09:0
    طبها كالعاده لم اقراء باقي مقالك ..من اول سطرين عرفت المضمون واليوم فقط تاكدت من اي طينه انت
    الموضوع ليس تصفية حسابات كما اعتقدنا وانما الموضوع ارتزاق ..بمعني مرتزق صحافه تكلف بمهام تدمير هدف معين بقلمك وكل مقالاتك اثبتت انك مرتزق صحافه ولهذا السبب تم طردك من صخيفة الصدي لعدم الثقه بك ..وعموما هي مهنه امتهنها الكثيرون الان من الصحفيون الذين يدعون العمل تحت لواء الصحافه
    وتناسيتم ان للكون رب وان هناك ضمير وشرف المهنه
    هداك الله انت وشلتك
  • #9
    مكاوي 04-06-2016 09:0
    تحية طيبة أستاذنا لو جد إنك حريص على مصلحة المريح و إستقراره وفوزه في المباريات القادمة مامفروض تقول كلام زي دا في هذه الأيام (علوق الشدة) جميع المشجعين والمحبين همهم في هذه الأيام الدعم المعنوي والمادي لنصرة الزعيم وأنت ولا هنا، شايت وين ماعارف ن لم تتطرق لهذا العمل الجميل والوقفة القوية لهؤلاء الناس في أي من مقالاتك ، رجاء أجل هذه المواضيع لوقت لاحق وقف وقفة رجال مع هذا النادى العظيم وفقك الله
  • #10
    عزالدين ابرايم عبدالرحمن حاج موسي 04-06-2016 08:0
    والله انت كان بعدت بكلامك الشين اليشبهك دا كان احسن الواحد الكلام ما قادر عليه وينتقد جمال وغيره ياخي نقطنا بسكاتك
  • #11
    د الشريف 04-06-2016 08:0
    قبل ان تنتقد الأحتراف فى الأندية يجب ان تسأل نفسك سؤال .. هل انت صحفى محترف ؟؟؟ مقالك كلو قوالات .. امو قالت .. والمعز قال .. وابوجريشة قال .. والمدرب قال .. الحقيقة انك صحفى فاقد للبوصلة ورواسب الخلافات الشخصية هى من توجه قلمك .. مقال اقل ما يوصف به انه هايف ولا يستحق النشر فى إصدارة يتابعها مئات الألاف يوميا !!!
  • #12
    مريخابي وكدا 04-06-2016 07:0
    غض النظر عن الاخفاقات و التجاوزات، هناك مبارة مهمة تتطلب تضافر الجهود و ليس تسبيط الهمم.... مبارة المقاصة انتهت و جمال التحق بالمعسكر ... يبقى أي كلام تاني في الموضوع ح يكون كلام (أي كلام).... بعدين ممكن الناس كلهم ممكن يبصموا ليك بالعشرة بأنك أنت الصحفي الوحيد الحقاني و النزيه و الذي لا يخاف في الحق لومة لائم و ما طمعان في قروش الوالي (حتى لو كانت في كشف العرس !!!).
  • #13
    سوداني 04-06-2016 06:0
    الاستاذ محمد سيد... النقد دائما يتنوع ويبحث عن الخلل ويحاول ايجاد الحلول ويتجدد مع تجدد الاحداث .. انت تدور في فلك واحد يوميا وفي نقاط محددة.. ما يكتبه زملاؤك الصحفيين (طبالين وهتيفة)..ودلع اللاعبين (بكري وتراوري واخيرا جمال).
  • #14
    الجاكومي 04-06-2016 02:0
    الرجال شغالين في النفرة وانت شغال في الحفرة .. يخيبك يا .......
       الرد على زائر
    • 14 - 1
      رضا على 04-06-2016 10:0
      لايكتب شيء مفيد للمريخ يدور فى السلبيات
    • 14 - 2
      sahir 04-06-2016 10:0
      ديل الرجال يا اخى الجاكومى
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019