• ×
الجمعة 29 مارس 2024 | 03-28-2024
امير محمد عبدالماجد

علي مقاعد المتفرجين

امير محمد عبدالماجد

 0  0  12599
امير محمد عبدالماجد
دفن الليل اب كراعاً بره ..!!
{ ناس الجزيرة الرياضية ديل بتاعين امور خلي بالك
{ قلنا ليهم ودونا بلص تمانية ودونا بلص عشرة
{ ياجماعة الرقم تمانية ده مؤثر عندنا لعبناهو يوم التيحا جاب حقو ...
{ دايرنو يوم الجياشة ومتحركاتنا ماشة
{ متحرك يوسف في الطرف اليمين ومتحرك بويا في الشمال
{ وقدامهم متحركات الخبراء علاء وعمر
{ رقم تمانية والدنيا فنية .. متحرك جواه متحركات
{ بلص عشرة دي معناها مهند كورة الجيش دي مهند حايكون بلص
{ ومهند لما يكون بلص حاجة تانية
{ بكرة يوم المطر .. سامعنا ياسادومبا
{ بكرة مطرة سادومبية ورياح هوجاء كاريكية
{ ديل لونمرة تمانية اداهم التموين .. بدونا المعلوم
{ غايتو ناس الجزيرة قلنا ليهم هيثم .. قالوا مهند
{ الدفاع ياميشو لازم يلتزم ويلعب اول باول .. مادايرين فلسفة
{ ماملاحظين الفلسفة في دفاع الهلال قاعدة احتياطي الايام دي
{ سامي في الايام الاخيرة جاب ليهو فلسفة كده بعرفه براهو ..
{ ميشو مفتح وموبايله كمرتين عرف ليك سامي بالطريقة دي بلحقنا امات طه قعده جنبه
{ من مامشي كامبوس التعاون قعد مع ميشو في الكنبة
{ ميشو اللاعبين الفلاسفة مابنفعوا معاهو .. تلعب بمبدأ السلامة انت زولو
{ الله يسترنا من المعز .. الايام دي طبزاته قوية .. يطلع غلط .. يرجع غلطين
{ الكنبه لوفيها زول غير جمعة كان طالبنا ميشو يقعدو جنبو
{ جمعة لو استوى المعز تاني مابلم فيها بالطريقة دي
{ اخطاء المعز في مباريات التيحا وهلال الساحل كانت قاتلة ومن الحجم العائلي
{ يبدو أن المعز بحاجة لكنبة الاحتياطي حتي يراجع نفسه
{ الكنبة تعلم أحياناً مايصعب علي اللاعب تعلمه خلال المباريات
{ مباراة الجيش اعتقد انها مباراة كاريكا ويشة ويوسف محمد
{ دفاع الجيش ضعيف في المعكوسات والضربات الراسية من القائم القريب مع دفاع { النيجر اهداف مضمونة
{ يوسف يدور .. وبشة يدينا البشارة
{ حركة كاريكا وسرعته ومهارته ستشكل فرقاً واضحاً خلال المباراة لأن دفاع الجيش { عشوائي وتقيل ولايملك المهارة ويمكن لكاريكا أن ينطلق من الاطراف بسرعة ويشكل خطورة كبيرة
{ واضح أن الجيش سيضع رقابة علي سادومبا لاعتقادهم انه أخطر لاعبي الهلال وهذا سيتيح المساحة والزمن لكاريكا ولاعبي الوسط المتقدم للتهديف
{ الهدف المبكر سيفرض ايقاع الهلال ويهلهل حسابات الجيش ويخيفهم ..
{ استغلال فترة جس النبض لاحراز هدف في شباك الجيش سيضعنا في المقدمة مع بداية المباراة
{ تبقي قدرة الفريق علي امتصاص ردات الفعل بعد احراز الاهداف المبكرة وهي واحدة من اشكالات الفريق التي تحتاج لمعالجات
{ الصفوة بعد ركبوا قطر المحلي طلعونا عايزين نتعاقد مع انرامو
{ شوف زي ديل .. هونحنا قادرين ندفع قروش بويا لمانتعاقد مع انرامو
{ شتلة أو كما يقول المصريين (إفتكاسة ) غير موضوعية
{ صحيح انرامو ثقيل زي سادومبا وقونو في جيبه زي بشة لكن مالازمنا حالياً
{ هجومنا فيهو سادومبا وكاريكا وبكري واحمد عادل ووراهم مهند وبشة وهيثم وخليفة ويوسف وعلاء وعمر وكلهم هدافين
{ انرامو كان جبناهو بقعد مع التعاون في الكنبة
{ ناس في الجزيرة بلص عشرة وناس الامل قال ماينقلوها في التلفزيون
{ عموماً يبدو أن الأمل ناوي علي حاجات مافي داعي ينقلوها
{ جمهور المريخ الايام دي حلقومو في قفاهو ومامستحمل اي ضربات عطبراوية .. وكمان يقولوا ماحاينقلوها
{ يعني المريخ يلقي شريط يدم بيهو شكوي وين
{ كلام رئيس نادي الامل علي عينا ومافي داعي للحلايف ..مصدقنك
{ قول بصراحة ناوين علي شنو...
{ يبدو والله اعلم ان المريخ سيعود من عطبرة في المركز الثاني .. يبدو
{ المباراة دي لومامنقولة حاتحصل فيها بلاوي يارضا
{ معقوله ناس الامل فجأة اتذكروا قروش مباراة شباب بلوزداد الطالبنها للتلفزيون وقرروا منع التلفزيون والاذاعة ...
{ اهـا وكاميرات الصحف حايخلوها والا حتي كاميرات الصحف ممنوعة
{ الحكاية دي خلي بالك دفن الليل أب كراعاً بره ونحنا عارفين وعاملين ماعارفين
{ طبعاً في النهاية حانقول ناس الامل معاهم حق
{ هسي ناس المريخ لوحصل المتوقع يشتكو لمنو ..
{ اتحاد شداد والااتحاد معتصم ..
{ للمفوضية والا الفيفا ..
{ غايتو ناس الامل الفرصة جاتهم سريع خلاص نقاط واتحاد مافي
{ ابو برمودة عطبرة دي عنده معاها ذكريات مرة وحزينة .. ماحايعرف يعاين للميدان والا للمدرجات باقي مدرجات عطبرة فيها نبالين
{ حجارة تجيك بالدي اتش ال .. مضمونه وجرحها هاي دفنشن
{ علي مجلس المريخ أن يتسلح بالعصي والطواقي الحديدية
{ جمهور المريخ اليوم داك بشوف الفليق الجد جد
{ خلونا مع بلص ناين الله يسترنا من التجميد ونشاف الراس
{ بعد كلام شداد الأخير باقي لي الموضوع متشعب وشلاليته كتيرة
{ شداد عايز انتخابات مفايها مفوضية والا جهة منظمة ..
{ يترشح ويشرف عليها ..
{ العايز يترشح يجي يقدم ورقه لي شداد عشان يشرطوا ليهو في محله
{ هسي معتصم حايجي يسجل عند شداد والابرسل محمد سر الختم يسجل ليهو
{ بعدين شداد يبدو زعلان من المؤتمر الصحافي بتاع المفوضية عشان كده قال مايجوا المرة دي
{ يعني مايعملوا مؤتمر صحافي والاشنو ياشداد
{ شداد زعل من المفوضية ... الغيت علي الفور
{ طيب ماتزعل لينا من المحليات العذبتنا دي يمكن الفيفا تلغيها
امسح للحصول على الرابط
بواسطة : امير محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019