* صحصح فينا منتخبنا الوطني بالأمس مشاعر ظلت (نعسانة) لسنوات طويلة ..
* مشاعر تبلدت ودفنها غبار (التواضع والتخاذل) غير ان منتخبنا بالأمس نفض ذلك الغبار واعاد لنا ذكريات التألق والعطاء الباذخ ..
* قدم المنتخب الوطني واحدة من أجمل وأفضل مبارياته في السنوات الأخيرة ومسح كل الصور البائسة التى إنطبعت في الأذهان ..
* وقيمة ما قدمه منتخبنا بالأمس تنبع من أهمية وخطورة المنافس ..
* ساحل العاج وما ادراك ما ساحل العاج ..
* وعندما تلعب أمام ساحل العاج فهذا يعني انك تلعب أمام تاريخ افريقي باهر لان المنتخب العاجي هو من الإضاءات المهمة في سفر الكرة الافريقية ..
* لعب المنتخب بقوة وبسالة وشجاعة وروح عالية ..
* فكان هو الطرف الأقوى والأخطر والأفضل في المعلب ..
* بل ان منتخبنا كان يستحق التأهل بعد هذا المظهر الذي شرفنا كثيرا وجعلنا نحس بعظمة الإنتماء ..
* ولعل أكثر المتفائلين ما كان ينتظر هذا العطاء من المنتخب (المُهمل) ..
* ولكنها عزيمة أبناء الوطن الذين وجدوا أنفسهم علي المحك فكانوا علي قدر (الصقر) الذي زين صدورهم ..
* ومن الإنصاف ان نشيد بالمدرب مازدا الذي نجح بدرجة الإمتياز في إدارة هذه المباراة الكبيرة (هنا وهناك) ..
* وتمتد الإشادة لتشمل كل نجوم المنتخب ونخص منهم النجم المتألق أكرم الهادي سليم وبكري المدينة وأبوعاقلة ..
* أثبت أبوعاقلة انه (عملة صعبة) ونجم من ذهب ينتظره مستقبل عريض وحافل بالنجاحات إن شاء الله ..
* يستحق بكري المدينة كل كلمات الغزل وهو ينجح في خلخلت دفاعات العاجي ويظهر بهذا المستوى البدني والفني الذي أقل ما يوصف به انه (رهيب) ..
* وبذات الإعجاب نتحدث عن أكرم وأمير ورمضان ونزار وعنكبة واطهر وكل المجموعة المقاتلة ..
* وحقيقة لولا مهند الطاهر لما فرزنا منتخبنا من المنتخب العاجي ..
* يظل مهند الطاهر هو (العطر) الذي تتطعر به الكرة السودانية فتخرج للناس في أطيب هيئة ..
* مهند مسيرة من الوفاء مع المنتخب الوطني وسيرة تشبه دواخله البيضاء فله كل التقدير لما قدم وما يقدم ..
* وبمناسبة مهند يا الكاردينال ..
* مرات بحس إنو (طوب الجوهرة الزرقاء) جا من (كمينة طوب) سيدها مريخابي ..
* والله صحي ..
* الإحساس ده جاني بعد مباراة الأهلي الليبي ..
* لانو مستحيل الهلال يطير من الدور الاول ..
* الموضوع ده يا الكاردينال شكلو من (الطوب) ..
* رغم إنو عندي احساس تاني بيقول لي طيران الهلال عندو علاقة بـ(المُونة) أو (الطين) ..
* وانا عايز أشبه رجال الهلال بـ(الرملة والأسمنت) ..
* كبار الهلال هم (الأسمنت) وفريق الكرة هو (الرملة) ..
* والكلمة الطيبة هي (الموية) البتخلط (المُونة) المكونة من الرملة والأسمنت ..
* وما في (مُونة بتتخلط) لو ما لقت موية ..
* والهلال الآن يفتقد لهذه الموية ..
* لو وفرت (الموية دي) يا الكاردينال تسطيع ان تبني (الجوهرة وتبني الفريق) ..
* وصدقني .. البنيان بيكون واحد وبنفس المستوى ..
* ودعوتنا من أجل (صفاء النفوس) ما زالت قائمة ..
* المهم ..
* نتمنى أن يحافظ منتخبنا الوطني علي هذه الروح حتى تكون (نواة) لمستقبل حافل بالكفاح والبطولات ..
* شكرا صقور الجديان والقادم أحلي بأذن الله ..
* في حواره مع (قوون) قال موكورو : (كافالي أفضل من العشري) ..
* أقول ليك حاجة يا شيخ موكورو ؟؟
* العشري ذاتو لو سألتو بيقول ليك (كافالي أفضل مني) ..
* والله صحي ..
* لكن منو البيقنع (الديك) ..
* غايتو نس غايتو !!
* أجري فريق المريخ أمس الأول تدريبا بمشاركة (ثمانية) لاعبين بعد طرد ضفر ومصعب ومجدي عبد اللطيف وتراوري ..
* وسبب الطرد قالوا اللاعبين ديل جو متأخرين ..
* الحاجة دي ذكرتني حاجة ..
* زمان زمن (إيجار العجلات) لما تتأخر بتدفع دقائق التأخير ..
* يعني لو (اجرت العجلة ساعة) واتأخرت (ربع ساعة) بتدفع حق الربع ..
* ولو ما عندك حق الربع طوالي سيد العجلات (بتجرجر معاك جدا) ..
* وإحتمال يفتح فيك بلاغ بتهمة (التأخير) ..
* عشان كده كنا بنقدر المسافة والزمن ومحل الإيجار ..
* عشان ما تتأخر ..
* في الغالب إحنا واولاد حلتنا كنا بنأجر العجلة عشان نمشي درس العصر ..
* بنأجر العجلة ساعتين ..
* ساعة زمن درس العصر ، وساعة بنضاهب بيها ..
* ضهب ساعة ودرس العصر ساعة ..
* أنا واحد من الناس كان بيعجبني منظر انك تكون ماشي برجلينك وماسك العجلة بيدك ومعاك (بت) ..
* كنت مغرم بالحاجة دي ..
* واي زول طبعا حر في (غراماتو) ..
* كنت ما بأجر عجلة إلا بعد ما أكون ضامن لي (خلطة) ..
* لو عندي مواعيد (غرامية) طوالي بمشي بأجر عجلة مخصوص عشان خاطر المواعيد دي ..
* وبتذكر كنت بأجر عجلة (دبل) مكتوب فيها أسفل السرج الخلفي عبارة (رد الجميل صعب) ..
* وبناتنا بتوعين درس العصر كانن معجبات جدا بهذه العبارة ..
* لو مشيت محل الإيجار وما لقيت العجلة المكتوب فيها (رد الجميل صعب) بخلي الإيجار ..
* لانو بصراحة كنت بحس إنو البنات (متجاوبات معاي) عشان خاطر العبارة المكتوبة ما عشان خاطري انا ..
* والله صحي ..
* المهم ..
* ناس تراوري ومصعب وضفر تأخروا (45) دقيقة عن موعد التدريب ..
* ديل والله العظيم لو التأخير ده عملوا لسيد العجلة كان زي الوقت ده يكونوا (مقفولين في سجن الهدي) ..
* (45) دقيقة دي فيها (3 ربع ساعة) ..
* ديل متأخرين شوط عديل ..
* يكون كان عندهم درس عصر ؟؟
* وطبعا ما في زول بيقدر يحاسبهم ..
* البلجيكي طردهم من التدريب كـ(عقاب) ولكن مجلس الادارة بيكون عاقب البلجيكي بسبب معاقبته لهذا الرباعي ..
* تعاقبهم كيف وانت عارف الناس ديل ما صرفوا ليهم شهرين ؟؟
* انت ما اديت الزول حقو معقولة تعاقبو عشان تأخير ..
* البلجيكي ده ما عايز يجيبها البر ..
* علي بالقسم البلجيكي ده لو كان معانا في الهلال كنا عرفنا (كيسو من تاني يوم) ..
* من تاني يوم كان جبنا خبر كيسك ..
* انا والله بطلب من مجلس الهلال وإعلام الهلال يشوفوا لينا (كيس البلجيكي ده) ..
* الزول ده أنا ما عاجبني ..
* وإعلام المريخ واضح إنو ما عندو خبرة في حكاية الأكياس دي ..
* فياريت تشوفوا لينا كيسو ..
* يا ريت ..
* يا ريت بـ(العاء) ..
* و..و..
* وبأسم الحب بقدم ليك حياتي ومعاها (هدف مهند الطاهر) ..