• ×
الإثنين 2 أغسطس 2021 | 08-01-2021
محمد الطيب الامين

المنتخب و(طوب) الجوهرة الزرقاء !!

محمد الطيب الامين

 3  0  1882
محمد الطيب الامين


* صحصح فينا منتخبنا الوطني بالأمس مشاعر ظلت (نعسانة) لسنوات طويلة ..
* مشاعر تبلدت ودفنها غبار (التواضع والتخاذل) غير ان منتخبنا بالأمس نفض ذلك الغبار واعاد لنا ذكريات التألق والعطاء الباذخ ..
* قدم المنتخب الوطني واحدة من أجمل وأفضل مبارياته في السنوات الأخيرة ومسح كل الصور البائسة التى إنطبعت في الأذهان ..
* وقيمة ما قدمه منتخبنا بالأمس تنبع من أهمية وخطورة المنافس ..
* ساحل العاج وما ادراك ما ساحل العاج ..
* وعندما تلعب أمام ساحل العاج فهذا يعني انك تلعب أمام تاريخ افريقي باهر لان المنتخب العاجي هو من الإضاءات المهمة في سفر الكرة الافريقية ..
* لعب المنتخب بقوة وبسالة وشجاعة وروح عالية ..
* فكان هو الطرف الأقوى والأخطر والأفضل في المعلب ..
* بل ان منتخبنا كان يستحق التأهل بعد هذا المظهر الذي شرفنا كثيرا وجعلنا نحس بعظمة الإنتماء ..
* ولعل أكثر المتفائلين ما كان ينتظر هذا العطاء من المنتخب (المُهمل) ..
* ولكنها عزيمة أبناء الوطن الذين وجدوا أنفسهم علي المحك فكانوا علي قدر (الصقر) الذي زين صدورهم ..
* ومن الإنصاف ان نشيد بالمدرب مازدا الذي نجح بدرجة الإمتياز في إدارة هذه المباراة الكبيرة (هنا وهناك) ..
* وتمتد الإشادة لتشمل كل نجوم المنتخب ونخص منهم النجم المتألق أكرم الهادي سليم وبكري المدينة وأبوعاقلة ..
* أثبت أبوعاقلة انه (عملة صعبة) ونجم من ذهب ينتظره مستقبل عريض وحافل بالنجاحات إن شاء الله ..
* يستحق بكري المدينة كل كلمات الغزل وهو ينجح في خلخلت دفاعات العاجي ويظهر بهذا المستوى البدني والفني الذي أقل ما يوصف به انه (رهيب) ..
* وبذات الإعجاب نتحدث عن أكرم وأمير ورمضان ونزار وعنكبة واطهر وكل المجموعة المقاتلة ..
* وحقيقة لولا مهند الطاهر لما فرزنا منتخبنا من المنتخب العاجي ..
* يظل مهند الطاهر هو (العطر) الذي تتطعر به الكرة السودانية فتخرج للناس في أطيب هيئة ..
* مهند مسيرة من الوفاء مع المنتخب الوطني وسيرة تشبه دواخله البيضاء فله كل التقدير لما قدم وما يقدم ..
* وبمناسبة مهند يا الكاردينال ..
* مرات بحس إنو (طوب الجوهرة الزرقاء) جا من (كمينة طوب) سيدها مريخابي ..
* والله صحي ..
* الإحساس ده جاني بعد مباراة الأهلي الليبي ..
* لانو مستحيل الهلال يطير من الدور الاول ..
* الموضوع ده يا الكاردينال شكلو من (الطوب) ..
* رغم إنو عندي احساس تاني بيقول لي طيران الهلال عندو علاقة بـ(المُونة) أو (الطين) ..
* وانا عايز أشبه رجال الهلال بـ(الرملة والأسمنت) ..
* كبار الهلال هم (الأسمنت) وفريق الكرة هو (الرملة) ..
* والكلمة الطيبة هي (الموية) البتخلط (المُونة) المكونة من الرملة والأسمنت ..
* وما في (مُونة بتتخلط) لو ما لقت موية ..
* والهلال الآن يفتقد لهذه الموية ..
* لو وفرت (الموية دي) يا الكاردينال تسطيع ان تبني (الجوهرة وتبني الفريق) ..
* وصدقني .. البنيان بيكون واحد وبنفس المستوى ..
* ودعوتنا من أجل (صفاء النفوس) ما زالت قائمة ..
* المهم ..
* نتمنى أن يحافظ منتخبنا الوطني علي هذه الروح حتى تكون (نواة) لمستقبل حافل بالكفاح والبطولات ..
* شكرا صقور الجديان والقادم أحلي بأذن الله ..
* في حواره مع (قوون) قال موكورو : (كافالي أفضل من العشري) ..
* أقول ليك حاجة يا شيخ موكورو ؟؟
* العشري ذاتو لو سألتو بيقول ليك (كافالي أفضل مني) ..
* والله صحي ..
* لكن منو البيقنع (الديك) ..
* غايتو نس غايتو !!
* أجري فريق المريخ أمس الأول تدريبا بمشاركة (ثمانية) لاعبين بعد طرد ضفر ومصعب ومجدي عبد اللطيف وتراوري ..
* وسبب الطرد قالوا اللاعبين ديل جو متأخرين ..
* الحاجة دي ذكرتني حاجة ..
* زمان زمن (إيجار العجلات) لما تتأخر بتدفع دقائق التأخير ..
* يعني لو (اجرت العجلة ساعة) واتأخرت (ربع ساعة) بتدفع حق الربع ..
* ولو ما عندك حق الربع طوالي سيد العجلات (بتجرجر معاك جدا) ..
* وإحتمال يفتح فيك بلاغ بتهمة (التأخير) ..
* عشان كده كنا بنقدر المسافة والزمن ومحل الإيجار ..
* عشان ما تتأخر ..
* في الغالب إحنا واولاد حلتنا كنا بنأجر العجلة عشان نمشي درس العصر ..
* بنأجر العجلة ساعتين ..
* ساعة زمن درس العصر ، وساعة بنضاهب بيها ..
* ضهب ساعة ودرس العصر ساعة ..
* أنا واحد من الناس كان بيعجبني منظر انك تكون ماشي برجلينك وماسك العجلة بيدك ومعاك (بت) ..
* كنت مغرم بالحاجة دي ..
* واي زول طبعا حر في (غراماتو) ..
* كنت ما بأجر عجلة إلا بعد ما أكون ضامن لي (خلطة) ..
* لو عندي مواعيد (غرامية) طوالي بمشي بأجر عجلة مخصوص عشان خاطر المواعيد دي ..
* وبتذكر كنت بأجر عجلة (دبل) مكتوب فيها أسفل السرج الخلفي عبارة (رد الجميل صعب) ..
* وبناتنا بتوعين درس العصر كانن معجبات جدا بهذه العبارة ..
* لو مشيت محل الإيجار وما لقيت العجلة المكتوب فيها (رد الجميل صعب) بخلي الإيجار ..
* لانو بصراحة كنت بحس إنو البنات (متجاوبات معاي) عشان خاطر العبارة المكتوبة ما عشان خاطري انا ..
* والله صحي ..
* المهم ..
* ناس تراوري ومصعب وضفر تأخروا (45) دقيقة عن موعد التدريب ..
* ديل والله العظيم لو التأخير ده عملوا لسيد العجلة كان زي الوقت ده يكونوا (مقفولين في سجن الهدي) ..
* (45) دقيقة دي فيها (3 ربع ساعة) ..
* ديل متأخرين شوط عديل ..
* يكون كان عندهم درس عصر ؟؟
* وطبعا ما في زول بيقدر يحاسبهم ..
* البلجيكي طردهم من التدريب كـ(عقاب) ولكن مجلس الادارة بيكون عاقب البلجيكي بسبب معاقبته لهذا الرباعي ..
* تعاقبهم كيف وانت عارف الناس ديل ما صرفوا ليهم شهرين ؟؟
* انت ما اديت الزول حقو معقولة تعاقبو عشان تأخير ..
* البلجيكي ده ما عايز يجيبها البر ..
* علي بالقسم البلجيكي ده لو كان معانا في الهلال كنا عرفنا (كيسو من تاني يوم) ..
* من تاني يوم كان جبنا خبر كيسك ..
* انا والله بطلب من مجلس الهلال وإعلام الهلال يشوفوا لينا (كيس البلجيكي ده) ..
* الزول ده أنا ما عاجبني ..
* وإعلام المريخ واضح إنو ما عندو خبرة في حكاية الأكياس دي ..
* فياريت تشوفوا لينا كيسو ..
* يا ريت ..
* يا ريت بـ(العاء) ..
* و..و..
* وبأسم الحب بقدم ليك حياتي ومعاها (هدف مهند الطاهر) ..

امسح للحصول على الرابط
بواسطة : محمد الطيب الامين
 3  0
التعليقات ( 3 )
الترتيب بـ
الأحدث
الأقدم
الملائم
  • #1
    سييف الدين خواجه 03-31-2016 12:0
    يا عزيزي قلنا للكاردينال وحد الصف لكن في ناس عايزين توحيد السف وبين الصف والصف خطان متوازيان لا يلتقيان !!!خرج الهلال بعدم وحدة الصف شخصيا حسمت من قبل ما يبدأ دور 32وكنت علي يقين اننا ما حنتاهل والاسوأ قادم !!!تصور هذا الشطب وسيكافا في الطريق ما هذا !!!لو توحد الصف السف يطير والحال يرجع بس الشكية لي الله والرئيس ما عندو خبره وشخصية مهزوزه رغم ما يظهر ويحس ان رئاسة الهلال ما مقاسو لذلك يردد انا الرئيس في حد مغالط !!!لكنها عقدة النقص !!!الرئيس ما عارف شايت وين قالت كافاني كيسو فاضي وهو درب ليل الفرنسي والان بالجزائر!!!
  • #2
    Kamal M. Ahmed 03-31-2016 09:0
    ياسيدي مشكلة الهلال نفسيه عديل كده لانه اللاعبين شافوا عدم الاستقرار وأحسوا به يعني زي شيخ موكورو ده انشودة الجماهير وفجأه ناس الكاردينال يقلبوه ماسوره ويتخلوا عنه وبالتالي أي لاعب بيحس بعدمن الطمأنينه بسبب الكاردينال وشلته ، عشان الهلال يرجع هلال محتاجين الكاردينال يتحمل أن يقبل التوجيهات الفنيه من ابناء الهلال الشرفاء ويتعود علي ذلك وأنا لست خبير لكن بيني وبينك لو مسكت الهلال في الشأن الفني والله العشري ده ما أخليهو يدخل استاذ الهلال ,اجيب فوزي وكسلا فقط للشأن الفني فكلاهما يموت حبا في الهلال وله المقدره في العلاج ولا رأيك شنو
  • #3
    الفاضح 03-31-2016 06:0
    الكاتب الصحفي يمتهن مهنة المعلّم خارج صفّ الدراسة
    اللغة السليمة متوسطة الفصاحة ، السلوك الأخلاقي القدوة
    أنتم تخاطبون القارئ بأسلوب لا يرتقي به بل ينحدر به
    دارجيّة( ركيكة) غير مترابطة تتخلّلها تعابير شارع مخجلة
    التعرّض للاعبين بتثبيطهم والتقليل من عطائهم في غير أمانة
    نحن في عهد دولة تشجّع التدهور الممنهج في كل المجالات
    لذلك تتسيّد وتهيمن السلبيات بمعيّة أهل التمكين والتطبيل
       الرد على زائر
    • 3 - 1
      الفاضح 03-31-2016 04:0
      الأخ/ عبد الله بشير .........تحياتي وإكباري
      كلّنا مرّت علينا هذه الهفوات فلا تحزن
      ولأن قلبك أبيض وأنت حسن النيّة فلم يظهر شيء
      أعاود وأرسل تحايايا واحترامي

      الأخ/ مؤمن
      شكرا على الأشادة حفظك ربّي
    • 3 - 2
      مؤمن 03-31-2016 11:0
      الله عليك ... كفيت ووفيت ... مقال مخجل وفضيحة ...
    • 3 - 3
      عبدالله بشير 03-31-2016 10:0
      الاخ الفاضح
      تحية طيبة،،

      كلامك صحيح 100%. فقط اعتذر عن ضغطي على زر التبيلغ عن اساءة بالخطأ حاولت التراجع لكن لم اجد خيار للتراجع. الرجاء تقبل اعتذاري عن هذا الخطأ

      وخالص احتراماتي

      ملحوظة اتفق معك فى كل ما كتبت وربنا يكون فى عون اعلام بلادي وفى عون شعبنا.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019