• ×
الخميس 28 مارس 2024 | 03-27-2024
امير محمد عبدالماجد

على مقاعد المتفرجين

امير محمد عبدالماجد

 0  0  12195
امير محمد عبدالماجد

فريق الشباحين ...!!
{ الفيفا قالت دكوها كلها ...
{ الوزير قال دكوها جزئيا ...
{ ونحن بين الكلية والجزئية مجلسنا مشلهت وماقادر علي المصاريف
دكوها ...
{ ياعم بلاتر ماخلاص دكيناها جزئياً وزولك حايترشح ولوفاز بنغير ليهو السوناتا بي { سوناتا جديدة ونضربه لون علم سويسرا عشان ماتزعل
{ تبقي سوناتا سويسرية
{ تاني عايز شنو ...
{ دكوها ..
{ ده حظ شنو ده .. اول ما الكاس بقي في خطراتنا الفيفا عايزه تجمدنا .. والوزير ماعايز يتفاهم ومجلسنا بقي مشلهت
{ عرفونا ضابحين فيدرالية جو يبهدلوا لينا العزومة
{ الوزير يقول ليك حليناها ..
{ ياهو ده حلك ..؟!!
{ شداد النت بقي قوي عنده واشتغلنا مع بلاتر يانعمل الفي راسه يايجمده
{ اقول ليك حاجة ياشداد .. الله فّي ..
{ الكونفدرالية لومكتوبة لينا بنجيبه .. لكن انت ما انسترت
{ بعد ده نشرب موية ونرجي البحصل
{ المريخاب عايزين التجميد
{ مافارقه معاهم ... أصلاً مجمدين وظروفهم بطالة
{ شغالين المديدة حرقتني ..
{ المريخاب عايزيننا نطير بعد ماطاروا وشبعوا طيران
{ عارفين الفريق البقي يلعب في ارض الخصم بالاسلوب ده والجرأة دي بجيب الكاس
{ خايفين بويا يبقي هداف الكونفدرالية من مباراة واحدة
{ مش بويا .. بعمله فيهم
{ ثلاثة مباريات اختاروهو في المنتخب .. لوعمل عشرة ببقي نائب اخصائي
{ نائب هيثم مصطفي في المنتخب
{ طبعاً اخصائي صعبة في وجود هيثم اخصائي الباصات البتخلع المهاجم وتعمل شلل اطفال للمدافع
{ طبعاً الهلال فيهو كل صنوف المجتمع .. المهندسين والمعماريين والضباط والصحافيين وبتاعين الرقشات
{ عندنا واحد كده عندو تلاته كرعين بجري بي اتنين والتالته احتياطي
{ لو واحدة تعبت بنّزله ويسحب التعبانه في كسر من الثانية
{ المدافع لما يتابع الحركة دي بلقاها في القون
{ عارفنو مجرب وبلعب في الحتات الضيقة ويحرج المدافعين
{ وعندنا بشة ..
{ ده براهو حكاية .. شباح وبعرف طريق الشباك
{ أخيراً اتحفنا الاخوة اللاعبين بخبر نزولهم لارض الملعب واداء التمارين في ظل غياب الادارة عن ساحة الصرف
{ شكراً للارباب والكاردينال اللذان تبرعا ودفعا الحوافز المحلية والافريقية
{ لا نملك الا الشكر .. لان تدخلهما حل الازمة مؤقتاً ..
{ لاحقاً سندخل في المطب ذاته عندما يطالب اللاعبون بالرواتب والحوافز
{ صحيح ان ارجاء السداد والحلول المؤقتة الي ان تحل الازمة الكلية سيفاقم الاوضاع لكن الحقيقة ان سير الاوضاع علي ماهي عليه ينذر بكارثة
{ تبرع الارباب والكاردينال مع تقديرنا له بنج موضعي سيخفف الازمات لكنه بالتاكيد لن يحلها وحتي لوسلمنا مفاتيح النادي للكاردينال .. فالحل سيكون مؤقتاً
{ سيدفع الكاردينال حتي يفتر كما فتر الارباب واصحاب الحاجات علي الباب ينتظرون سداد الدين
{ ادارة مؤسسات المجتمع المدني الكبيرة كالهلال تحتاج لحلول موضوعية واستراتيجية توفر لها مداخيل مادية تعينها علي الاقل علي تدبير نفقات التسيير والتعاقدات وتبقي مساهمات الاقطاب اضافة جيدة ومطلوبة للتجويد
{ الاعتماد كلياً علي جيب الكاردينال يعني ببساطة اننا تحولنا من ارباب الي ارباب اخر { سنرهقه ونحيطه بالمشاكل والالتزامات
{ التفكير بالحلول والنقاش حول التجارب العالمية والاقليمية سيقودنا لوصفة سودانية تسهل علي الناس قيادة الاندية دون أن نرهقهم بالصرف العالي
{ اقطاب الهلال .. حلوين لسان .. بلا احسان
{ الواحد فيهم شديّد في النضمي والحكمة ومعسول الكلام ..
{ أول ماتجي للقروش ... يملاك وعود جوفاء
{ قالوا لن نساند مجلس الارباب لانه لم يحترم تاريخنا في الهلال
{ عندما ذهب الارباب تواروا عن الانظار
{ ناس لسانهم يقطر عسل وجيوبهم فيها عقارب
{ خايفين من الصرف .. وعايزين فلاشات الكاميرا
{ جري وطيران مابتلموا فيهم ...
{ مابتدفعوا وعايزين الجمهور يشيلكم زي سادومبا؟!!
{ الجمهور بعد ده مابشيلكم ...
{ بشيل حالكم ...
مدرب الجيش بدا يصرِّح ويسخن في الاجواء من معسكر جيش نيامي
{ قال جاي اغلب الهلال في الخرطوم
{ شيخ عمر ده بدرب جيش النيجر والا مازيمبي؟!!
{ شيخ عمر نقطنا بي سكاتك الله يرضي عليك ماتشربنا نحنا حركات المدربين دي حافظنها
{ تعال ألعب كورتك العشوائية ديك واخد المعلوم
{ نحنا هدافنا ماسادومبا يا عمر.. الفريق كله هدافين
{ ده فريق الهدافين الشباحين ..
{ ناس بشة ...
امسح للحصول على الرابط
بواسطة : امير محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019