• ×
الخميس 23 سبتمبر 2021 | 09-23-2021
بابكر سلك

شفع الروضه اتخرجوا

بابكر سلك

 0  0  2558
بابكر سلك

* المتابع لحركة المجتمع هذه الايام يجد ان معظم الاسر مشغوله
* مشغوله بصغارها
* فالايام ايام تخاريج الروضه
* الصغار كلهم اتخرجوا بدري
* الحكايه دي بدت طول واستمرت
* ناس الثانوي لسه بمتحنوا
* وناس الجامعات اهو مواصلين
* لكن ناس الروضه اتخرجوا
* بدري بدري
* حلاااااتهم لو شفتهم بي روباتهم
* وبلبسوهم كمان كسكته
* تلقي الواحد منهم حلاتو الراس قدر النبقه والكسكته قدر البرش
* تلقاهو ماشي وسايقنو من يدو
* الكسكته دوغري والراس ملفوت لي ورا
* الراس صغير عاد
* وابداعات رياض الاطفال في التخريج تنافس نفسها
* في وحدين بخرجوهم صغار شديد
* تلقي الحزام لافي فيهو تلاته لفات
* وفي وحدين شدت ماصغار
* تحت البنطلون بحتاطوا ليهم بالبامبرز
* لكن وقفة التخريج طويله
* والصغار ما بتحملوا
* حتي البابمبرز غلبو الصبر
* بلل معاهو كل الامكنه
* وتخريجات رياض الاطفال دايما من عصرا بدري
* عشان صغار ومابقدروا يساهروا
* من العصر يخرجوهم ليك
* وتعال شوف الغنا الجماعي والابداعات الفرديه
* روضه الثوار بعمر المختار ابدت في برنامجها
* ادارة عائشه القذافي
* من اغنياتهم في التخريج كانت
* دنيا اللوده دنيا دميله فيها تهاني وفيها اميله
* نحنا بنحبك يا ماما فاتنه
* دلستينا ودريتينا وخلجتينا
* لعبتينا ووليتينا وعومتينا وتيلتينا
* ولسه نحبك ماما فاتنه
* ونحنا نحبك ماما فاتنه
* دلستينا دليتينا.. عومتينا وتيلتينا
* وكان عندهم في التخريج نشاط مسرحي كمان
* في اسكتش كده عجبتني حته شديد
* شافع لابس كسكته مع شافع ما لابس كسكته
* ابو كسكته: نحنا موش دبنا ليكم النول وولعناهوا ليكم
* ابو من غير كسكته: ساح دبتوهوا لينا النول ..لكن ولع تنق ..بلنق تفا
* ابو كسكته: ماخلاس تفا تفا نعمل ليكم سنو?
* ابو من غير كسكته: اعملوا لينا نول زي بتاع ناس عمو جمال عسله سنين ماتفا
* ابو كسكته: لكن نول ناس عمو دمال ما سيني ما بتفي
* المهم
* الشفع اتخرجوا بدري
* من عصرا بدري
* والكبار لسه فيها
* ناس الجامعات لسه
* الدراسات العليا لسه
* والسنه دي مناقشة الدكتوراه وارده ان شاء الله
* الغريبه في تخريج شفع الروضه مكتوب في الخلفيه
* عقبال الدكتوراه
* لسه بدري ياماما فاطمه علي الدكتوراه
* يادوبك روضه
* حلك الاساس والثانوي والجامعه والماستر
* الماستر لازم موضوعو يكون مانديلا والنضال الافريقي المعاصر
* ده مدخل الدكتواره الوحيد ياماما فاطمه
* ايها الناس
* المريخ عالمي لا محاله
* ويوم العبور كان بيننا داخل الاستاد المريخي الغيور المستر مايكل ارون السفير البريطاني لدي السودان
* هو واسرته كانوا حضورا انيقا مشرفا
* انجليز شفوت شديد
* ولان المريخ عالمي طبيعي ان تجد علي مدرجاته جنسيات متعدده وحد بينها حب المريخ
* الخواجه برغم انه دبلوماسي
* الا ان دبلوماسيته ماقدرت تخبئ مريخيته الصارخه
* مستر مايكل مريخابي وآرسنالابي
* وهو ليس غريب علي السودان
* كان معلما بمدرسة الدامر الثانويه في بدايات التمنينات
* وهاهو يحفظ ويعود في ابريل لمدرسة الدامرالثانويه مع عديل المدارس والرائع طارق الامين ومجموعته ليعيد تأهيل صرح عمل فيه يوما ما
* لله درك يا شفت
* علي صفحات الزعيم نلتقي اخونا في المريخ المستر مايكل آرون قريبا
* خواجه اسلي
* وحقو في عديل المدارس بالدامر ياطارق
* تصحب معك اطفال روضة الثوار بعمر المختار عشان يغنوا
* نجنا نحبك ماما فاتنه
* دلستينا ودليتينا وعومتينا وتيلتينا
* وطبعا العوم والطيران من المناشط الاساسيه في روضة الثوار بعمر المختار تشرف عليها ماما فاطمه
* ايها الناس
* اولاد الاولتراسات هم اولادنا وتاج راسنا
* لانتعامل معهم كغرباء
* وهم لا يعاملونا كغرباء
* بل نفتخر بهم
* لانهم طوروا التشجيع فينا
* الناس تقعد في محبه وتناقش الامور بشفافيه
* والكاشب الاكبر هو المريخ
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* في كلام كده جابوا لينا
* ان بقي صح يا والينا
* اردن للعلاج تاني يانا المامشينا
* بي حقنا كمان ويلعبوا فينا!!!
* الحلبه الشيح الجردقه الحرجل مر حجازي لبان ضكر ..مالهم يا والينا??
سلك كهربا
ننساك كيف والكلب عارف فوائد الحرجل بالنسبه لينا قال اردم قال اقصد اردن قال بالله!
والي لقاء
سلك
امسح للحصول على الرابط
بواسطة : بابكر سلك
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019