• ×
السبت 10 أبريل 2021 | 04-09-2021
شوربجي

اللهم احفظ كشافاتنا من عيون جيرانا

شوربجي

 23  0  2207
شوربجي


و يا فلان الفلاني صلي علي النبي العدناني

وما تسحر القلعه وما تجي جنب القلعه تاني

ويا عين يا عنية .. يا كعبى يا ردية

يا كافرى يا نصرانية .. عرضتك اللدية

اخرجى يا ما تخافى الله

وتب دبيتك بالله

النبى طلق ناقتو ولحق رفاقتو

بعد ما كانت كسيرى بقت جبيرى

أخرجى يابيضه زى الشحمه وياسوده زى الفحمه أخرجى

قهرناهم بالقاهر والنبى الطاهر

بخرناك من عين عمتك بت جد أبوك

ومن عين العزبه البتقد العتبه

عين الراجل فيها مناجل

وعين المرة فيها الترة

وعين الفتاة تقد الواطة

وعين الصبى شرا غبى

عين الجار احر من النار

وعين المزاح أحر من السلاح

وعين الضيف احر من السيف

وعين العجوز القنفزوز

البتفك الريق فى طرف الفريق

اخرجى من قلعتنا وكشافاتنا ،

عين العجوز الكافوت اللافوت القاعدة غرب البيوت ،

عين من فكر وذكر فيها الفلفل الضكر ،

ويا عينى يا عينية يا كافرة يا نصرانية

يا مقطوعة الذرية

اخرجى خصمتك بي تقيه .. كان فيه وفي البقية ..

اخرجى أخرجى.........

اللهم احفظ قلعتنا من عيون الحساد

اللهم احفظ كشافاتنا من عيون الحساد

هو بالطبع يوم جميل وبديع

وقد اضاءت امدرمان كلها

وقد جعلتني هذه الكشافات اجتر ذكريات نركيب الكهرباء في قرانا بحلفا الجديده

فقد كانت قرانا مظلمه وقررت الحكومه اضاءتها

ومدت الاعمده في كل القري

يومها ودعنا لمبات الجاز والرتاين والي الابد

ويومها سهرنا حتي الصباح ونحن نلتف حول الاعمده نتطلع الي اللمبه التي في الاعلي

اليوم اضاءت كشافات نادي الهلال كل امدرمان

وقالوا النور واصل جياد

وقالوا استاد المريخ لاعب علي اضاءات نادي الهلال

وقالوا في ناس رسلت رسائل واتساب الي كردنه انهم ما قادرين ينوموا من كشافات نادي الهلال

ولهذا فمن حق الاهله ان ينحروا الذبائح ابتهاجا بهذه الكشافات الجميله

ونور الله طريقك ايها الكاردينال

فلولاك لما شاهدنا هذه الكشافات العملاقه

ولولاك لما شاهدنا هذه الطوابق الشاهقة من المدرجات

ولولاك لما شاهدنا هذه القلعة الفخيمه

توحدوا اهل الهلال فقد اصبح لكم ملعبا يضاهي ملاعب العالم

توحدوا اهل الهلال فقد دخل الهلال التاريخ بهذا الملعب الحديث

توحدوا اهل الهلال وانبذوا التناحر فالقلعة تنتظر صف صفوفكم

مرحبا بالارباب في قلعة الهلال

مرحبا بطه البشير في قلعة الهلال

مرحبا باقطاب الهلال في قلعة الهلال

فرحتنا كبيره في هذا اليوم وملعب الهلال يحتضن كشافاته الجديده

وبصراحه فرحتنا بالقلعه ستفوق فرحه عبورنا لثوار الزنتان

وسواء تأهلنا بالاحد او خرجنا فلن نغضب كثيرا لاننا سنكون اكثر فرحا بما يحدث في منشآت الهلال وتلك القلعة الزرقاء التي تسر كل العيون

كشافات جديدة وكراسي وطوابق

والكشافات ذات مواصفات عالميه

ولا تؤثر اطلاقا علي اجهزة النقل التلفزيوني

وقيمة البرج الواحد ٣٧٠ الف جنيه

وهذا غير الكراسي الحديثه

والملاعب الملحقه

وحمامات السباحه

وقاعات الاجتماعات

ومساكن اللاعبين

وهو بالتأكيد عمل عظيم وكبير جدا

قد يجعلنا لا نحزن كثيرا ان خرجنا من بطولة افريقيا

وما مشكله فنحن في طور بناء نادي يليق بجماهير الهلال الجميله

والتي تستحق ان يكون ملعبا حديثا ومتطورا تفخر به

ومن ثم العمل علي بناء فريق بقدر هذه البنية التحتيه الكبيره

اتمني ان تكون كشافات الهلال الجديدة هي تميمة انتصار يوم الاحد


تعليقات ظريفه في الفيس:

{{{}}} كتب شفووت الهلال في الفيس :

جيت ماش لسه في حالو... بس الشمس لمن تمغرب بتعب....
قلت ليهو.... يا حاج العشاء اذن قبل شوية...

استغرب واتبهت وكبس المصلاية.... قال الضوء الجاي من الغرب دا بتكون الشمس شرقت من الغرب...
طمنتو وهديتو وقلت ليهو ما تخاف دي ما القيامة دي كشافات استاد الهلال الجديدة...
فرفع يدينو وقعد يدعو للهلال بالنصر والتوفيق...


{{{}}} وكتب هلالاب بأدب :

بيان وتوضيح من المكتب الاعلامي للشرطه

بسم الله الرحمن الرحيم

جمهورية السودان الديمقراطية

وزارة الداخلية

رئاسة الشرطة .المكتب الاعلامي لشرطة ولاية الخرطوم .

تنوير عام

ترجو شرطة ولاية الخرطوم من جميع المواطنين الكرام التزام الهدوء وممارسة حياتهم العادية فقد توجهت قوات الشرطة بعد الساعة السابعة من مساء اليوم صوب مدينة امدرمان .وتحديدا الي منطقة العرضة بعد تواتر انباء تفيد بنشوب حريق ضخم في المنطقة والبعض من المواطنين ادعوا بان البلاد تتعرض لقصف جوي مكثف .والبعض الاخر اكد انه شاهد اطباق فضائية واشاع بانه غزو فضائي واشتد الهرج والمرج واحتمي الناس بالمساجد في المناطق الشرقية لمدينة امدرمان وامتد حتي مدينة بحري بعد ان ظنت مجموعة كبيرة من المواطنين ان الشمس اشرقت من جهة الغرب وظنوا ان القيامة قامت .

وبعد التحري والتقصي الدقيق اتضح ان كل مافي الموضوع .

انو الهلال بيجرب في الكشافات الجديدة


محمد حسن شوربجي
امسح للحصول على الرابط
بواسطة : شوربجي
 23  0
التعليقات ( 23 )
الترتيب بـ
الأحدث
الأقدم
الملائم
  • #2
    essam jeddah 03-19-2016 11:0
    ههههههههههههاي اها ياشوربة انت الكجيت الكشافات بي عيونك المقلعات ديل وبخرتك القديمة زيك دي ... هههاي والله حافظ كلام التبخير كويس بس ايه رايك كردنة قال الكشافات انطفت وخربت بنيران صديقة برضو وبالواضح كدة هو بيتهم الارباب ... حلحلوا مشاكلكم بعيد والله ناس المريخ لا شغالين بيكم ولا فاضين ليكم .. انت بتردح ساكت وما عارف الميت منو .. الطابور الخامس حقكم لا حيخلي جوهرة تكتمل ولا حيخليكم تعدوا لدور ال 16 ,, اها المريخ اتأهل رغم سوء العرض وطبظات الخواجة ورونا شطارتكم بكرة واوع اثوار يطبقوا ليكم الكية والحنة .. امسكو ابيكو بس الباقي مقدور عليهم طالما مكسيم في
  • #3
    بندق 03-19-2016 02:0
    عليك الله انت متين بتخلي الكلام الفارغ ده كشافات شنو وعواره شنو بالله انتا مابتخجل من البتكتب فيهو ده
  • #4
    alsudani3 03-19-2016 12:0
    ياراجل !! الشركة الصينية بتاعت البامبرز متخصصة في النداغات وليس الكشافات ... اعد المحاولة مرة اخرى
  • #5
    مريخابي أبها 03-19-2016 11:0
    يا شوربة اقصد يا فرحة ما اكتملت
    حساد البلد دائما بغطسوا حجر صفرهم
  • #8
    ودعقيده خلف 03-19-2016 09:0
    والله العظيم براكم سحاريين ياصفرررراب واتق الله في نفسك لو الشمس شرقت من المغرب انا جالس تكتب وترسل في رسائل اتق الله في نفسك كدي اول حاجه امرقو من ورطه الثوار وبعد داك تكلم معانا
  • #9
    العقرب 03-19-2016 08:0
    والله يا شوربة إنت كجيت الكشافات من الأول هسي قال ليك الكشافات باظت وحولو المباراة بالعصر ... وبرضو الليلة دايرين نحييك لأنك ماجبت سيرة المريخ نهائي نحييك على هذا النهج ونشد من أزرك وواصل على هذا النهج .
  • #10
    ابو مروان احمد الرياض 03-19-2016 08:0
    ذيادة خير قال ليك ناس المريخ بما فيهم مزمز وكابو طلبو من كردنة اضاءة الكشافات اليوم لكى تضئ لهم الاستاد
  • #11
    ابوبلسم 03-19-2016 08:0
    مستجد النعمة ضائق
    حالتك زي حالة الشافع صغير الجابو ليهو لبسه جديدة وفرحان بيها
  • #12
    عزالدين ابرايم عبدالرحمن حاج موسي 03-19-2016 08:0
    الما شاف البحر تخلعو الترعه .........
  • #13
    جعفر صالحين 03-19-2016 08:0
    يا راجل انت نجهت الكشافات والتى تعطلت قبل أن تعمل .. انت كج كبير .. قال كشافاتنا تنور استاد المريخ !!.... ههههه خليها تنور استادكم فى الاول وبعدين تنور فى حتة تانية ... والله انت طفل بعقلية طفل جاهل وشاذج .. لكن اشتمر لغاية ما تجيب ( الكج ) للهلال وتطلعوا من البطولة ان شاء الله من وقتا بدرى .....
  • #14
    بشري 03-19-2016 07:0
    صراحة انا مافاهم انت بتقول في شنو ؟؟ الكشافات اهم من الفريق يعني ؟ ولا قاصد شنو ؟؟ ههههههههه اذا الهلال انغلب يوم الاحد معناها انت تاني ماحاتكون عندك شغلة ... حاتكتب شنو تاني
  • #15
    ابو الملوك 03-19-2016 07:0
    قنعت من فريق الكورة وركزت على الكشافات .. احسن الواضح ما فاضح .. اقترح ان يتم تحويل اسم النادي الى نادي
    الكشافات القوية و ان ينسحب فورا من بطولة القدم و يشترك في مسابقات الكشافات و الاضاءات القوية ...
    يا راجل نحن هلالاب لكن عايزين كورة بدون مقصورة وذي الفقاعات دي ما بتمشي فينا

    اذا كنت هلالابي اصيل حب الهلال و اترك الكاردينال .. قال كشافات قال .. الكشافات دي فائدتها شنو و فريق الهلال
    دفاعه شوارع وهجومه حمام ميت .. يا اخي ما تشمت المريخاب فينا
  • #16
    ادروب 03-19-2016 07:0
    والله انت هايف وكتاباتك هايفة والذي سمح لك بالكتابة اكثر هيافة
  • #17
    الفاضح 03-19-2016 07:0
    اللهمّ أبعد وجوه الشؤم والنحس عن الفريقين
    حتي لا يصابا بما أصاب السودان من هذه الرممم
    وأوّل غيثهم (الحمضيّ) هو أفشال الإنارة للمباراة
    ربّي أبعدهم عن المريخ اليوم وكلّ دقيقة وثانية
    وسلّط على من يدعمهم غضبك فقد آثروا مؤازرة الباطل
  • #18
    الاسر جمالك 03-19-2016 06:0
    الجيران عيونهم مليانة شوف الناس المخلوعة و مستجدين النعمة وين و شوف الناس الطلعو بيان الجوع الشهير بقيادة سبدا
  • #19
    عاشق النجوم 03-19-2016 03:0
    عيون مين يا عم فخر البلد مريخ العظمة و الامجاد فات مرحلة الكشافات و الطوابق و الكراسي قبل اكثر من عشرة سنوات فعلا المافي بيت ابوك بعمل شنو ........... مستجد نعمة ؛ وبعدين عندك مبارة اهم من الكشافات ركز معك فريقك المدعوم و انسه الزعيم يتحدث ؛ انت صفوة ارفع راسك .
    عاش سودان المريخ ؛ عاش شعب المريخ العظيم ؛ المجد للمريخ .
  • #20
    الزعيم 03-19-2016 02:0
    يا سبحان الله قبل عشرة سنوات. استاد المريخ ركبوا كشافات ألمانية الصنع. والمهندسين كأنو ا ألمان فى وقتها الشفوت مزمل. كواي القلوب. والسلك اب كهرباء الخطرة كتبوا ممكن يا والي. تمد لناس زريبة العيش من كشافاتنا وكتبوا بعد يومين ممكن نبرع لأولاد عمومتنا بالكشافة القديمة. والمسكين اليوم. مقال كامل. عن كشافات صينية. فى الاول كتبت. الكردنة. شحن. كشافات الاستاد من ألمانيا. ويوم امس. راينا بعينا الصينيين شغالين. وعشرات اللمبات ضربت ونزلوا. البرج مرة اخرى يا سيد يا جيد أتحداكم تلعبوا مباراتكم يوم الأحد بالليل حتى تشوف الفضايح من كشافاتك الدخلت خلع لناس بحرى وامدرمان حتى. الكاف يوديكم وراء الكشافات اقصد الشمس. ناس مزمل وكبارنا يكتبوا. عن مباراة الرد ويحذروا الصفوة عدم استخدام الشماريخ والالعاب النارية ويحثوا اللعيبة عدم الاستهتار. وناس الكشافات الصينية مخلوعين. ركزوا شوية عندكم مباراة يوم الأحد. انصحوا ابيكوا مهاجم الثوار. لو احرزت نفس الهدف السابق فى مكسيم. ممكن ينافس اوكر. الزعيم. وميسي البارسا وسوريز. ........
  • #21
    صلاح محمد حسن الشيخ 03-19-2016 01:0
    ما فى حد بيغطس ويودى الهلال فى ستين دهيه غيرك انت يا شوربه الظاهر فى نظرة عيونك ديل مانظر زول عادى الله يكافينا شرك وشر امثالك ولو شافك الكردنال حيقرالك المعوذتين
  • #22
    صفر الكرة الارضية 03-19-2016 12:0
    اللهم أحفظ لهم كشافاتهم وأجعلها تعمر بعمر "الصفر"
  • #23
    احمد عوض 03-19-2016 12:0
    الزول دا مالو مخلوع كدا ياعزيزي نحن في عام 2016 وانت يادوب بتركب في كشافات شوف المريخ غير الكشافات متين وصحي ألما بتشوفو في بيت ابوك بخلعك
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019