* استمتع جدا بحروف فطومه اختي
* من الفاء وحتي الياء المعرجه
* حروفها تكشف حال الهلال
* وتوضح مايدور بخلدهم
* فطومه عودتنا انها تردح
* من كانت صغيره دي طريقتها
* امس بقت تمدح
* اول مرة تمدح زول غير كردنه
* ختت طار كردنه وشالت طار سيدي الحسين وبقت تمدح في الاعلامي المصري اديب
* كتبت عن حكمة اديب
* وعن اعفاء وزير العدل المصري
* الغريبه برغم انها جابت سيرة وزير العدل المصري اغفلت الحديث عن وزير العدل السوداني
* الشعب كلو داير يعرف قرار وزير العدل السوداني حول الدكاكين الملحقه بسور استاد ونادي الهلال
* كنا دايرين نعرف كلام وزير العدل بتاعنا في الموضوع ده
* وهل كان قراره انو تلك الدكاكين مباني خاصه وبالتالي يختص القانون المدني فيما يتعلق باخلائها
* ام هي مباني عامه يتم اخلائها بالطرق الاخري المحدده لذلك?
* يافطومه قولي لينا فهمينا الحته دي
* وهل تم اخلاء تلك الدكاكين فعلا???
* ان كانت الاجابه بنعم
* كيف وبموجب شنو واخلاها منو???
* فنحن من نفر يثق تماما بان دولتنا دولة قانون لادوله بوليسيه
* ودولتنا تحترم القانون قبل ان يحترمه المواطن
* لذلك دولتنا دولة محترمه جدا
* بس فهمينا الحصل في الحته دي شنو وقولي لينا
* المهم
* سجلت فطومه اعجابها بالاعلامي المصري اديب
* واكتر حاجه عجبتها في اديب جملته الشهيره
* هيا الناس دي عايزه ايه بالضبط
* الناس دي عايزه جويه باي تمن يافطومه يا اختي
* الموضوع ماداير ليهو درس عصر
* بطولة افريقيه جويه زي بتاعت المريخ يافطومه
* فشعبكم يافطومه لاداير كسكته ولاداير جوهرة
* داير بطوله قبل يمشي المقبرة
* بمناسبة المقبره يافطومه
* قصة اخلاء الدكاكين دي ماتنسيها
* ورينا بي ياتو قانون حا يتم التعامل مع المستأجرين اصحاب حق الانتفاع والبسأل الله من حقهم وحقوقهم في الدنيا قبل الآخره
* طبعا كل القوانين ليها تكييفها مع اي حالة يختلف حولها اصحاب مصالح
* الا قانون الغاب
* نحمد الله بلدنا غابه مافيها
* سهله ودلجه كان وقعت منك ابره بتظهر فيها
* الحته دي ضروري تكلمينا عنها بادب وباعجابك باديب
* واوديب
* او ديب دي طبعا يعني او ذئاب
* نحنا موش برضك غلبنا الذئاب في بلدها??
* طيب
* هيا الناس دي عايزه ايه بالضبط???
* ايها الناس
* لايفوتكم
* فطومه اختي ختت تشكيلة الهلال لمباراة العوده
* قالت الثعلب يلعب
* ورينا شخصيتك يا عشري
* ولعلمك
* العشره الباقيين في التشكيله يا عشري فطومه جهزتهم
* لو في شطاره يا عشري رف الثعلب
* وصديقي مبارك اب شنب
* الشنب في ولا ياحليلو والثعلب يلعب!
* سيدا
* الثعلب كييييف? اوامر عليا قلت لي
* المهم
* مشينا نيجيريا تعارف عقدوا لينا
* وعصرونا في حكاية العرس
* قالوا لينا العرس السبت الجاي
* عشان كده حقو نوقف القيدومات ونجهز للعرس الكبير
* عشان يوم الحفله مانطلع مسخره
* عشان اهل العروس مايقولوا عريسكم ما بستاهل
* نحنا عريسنا زينه
* ويستاهل شاكيرا زاتها
* لكن برضو العقد ماكفايه
* لازم نكمل العرس
* ونتجرتق
* ونمشي لي قدام
* يغنن لينا ناس فطومه
* ياعديله
* وسيروا وفرحت امو
* وتلاته ارادب عشا
* وعريسنا الفوقو محريه جابها بالطياره الجويه
* ايها الشفوت
* دعوه من البصري مدير النادي المكلف
* لجنة التسيير تدعوكم جميعا
* قروبات وروابط وجميع الاولتراسات
* وفرادي
* تدعوكم جميعا لنعد العدة نرهب بها عدونا
* وعدو الانجاز والاعجاز
* خصصوا غرفه لهذا الموضوع
* دايرين نملي العين قبل الاستاد
* انتصرنا خارج الارض
* لان كل الارض ارض لنا
* انتصرنا بعيدا عن جمهورنا
* لان جمهور المريخ حاضر في اي زمان اي مكان
* يبقي في ارضنا
* غيرنا من يزرع ارضنا
* يبقي وسط اهلنا
* غيرنا مين يستر عرضنا
* اذن كلنا حضور بدار النادي
* والشفت مابوصوهوا
* ايها الناس
* يستمر الانجاز في تجديد نادينا
* فبعد ان كان نادينا بنادينا
* اصبح نادينا بفخر بينا
* وتوتا والتومات يزغردن لينا
* سعديه
* قولن جق
* والشفت عادل حسن علي بالسعوديه
* يعلن دعمه لنفرة النادي بالف ريال سعودي
* ريال ينطح عقال
* ولسه القطر بشيل كتير
* اركب معنا
* قبل القطر يفوتك
* ايها الناس
* ابيكو نمرة اتنين وعشرين
* يعد بمزيد من الاهداف في الشبكه الاقرب
* الزول ده ودوهوا قدام يا روشا
* الزول ده خطير ومجنون اقوان
* بهمو القون لكن وين مامشكلتو
* خالد عز الدين
* احلي قون ابيكو ولا قون عبدو ?
* عليك الله
* احلي ياتو!!!
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* المويه بعد زتوها لينا برصو ابت تجينا
* في محكمة امدرمان الشرعيه خمسه يوم نقطه مانقطت لينا
* اسي ده وضع شرعي يا والينا??
سلك كهربا
ننساك كيف والكلب لما سمع المحكمه الشرعيه مافيها مويه قال ماتقول لي دي المقبله علي رئاسة المعتمديه?
والي لقاء
سلك