• ×
الخميس 4 مارس 2021 | 03-04-2021
شوربجي

خلاص المريخ افضل من الهلال

شوربجي

 18  0  3256
شوربجي



((())) اوقفوا حملاتكم ضد الهلال :

بدأ بعض اعداء الهلال يشن حملة قاسيه علي مجلس ادارة الهلال

وقد دعموا حملتهم باليكاء والعويل علي هلال قد ضاع وخرج من بطولة افريقيا

ووصفوا تلك الحمله بمطالبات بابعاد الكثيرين من اللاعبين

كاريكا وبشه والشغيل وسيسه

وابدالهم بالشباب الذين يجلسون في دكة البدلاء

ولو فرضنا ان العشري قد قام بالاستعانة بشباب الهلال وانهزم الفريق بنتيجه اكبر لخرجوا علينا يتهمون المدرب والاداره بتجاهل لاعبي الخبره

لا داعي اخوتي لهذه الحمله السخيفه لان كرة القدم ببساطه فوز وهزيمه وتعادل

وكرة القدم اخوتي لعبة للمتعه والتسليه وتنشيط الجسم

ولا اظن انكم ممن يقولون ان كرة القدم هي لعبة لاحراز الكئوس والتغني بها

اتركوا مجلس ادارة الهلال يعالج الاخطاء بهدوء ورويه

دعوا الجهاز الفني يعمل علي تلافي اخطاء مباراة الذهاب بهدوء ورويه

اجعلوا حب الكيان وان كان قابعا في قاع افريقيا هو الاهم

تنفسوا اخوتي حبا ازرقا لا يدانيه حب

لا تربطوا اخوتي ما بين هزيمة الهلال وفوز المريخ

الهلال قابل فريقا عنيدا ومتمرسا

والمريخ قابل فريق مغمور وضعيف


((())) والله ما من قلبنا لكن مجامله :

دعونا اليوم نكتب كلمات تروق لمن هم غاضبون علينا من مشجعي المريخ علهم يرضون وتعود بيننا الموده والمحبه

المريخ فريق عالمي والهلال فريق محلي

المريخ هو بطل كاس مانديلا والكاسات المحموله جوا وارضا وبحرا والهلال صفر

المريخ هو بطل السودان الذي تباري مع بطل العالم ولم يتباري معه الهلال

المريخ فريق قوي وان تعادل او هزم من فرق في الدوري والهلال تعبان

المريخ بهدل البايرن واتهزم منه 2 صفر فقط والهلال لم يلعب الا مع كي كي وعزام

والمريخ فاز بكاس حقيقي وليس وهم والهلال ليست لديه كاسات

والمريخ هو زعيم البلد والهلال ما سيد البلد

المريخ جماهيره اكثر من جماهير الهلال

والمريخ هو من يمتلك اكبر ملعب في افريقيا وقلعة الهلال ما حلوه

والمريخ له صحفيين جهابزه قدموا للمريخ ما لم يقدمه اعلام آلهلال لفريقه

مزمل وابوشيبه وكابو وحسن محجوب واسماعيل حسن هم احسن صحفيين في السودان وودعبد الماجد وشجرابي ما صحفيين ولا بيعرفوا صحافه

المريخ اقدم فريق سوداني وتأسس قبل الهلال وبواسطة سودانيين وليسوا يهود كما يزعمون

المريخ لا يزور في اوراق اللعيبه

المريخ فريق غني جدا وما مديون

والمريخ لا يحصل دعما من الحكام

والمريخ لا يحب النقاط الحرام

والمريخ لم يزور بصمة علاء الدين

العصر والتاريخ يشهدان والأرض والسماء يعرفان

المجد والمريخ توأمان

والنصر فوق صدره الفسيح

والفخر فوق هامت النجوم يستريح

والأمن مستتب والأمان

وأنت يا مريخ تصنع التاريخ

تملأ الزمان والمكان

ونحن عزة ومنعة وصولجان

اسألوا الأيام عن أمجادنا واستنطقوا الزمان

أسالوا الغروب والمشارقا

اسألوا الإفرنج والأعراب والأفارقة

لا تسالوا الأقزام أسالوا العملاقة

أسالوا الهونفيد واسبارتاك والبطارقة

من غيرنا قد لوّن التاريخ بالذهب ؟

من غيرنا قد وهب الأفراح وما وهب

من دوّخ الأبطال أينما ذهب

فنحن منذ البدء كانت البطولة

وكانت الشهامة الشماء والرجولة

وكانت المبادئ السمحاء والفضيلة

فكانت الأشبال والأسود

من غيرنا قد طوع الظروف ؟

من غيرنا قد هزم التحكيم والتنجيم والألوف ؟

من غيرنا قد أشعل الحماس وألهب الكفوف ؟

فأزهرت وفاء وأشرقت صفاء

و أثمرت أخا وجاءنا الوفاق وحد الصفوف

فصاحت الألوف:

نحن بين الناس صفوة

نحن في الحياة قدوة

نحن في المريخ أخوة نعشق النجم ونهوى

نحن في التاريخ سفراً يملأ التاريخ زهواً

واختلاف الرأي فينا يجعل المريخ أقوى

نحن في المريخ أخوة نعشق النجم ونهوي

الهلال مهزوم من فريق ليس له دوري

والمريخ قابل اقوي فريق نيجيري

الهلال قد يخرج من البطوله

والمريخ هو من يفوز بالكاس

الهلال يملك الفلوس وخسر

المريخ فلسان وكسب

الهلال يبني قلعه ويدعي انها جميله

المريخ يملك قلعة حمراء وليس بها حفره

الهلال لاعبوه الاجانب مواسير وخاصة ابيكو

المريخ لاعبوه الاجانب رهيبين ومشهورين


((())) اجمل المجادعات ما بين شعراء الهلال والمريخ :

وقع شاعر المريخ (بيكو) في قبضة ثلاثي الهلال(ود المجذوب..سوهندا..ودالبشري)..في مجادعة نارية جميله دعتنا لنشرها كما هي :
ود المجذوب
اتفضل حبابك واشرب الميرندا
ود مجذوب متل اتراكو تيم روندا
ود البشري اخوي كمبالا تيم يوغندا
والمازيمبي حاضر الليلة في سوهند...
ود البشري
مرحبتين حبااابك ،،يا وصيف دنيانا
من قومة الجهل ،،، شايفك تملي ورانا
اتفضل تعال ،،،، يا الخوتك عاجبانا
نضبحلك عجل ،،، نضرب كمان جبخانة
...
بيكو (المريخ)
هاتو الجبنه - اصلا ماني عاشق غيره
الميرندا زي تطواني - حاجه خطيره
وود البشري زي قورماهيا ناس ابو طيره
عاد سوهندا زي مازمبي - كتر خيره
...
ود البشري (الهلال)
الزول الكلس ،،،، ماهو البياخد ،، لبعة
والاسد النتر ،،،، تب ما توقفو ،،،، ضبعة
نحن اهل كرم ،،،،، والسمتة عندنا طبعة
ما بنضبح خروف ،، ،،،، حررررم نجيبهن( سبعة)
....
ود المجذوب (الهلال)
اهجمو يا صحاب بي سرعة واردمو بيكو
الخوف لو يفز واصلو الهروب تكتيكو
حاسس بيهو فعلا فيهو جينات زيكو
كان جرا ما بتلحقو لا همر ..لا تيكو
....
بيكو (المريخ)
ود مجزوب اخوي انا ماني هارب تب
لا زي الهﻻال - المن سطيفو هرب
ولا زي الصفر - الدارو ديمه خرب
انا ود النجووم - في الكورة فن وطرب
...
ود المجذوب (الهلال)
يا سوهندا وينك يا البتعدلي راسي
شاعرة الهلال ابداعا لاعب اساسي
رغم الرقة فيك في الحارة قلبك قاسي
خليهو الهجوم الليلة يبقي ثلاثي
...
سوهندا (الهلال )
مرحبتين سلام اهل الوصيف الديمه
ود الضل حبابك والهروب ليك شيمه
الجري والشتات بينكم علاقه حميمه
والقاصد الهلال طلق بياكل النيمه
...
ود البشري(الهلال )

في علم الحساب ،، السبعة اكتر ، اكتر
الحاصل كتييير ،،، كاتبنو جوووة الدفتر
بنلاقيكا بااااكر ،،،، وانت تيمك ،، اشتر
والشقي يا حبيب ،،،، بلقى العضم ،، في الكستر
...
سوهندا (الهلال )
مرحبتين حباب الأحمدين اخواني
يافخر الهلال ياتاج لكل سوداني
بردم للوصيف بالقافيه كل اوزاني
شان خاطر الهلال انا ببقى مجني وجاني
..
ود المجذوب (الهلال)
انساهو الوصيف يا بيكو امشي اتعشي
ممكن تنسي بشة وتنسي قون التشة
يمكن تنسي يوم قون التكاسي الخشة
والعجب الصفاقسي قالو فيك اتفشي...
بيكو (المريخ)
اتعشيت هلال - تب فيهو اخدت نصيبي
واتجرعت كاس - ما زي بتاع الليبي
معروف الصفر من ساعتو يوم كان بيبي
تسعه من المجر - سوهندا اختي دريبي
....
سوهندا (الهلال)

مابختاك حلف والليله ماسايباكا
ياودالضليل الجلسه حلوه معاكا
تتذكر هناك ودمدني يوم دقاكا
وإن فريت جريت للحول بنستناكا..


ود البشري (الهلال )
تسعة قبيل اخدتها ،،،،،، من فريق اثيوبي
تيما في الشعار ،،كان لونو احمر طوبي
ازرق لوني كل الدنيا خااابرة دروبي
مين في القارة زي سيد البلد ،،، محبوبي ؟؟
....
ود المجذوب (الهلال)
هوي يا بيكو هوي شايفك مكون لوبي
هسي دحين مصدق انو تيمك كوبي
قول للنجمة يكفي من الفضايح وتوبي
والتعسة الذكرتها..أسأل الاثيوبي
...
بيكو (المريخ)
المجزوب دحين متزكر اولاد سوسه
في 20 دقيقه الكوره لافي تكووسه
اخدت السته - قبال تفتح المدروسه
اصلو شباااكك المفتووحه - موو محروسه
....
ود المجذوب (الهلال)
دحين يا بيكو جاوب وصحح المعلومة
عن نجمتكم الطوالي نافخة جضوما
من ضمن الفضايح لما جات مردومة
حارة السبعة .. ولا الاربعة المشؤومة
...
ود البشري (الهلال )

كمبالا الشقيق ،،،، سواها فيك قبالي
اداك حبتييين ،،،، جوة الصميم طوااالي
وكتين تنضرب ،،، زعلك بريح بااالي
بعدة العلقة ،،، ديك ،، قالو استقال الوالي
...
سوهندا (الهلال)

أزرقنا الجميل في القاره عشقي ولوني
والبدر الشلع الضاوي لي في كوني
شكلك ياخ نسيت واناحافظه في تلفوني
الخمسه التمام من كانون الكاميروني
...
بيكو (المريخ)
8 توالي قبلها - يا حلات زكراها
ود ماجد عمل - ما غيرو ختا سواها
التاريخ ده هيلنا - السمحه ما بننساها
عرسناك عديل - جددنا ليك مرساها
...
ود البشري (الهلال)
اربعة شالا من ازرقنا ،،،،،،، في الممتاز
والي الدين وزاهر ،،، حققو الإعجاز
بهواهو الهلال ،،، مااا تقولو زول منحاز
نحن الجانا حيشوف الحريق ،،،، بالجاز
...
سوهندا (الهلال )
أحرق من طرف ودبشرى ياشاعرنا
ودمجذوب ارح بالقافيه يابارعنا
نحن اسياد بلد ماف زول بجي يقالعنا
ماهبنا الخصوم غير الله مين زارعنا
...
ود المجذوب (الهلال )
اليوم داك مرقتا سريري نص الحوش
قلتا النجمة صعدت وجهزولا البوش
لما لقيتا سالكة..وساي بتدخل توووووش
نمت من الفرح ..ولحافي ما مفروش
...
بيكو (المريخ)
اخدت السبعه - من المصري لو تتزكر
اسمو مقاولون - والجبلو اخضر وانضر
ود مجزوب اخوي بي رست راحه وفكر
كيف السله كيف - دي براكا فكر وقدر
...
ود البشري (الهلال)
التيم الغريب المن ،،، جزيرة بعيييدة
اسمها تب غريب اصلا حروووفا عديدة
قالوا الكورة ما بنقولا ،،، الا اكييييدة
طلعت سبعة ،،،، او ظنيتا تسعة غلييييدة
...
سوهندا (الهلال)
تسعه وسبعه ماخداها النجوم ؟مسكينه
والساماتا عصرآ كوره سمحه حنينه
نحن أسياد بلد في الكوره اسسنا متينه
يابيكونا هوي الليله انت رهيينه...


ود المجذوب (الهلال)
يا بيكو الحبيب مرحب حباب الطلة
لكن يا اخوي ما بنرضي ليك تتذلة
بس جاوب السؤال ..ومن بعدو مجد بلة
الوحدات دحين..كورة قدم ام سلة



((())) الحمد لله رب العالمين فلقد تلاشت البذاءات كثيرا :

الحمد لله رب العالمين - فقد تلاشت كثيرا بذاءات من كانوا يسبوننا وبعض الكتاب

والحمد لله رب العالمين - فلقد وصلت الرساله وهدي الله نفوس هؤلاء الشباب

والحمد لله رب العالمين - فقد اثبت هؤلاء الشباب انهم علي خلق وان البذاءات ليست من شيمهم

شكرا ايها الشباب وقد تخلصتم من شر مستطير


محمد حسن شوربجي


امسح للحصول على الرابط
بواسطة : شوربجي
 18  0
التعليقات ( 18 )
الترتيب بـ
الأحدث
الأقدم
الملائم
  • #1
    النازف 03-15-2016 07:0
    اجتهد وكتّر من قراية أعمدة كتّاب ناديك الهلال
    عشان تتعلّم وتمتحن من فصول تعليم الكبار سنّا
  • #2
    محمد عبد الرحمن محمد حسين 03-15-2016 01:0
    ودي عايزه ليها درس عصر ياشوررررررربه
  • #3
    د . شريف 03-15-2016 11:0
    عمك شوربة أخد مسمار .. بطل كورة وبقى سمسار .. يغش ويكضب فى الأسعار .. مرة مبانى و مرة خضار .. جاتو العازة بالفرار .. لف ودور ذى الفار .. نط الحيطة وهاك يا فرار !!!!
  • #4
    عزالدين سيد وديدي 03-15-2016 10:0
    رغم انفك ثم رغم انفك ثم رغم انفك كل ما ذكرته صحيح وان كنت تقصد التريقة وكلما تريد ان تكسب الصفوة زيد الجفوة. انت لا تصلح كاتب يستحسن ان تبحث ان قصص للاطفال على غرار مجلة عمك تنقو ومجلة الصبيان وكشكول.
  • #5
    عوض دندش 03-15-2016 09:0
    وده عايزة كلام ياصحفى آخر الزمان . اكيد الزعيم افضل من الهليل
  • #6
    صمويل 03-15-2016 09:0
    هذه الرسالة ليس لك يا أخ شوربة فهي لاخوتي المريخاب، لو أنهم فتحو ليك ولم يلتفتوا إلى ما تكتبه، انا متأكد أنك حا تترك الكتابة. لأن كتاباتك تسعين في المائة عن المريخ.
  • #7
    03-15-2016 09:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟ ؟ ربما بعد أن يطير النعام
  • #8
    Mohamed Said 03-15-2016 09:0
    يا أخي الكريم بدل الشحن العاطفي ناقش الكورة لا المريخ أحسن من الهلال ولا الهلال أحسن من المريخ وبالله ما تكسب ذنوب ساكت هذا الكلام أنت مسئول منه أمام الله روق شوية وخليك من الكورة وشوف ليك حاجة أحسن
  • #9
    مصطفى محمد علي 03-15-2016 08:0
    بالأمس كتبنا مشيدين بك وبالنهج العقلاني ولكن اليوم رجعت للإستهتار بالمريخ وجماهيره فلا تعود تشتكي وتهدد بالقانون .............
  • #10
    البطل 03-15-2016 08:0
    أسأل (مانديلا) الأحسن ياتو ..

    وبعدين نحن خلاص خلينا تشجيع الكورة ..
    بقينا نشجع الرؤساء ..
    أنا غايتو بشجع البشير و(مانديلا)..
    طبعا البشير هلالابي (كيسو فاضي) ..
    ومانديلا الما خمج (كاسو ملياااان) ..
    براااااااك عارف حبيبنا ..
  • #11
    ود الحاج 03-15-2016 07:0
    حنى التريقة مابتعرف ليها
    وكمان عاسز تحشر فى زمرتك كتاب لهم
    إحنرامهم أمثال محمد عبد الماجد وشجرابى
    وكثر
    وأما أمثال القامة مزمل فأمثالك لاينظر إليهم
    أو يعيرهم إنتباها
    ود الحاج
  • #12
    تونجيلا 03-15-2016 07:0
    اترك المريخ فى حاله واكتب عن عيوب الهلال عسى ولعل تخرجوا من الاهلى الليبى الذى يحتاج لهدف وحيد يركبكم الهواء.
  • #13
    jo 03-15-2016 05:0
    مين كاتب المقال ده يا جماعة؟؟!!!
    ماعندك من المقال ده إلا صورتك يا شوربة.
    لو المقالات الصحفية بكتبوها كده كلنا كنا بقينا صحفيين.
  • #14
    صفوة لاخر العمر 03-15-2016 05:0
    المعروف لايعرف عزيزى شوربجى
    انت قلل من كرهك للزعيم تسعد
    كن واقعيا وناقد موضوعيا تحب(بضم التاء)
    الاهلى الليبى ليس متمرساولا يلعب فى دورى من 2011
    اينيمبا النيجيرى تاسست سنة1975 وفاز بالابطال فى سنييه الاولى
  • #15
    عاشق النجوم 03-15-2016 01:0
    انت لسه بتقول فريق الاهلي الليبي قوي و خطير ؛ و الفريق النيجيري متواضع الإمكانيات بالله عليك خاليك صادق مع نفسك و جماهير الرياضة اين الكورة الليبية من النيجيرية الدوري الليبي متوقف والاهلي يلعب ضيف غريب في تونس ؛ اما حديثك عن الفريق النيجيري حمام فهو مردود ليك هل تعلم ان الفريق الاولمبي النيجيري حاليا بستعد للمشاركة في البطولة الأولمبية في البرازيل ولديه مبارة يوم 25 في هذا الشهر اما الفريق الاول النيجيري حدث اين الكورة الليبية و النيجيرية ؛ وبعدين المريخ العظيم غصب عنك فخر و سيد البلد ؛ سيبك مع الهليل و اترك مريخنا العظيم صاحب الانجازات وكاس الكؤؤس الإفريقية ليس ببعيد ارجع للتاريخ 1989 اذا حب تتاكد راجع تلفزيون السودان و قناة قوون سوف تجد تسجيل للمبارة يا صحفي اخر الزمان ؛ هداك الله .
  • #16
    الزعيم 03-15-2016 01:0
    يا شوربة لا تفتكر جبت شىء جديد من رأسك المريخ كل فى الكل وبعده الوصيف اهلى شندى حتى وصيفنا فى الادارة صلاح ادريس. والمرتبة الثالثة الخرطوم ألوطنى. والرابع.نشوف. باقى فرق الولايات وبعدها ينظر ويفاد الزعيم أجبرك تفتش أبيات شعره.فىى قوقل شكرًا خدمت. الود يا عّم قوقل
    نجى لبذاءات الشابكنا كل يوم المفروض تغنى اغنية الإمبراطور وردى برأى سويتا فى نفسى انت البديت والرد كان طبيعى. وتحذير المرة الأخير إياك تانى تكتب مواطنين سودانيين بأنهم اجانب والا. نذهب الى المحكمة لو هم ارترتيين ولا حبش عندهم حدود اما اليطلع لينا من مجر ولا قبرص يسجن فورا لعلمك كجبار الانت تكتب عنه انا شخصيا على مرمى حجر من كجبار إياك والاستفزاز مرة اخرى لا عذر بعد اليوم مؤمنين. الرياضة تسامح واخلاق الشخص الذى وصفنا بالغوغائية عرف خطاءه وغير أسلوبه. وسامحناه لوجه الله تعالى هو الحاج ادم اذا كان ربنا يسامح عبده كيف نحن بشر وما نسامح رجاءا نصيحة مجان. احترم الآخرين حتى يحترموك وما فى داعى للعنصرية والقبلية. الدخيلة على مجتمعنا. وانا باكد لك اذا غيرت اُسلوبك نمد لك الورد وبالمقابل اناشد الصفوة ان نوقف الهجوم عليه وانا بكل شجاعة أبادر المناكفة مطلوبة بسما بالطريقة الجارحة اطيل. العفو والعافية يا استاذ محمد حسن شوربجى يصلح حالنا جميعا
  • #17
    ميرغني الامين 03-15-2016 01:0
    رسالة شنو ياشوربه الوصلت خلي ادارة كفر ووتر دي تفك الحظر عن الرسائل عشان تسمع العجب العجاب وشكرا جزيلا ماعيزنك تمدح الزعيم خليك في كسير تلجك ده للكردينال
  • #18
    د الشيخ 03-15-2016 12:0
    اللخو
    انت جاد في كتاباتك دي استغفر الله العظيم
    الله يشفيك
       الرد على زائر
    • 18 - 1
      طارق 03-15-2016 10:0
      كتبت بدءا ماتجيش به نفسك من حقائق تعتمل في نفسك واما مجادعاتك دي مابتجيب انتصار او بطوله وقوه الاهلي الليبي دي قدامكم وبس وضعف النيجيري امام الزعيم فقط الله يشفيك يارب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019