• ×
الإثنين 17 مايو 2021 | 05-16-2021
معاذ ابو مؤيد

فرحه الجماهير ضاعت في شيخ الملاعب والسبب معروف

معاذ ابو مؤيد

 0  0  1903
معاذ ابو مؤيد
لم تمر اكثر من يومين للفرحه في المدرجات والقروبات الا والحسرة والالم يخيم علي الشارع المريخي للعرض الهزيل والفقير والميت دماغيا
معقوله !!ياكباتن المريخ تقتلوا فرحة الجمهور بالشكل دا وتتلاعبو باسم المريخ بالوضع دا العرض الجنن العالم من سوداني والعرض الاحبط العالم من لاعبي المريخ
خليتو ناس طلعت من الاستاد من الشوط الاول والخلف الشاشات كل زول شاف موضوع تاني ويسال من النتيجة بالواتساب احباط من امه ويا له من احباط عجيب وغريب يعني الناس كلها سمعت بعوده الوالي الا انتم يالاعبين!!
يعني دا اسه عليكم الله شكل استقبال للمجلس الجاي ولا هذا شكل استعداد للافريقيه .؟
والمشكله في ابوجريشه القاعد في كنبه الاحتياطي في كرسي الطلبة قاعد وراء وعايز يدفع نصف القيمة لومامكاجرته في موضوع مدير الكره ماكان ارحم ليك ولينا
مدير كره عشان يعرف يزبط التيم مدير كره عشان يكون قريب للاعبين ديل ويحل المشاكل.
ياابوجريشه الاوزان زادت في الاحتياطي ابتدا من المدرب وكريم الحسن وسعادتكم العربيه ليها حق لساتكها تنبشر
وصحف الهناء وصحف الاحلام الورديه تقول ليك التدريبات علي قدم وساق وتطبيق الخطط والتكتيك
التدريبات دي الا تدريبات ونسه ساكت معقوله تسعين دقيقه جمله تكتيكيه واحده مافي طيب بتمرنوا شنو الناس ديل
واللاعبين يدوك احساس انو اول مره يتشاوفوا كل واحد جاري والكورة جاريه وراهو مش جاري بالكوره
فهمونا بتدربو شنو حتي لو قلنا تدريباتكم تقسيمه ولا اي تدريب مافي بصمه ومافي اي مردود فني او لياقي
المدرب زاتو بشبه لي ممثل امريكي بي بدلتو السودا دي
وبقينا ماعارفين مدرب المريخ من مدرب النسور كل مدرب جاري مع الهجمة محل ماتمشي
تداخل في المناطق الفنيه والسؤال مساعد المدرب دامر فاهم لوك ايمال دا ولامستمتع باللغة الانجليزيه قايل نفسه بحضر في فيلم اجنبي بس يادامر ياخوي فلمنا دا مافيه ترجمه علي الشريط يعني تحضر عشان تشوف نهايه القصة ولاكيف نهايه القصة انو فشل في الميدان وفشل في المعسكرات وعدم للانضباط التكتيكي والانضباط خارج الميدان

مريخ ٢٠١٥ نجح وسار بسياسه الانضباط والحزم ومن يوم دخلوا ناس الطبطه والهرجله المريخ غادر افريقيا لوجودهم
والبطل الهمام مامعروف وين كل يوم نسمع قصه عن البطل والكابتن قصص مافي زول من ناس مجلس التسيير عايز يحكيها أو يحسمها قصه مسيخه وطويله شفتو الانضباط راح وين راح مع ناس اخوي واخوك
يعني انضباط غارزيتو راح في شربه مويه وراح شمار في مرقه وياكابتن راجي وكل زول معاه الماعاجبو القعاد يورينا عشان يخرج من الباب الكبير
عرفتوا قيمه غارزيتو وعرفتوا الفرق بين المدارس والمدربين وعرفتوا الفرق بين المدرب والمتدرب وعرفتوا مظاليم غارزيتو نظرتو كانت شكلها كيف
نحن ماعايزين نتكلم عن اداء اللاعبين ولا نحلل المباراة لكن عايزين نعرف التمارين بحصل فيها شنو عشان لو فيها حفله وونسه خلونا نشاركم الافراح اصلا اللاعبين شكلهم مابعرفو بعض مافرقت لو جينا عليكم علي الاقل نحن بنعرف بعض ونعرف اللاعبين لكن ياناس التسيير اصراركم علي عدم تعين مدير كره وعايزين تسمعو كلام ابوجريشه دا مابنوافقكم عليه
جيبو ليكم زول يحسم الفوضي علي وزن اغنيه شكر الله الاداء لابشبهنا لابنشبهو ودا مابشبه فريقنا
والزبدة وخلاصه الكلام انه في فوضي في التمارين وفي فوضي في المعسكر وفي فوضي وسط اللاعبين يعني المدرج والشفوت منظمين اكتر من اللاعبين وبعرفوا بعض اكتر.
ياهم نفس اللاعبين ونفس اشكال السنه الفاتت معناه العلة مامنهم العلة منكم انتم السامحين لزول واحد يفرض رايو عليكم خففوا الاوزان الفي كنبه الاحتياطي دي عشان العربيه ماتوحل وتغرز اكتر من كده ومن اسه ياالمجلس الجاي ابوجريشه دا لو معاكم مركبكم مابتقطعكم البحر وشهر ١٢ بنشوفكم تغنوا وضاع الامس منا عشان كده العلة في المحيطين بالفريق من قطاع رياضي وغيرو ودي واضحه مادايره ليها زول يفهم كوره أو ينظر رجعوا الانضباط والالتزام يرجع المريخ تستمر سياسه الفوضي والطبطه معناها كل شفت من الشفوت يجي الاستاد ومعاه ليمونه مش ليمونه الظهر علي صفحات الصحف العايز يصطاد في الماء العكر ليمونه يمصها عشان نحن معروفين مابنتحلم الغث في كره القدم والغث ياهو الحاصل اسه
ختاما ارحمونا يرحمكم الله

وضربو حساباتكم وجهزو كشوفاتكم استعدادا للمغادره من الباب الكبير
ونحن علي المدرج ونتفرج
لكن ماعاجبنا الحال ولا دا شكل فريق يعجبنا ناس الكوتشينه بقولو التربيزه مميله ونحن نقول الدكة فيها زحمه اوزان وناس الاوزان ديل بالله ماتنسوهم في صاله المغادرة سوقوهم معاكم في نفس الرحلة لانو رحلتكم ماعايزنها زي رحله المعسكرات بالقطاعي كل صاحب وزن تقيل طوالي يحزم حقائبه ومع الجماعة
لانو ماعايزين مخرج المباريات يركز لينا علي الاوزان التقيله الوزن الزائد علي مسؤليه صاحبه والانضباط والحزم عندو ناسو وومعروفين
حزم المعسكرات والتدريبات يقود للمنصات غير كده تكون دي طبطه وتساهل مافي محلو
مادايرين فخامه صوت ساكت والحس الغليظ
غارزيتو كان مبعد كل صاحب صوت تخين ولسان طويل وقافلهم ليك قفله السنين
اسه الوضع مامطمن ضربوا حساباتكم سريع سريع وشوفو البيكم والعليكم عافين منكم وراضين عنكم بس سلمونا المريخ الاستلمتوه انتو عارفين انو الشفوت والصفوه ديل زي ناس مدني بيعرفو الزول الفنان من غناه
ونحن بنعرف المخلص وقلبو علي النادي من عدمه وعارفين التسيب من الانضباط ونص الشفوت ديل بفهمو كوره
لكن ماعندنا استعداد تستمر حاله الفوضى دي بالله ماتنسو سريع سريع ظبطو اموركم وماتنسو الجماعة الزكرناهم ناس الاوزان التقيله وسلمو لينا علي كريم الحسن والسمسار الجابو لانو حيوحشونا خالص
واسمعت اذا ناديت حيا ولاحياه لمن تنادي
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019