• ×
الخميس 28 مارس 2024 | 03-27-2024
معاذ ابو مؤيد

لكل زمان رجال ياريس

معاذ ابو مؤيد

 4  0  1569
معاذ ابو مؤيد


في كل الانديه الرياضيه اللاعب والجماهير تطلق علي رئيس النادي ياريس حتي اعضاء المجلس بيقولو ليه ياريس
عشان كده عايزنك ريس بنيو لوك ريس يجي بفهم تاني ومركب وش للجماعه حتقول لي الجماعه منو حاقول ليك اطفال الانابيب الشفناهم فجاه في عالمنا زي شفع المسلسلات الواحد يولده اليوم تلاقيه في الحلقه القادمه في الجامعه
نرجع لاطفال الانابيب المولودين خارج رحم المريخ الناس الظهرت فجاه في عالم المريخ الجميل الناس الجات وماعارفه المريخ تاسس بتين ولاعارفه طبائعنا وانجازتنا ولاعادتنا ناس فجاءه تلبو في حياتنا
ياريس....
كلامي الجاي دا حاسميه مخرجات الحوار المريخي لقروبات الواتساب وقروبات التواصل الاجتماعي دي شايلا جواها كتير من جميع الاشكال يعني لامه لم تقيل ومعظمهم مثقفين ومحبين للنادي والكيان
لكن كلهم متفقين علي حاجه واحده وكارهين اختها
متفقين عليك ياريس وعلي حضورك بس كمان ياريس عايزين حضور مختلف شديد
وكارهين تكرار الوجوه وناس المصالح ومعروفين للجميع
ماعايزين نشوف اعاده للمسلسل واخطا الماضي اصلو الزياده في الاكل مابتطلع سمحه عشان كده ماعايزين نفس الملاح
عايزين نشوف وجوه شابه وجوه متعلمه وماناس مصالح
انت ياريس عايز نجاح لاسمك ونحن عايزين نجاح للمريخ ونجاح ليك
وعشان مركبك تمشي بامان ابعد المنتفعين وناس الحلوق الكبيره الناس البتبلع بلع وهمها جيبها الناس البتصرح في قصاصات واعمده في الجرايد باسم المريخ والناس الصوت دايما عالي ديل يدمرو وطن مش يدمرو المريخ
وعشان مركبنا تقطع البحر خليك واضح وشفاف واعمل ليك لقاء كل شهرين مفتوح للجمهور وللاعلام عشان الكلام يطلع منك مباشره وناس الشتل يشوفو ليهم بلد ناس التنظير الصحفي والناس ديل مفتكرين الحياه زي زمان واعمده الصحف وعايزين يبرطعو زي زمان ومفتكرين العمود ممكن يحرك المدرج مفتكرننا ناس ونسه ساكت ونسو انو الزمن زمن عولمه والكل قادر يرد عليهم والكل ممكن يكتب عمود زيهم وينتشر اكتر منهم الجرايد بقت بايره من شده مابايره ناس المعارضه كان بيدوهم صفحه اسه بقو يكتبو تصاريحهم في قصاصه وفي ركن بعيد
وعشان مركبنا تمشي من غير عواصف كمان خلي مجلسكم دا يكون هرمي
يبدا من القاعده ولحدي مايصلك ياريس
يعني اسس للعمل المؤسسي وخليك قريب للقاعده الجماهيريه القاعده الجماهريه دي لو عايز تشوفهم اخد ليك لفه جنب الاستاد وشوف ناس القروبات والناس التسد عين الشمس شغالين بضراعهم ناس التراس الاسود وناس ابوطيف وناس ستموني وبقيه الكيانات وممكن تاخد فكره من امين المال وتشوف ايصالات الدعم الجات اسود المريخ ومحبي الكيان والصفوه وناس كتار ياريس سد جزء من الفرقه في غيابكم
ساس اي حاجه لو ماتمام بتكون تبني في قلعه من الرمل
والجمهور دا هو الساس ابداء بمجلس الجمهور المريخي شفوت المدرجات مجلس الجمهور دا بساعدك كتير من نفرات لحدي الدفاع عن المكتسبات وبي كده تضمن صوت القاعده الانت متكل عليها وااااصلك وسامعو وتقدر تستفيد من رايهم والاستثمار من خلال الجمهور هو الحل لي باكر وبعد باكر
نمشي فوق حبه ناس راس المال والداعمين خليهم في مجلس مصغر سموه مجلس الاستثمار والداعمين واعضاء الشرف
يكون مجلس عايز يستثمر يستفيدو هم ويستفيد المريخ وانت زول تجاره وعارف شغل السوق والقرش كيف يولدو وعارف من اين تؤكل الكتف
نجي لكبارنا اهل الراي والحكمه ناس الشورى ديل خليهم ذي ماهم وضيف عليهم اسماء جديده
وفي دائرتين لاذم تهتم بيهم عشان ديل بساندوك في كل المحافل الدائره القانونيه البتدافع عن حقوقك وحقوق المجلس وحقوق المريخ الناس الحافظين قوانين الرياضه حفظ وعارفين بنود الفيفا بند بند الناس المابتجامل القانون عندها يطبق علي الكل
والدائره التانيه الاعلام ديل ياريس لاذم يكونوصريحين وواضحين وهم البعكسو الحاصل للجميع ماناس شوفوني وناس تصوير وناس مانشتات ناس يعرفو يديرو المكتب الاعلامي بطريقه حديثه عشان اي زول عايز معلومه يلاقيها في ثانيه عشان ناس المكتب الاعلامي ديل يكونو صوت النادي في كل محفل وعشان الشتل والكلام البطلع بلسانكم وينرفزكم ويخلق المشاكل يختفي من الصحف وعشان الخطاب الاعلامي يكون موحد
ياريس كلامنا الفوق دا كلام معظم المجتمع المريخي
الناس ملت من اصحاب المصالح الهمهم جيوبهم وهمهم صورهم تملا الجرايد نحن ماعايزين نحفر في البحر ياريس
اذمه المريخ الاخيره دي طلعت جنس مواهب وجنس ناس بحبو المريخ ذي ابناءهم ناس بسيطين ديل الاثبتو القول بالفعل الواحد فيهم يساسق للنادي اكتر من بيتو الواحد نايم وقايم بهم المريخ ناس جوه السودان وناس بره
عشان كده ياريس المؤمن بتعلم من تجاربو وانت تجاربك مع الوجوه المكرره شفتها كيف
ناس المساطب وناس شاخور ديل هم الساس وهم الاساس
ماتعتمد علي ناس المقصوره الرئيسيه والناس المنظراتيه خلي عندك كشيفين في القروبات والمساطب بطلعو ليك شباب عملي وشباب بحب المريخ لانو ناس الماسطب ديل هم المريدين وهم المحتفلين حاليا بعودتك وفي ناس فرحانين قايلين مصالحهم حترجع
لكن اسمع كلام المبكيك ماتسمع كلام البضحكك
ماتنسي وصيتنا الوجوه المكرره ابعدهم عنك وتعال بنيو لوك وشخصيه جديده والقرش دا لو ماعارفو بجيب فايده للكيان ويعوضك خير ماتمرقو بالساهل بند الصرف خليه مقنن ومسكو لزول قيحه ماخد طباع المصرين زول يقول نئبض يعني نقبض مشي زول يقول نصرف يعرف يحكها قرش قرش وجنيه جنيه
والجنيه عند ناس شركه الاتصالات عندو قيمتو ونحن جنيه المريخ دايرين ليه قيمه في السوق مايمرق بالساهل

ختاما
دعواتنا ليك بالتوفيق وان نشوف تجربه مختلفه والخيار عند ناس العضويه بس مجموعتك خليها مختلفه عشان يفوزو بحب الجماهير زيك

ونحن علي المدرج ونتفرج
وناس المدرجات ديل ممغوسين وماكلنها جواهم وناس اعمده المحاربه والتصريحات التحت تحت ديل
لو لمو في ناس المصالح ديل وناس الحلاقيم الكبيره ديل مامعروف يحصل شنو عشان كده محاربتهم تبدا من عندك ياريس والباقي علينا نحن كفيلين بطردهم من مجتمع المريخ نخليهم يتابعو اخبار المريخ من منازلهم
كلامنا دا كلام القروبات ووسائل التواصل الاجتماعي الزمن اتغير ياريس وحاليا الناس مستخدمه التقنيه استخدام جد استفيد منو وخليه في مصلحه الكيان
اهل الوجعه ناس عاشقه الكيان وتقدر الناس البضحي بمالها ووقتها من اجل المريخ
شعارنا القادم.....
حنبنيهو البنحلم بيهو يوماتي
مريخ عاتي مريخ خير دمقراطي
مريخ استثمار مريخ يملا العين
مريخ خالي من اطفال الانابيب والمرتزقه واصحاب المصالح الشخصيه
والكلام ليك يالمطير عينك تاني جنيه المريخ تلقاه عند الغافل بس
اكسب زمنك ولقط عفشك واتخااارج الدوره دي الموضوع خطير والناس استوعبت الدرس دوره مختلفه لمجلس مختلف لاتوجد فيه كلمه اعد او وجوه معتاده
تعال علينا في المدرج وادفع من جيبك وعيش الفرجه والمتعه
يابتاااع المصالح والمنفعه الشخصيه تعال لينا في المدرج اقعد جنبنا عشان تستفيد والمريخ زاتو يستفيد من حق تزكرتك مش قاعد لينا عاله وعايز تمص دمنا وتفورو بتصريحاتكم الجبانه الانتو مامقتنعين بيها نحن ننتظرك عشان تدخل مدرسه المريخ من باب المدرج بعديها نقول ليك
ينظر ويفاد......
امسح للحصول على الرابط
بواسطة : معاذ ابو مؤيد
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    جلابي الدوحة قطر 03-03-2016 09:0
    احببنا الوالي كثيرا وكثيرا ولكن انسحاباته الكثيره اثبتت لنا ان ورائها مقاصد فكيف لمحب للمريخ ان يتركه في قارعة الطريق ويترنح ويصبح عرضه للسخريه ...لا الوالي ولا غيره يحب المريخ كل يحب نفسه ويعمل لمصلحته وعودة الوالي لها ماربها ولكن يجب ان يكون هناك تنوع في الرئاسه وعمل مشاريع تسند الكيان حتي وان رحل الجميع هذا هو حب المريخ وليس الكرسي
    كثير من الافواه تتحدث وتتحدث وتتحدث ولكن لم نري اي منهم يتحدث ويعمل
    كفاكم دروس انشاء وافعلو ما يجعل الكيان ثابت وشامخ للجميع وليس للفرد
  • #2
    أبوسامي 03-03-2016 08:0
    لا فض فوك ، مقالاتك مقروءة ومليانة وأفكارك صحيحة ، بس مسألة بسيطة أرجو تنبيه الطابعين للتفريق بين الذال والزين والهاء والتاء المربوطة لأنها بصراحة أصبحت ملازمة لمقالاتك ومزعجة . نتمنى لك التوفيق وإلى الأمام .
  • #3
    محمد ابراهيم 03-03-2016 07:0
    الوصاية دي كلها قبل يرجع... يعني اكيد فايز في الانتخابات ولا اساسا لا يوجد مرشحون آخرون
  • #4
    osama 03-03-2016 03:0
    لا تجربوا المجرب والريس بتاعكم ما بيفهم في الكورة ولو انتوا ما عارفين الكلام دة شوفوا ليكم حاجة تانية
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019