• ×
الأربعاء 4 أغسطس 2021 | 08-03-2021
معاذ ابو مؤيد

مشاورات القصر كملت حزمه البيانات والنت في السودان

معاذ ابو مؤيد

 1  0  1077
معاذ ابو مؤيد

الصمت والهدؤ كان يسبق عاصفه الاخبار المتناقله في القروبات زي اعصار تسونامي القروبات كانت هادئه زي وقت اذان المغرب في رمضان الا من بعض المناوشات والاعمده المتناقله وبعض الونسه الجانبيه
سبحان مغير الاحوال فجاءه ومن دون مقدمات تغيرت صور العرض في القروبات وعينك ماتشوف غير كلمه عاجل وصور الوالي تنور ايقونه القروبات
القون في الكوره يجي في ثانيه والخبر في الواتس اب يجيك في ثانيه في مشرفين قروبات ماعرفو قروبهم من قروب الجيران لاعرفو يدخلو قروباتهم ولاعرفو يتابعو عاجل ولاعرفو يرسلو الاخبار
صوره العرض الواحده لخبطتهم
ومن كتره الصور في ناس نشطو النت مرتين اصلو حزمه زين الجديده ماتتحمل عوده الوالي
ناس زين وسوداني وام تي ان امبارح فجاءه كده جاتهم قروش بسبب تنشيط النت واسه قررو يوم الجمعيه العموميه يعملو استعداد ويرفعو الاسعار عارفين المريخاب عندهم وزنهم وفرحتهم مختلفه بواليهم اصلو المريدين ريدهم صعب ومكلف وامس كان استفتاء لشعبيه الوالي وناس الاتصالات فرحو بالاستهلاك الكثيف للنت عدادهم تقيل والعداد رااامي
صوره الوالي تاخد كميه مهوله من البيانات وناس القروبات الواحد يرسل الصوره ويستقبلها في قروب تاني زي صحن البليله في رمضان يلف الحله كلها
وبليله الوالي طعمها براهو عشان كده الصحن يمشي ويجيك بنفس الحراره والسخونه
يجيك معاهو طاسه مغطياه تكون دي الطاسه الضائعه
لكن السؤال المهم ثم ماذا بعد سؤال كبير وعريض
القروبات دي حتتخلي عن واجبها وتكون قروبات ونسه وتعارف ولا الناس تشيل الشيله مع الرئيس الشاب
الفرحه الهيستريه معروف سببها شنو وسببها منو فرحه زي فرحه هدف التاهل لنهائي دور الابطال كمان الفرحه دي ماتنسينا المباراه النهائيه ونعض اصابع الندم
العوده مشروطه وعشان الشروط دي ماتتفعل لاذم التكاتف دا يزداد حبه ولاذم الدخل يرتفع يعني الرئيس الشاب مامعاه عصا موسى ماتخلوه في الساحه براهو ماتعيديو سيناريو الايام المظلمه
لو كانت الايام الفاتت شهدت نفرات مفروض مع الرئيس الشاب تشهد صناديق خيريه ومبادرات فعليه والناس تشاركو الحلوه والمره
اليد الواحده ماتصفق وحتي لو صفقت نحن خلونا نبشر معاه باليد التانيه
يعني تخصيص القروبات دا وقتو تماما عشان كل قروب يشيل الشيله مع المجلس القادم
اصلو المؤمن بتعلم من تجاربو ونحن جربنا مجالس التسيير والتكليف
ذي ما الاستقرار الفني مطلوب في الميدان الاستقرار الاداري مطلوب
فيزالمدرجات
مامكن نطالب بالاستقرار والناس حست انو لقت الكنز
والناس عايز تدخل العقارب تاني جيوبها
القروبات دي لو ماانجزت الملفات المعاها حاليا علي الاقل مساعد القادم بالحضور الحضور دا بيضخ مال للخزينه
والمباراه الجايه نتمني نشوفها بمعدل المباريات الافريقيه عايزين القروبات ماتفتر وتقتنع انو المشكله خلاص انحلت
مافي مجلس بيحل مشكله بعيد عن الجمهور انتو الذاد في الميعاد
والناس الشغاله حاليا في النادي وفي الاستاد وفي القروبات واصلو من غير توقف
معقوله الناس عايزه تستقبل العرس من غير مايضربو البيت جير وبوهيه والواجهه الاماميه للنادي منوره بالاحمر والاصفر
الناس الشغاله في الصيانه مع الجميل ابوطيف مفروض الهمه تزيد وناس ستموني مفروض النجيله تكون داخل وخارج الاستاد
يعني الهمه مطلوبه وماعايزين القروبات تكون للاعمده والونسات ويعشعش فيها الطير
عايزين المبادرات تستمر عشان الاستقرار الاداري
الطاسه لو ضاعت تاني مغنطيس مابحصلها لينا
الناس جربت كل الالوان ولون الفقر طعمو في خشم الناس لحدي اسه
لو دايرين انصلاح الحال الناس تتوحد وتواصل بنفس الحال والنفرات
النوم علي العسل وعلي جيب المجلس الجاي حيرجعنا لايام من النسيان
ختاما
خلو القروبات تكون كالبنيان المرصوص وتشيل الشيله

ونحن علي المدرج ونتفرج ومنتظرين نشوف الناس بعد الفرحه الجميله دي ياريت الناس تحضر عشان الحضور بيعطي امل للقادم من بعيد لم يشوف الاستاد مليان بطمن ولو اطمن بيعطي ولو اعطى عين الناس تشوف كل الفرح والناس لو فرحت تاني البنقصها شنو
ذي ماصوره الوالي اتوحدت في القروبات الناس تتوحد لتجاوز القادم والقادم قادم بعد ولاده عسيره عايزين المولود يجي ويلاقي الدنيا فرحه ومطمنه
وبدل تبادل صور الوالي نتبادل الافكار عشان نتجاوز القادم
ولو اتبادلتو الصور حزم البيانات تكمل وبدل جيبنا يكمل في البيانات مفروض يكمل في معشوقنا المريخ لانو المريخ اولى من شركات الاتصالات
بدل ترسل صوره رسل فكره عشان الناس ممكن تساعدك وفكرتك تساعد الكيان والكيان ملك الجميع انت اولهم اخي المشجع
والناس بعد دا عرفت الصالح من الطالح وعرفت البحفر تحت تحت وماعايزين زول يوصيكم شفوت وعيونكم مفتحه وعرفتو تفرذو الكيمان خليكم مفتحين وادعمو اهل الوجعه واهل المصالح الشخصيه خليهم يتمرنو في الرديف امكن يرجعو لصوابهم ويعرفو قيمه الزعيم
امسح للحصول على الرابط
بواسطة : معاذ ابو مؤيد
 1  0
التعليقات ( 1 )
الترتيب بـ
الأحدث
الأقدم
الملائم
  • #1
    عبدالباقى 03-02-2016 07:0
    يا اخوانا والله عيب دا كلو عشان شخص واحد انتو كده بسيئو للمريخ كانو المريخ تيم الرجل الواحد هذا فيه اساءه للمريخ صدقونى واسمع كلام الببكيك ما تسمع كلام البيضحكك اصحو مااخموكم ناس مزمل وكابو واصحاب المصالح الخاصه
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019