• ×
الأربعاء 21 أبريل 2021 | 04-20-2021
معاذ ابو مؤيد

الناس ماشه قدام ونحن ماشين ورا

معاذ ابو مؤيد

 0  0  943
معاذ ابو مؤيد


غايتو اتحاد الكره لو شاف ليهو شهر في السنه تكون كل الدوريات الاوربيه والخليجيه مافيها بطولات يكون عمل خير والله نحضر مباريات دورينا وباقي الدوريات فرق كبير وشاسع نحن بنحضر لينا في مباريات من الامس في دورينا وماتعرف فريقك من فريق الجيران
معقوله نحضر في الدوري عندنا زي البنحضر في تلفزيون ابيض واسود
المشكله وين في كوادرنا ولا اجهزتنا ولا في عويناتنا
الناس وصلت تقنيه الHD ونحن ماوصلنا لسه الSD يكون مطور
الدوريات كلها تحضرها في التلفزيون زي الحاضرها في الاستاد وامكن احسن من الاستاد زاتو
وين الاستثمار في النقل التلفزيوني معقوله راس المال جبان عندنا للدرجه دي
غايتو اتحادنا بركه مالعب مبارياتنا ايام السبت والاحد كان الضحك شرط عيونا
مافي مستثمر قلبو قوي يجيب ليه عربتين تلفزه بتقنيه عاليه الحوده لنقل المباريات علي الاقل العالم تشوف دورينا وتسوق لاعبين السودان
ولا القصه اضاءه ملاعبنا ولا المشكله وين افتونا ياناس التلفزيون
حتى التقنيات المصاحبه لنقل المباريات غير متاحه حاليا لا اعاده ولاخطوط تسلل ولاجرفكس للنتيجه وزمن المباراه ولا لوقو للبطوله يملا الشاشه ويملا العين
والغريبه جزء كبير من الفنيين في الشركه العالميه الناقله للدوري السعودي من ابناء الوطن شباب يسد عين الشمس مافي زول قال يستفيد من خبراتهم حتي لو في اجازتهم السنويه ومتاكد تمام انهم لن يبخلو علي وطنهم بخبراتهم ممكن تمشو الجامعات فيها شباب موهوبين وعقليات جميله جيبوهم يتدربو ويصنعو الفارق ليكم انا متاكد انو في شباب في الجامعات والمعاهد محتاج الفرصه
انقذو عيونا قبل ماالنظر يروح اصلو نحن مرضانين بمشاهده مباريات الدوري الممتاز واحساسنا بي الدوري مختلف وليه طعم خااااص
عايزين ننافس الاخرين ونقدم الدعوه للاخوان والاجانب يتفرجو معانا لكن مع الصوره المطششه دي قدر ماتبرر تلاقي نفسك محرج نحن في التبرير ومحرج من الدعوه
وحتى المواقع المسانده للنقل من مواقع الكترونيه ويوتيوب وتويتر زاتها ضعيفه وامكن معدومه
بطوله ضعيفه من مجمل النواحي المسانده للبطوله الضعف الفني من كل الزوايا داخل وخارج الملعب
غايتو ننتظر الفرج من الله ويتحسن الحال
ختاما
ارحمونا يرحمكم الله

ونحن علي المدرج وفي كل مكان عايزين الفرجه الصاح والمشاهده الجميله مامكن جوه وبره الاستاد العيون تعبانه والواحد لو داس الرموت بالغلط وجات مباراه تانيه غير دورينا لايعرف يرجع ليها ولايقول انتظر النتيجه
النيلين انتم بعيدين شديد عن الشغل التلفزيوني انتو ماشغالين ليكم عرس دا دوري ودا استثمار رياضي حسسونا انو بنحضر في تلفزيون ملون مش ابيض واسود
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019