• ×
الإثنين 8 مارس 2021 | 03-07-2021
محمد عمر الامين

عربسينو ادوها انفانتينو

محمد عمر الامين

 0  0  6914
محمد عمر الامين





* غايتو العرب ديل عندهم جنس محن اصلو لا يمكن تتصورها او تفهمها.
* الواحد فيهم لمن يقيف ويتكلم ليك عن العروبة والجوار تقول الماشي علي دولة ممكن يدخلها ساكت من غير فيزة او تفتيش.
* ما يظهره العرب في الظاهر يختلف عما تحمله دواخلهم لأن ما تحمله دواخلهم يقول علي وعلي أعدائي.
* هسع عليكم الله معقولة اخلي رئيس اسمه زي دواء الحموضة يبقي رئيس للفيفا.
* يعني فيها شنو لو حصل اتفاق في المرحلة الثانية وقام الأمير علي ود الحسين حول اصواته السبعة وعشرين للشيخ سلمان الذي كان قاب قوسين او أدني من تحقيق حلم عربي آسيوي لأول مرة في تاريخ إمبراطورية الفيفا.
* الأمير علي عامل زعلان انه سلمان اترشح معاه طيب فيها شنو السنة الفاتت اترشح براهو مع بلاتر وما جاب التكتح لانه أفريقيا قررت تدي بلاتر.
* الشيخ سلمان ضمن أصوات أفريقيا المرة دي يعني بالواضح كده أفريقيا مكجنة الأمير علي وحتي لو كان الشيخ سلمان ما اترشح وخلي الأمير اترشح براهو كانت أفريقيا أدت اصواتها لدواء الحموضة الفاز ده.
* الحكاية من أولها كانت ظاهرة وما عاوزة ليها درس عصر التنافس سيكون ثنائي بين انفانتينو والشيخ سلمان.
* المرحلة الأولي انتهت وتقدم دواء الحموضة علي الشيخ سلمان بثلاثة أصوات فقط.
* مفروض ومن دون اي نقاش الأمير علي يمشي علي الشيخ سلمان ويديه بوسة بي جاي وبوسة بي جاي ويقول ليك حياك أخا العرب يا صقر قريش ساهديك اصواتي في الجولة الأخيرة تجسيدا لكل معاني الوحدة العربية.
* بس الأمير يظهر انه مغبون من أفريقيا الرقدت بيهو في انتخاباته مع بلاتر ورقدت بيهو تاني مع شيخ البحرين فقال علي وعلي أعدائي اسمعوا يا ناسي اصواتي السبعة وعشرين ادوها لدواء الحموضة ويلا بلا لمة.

سندة شاطئية

* وتابي الرماح اذا اجتمعن تكسرا وإذا افترقن تكسرت احادا بس ياهو ده ذاتو حالنا نحنا العرب.
* لم يفز دواء الحموضة عن جدارة وإنما خسر العرب وحدتهم وكلمتهم في أكبر محفل كروي في العالم.
* مفروض بعد ده الأمير علي يقنع من الترشح مستقبلا لانه حتي او ترشح براهو فلن يجد لا أصوات أفريقيا ولا حتي آسيا التي تقع فيها الأردن جغرافيا.
* والله المغصة عاوزة تشقني معقولة ننتهي من بلاتر السويسري نجيب لينا رئيس اسمه زي دواء الحموضة وكمان بشبه الحارس بارتيز.
* قعدت أضحك وعيسى حياتو يعاين للأمير علي عشرة عشرة.
* لن نقول هاردلك للشيخ سلمان ولكننا نكتفي بهاردلك للعروبة التي ذبحت بزيورخ لتهدي أوروبا رئيسا علي طبق من ذهب.
امسح للحصول على الرابط
بواسطة : محمد عمر الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019