معركة ذات النقالات ..!!
{ مباراتنا الامس دي اسمها ذات النقالات ...
{ النقالة تطلع بي جاي .. ترجع بي هناك ..
{ هلال الساحل امس لاعب معانا بخطة اربعة نقالات وراء .. اربعة وقاعين في النص .. اتنين للمقابضات قدام
{ وكله كوم والحكم الامس ده كوم تاني ...
{ من بنين ده يامرسي ...
{ حكم مباراة الامس تحامل علي الهلال بصورة واضحة .. تغاضي عن شلاليت لاعبي هلال الساحل واحتسب مخالفات علي الهلال لاتستحق ووزع عليهم كروتاً في مخالفات ارتكبت ضدهم
{ لولا ان هدف بشة كان واضحاً وصريحاً ومافيهو غلاط لما احتسبه الحكم
{ علي من يدعي ان الحكام يجاملون الهلال ان يشاهد مباراة الامس ليتاكد بنفسه من تحامل الحكام علي الهلال
{ صحيح اننا لعبنا كرة فقيرة وفطيرة ولم نقدم مايشفع لنا كفريق كبير لكن المباراة للاسف لعبت علي ظهر النقالات
{ استهترنا بالخصم ولم نهدد مرمي هلال الساحل بكرات حقيقية وكان بامكان هلال الساحل ان يحصل علي التعادل لولا بشة
{ في كل مرة ينزل بشة بالاشارة ويأتي بالبشارة
{ دخل بشة قلوب الهلالاب من اوسع ابوابها واثبت انه مكسب كبير للهلال
{ فريق تخندق طوال زمن المباراة في نصف ملعبه ولعبها علي النقالات والشلاليت من الصعب تقبل تعادله معنا
{ لم نلعب المباراة وسجل فريقنا غياباً غريباً عن ارض الملعب .. كرات عشوائية وتمريرات ميتة وهفوات غير مبررة في التمرير والاستلام
{ المعز الذي لعب امس لايستحق ان يكون حارسنا .. مستهتر وخروجه من المرمي عشوائي وخطير لو امتلك هلال الساحل مهاجمين جيدين لاحرز في شباك المعز واستفاد من اخطاء الحارس الدولي
{ لم يلعب الهلال امس واكتفي ببشارة بشة
{ علي ميشو ان يعيد ترتيب الحسابات قبل مباراة الجيش
{ واضح ان جماعتنا في الاتحاد المحلول والمعترف به شغالين برقيات للفيفا وماشغالين بالحاصل في البلد
{ فجأة النت بقي قوي في مقرات الاتحاد كلها والرسائل شغالة ارسال واستقبال
{ محل النت قوي .. مكان قاعد شداد الرسائل عايزه الاعاده كلها ..جزئية مادايرين .. { الوزير مايتدخل والمفوضية ماعايزنها
{ محل النت ضعيف زمان .. مكان قاعد معتصم مع جماعته .. صلحوا النت وبقي شغال تمام .. والرسائل طلباته واضحة اعادة جزئية في منصبي الرئيس وامانة المال .. { والحاجات الباقية الصغيرة صغيرة مافي خلاف حولها
{ اول ما الموضوع بقي عند الفيفا .. النت اتصلح والجماعة بطلوا الشغلة وبقوا مقابلين الفيفا
{ تربيطات محلية بالنهار ورسائل للفيفا بالليل
{ ماعارف الناس ديل رمضانهم ده كيف مع الانتخابات دي ورسائل الفيفا
{ الزول لازم يعمل حسابه انتو قايلين الزول البكضب بالانجليزي في رمضان مابحاسبوهو ...
{ غايتو في واحدين كده بكون موضوعهم جوع وعطش ساكت
{ تاريها مقاعد الاتحاد دي مريحة ونحنا ماعارفين ...
{ تسمع كلامهم بعد الانتخابات تصدق ..تشوف افعالهم ايام الانتخابات تستغرب
{ كنكشة في الكراسي وتربيطات وجري وتعب ونشاف ريق
{ ياعمنا .. ماقلتو زاهدين في المناصب .. البتعملوا فيهو ده عيب
{ الناس بشوفوا فيكم ...
{ في كل الاحوال الاتحاد الجاي مابيقدر يفلق راسنا بالزهد في المناصب وخدمة الكرة السودانية بعد البكاء الشفناهو ده والكنكشة في الكراسي
{ زول بيكتب للفيفا الخطابات دي كلها مايكلمنا عن زهد المناصب
{ حسب الاحاديث الصادرة عن مجموعة شداد واضح أن الرجل سيسوط الانتخابات { سواطة دولية في حال اكتشف انها تمضي في اتجاه فوز معتصم بالرئاسة .. ولديه مسوغاته المقبولة عند الفيفا
{ ماعايزين تجمدوها .. خلوا شداد يفوز ...
{ معتصم للتجميد .. وشداد للفرهيد
{ فهمتو ليه المريخاب بيمهدوا للتجميد ...
{ عارفين شداد مابفكها بي اخوي واخوك .. لومافاز بجمده لينا ..
{ تفتكروا وفد الفيفا حايجي محايد ويقيف علي مسافة واحدة من المتنافسين .. ما اعتقد
{ وفد الفيفا حايكون شدادي اكتر من الزول العارفنو داك .. ولو ما شداد قال الانتخابات نزيهة وفد الفيفا ماحايعترف بيها
{ تربيطات معتصم دي حدها الصندوق .. لوفاز شداد بمشي يشرب ليهو موية باردة ويقول مانزيهة
{ طبعاً شداد لو فاز الانتخابات دي نزيهة وشفافة
{ والوزير موقفه شنو .. حايسكت علي الموضوع ...
{ بصراحة الوزير ماقصر معاهم .. ساعدهم قدر مايقدر ...
{ ما قدروا يحافظوا علي الانتصار
{ الموضوع ده عنده علاقة بي تقدم المريخ علينا بي فارق ستة نقاط ومايقدر يحافظ عليهم ونجي نفوته
{ أصلاً نحنا بنقدم الصفوة وبعدين نزحهم عشان نشيل الكاس
{ الكاس تقيل يا اخي يمكن يقع يعور زول فيهم ...
{ يعني موضوع شداد ده زي موضوعنا مع الجماعة
{ تقريباً ..
{ لكن قائمة معتصم فيها هلالاب .. أهـا دي كيف
{ عادي الهلالاب كانوا رؤساء لنادي المريخ ... واجمل بطولاتنا كانت في عهد الرؤساء الهلالاب
{ واللعيبة ...
{ اللعيبة دي عادي .. بعد انخفاض المستوي بيلعبوا في درجات صغري .. عنك لاعبين هلالاب كتار لعبوا في الاندية الصغيرة قبل الاعتزال .. لكن بيعتزلوا هلالاب ...
{ علي الكاردينال ألا يثير حفيظة الهلالاب بالحديث عن عودة كلتشي لفريقنا .. هؤلاء المحترفين ذهبوا من الهلال مشيعين بلعنات الجمهور .. ولن نقبل عودتهم لصفوفنا
{ كلتشي لم يقدم لنا جهداً يستحق ان نبكي عليه قارياً .. معظم اهدافه محلية ولو كنا سنبكي علي محترف فان الفصيح قودوين هو المحترف الذي احرز خلال مسيرته معنا اهدافاً مؤثرة
{ قودوين غير مرحب به في فريقنا فكيف نرحب بكلتشي
{ قد نمازح الصفوة بكليتشي وطمبل .. لكن عودتهما الي الفريق الازرق غير مرحب بها ..
{ فنياً لدينا هجوم مميز وكليتشي وطمبل اقل بكثير فنياً من سادومبا وكاريكا وبكري المدينة واحمد عادل
{ هجوم الهلال الحالي لايحتاج الي لاعبين من عينة كليتشي وطمبل وقودوين ...
{ نحن يا كاردينال لانغازل لاعبي الفرق الاقل منا .. فلاتغازل كليتشي
{ المواهب تذهب من فرقها لاهلي شندي وبعدها للهلال
{ المتعة التي يوفرها بكري المدينة لايستطيع كليتشي ان يمنحنا اياها ... اما عمايل سادومبا فلايستطيع سبعتاشر كليتشي ان يستوعبها
{ قالوا ناس جميعابي الكاملين عايزين المباراة يعيدوها ... ومشتكين
{ عيدوها .. بتاخدوا اربعين