• ×
السبت 15 مايو 2021 | 05-14-2021
معاذ ابو مؤيد

من قروبات حماس لقروبات ونسه وكلام واتساب

معاذ ابو مؤيد

 0  0  2722
معاذ ابو مؤيد
ياناس القروبات حيرتونا من شعله من النشاط ووقفه قويه خلف الكيان بقت ونسه وكلام واتساب وغنم ناس بكري سرحن والنقاش بقي جااايط وامور هامشيه والله عزرناكم
وعارفين السبب لكن كمان نعاين للكيان الاحمر الوهاج
ونسيب ناس الطاسه الضائعه مع اجتماعاتهم وتصريحاتهم بعد دا مفروض ننتهج نهج القروبات المخصصه بدل القروبات العامه يعني يكون قروبات تخدم الكيان بالمجهود طالما الناس بعدت عن الدعم المادي
يكون الدعم بالمجهود وناس الدعم المالي يكون قروبهم هو الشامل
ليه مايكون في قروب الحرفيين للزعيم وقروب الاعلاميين الصفوة وقروب الاطباء والصحة للمريخ يعني كل اصحاب تخصص يتلمو في قروب واحد ويشوفو يخدمو الزعيم كيف بدل يتشتت المجهود ويتفرتق الرصاص
طالما الناس حاليا مجتمعه وهمها الزعيم خلونا نستغل الوضع ونتلم في قروبات مخصصه لخدمه الكيان
المال حاليا قل في القروبات وعارفين الوضع الاقتصادي عاصر الناس
ماعايزين المجهود يقل والمبادرات بدل تكون فرديه تكون جماعيه قدامنا تحدي كبير
ماتخلو الاختلاف حول لجنه التسيير يفرتق لمتنا الحلوه
قروبات التخصص تساعد الكيان والافراد وتفتح باب تقويه العلاقات كل زول حسب مجالو خلونا نخلي عالم الزعيم عالم جميل عالم اسري واجتماعي ورياضي
وكلام الواتساب مابخلص لكن الزعيم محتاج لينا ومحتاج لمجهوداتنا ومحتاج لتخصصاتنا يعني الحرفيين لو مع بعض في قروب بيعملو من النادي تحفه والاستاد لوحه
والاعلاميين لو مع بعض بتتكون اقلامهم خط الدفاع الاول للزعيم والاطباء ممكن يعملو ايام صحيه في النادي للاسر الزمن ماشي والمغادرة من القروبات كترت والسبب معروف السبب ماعايز ليه شرح والكلام دا نبهت منو زمان خلونا ننقذ مايمكن انقاذه ونتدارك الموقف
ومشرفي القروبات يساعدونا بنشر القروبات المتخصصه ويعلنو عن ارقام المشرفيين والصحفيين يعلنو في اعمدتهم
اصحاب التخصصات لو اتلمو مع بعض بيصنعو من الفسيخ شربات وبعد مانخلص المهمة ممكن نعمل قروب وداع الطاسه الضائعه نودع فيه ونقول وداعا ياظلام الهم ونطلع الجوانا فيه ونفضفض يكون قروب وداعي بمعنى الكلمة
خارج النص
يارضا ياخوي عالم الرياضة ماات بالروتين وماات بالزمن الضيق ودموعك غاليه علينا بس كمان نحن كل جمعه دموعنا جاريه عشره عشره علي حال البرنامج والروتين الممل يارضا ياخوي البرنامج دا اسبوعي مفروض يكون تحفه اعلاميه مش يكون جنازه بحر كده وكاس بطوله جيم دا كان تمسحوه وتتمروه بدل اثار الاصابع والغبشة الفيهو راجع اعداد البرنامج ومحاورو الشخص لو راجع حساباتو اكيد بتوفق
شاهد البرامج الرياضيه اليومية لاحظ اليومية في القنوات العربيه استفد من تجارب الغير زمان الغير بستفيد من تجارب السودانيين لكن اسه نترجااااك استفيد من العولمة الحوليك وتجارب الاخرين
ختاما
ارحمونا يرحمكم الله

ونحن علي المدرج ونتفرج وكل ناس قروب متخصص شايفين بصمتهم في النادي والاستاد والكيان روقو المنقه وخلو القروب فعال بدل ونسه غنم ناس بكري وحواشه ناس المك وورشه ناس ودالجاك
كلو ملحوق والحقو الزعيم قبل فوات الاوان
خصخصو القروبات وماحتندمو بدل الواحد مشتت نفسو في عشرين قروب والونسه واحده والاعمده واحده انضم لقروب مجالك وابدع في خدمه الزعيم وطالما العرب ماتفقو في انتخابات الفيفا خلونا نتفق نحن في مجتمع المريخ الكيان ونوحد القروبات ونكون نموذج في السودان
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019