شفوتنا الليله جو شفت وراء شفت كلهم سمعواالنداء والاستاد يادوبو نور من بدايه الدوري وحتي الان
جمهور يشرح العين مع انو لسه ناقص لكن الغايب عزره معاه
دايرين من هنا ولي قدام العدد يكون في زياده مش نقصان ماعايزين نفرات تاني
شفتو الفرق كيف اتلميتو ودعمتو النادي بالحضور والمال !!!
الناس تخلي الانتقاد الان عشان المركب عايزه الهدوء
عارفين الريس ومساعدنو تعبانين لكن هانت والجمعيه العموميه قربت نتكاتف عشان نمشي لي قدام ونعدي من وسط الزحام ونلاقي الطاسه الضائعه
عشان المركب ماشه للغريق والالتفاف مطلوب والغريق دا البطوله الافريقيه ودي بطوله النفس الطويل يعني علي مراحل
والتفافنا حاليا حيعبر بينا فتره مجلس التسيير...
ونكون في البطوله الافريقيه قطعنا شوط واتاهلنا للمجموعات
خلونا نعدي الموجه بالحضور والتشجيع
وامس قلنا الحضور حيغطي علي السلبيات والاخطاء
وكان لنا مااردنا حضور يفرح حضور يشرح والشفوت كانو في الميعاد والسلبيات اختفت
ثلاثه نقاط جات واخواتها حيجو بس خليكم قريبين
طالما في نقاط نحمد الله قاعدين في الصداره
نخلي الانتقاد حبه واللاعبين بشر لو ماحسو في استقرار اداري حيكونو في قلق عشان كدة نعزرهم حبه
الافريقيه الشهر الجاي يعني نبرف ليها من اسه
والعرس بيكون عندو قيدومه وحفلاتنا تدور من اسه عشان العرس يكون كااارب
نحن علينا التشجيع ونجيه المكان
يعني يرضيكم شكل الاستاد
ولا شكل النجيله
ولاالبيئة المحيطه بالاستاد
خلونا نتكاتف جايين علينا ضيوف
نكرمهم في الميدان وبره الميدان
واللاعب زاتو لو شاف اهتمامنا بالاستاد وحس بالامان مننا اكيد حيدينا خلاصه خبرتو
وامير كمال خير مثال حاسي انو من الجمهور قبل يكون لاعب زول حاسي بالامان منكم
والله اتمنينا يرتدى الكابتنيه علي طول زول قلبو حار وقبل دا كلو واحد من الشفوت شكلو كان بيدخل مباريات المريخ زمان اتعلم الشفتنه من شفوت المدرجات
شعار المرحله الجايه امير كمال كابتن للفريق عشان الغريق قدام محتاجين شفت زيو حاسي بنبض الجماهير
كابتن الفريق عايزنو شفت من الشفوت
ختاما........
نحن علي المدرج ونتفرج ومباراه امبارح اعادت لينا مدرجنا المسلوب بامر لجنه التسيير امبارح مدرج يفتح النفس لكن عايزنو لي قدام يفتح الشهيه للاعبين
