قرر الرئيس التحفة بيع وشراء نادي الهلال بتحويله كما قال الي شركة مساهمة عامة وفقا لقانون الاتحاد الدولي لكرة القدم، وقال لافض فوه انهم شرعوا في اجراءات تسجيله كشركة مساهمة عامة ، واشار الى مخاطبة الهلال لوزير الشباب والرياضة مرفقا معه المسودة وكل المطلوبات، وقال فيما يري النائم ان كل هلالي سيكون له سهم في الشركة المذكورة، هكذا في المطلق كل هلالي سيكون له سهم ، مع انه رئيس لنادي كبير وبحكم عمره الصغير في الادارة وجهله المفجع بكثير من التفاصيل الادارية، يفترض ان يحدد من هؤلاء الاهلة ، هلالاب الداخل ام هلالاب الخارج؟، هلالاب الولايات ام هلالاب العاصمة؟ الغريب انه لم يذكر الجمعية العمومية، احتمال ماعارف ، ماهو لسه مابعرف حاجة عن الهلال، ولابعرف حاجة عن الكورة، ولا بعرف عن القوانين التي تدير الكورة، عشان كده ممكن يكون ماعارف واكيد ماعارف انه ملف الهلال كنادي محترف موجود وليهو سنين والهلال بشارك بيهو في المنافسات الافريقية ، وهذا وفقا لقوانين الفيفا ، المصيبة انك ماعارف ، وماعارف انه الهلال والمريخ والخرطوم الوطني واهلي شندي بشاركوا افريقيا بهذه الملفات.
ولانه ماعارف وبضحك الناس عليهو ماعارف انه موضوع الاندية المحترفة ماعندو علاقة بتحويل الاندية الي شركات نهائيا، وبالتالي لاعلاقة له بالوزير عشان يرفع ليهو توصية ويطالب وفقا للفيفا، ده جهل اداري الا اذا كان يرغب في شراء النادي بهذه التمثيلية الساذجة، ويكون المشهد كالآتي ( هو رئيس مجلس ادارة النادي يبيع النادي ويشتريهو كده) ، ولانه مستعجل والفي قلبو علي لسانو ناسي انه في قانون بحكم الرياضة في السودان وبه تعريف لوضع الاندية كهيئات رياضية ، ولانه ماعارف ماشي للحكومة يقول ليها الفيفا قالت الاندية تتحول لشركات عشان تبقي محترفة، مع انه الفيفا ماقالت ولافي اي تجربة لتطبيق نظام الرخصة عندو علاقة بتحويل الاندية لشركات ، حتى في انجلترا الاندية المحترفة (من كل الدرجات عندها منافسة براها) بس عشان تعرف حتى الخليج بدورياته المحترفة ماحول الاندية لشركات، معقولة ياكاردينال عايز تبيع النادي وتشتريهو بالغت، وخاشي بانه الفيفا قالت، وعشان تعرف اكتر لانك ماعارف وبتقول (نكات) نظام الرخصة او الاحتراف في اقوال اخرى لايغير اي شيء من وضع النادي ، قول لي كيف؟ اقول ليك واديك مثال ، شايف نادي النسور مش تبع الشرطة ؟ والشرطة مؤسسة؟ هذا النادي لاتنطبق عليه مواصفات النادي المحترف او الذي يستحق الرخصة، قول لي كيف؟ اقول ليك، لانه اهم شرط في موضوع النادي المحترف فصل المال الخاص بادارة فريق الكرة عن المؤسسة ، بمعني ان تفصل مؤسسة الشرطة ميزانية واضحة تخصص لفريق وهو مبلغ يوضع كسقف لكل الاندية من الاتحاد السوداني الذي يخطر به الاتحاد الافريقي المسؤول الاول عن المتابعة، وهي تفاصيل كثيرة عايزه قعدة وعشان تفهما وتستوعبها قصة طويلة، المهم ان هذا المبلغ يوضع في بنك بحساب معروف عند الاتحاد تتم مراجعته كل فترة، وهذا المبلغ لاعلاقة بميزانية الشرطة التي تصرفها علي مؤسستها ، اظن واضح ، مش كده وبس حتي الادارة المسؤولة عن الكرة بمافيها الجانب المالي جسم اداري منفصل تماما عن الشرطة والطريقة التي تدير بها الشرطة مؤسستها.
وماينطبق علي نادي النسور المنتمي لمؤسسة، ينطبق علي الهلال النادي الجماهيري الكبير، تفصل ميزانية الفريق تماما عن ميزانية النادي بتفاصيلها المختلفة وتوضع في بنك ويعين جسم اداري للاشراف عليها ، هذا الجسم له جسم مسؤول عنه في الاتحاد السوداني لكرة القدم ، وجسم اعلي في الاتحاد الافريقي، ببساطة الموضوع ماعندو اي علاقة بتغيير هوية النادي، وهو كده بوضعو الحالي ممكن يبقي نادي محترف. فهمت ولا لسه؟ بالغت لكن عايز تبيع النادي وتشتري، قلت لي كل هلالي يكون عندو سهم؟ وانت عندك كم سهم ؟ ده رئيس مجلس ادارة نادي الهلال .. تخيلوا ؟