غايتو الفلس مابعيبو بيه الناس لكن لم الوضع يكون بضبابيه وعدم مصداقيه والشغله تجوط والكل يصرح والناس ماعارفه شايته وين دا الشي البجنن الناس
معقوله رئيس قطاع رياضي متواجد خارج السودان ويرفض تعيين مدير كره ويتم تكليف شخص اخر يسموه شنو
ولم الوضع المالي يتفاقم بالصوره دي والمجلس ماقادر يتحرك ويخلق بدائل يسموه شنو
هو مجلس التسيير لم قبل عرض الوزير بالتسيير ماعارفين انو الشغله ماليه واداره فنيه
معقوله بس تقبل بحاجه وماعارف تسيرها
اها دعم القروبات زااااتو بقي ضعيف حتمشوها كيف
وانتو مصرين علي اكمال مده التكليف لشنو وعشان منو
القاعده الجماهيريه المريخيه متملمه وكل القروبات والمجالس الرياضيه المريخيه تطنطن وماراضيه الوضع
حسو شويه وعجلو بالجمعيه العموميه
المريخ دا نادي الشعب
يعني مامزرعه عشان تمشي بالبركه ورزق اليوم باليوم
دا كيان ومؤسسه رياضيه محتاجه صرف
ولغه كره القدم الحديثه واضحه
اسمها الاستثمار الرياضي بالله عليكم حسو بالجمهور المغلوب علي امره
انتو لاداره فنيه نجحتو
ولا اداره ماليه نجحتو
قاعدين لشنو ولحدي بتين لحدي مالمركب تغرق ويغرق الفيها ولا الفهم شنو
بالله عليكم مجلس يسجل لاعب وزنو هو ومدير القطاع الرياضي واحد
طيب ابوجريشه مايلعب مدافع برضو
يعني سجلتو اللاعب بطيخه مقفوله ماشفتو ليه فيديوهات في اليوتيوب
ياخي بعد ماوصل ماشفتو شكلو ساكت
معقوله كل شي عندكم بالحجم العائلي
مدرب صوتو بالحجم العائلي
لاعب مدافع وزنو بالحجم العائلي
فلس مفلسيين بالحجم العائلي
اداره فنيه راسبين فيها وبالحجم العائلي
ليكم كم شهر بالله وانتو علي راس الهرم
تعالو بالورقه والقلم احسبو لينا انجازتكم
صدقوني حيكون فشل برضو بالحجم العائلي
وسمعنا تحت تحت عايزين تترشحو للمجلس القادم
بالله انتو مكلفين ماعرفنا ليكم حاجه عايزين تجو منتخبين يعني الرماد كال حماد عايزين تقضو علي الاخضر واليابس
يعني البناهو غارزيتو في السنه الفاتت عايزين تمسحوه في شهور
الناس ماصدقت حصل انضباط في الفريق وعمل فني
اسه لا انضباط لاعمل فني ولاحتي رواتب
المقعدكم شنو
لو غلبتكم طلعو بيان عديل وناشدو رجالات المريخ
لوغلبتكم عجلو بالجمعيه العموميه
لو غلبتكم قدموا استقالتكم
معقوله الحال يصل بينا لي كده
المستفيد منو من الحاصل
الايدي الخفيه لازالت تعبث بتاريخ المريخ
اصحاب المصالح والسماسره قاعدين لينا في حلقنا مالكم
ماكفاكم تلهطو فيه من سنين وسنين
خلاص المريخ صدرو نشف كفايه رضاعه مصيتو دم الزعيم
وياريس ونسي الرياضه عايزه المال والشفتنه وللاسف انت الاتنين ضعيف فيهم منتظر شنو
مايلحقوك عادل جمجموم رئيس نادي الاتحاد السعودي جمهور الاتحاد زفاهو زفه من امها وماخلو ليه حته ينوم عليها وممكن ترجع لليتيوب وتتفرج
نحن والله شخصياتكم فوق راسنا من فوق
لكن كمان معشقونا الزعيم دا مابنرضي فيهو
المريخ خط احمر زي لون شعارو
المريخ نادي الشعب
المريخ هو متنفسنا الوحيد
ذي ماستلمتو مفتاح النادي بكل هدؤ والناس استبشرت بيكم خير
ارحلو بهدؤ واعملو لينا جمعيتنا سريع سريع
عايزين جمعيه عموميه بمن حضر
قدر العضويه السجلت
ماتوصلونا مرحله الغليان
بيئه المريخ بيئه جاذبه ماتخلوها بيئه طارده
ياجماعه الخير الشغله غلبتكم عديل سيبوها حواء المريخ ولووودوممكن تجيب صاحب الفكر والمال
يعني التسيير دا ماحل دائم دا حل مؤقت
الزمن يسرق الجميع والمريخ مقبل علي البطوله الحلم
والناس سقف طموحاتها بقي مرتفع يعني اقل من النهائي مافي زول حيقتنع
يعني مامكن بعد ماعايزين نعرش صبه عايزين ترجعونا للسكن في الجالوص
ختاما
ارحمونا يرحمكم الله
ونحن علي المدرج ومنتظرين الجمعيه العموميه بنفس لهفه الانتظار للبطوله الافريقيه
يعني ماتخلونا بدل نتفرج من المدرج الناس تتفرج فينا وتشيلو حالنا
فلسكم حيغطس حجرنا
