خطاب جديد.. واريكا عميا...!
 المعركة تستمر بأمر الفيفا لا الوزير...
 وخطاب جديد اقتضى أن تكون هنالك مسرحية جديدة في الاكاديمية..
 وبعد استخدام سلاح البتر دخل علينا أخوة مجدي بسلاح جديد اسمه الطرد..
 في دقائق وكمن اكتشف احدهم قنبلة على وشك الانفجار فتم بسرعة مذهلة اخلاء المبنى من كل اهل الشأن...
 بعض الاعلاميين كانوا يتأهبون لاداء فريضة الصلاة تم منعهم...
 الموظفون المشتبه بانحيازهم لشداد قيل لهم اذهبوا منازلكم اليوم عيد الفلاح..
 ربكة..جوطه...اضطراب..هلع...وبشتنه ألف...
 والسبب أن الفاكس صفر...
 وعندما يصفر الفاكس فان القلوب توجف والرجفة تصل حد تطاقش الركب في ثنائية متفردة ...
 رمضان ببقى اتنين..رمضان الشهر الكريم ورمضان الفيفا...الاول فطوره عند المغيب والتاني عطش دائم والموية سراب ...
 ماذا حدث ولما هذا الهرج والمرج والضوضاء هل انطلق مدفع الافطار نصة نهار..؟ اكيد دا مدفع ناس وارغو كدي خلوا الرجفة وورونا...
 الفاكس صفر اذن هنالك رسالة...بالطبع مفرحة لشداد.. وملغومة لأهل معتصم ..متعووووده...
 واختفت الرسالة في ثواني بعد أن تم الاخلاء وباحكام...
 وكيف لا يكون الاخلاء باحكام وناس مجدي وكمن نالوا دورة تدريبية خاصة فائقة الدقة عند اهل الدفاع المدني شعبة المطافيء...
 وهنا لا بتر فقط بل يبدو انهم تجاوزوا هذه المرحلة واستعاضوا عنها باستخدام الاخفاء...
 الخطاب قال بوضوح ألا استثناء لاي منصب وكله يخش الصندوق...
 لا بنعرف مجدي لا طريفي ولا تزكية وحتى قرار التحكيمية لم يكن صحيحاً لأن الجمعية هي التى تعلن الفوز بالتزكية لا المفوضية..
 اذن ما قبل الجمعية لا علاقة له بالتزكية..
 المرة الفائتة بتروا الجزء المهم وهنا وجدوا أن الرسالة باكملها مهمة فآثروا ان يخفوها...
 ومن شدة الغباء الذي يتحكم فيهم هذه الايام إثر الهلع من فقدان المناصب نسوا ان هنالك من يستطيع ان يجد الرسالة سيما أن الفاكس لا يوجد في منزل احدهم...
 الرسالة وصلت عتبة الوزير المختص...وللمرة الالف يجعلونه ايضاً يتخذ القرار غير السليم ويضعفون موقفه في القضية...
 والله ان هذا الوزير رجل طيب وحقيقة مسكين لأنه بات يلدغ مئات المرات من هؤلاء وهم يستمرون في اضعاف موقفه وهو يصدر في القرارات التى تلحس في ثوان من قبل الفيفا...
 لم يستوعب بعد وزيرنا الهمام أن من يعتمد عليهم على ابلاغ المعلومة هم مدفوعين لاجل حماية مواقعهم وحسب ولا علاقة لهم بالحقيقة المجردة الا وليسأل نفسه لماذا يحرفون عنده المعلومة..؟
 ثم عزيزنا الوزير ألم تسمع بحكاية الـ(91) ألف دولار...؟
 91) ألف دولار دخلت خزينة الاتحاد يوم 25 قبل الانتخاب غير الشرعي لمجلس الادارة ...
 وخرجت يوم 27 من البنك وتبقى منها 800 دولار...
 دخلت نملة ولهفت 91 الف دولار وخرجت...
 لم يستووا بعد على الكرسي وصرفوا 91 الف دولار وجاء الرد الاقبح من الذنب عندما سئلوا فكان الرد انها مصاريف ترحيل اعضاء الجمعية العمومية...
 الاستاذة هنادي الصديق سألت بشجاعة رئيس اتحاد 26 غير الشرعي عن اختفاء المبلغ الباهظ فاذا به يجيب بلا وعي انه استخدم لمقابلة ترحيل اعضاء الجمعية...
 اكيد اعضاء الجمعية اتوا بالطائرات الرئاسية الفخمة...
 واكيد انهم اتوا الى الخرطوم من الولايات عبر لندن وفرانكفورت...
 ياربي انحنا نكون داقسين والولايات المقصودة هي الولايات المتحدة الامريكية..؟
 احتمال انحنا قرينا الابتدائي بالمساء وناس معتصم خريجي اكسفورد..؟
 يا وزير اسأل عن هذا المبلغ تتضح لك الحكاية الضحكت الغنماية..!
 --------------------------------------------
الليمبي أبو تكه..!
 الليمبي جات...يا هلاااااااااوة...الدنقلاوية اقتحمت ديارنا والصوت مبحووووح..
 حمد الله على سلامتك يا دنقلاوية صوتك دا مبحوح من شنو..؟
 صوتي مبحوح من حال الوصيف المجروح...هليلك يا وسيفه...هليلك يا هبيبه...هليلك يا الشربتي ما رويتي ...هليلك يا اللقيتي وما استفدتي ...هليلك يا الوقعتي على هيلك...
 ثم انشدت بقية مرثيتها..
 الليمبي ابو برمودا يا هليلا...
 الليمبي بقت ضعيييييفه وعدم الضورارات هدت هيلا...
 الليمبي عتشانه وجات جارية كربك كربك كربك للقروش عشمانه..
 الليمبي تاني برمودا مافي لأنو جمال شتت والوسيفه بقت بدون والي..
 غايتو ناس ضقل ديل حيملوك سراويل ابوتكه لمن تعرفي هاجة...
 هليل زمن البرمودا اقعدي غني يا كروجر ...
 وصدقت الدنقلاوية فيما قالت ...
 فالليمبي يعود في زمن الفاقة والعوز والفقر البودي اشارات المرور..
 ناس ضقل ديل بقفلوا موبايلاتهم من الساعة حداشر وتاني لو فتشتهم في الكرنوس بيت بيت ما بتلقاهم..
 والليمبي المرة دي جاي داخل علينا بي تمانية جيجا...
 اول قرار اصدره جاء بالحجم العائلي اي تمانية جيجا وهو يسأل عن طمبجها وقام نساها...
 ويقال انه اوصى الجهاز الفني بضرورة اشراك جبرة في اللقاء القادم لأن بلة جابر زولن عقله طاير وجوه الميدان شغال فرفرة وفي المهام مشاتر وفاير..
 واول ما شاف طارق مختار قال دا رجعوه سريع وما بقعد معاي دقيقه...خلااااص انا ناقص دبابات مجنزرة...
 مسكين الليمبي يا ما تشوف مهازل..
 وعيال الدلاقين قالوا ايه .. زمن الليمبي الهلال ما غلبنا..
 والله المرة دي في صفرجت ما تغلبونا خليكم لمن تقابلوا ناس سيدا...!
 وبعدين مزمز والكورال.. شكر الله سعيكم شكركم ما بندوروا..
 مزمز وود الشريف وسماعين وفروا مدادكم لفريقكم المحتاجكم انحنا متكفي..ولا خلاص قررتوا تشربونا زي ما شربتوا الدلاقين..؟
 الدلاقين شنو انتو ما سمعتو النغمة الجديدة...؟
 الوسيفة بقت شغاله بطريقة (اريكا عمياء) كما وصفها مزمز...
 اريكا عميا.. ؟ لا صفره...
 اريكا عميا.. ؟ لا حمرا..
 اريكا عميا.. ؟ قومي كده عمى كباسه..!
 بعدين اريكا عميا دي لعبة بنات ..وكمان لو اضفنا ليها لافتة ألتراس الوصيفاب بتاعت (العبوا كالرجال أو اتركوا نادي الابطال ) بنعرف حاجة..
 حااااحا...!
ابقوا معي...!
و...للشريان ختام...!
 الوزير سوار في الديار..الله اكبر ولله الحمد...
 والوزير اسامة ونسي معانا والوصيف بعد كده ما همانا...ونسي ويا وسيفه للشمارات بعد كده بس انسي...
 زيارة تاريخية للوزيرين واحتفاء من جانب الجماهير يليق بقامتيهما لأن سوار قال نحل المشكلة مع الفيفا عشان خاطر الهلال..
 والكاردينال في قلب المعركة مع الابطال...
 والجماهير عرفت كيف تحي انبل الرجال...
 اشرف كعادته اعلن عن تكفله بطائرة خاصة الى بورتسودان مع حافز التفوق للابطال..
 الوزير اعلن التبرع باتنين ألف لكل لاعب وقال كل مرحلة وحافزها بره..
 وسيدا مبسووووط اربعة وعشرين قيراط...فلقد عرف قيمة اهل الهلال..وعرف كيف تعز الدولة الهلال...وعرف كيف ان للهلال رب يحيمه وشعب بالمهج عند الازمات يفتديه...
 يا مزمز اريكا حوصا ككيف..؟
 وكمان ود الشريف بيتغزل في الهلال..خلاص عايز تلحقنا امات طه..؟
 غايتو سوق السراويل في سعد قشرة بقى بالدولار ..قرب يا ضقل واختار وما تحتار ...
 والليمبي دا عايز ليه تكه سلبه عشان تربطوه في الكنبه...
 عشان تضمنوا ما يقوم ينقز زي نقيزو العجيب داك التقول ساكي ليهو جداد..
 وعجبي من معتصم ومجدي وبقية الكورال ..
 تأجيل لقاء الهلال واهلي مدني لا سبب له سوى اضعاف الهلال..
 والهلال يستفيد من هذه المباراة لكي يستعد بصورة افضل للتباري الافريقي المرتقب..
 وهيثم مصطفى كان في قمة الغضب لانهم كلاعبين كانوا يعولون على اداء هذا اللقاء للاستفادة منه..
 ولكنه الفصيل الأحمر الذي كان تأجيله للمباراة بسبب واه للغاية لان اهلي مدني لديه لاعبين فقط وليس أربعة أو خمسة مع المنتخب الشبابي..
 عشان لاعبين يتم التأجيل...وعشان ينقذ الوصيف من الوقوع في براثن النزيف يتم ابعاده عن الامل..وعشان خاطر الوصيف يتم رفض الشكوى المضمونه لهلال كادوقلي..وبرضو هنالك هلالاب يقفون بجانب معتصم ولا يمانعون اذا كان القرار بالتجميد...!
 فوقووووا ربنا يرحمكم في الشهر الفضيل...
 يا قمشه للوصيف ما تنسى...
 يا قمشه بيييييييع وانقذ اولاد بلدك من الفضيحه...
 نرحب بالأخ الزميل ياسر مختار وهو يزور الديار في اجازة بين الاهل والاحباب..
 ياسر مختار صاحب موقع (كفر ووتر) الذي انطلق كالصاروخ محملاً بالمهنية التى تفتقدها بعض الصحف عندنا...
 اتقمشي..!