• ×
الجمعة 29 مارس 2024 | 03-28-2024
بابكر سلك

قيم الهلال والكدارة البدون رباط

بابكر سلك

 8  0  3549
بابكر سلك

* كتبت فطومة اختي ما يلي
* الهلال قيم ومدرسة واخلاق
* وكتبت في نفس المقال
* ولكن لابد ان يعلم هؤلاء ان الامر الآن في صورته النهائية عبارة عن قضية ستستمر الى آخر مراحل التقاضي وان وصلت الى ثلاث سنوات قبل أن يتم تحويلها الى الاتحاد العام ليتم خصمها من دخل المباريات ويتم تسليمها لهم بالقطاعي لتبلغ قيمتها في ذلك الوقت ثمن شراب وكدارة بدون رباط
* انتهي كلام فطومة
* يعني قيم واخلاق الهلال هي مماطلة اصحاب الحقوق الى أن تفقد قيمتها
* هكذا هي قيم واخلاق الهلال حسب ما حدثتنا فطومة اختي في مقالها
* الموضوع كان مطالبة النقر اخوان وطارق احمد آدم بحقوقهم طرف الهلال
* الموضوع ده روشا شايفو عيب
* وفطومة شايفاهو عيب كبير جداً
* بل نكرا على النقر اخوان وطارق احمد آدم ما وصلوا له من نجومية
* وقالوا لولا الهلال ما كان في زول عرفهم
* منطق معوج يا روشا يا اخوي
* اولاد العاتي ما لعبوا في الهلال والبلد كلها بتعرفهم
* محمود صالح ما لعب في الهلال
* والسودان كلو بعرفو
* بل التوانسة بعرفوهو
* يوم الافريقي التونسي اداكم اربعة في استادكم
* وقمتوا استعنتوا بمحمود صالح
* اليوم داك التوانسة عرفوهوا
* في زمن النقر الكبير في لاعب في الهلال اسمو حسن بتعرفوا يا روشا ؟؟؟؟
* سمعتي بيهو يا فطومة ؟؟؟
* في زمن النقر الصغير الهلال كلو كان النقر
* لمن جا من السعودية
* من المطار للميدان
* ايام فلقتونا وجع وجع النقر رجع
* النقر جا
* نسيتوها يا روشا ؟؟؟
* الوكت داك كان في زول اسمو علي بلعب في الهلال
* في زول بعرفوا ؟؟؟؟
* اما طارق احمد آدم
* السيد وزير الدفاع كما اطلق عليه الناس
* لو غاب كان تمرينكم بتلغي
* سكنتوا في الديم سكنه
* في الوكت داك كان في باك في الهلال اسمو السر
* في هلالابي بتذكر السر منو ؟؟؟؟؟
* لاتبخسوا الناس اشياءهم يا روشا
* التلاتة كانوا نجوم كبار
* ولولا مستواهم العالي لما قاتل الهلال في تسجيلهم
* ولولاهم يمكن كان يكون مافي هلال ذاتو
* لأنهم هم من جعلوا الهلال طرفاً للقمة بفضل مستوياتهم في الحقب التي لعبوا فيها
* ووقتهم في الموردة كان في اب كدوك والصياد وود المبارك وبريش وحسن حمد
* ديل ذهبوا
* فهل بقيت الموردة ضلعاً ثالثاً للقمة ؟؟؟؟
* أدوا الناس قروشهم بطلوا بطبطة
* فما يطالب به النقر اخوان وطارق وزير الدفاع ليس بدعة
* انه بدل فصل تعسفي تعرفه قوانين العمل
* وكيف تطالبون الناس بترك حقوق اقرها لهم القانون؟؟؟
* وكيف تأخذون مطالبتهم بحقوقهم مأخذاً عليهم ولا تأخذونها مأخذاً على ابي كسكتة بوصف انه قصر في الايفاء بحقوقهم ؟؟؟
* غايتو يا فطومة
* بدل تستخدموا قيم الهلال واخلاقه في مواجهة الناس ديل
* حقوا تدوهم حقوقهم عشان على الاقل يجيبوا بيها كدارة بي رباط
* او اقول ليكم
* شوفوا حقوقهم كم
* ادوهم ايراد صحيفتكم لفترة
* لمن يشيلوا حقهم
* منها كردنة ما يتعب في السداد
* ومنها ناس النقر وطارق ما يستنوا لمن حقوقهم تجيب ليهم جزمة بدون رباط
* ومنها تكونوا ساهمتوا في مسيرة الهلال الجوهرية
* قلتوا شنو؟؟؟؟؟
* ايها الناس
* الهلال في افضل حالاته المادية
* ما قادر يدفع حقوق الناس
* واذا طالب الناس الهلال بحقوقهم
* الحرب تعلن عليهم ويهدر دمهم
* قانون العمل يقر راتب الشهور المطالب بها في حالة الفصل التعسفي
* وازيدكم يا نقر اخوان وطارق الوزير
* في شهر سابع اسمو بدل انذار
* انذروكم ؟؟؟
* لو ما انذروكم عدلوا العريضة
* اصلوا العملتوهوا نسوهوا ليكم
* المهم
* مستجد النعمة دايماً مخلوع
* اديك شربات ولا اولع ليك النور
* مدرجات ما مكملة الجهة الشرقية من الاستاد
* سموها طابق
* وروشا كمان بطالب باحضار الريال او باريس سان جيرمان او المان يونايتد
* لاحظتوا روشا ما قال في الخيارات
* او البايرن او شالكا او دورتموند
* او برشلونة
* برشلونة العزمت جمال الوالي احتفالها
* وكلنا شفنا كيف لابورتا قاشر بي جمال
* معقولة يا روشا
* حبة اسمنت مايل زي صواني العرض بتاعة الفراخ المشوي في بترينات المطاعم
* تقول ربما فاقت البنية التحتية الاولى !!!!
* حتي حقوق الراحل المقيم محمد علي زروق الذي وقف على بناء استاد الهلال طوبة طوبة
* الغداء بطلع من بيتو لمن الاستاد انتهى
* ساكن سكنة في النادي والاستاد
*بني الاستاد بالطوب الاحمر
* وبني بيتو بالجالوص
* معقولة يا روشا تقول ربما فاقت البنية التحتية الاولى؟؟؟؟
*الراجل الله يرحموا برضك مطالب بحقوق ولا شنو اهدرتوا حقو كده
* وطلعتوا انجازو كدارة بدون رباط ساي !!!!
* غايتو بي طريقتكم دي
* يوم بتقولوا البابا هو الكاردينال ذاتو في عرف الكنيسة وفهم الكديسة
* البابا ذاتو حقو راح مع كردنة يا فطومة
* المهم
* روشا يتحدث عن آدم الكاردينال
* آدم الكاردينال ده عرفتوهوا ؟؟؟
* ده القالوا ليهو يا آدم خش جوه جيب تمنمية
* عارفنها لي شنو كانت ؟؟؟
* كانت لي بكري
* وقام آدم دخل يدو في جراب القروش
* قرصتو عقرب
* نفضها قرصت كردنة
* ولي الليلة القرصة حارقاهم
* دوشت راسهم
* ماشفتوا كردنة من ديك ولبس كسكتة
* كان ملصها الراس بلف
* وروشا قال
* آدم بحر دار وده لي زولاً من ناسنا في معسكرنا في اديس مصاريف وهدايا
* تعرف يا روشا
* العراب مستعدين نرجع ليهو بكري وباقي لعيبتنا هواده
* بس هو يجي اديس
* بجي ؟؟؟
* خليهو يجي
* كان بالكسكتة او بالطيارة او بالركشة
* بس هو يجي
* بجي متين ؟؟؟
* بحر دار بحرها هايج
* بغرق طوالي يا روشا
* مالو ما جا !!!!!
* اجي !!!
* ايها الناس
* «إن تنصروا الله ينصركم»
* آها
* نجي لي شمارات والي الخرتوم
* كان شفت يا والينا
* رسوم الاراضي كترت علينا
* ان كان القبالك باعوها كلها وحتة ما خلوها لينا
* حسب ما قلت لينا
* حقو انت رسوم الاراضي تخفضها لينا
* خفف علينا
* عشان الوالي البعدك ما يقول القبالنا المواطن مصوهوا كلو ومنو شيء ما فضلوا لينا
سلك كهربا
ننساك كيف والكلب لما شاف رسوم تجديد الحكر قال احر انواع الغربة لما تحس انك اجنبي في وطنك جر امشي الكلب ود الكلب ده بقول حكم كمان
والي لقاء
سلك
امسح للحصول على الرابط
بواسطة : بابكر سلك
 8  0
التعليقات ( 8 )
الترتيب بـ
الأحدث
الأقدم
الملائم
  • #1
    خالد 01-06-2016 03:0
    بكل اسف مستوى متدني للاعلام الرياضي تخيلوا ان مثل هذا الكاتب وامثاله هم صناع الرأي العام الرياضي؟ تخيلوا انهم من "يثقفون" رجل الشارع الرياضي.. اقترح تخصيص صحف للصحفيين المشجعين من امثال سلك ومزمل ومحمد عبد الماجد ونبحث للنوعية النادرة من الصحفيين المحترفين لنضع نواة لصحافة محترفة ترتقي بكرة القدم السودانية. هناك الكثيرون لو وجدوا الدعم وطبعا ليس الدعم المادي بل الدعم المعنوي يمكنهم القيام بذلك

    تمعنوا في هذه الكلمات: (روشا يتحدث عن آدم الكاردينال
    * آدم الكاردينال ده عرفتوهوا ؟؟؟
    * ده القالوا ليهو يا آدم خش جوه جيب تمنمية
    * عارفنها لي شنو كانت ؟؟؟
    * كانت لي بكري
    * وقام آدم دخل يدو في جراب القروش
    * قرصتو عقرب
    * نفضها قرصت كردنة
    * ولي الليلة القرصة حارقاهم)..

    هل هذه صحافة؟ بأمانة كده والغريب انهم يكتبون في الصحف ويظهرون في القنوات الفضائية!!!
  • #3
    بكرى النحاس 01-06-2016 12:0
    كلام نابع من حقد وغيظ لانك تركت كل الانتوا فيه وبتتحدث عن توافه الامور انت عامل فيها بتمزح ولاكن غليانك يفضح اساريرك البتتحدث عنه ده كله شأن داخلى لايخصك .الشىء البخصك هو معسكرك فى اثيوبيا الماراضى يكتمل كل يوم يذهب واحد
    والناس خلاص مسكراتها انتهة بطلوا السخف واهتموا بالمفيد .
  • #4
    سامي 01-06-2016 12:0
    مسكين إعلام المريخ ، بقى يهضرب وما عنده غير الشتيمة. الضرة فعلاً مؤلمة
  • #6
    اللدر 01-06-2016 07:0
    ما فهمت أي حاجة من هذا العبط .....

    جريدتنا الحائطية ونحن فى المرحلة المتوسطة ، كانت لغتها أفضل من هذا الهراء
  • #7
    سيف حسان 01-06-2016 12:0
    انت يا ابني لأتعرف عن الهلال شيء الهلال ليس كورة بل تاريخ الحركة الوطنية كلة خرج من الهلال صلح معلوماتك وبطل كلام لإِيلاَف بصحفي يكتب في صحف مقروءة عبر الانترنت الصحف اليومية أنا بقراء كل يوم وانا في اخر الدنيا ياحليلراجالات الصحافة منة من ات ومنة من ينتظر ومابدلو تبديلا عدل نفسك واكتب ماينفع الناس وخليك من لغة الحريم دي يا أستاذ
  • #8
    bushar 01-05-2016 09:0
    دا شنو العبط دا ياسلك بالله مريخاب هلالاب في أحد إستفاد حاجة من الكلام الفاضي دا يا أخي إحترموا نفسكم سواء إنت ولا فطومه النكرة التي تتحدث عنها
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019