• ×
الجمعة 16 أبريل 2021 | 04-15-2021
بابكر سلك

الراجل ما بعيبو جيبو

بابكر سلك

 8  0  2867
بابكر سلك

*الراجل ما بعيبو جيبو هكذا علمونا
*لان الجيب هو قسمه ونصيب
*وارزاق يوزعها رب العباد
*يعني المال ما شطارة بقدر ما انو رزق مقسوم من رب رحيم
*لذلك الراجل ما بعيبو جيبو
*والراجل يمكنه ان يجيب المال
*ولكن المال عمره لا يصنع رجلا
*لان الرجوله مواقف جميله
*ومواقف نبيله
*وشهامه وشجاعه وقيمه
*يبقي لايعيب مجلس المريخ ان اعلن فلسه علنا
*لان الفلس لايعيب الرجال
*ولكن ان يغطي مجلس التسيير علي الفلس
*فهذا يعني ان المجلس يخجل من فلسه
*وهذا الخجل لن يقدم المريخ
*فاعلان الفلس يخلق في النفوس رغبة ملحة للدعم
*ولكن ان يخرج علينا المجلس بتصريحات مفادها ان المال لاينقصهم اطلاقا
*فهذا يدفع الناس الي تربيع اياديهم ليتفرجوا
*ولا يشاهدوا الا خسران المريخ في كل الجبهات بسبب شح المال
*ولنا ان نستفسر
*هل دس الفلس واعلان ان المال لايمثل مشكله
*القصد منه ابعاد جمال عن الدعم ؟؟؟؟
*وحتي الغير جمال ؟؟؟؟
*طيب لمصلحة من يتم كل ذلك ؟؟؟
*و اذا لم يك المال عائقا للمجلس
*لماذا يسددون مقدم عقد البلجيكي بالاقساط ؟؟؟
*وهل كانت التصريحات بان غارزيتو قد طلب زيادات علي العقد حركة لدس الفلس ؟؟؟؟
*وهل فعلا مقدمات الاجانب لم تسدد بعد ؟؟؟
*ام ان المال لايمثل عائقا لكن مزاج كده المجلس ماداير يسددها ؟؟؟
*ايها الناس
*المجلس مفلس
*والكلام السمعناهوا عن انو الشايف المجلس مفلس يجيب قروشو
*كلام ما مظبوط وما مناسب
*اذا فشل المجلس في الدعم
*وفشل في استقطاب الدعم
*يبقي عجاج كرعينو اكرم من التصريح الغير مسئول الذي سمعناهو
*نجيب قروشنا نديكم ليها عشان تديروا انتوا ؟؟؟
*جد ليكم
*ايها الناس
*الراجل ما بعيبو جيبو
*لكن بعيبو لما يفشل في اداء مهمه متروكه ليهو ويصر يكابر
*ايها الناس
*اين الدعم الحكومي الذي اعتادت عليه اندية القمه عند التعيين ؟؟؟
*نفهم من كده انو حتي الدولة ماشغاله بمجلس التسيير الذي عينته ؟؟؟
*ام ان ناس التسيير لم يضيقوا الخناق علي الدوله للدعم ؟؟؟
*مع الوضع في الاعتبار لجنة عطا المنان التي كلفت في ظروف مشابهه
*ودعمتها الدوله لدرجة ان سددت معظم الديون القديمه
*يعني الدعم ما كان للتسيير بس
*وانما كان ايضا لحل الديون والاشكالات المتراكمه
*يبقي يا ونسي الدولة ساكته عشان انت ساكت
*ولا ساكته عشان معتبرانا ناس ساكت
*ولا ساكته عشان مافي زول طلب منها والح عليها ؟؟؟
*اسئله علي طاولة ونسي
*ايها الناس
*رحبنا بالتسيير
*واعتبرناهم ناس الامر فينا
*ودعمناهم بما نستطيع
*ولكن الشفافيه هي ما يجبرنا علي السير في نفس النهج
*ونفسها الشفافيه تجبرنا علي قول الحق لتتلك الجماهير الحقائق
*الجماهير
*اين هي الجماهير من دعم النادي ؟؟؟
*ولماذا الفشل في مشروع الدعم يا شفوت ؟؟؟
*اها
*يحضرني موقف مع الاخ قرشي عبدالهادي
*زرناهو في المستشفي لمعاودة والده
*كنا قاعدين وقرشي زعلان شديد
*قلت ليهو مالك يا قرشي
*قال لي فلان الفلاني اساء لي شديد
*وانا ما بخليهو
*كمال دحيهقال ليهو قال فيك شنو يا قرشي ؟؟؟
*قرشي قال ليهو انت زاتك مسح بيك الواطه يا دحيه
*دحيه قال ليهو قال فيني شنو كمان
*قرشي بتوتر وانفعال قال
*مسح بينا الواطه دي مسح انا وانت يا كمال
*قمت قلت ليهو يا قرشي ما تدينا النتيجه
*قد يكون الزول ده ماقصد الاساءه وانت فهمت غلط
*قول لينا العبارات القالها مسح بيك انت ودحيه الواطه
*قرشي قال
*الزول ده كتب في القروب جمال بعد ده الا يفتح دكان في فداسي
*قلت ليهو طيب انت وين اسائتك ؟؟؟
*قال لي في اساءه لي اكتر من كده
*علي الطلاق ما اخليهو
*المهم
*عندنا قروب يجمع بين ابناء المهنه الواحده للترابط والتواصل والمحبه
*الزماله هي شرط الانتماء الوحيد
*لذا العمر والسن ما ليهم دور في اكتساب العضويه
*عشان كده القروب ده فيهو الناس الفي مقتبل العمر في عمر الزهور ععمر الغرام عمر المني
*وفيهم من امتد به العمر حضورا انيقا زمن الاستعمار وحضورا مشرقا في هذا الزمن
*وفيهم من هو بين الجيلين
*في القروب واحد من الزمن الجميل كتب لواحد من هذا الزمن كلمة يا جنا
*فهاج زول العمر المشرق وماج في وجه زول الزمن الجميل
*فتدخلنا ليهدأ الامر قليلا
*ونحن لاندري سببا لهذه الحده
*اكتشفنا ان كلمة جنا لها معني غير كريم في عرف ابناء هذا الزمن
*وبالطبع زول الزمن الجميل ماكان يدرك ذلك ولم يعني ذلك المعني
*عشان كده كنا ننادي مرارا وتكرارا
*ما تختوا اولاد سنه اولي ابتدائي في مرحلة واحده مع اولاد تامنه
*عرفتوا ليه ؟؟؟؟
*مناشدة للسيد وزير التربيه
*حتي تستقيم التربيه
*افصلوا بين المراحل السنيه في الدراسه
*فلا يعقل ان نضع فراخ زغب الحواصل مع صبيان مراهقين في نفس الحوش
*لسلامة المجتمع
*للحفاظ علي اخلاقنا
*لنضمن لشتلاتنا ان تنمو في جو صحي وتكبر
*ليستظل الوطن بظلها
*اخي الوزير
*فهمتني ؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*مشينا المولد ونحنا داخلين رفعونا ايدينا
*وبعد ده نشلونا يا والينا
*زحمه اسكت بس يا اخينا
*لو ده المولد الحج كيف يا والينا
سلك كهربا
ننساك كيف ولما رجعنا من المولد مدلدلين ايدينا الكلب ينقلب ويضحك علينا
والي لقاء
سلك

امسح للحصول على الرابط
بواسطة : بابكر سلك
 8  0
التعليقات ( 8 )
الترتيب بـ
الأحدث
الأقدم
الملائم
  • #1
    ابوعبدو 12-27-2015 10:0
    الزول ده فاقد منطق و فاقد قيد ههههههههههههههههههههههههه منو لله العملك صحفي
  • #2
    almahwsamusa 12-26-2015 10:0
    الزول فاق من الحلم واصطدم بالواقع المرير وبدا يبرر المحيرني الناس دي بنبدل مواقفها سرعه كدا ليه والله احسن نخجل ليكم نحن
  • #3
    عبدالله الصادق 12-26-2015 10:0
    يا اخى انا اريد ان اسألك سؤال ماذا فعل المال للمريخ غير انه قد شتت شمل المريخاب المال السايب فى عهد جمال الوالى هل جلب لنا بطولة ؟ المريخ لن يندثر بسبب المال الذى ينقص لجنة التسيير ولجنة التسيير لم ترفع الراية البيضاء حتى الآن وتقول للوزير خذ الامانة ..انتم هل تعرفون رجل غير السيد جمال الوالى يمكن ان يدفع فى المريخ إذن لماذا تريدون إذلال اللجنة وهى التى تصدت للمسئولية بعد ان خذل الوالى القاعدة ورفض إكمال دورته ، هل اذا ترجلت هذه اللجنة سيعود الوالى ؟ لقد افسد الوالى طبع المريخاب جدآ وباتوا لايرون اى بارقة امل الا فى شخصه حتى الذين بدأوا يتصدون للمسئولية انتم تريدون ان تذلونهم والله العظيم لجنة التسيير هذه ان لم يكن لها حسنة واحدة غير كشفكم انت ومزمل والجوقة اعتقد انها تكون قد اكفت لقد كنت احتفى بآراءكم كثيرآ ولكن بكل صراحة سقطتم فى نظر الكثير من المريخاب اقول هذا الكلام وانا احد رواد النادى .. اليوم هنالك مجموعة محترمة هى المريخ ساس واساس هى المجموعة الوحيدة التى تستحق الإحترام واتمنى ان تستمر فى هذا النهج بالولاء للكيان فقط اما الوالى اتمنى ان لا يعود مجددآ للمريخ صحيح انه بذل كل شئ فى سبيل رفعة المريخ ولكنكم اليوم وبإيعاز منه تهدمون كل شئ اقول بإيعاز لأنه من الواجب ان يقوم بعقد مؤتمر صحفى يتبرأ من اعمالكم الصبيانية إذا كان نزيهآ اما صمته يعنى انه وراء هذه المخططات فهو فعلآ حيرنا ماذا يريد هذا الرجل كلما يذهب فى منتصف الطريق يعود مرة اخرى للإنتخابات ولا يكمل دورته وهكذا.. دعوا لنا المريخ فهو عالم جميل ونحن نحبه حتى لو لم يستطيع ان يسافر للمعسكرات وحتى لو انهى عقود الاجانب لعدم توفر الدولار فنحن لن نتوقف عن تشجيعه .. مريخنا الذى نحب وارتبطنا معه بعلاقة عاطفية متينة كان نجوم الاقاليم فيه يسكنون مع الفارس جمال ابوعنجة فى منزلهم العامر فى حى المورده اغلب الفترات واسألوا الثعلب عصام الدحيش ولكنهم فى الملعب اسود ضارية كان جمال واخوته يعتبرون المريخ حقهم لم يزاودوا عليه يومآ ما واعتقد انهم تركوه وليس معهم منه غير حب الناس الذى لا يقدر بثمن مهما تحدثنا عن الإحتراف فلا يمكننا ان نترك المريخ لدافع مال فالمريخ بالنسبة لنا كالماء والهواء وهو ملح رغيف الخبز وهو ورد الربيع واحلام الصبايا .. صحيح ان الزمن تغير ولكننا لن نتخلى عن اى لاعب يرتدى شعار المريخ ويضحى من اجله حتى لوتم ترفيع فريق الرديف بالكامل وسندعم اسامة ونسى ومدنى الحارث وكابيلا وهوارى السد العالى وحاتم الراجل ومن معهم الى آخر نفس ولن نطالبهم بأكثر من ما يستطيعون حتى لو خرج المريخ من البطولة الافريقية لن نتخلى عنهم فهم مريخاب خلص فنحن نريد إدارة تؤسس للمؤسسية حتى لو استهلك ذلك 13 سنة اخرى ففترة جمال الوالى هى اعوام من الفوضى مدفوعة الثمن لم يجنى المريخ منها بطولة تسعد القاعدة وزى ماقال الرائع حسن محجوب ساعدونا انتو بالسكات والموية الباردة وروقوا المنقة بلا والى بلا غالى
  • #4
    حسن ميرغني 12-26-2015 09:0
    ما بتخجل يا كهربا الفلس لما كان عند الهلال كان عيب وعيب كبير وكنتوا بتقولوا الكاش بقلل النقاش دارت عليكم الدوائر واصبحتوا مفلسين بعد الهروب الكبير للرئيس طوالي فأصبح الفلس بين ليلة وضحاها ماعيب بالنسبة لكم
  • #5
    مستغرب 12-26-2015 02:0
    لا حول الا بالله شوفو النفاق دا الراحل ما بعيبوا من جيبو كلام جميل ما منعيبو لكن العيب البتفولوا زمان وقت القرش كان موجود شابكنا البوفبه المفتوح و الطيارات الخاصه واى لاعب بنجيبوا بقروشنا وينا حسى قروشكم دى وينا رجالاتكم القولتم بتسد عين الشمس
    يلا يا عم ربنا يسهلا عليكم بس ما نشوفكم حايمين فى الجوامع
  • #6
    ام درماني قديم 12-25-2015 09:0
    انت ذاتك ما تدق صلعتك دى وتتبرع للكيان وقت فلسان وعدمان داير ال
    حكومة تغرف وتديكم ، بعدين منو القال ليك الجزلان ما بعيب الرجال ؟ عمركم كله معتمدين على جزلان جمال ، خلاص وقت عدمان وفلسان اتدين واتبين يا ود اب زهانة ! رجعتوا لوضعكم الطبيعي الخوف الاستاد يرجع تاني حفرة النحاس والجرورة من الدكان ،ما قلتوا نوبه والكاش بقلل النقاش غير لسانكم الطويل انت ومزمز وكابو البودي المريخ التوج مافى ..صفوه مفلسه ..اتعلمت الكتابة مع ظروف الفلس والحالة الشلش وبقيت تكتب من دقش يا جنا (حقت زمان ) هاك الصفوة دي وهاك الرصيد دا ....البركة فيكم وفى الجميع لوفاة الكابتن دقنو ..
  • #8
    وطن الجمال 12-25-2015 04:0
    خلاص ... لمن بقيتو مفلسين وعادمين العدم بقى الفلس ما عيب يا ضلالي يا اعلام سالب. ما زمان قلتو الكلاش بقلل النقاش حسع بس عرفتو ان الكاش ارزاق. قلنا ليكم الدنيا دوارة قلتو اطلعو من البلد. اللهم لا شماتة.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019