* بخلاف (البطانية) فإن (البلح) يكافح البرد ..
* والذى يأكل كميات كبيرة من البلح في البرد فإن درجة الحرارة في جسمه توازي درجة الحرارة في جسم الذى يتغطى بـ(البطانية) ..
* وأنا ما عايز اقول (البطانية والبلح أخوان في الرضاعة) ولكن أقول : الهلال وشيبوب أخوان في الحب ..
* والحب الذى وقع بين الهلال وشيبوب لعبت فيه (قاردن سيتي) دور (المأذون) ، بينما الإغتصاب الذى تم بين المريخ وألوك شهد عليه أسامة عطا المنان ..
* والله صحى ..
* إغتصاب المريخ وألوك حتى كوستي بريئة منه ..
* الذى وقع بين المريخ وألوك هو أشبه بالزواج العرفي ..
* بينما ما تم بين الهلال وشيبوب هو حب كامل الدسم..
* في ميدان المولد (العروس) أغلى أنواع الحلويات ، وفي ميدان الحياة (العريس) أغلى من (بورة البنات) ..
* عروس المولد غالية وعريس الواقع أندر من لبن الطير ..
* شخصيا لو كان عندي محل حلويات بعمل حلاوة بسميها (حلاوة شيبوب) على وزن حلاوة (جكسا) ..
* أنا ما عارف لكن إحنا في الهلال دائما عيد المولد بيصادف عندنا حاجات حلوة ..
* عيد المولد معانا حلو من زمن جكسا ولهسه ..
* وإنتو عيد المولد معاك شطة بس ..
* وتبكو بس .. عين قطرة وعين مس ..
* بلة جابر وعلى الهواء مباشرة قال مايلي : (جيت شايل شنطة الكدارة وشايل صحن في يدي دى وشايل صحن في يدي التانية وقمت سلمت على غارزيتو بخشمي لانو يدي فيها الصحن وبعد ايام غارزيتو بقى ما بيلعبني) ..
* هكذا قال ..
* ومن الملاحظات ان بلة جابر في تصريحاته لو ما جاب سيرة (الاكل) بيجيب سيرة (الصحن) ..
* والله صحى ..
* ولو ما جاب سيرة الصحن بجيب سيرة الصينية ..
* بله عندو ثقافة غذائية ممتازة ..
* بعد كلام بلة جابر ده أنا ياداب عرفت لشنو المريخ كل سنة بيكون وصيف ؟؟
* حاجة تكسف ..
* هيثم مصطفى لو نسى (القديم) قطع شك بيقدر يقدم (الجديد) المفيد للهلال ..
* ولكن هيثم لو ما نسى القديم الفي قلبو فإن الهلال موعود (بفرتقة) لن يلمها إلا الله سبحانه وتعالى ..
* لأكثر من سبب فشل فيصل موسى مع الهلال وذهب الآن إلى هلال الأبيض وكل الامنيات ان يحقق فيصل مع (الإبن) ما لم يحققه مع (الأب) ..
* موفق يا فيصل وشد حيلك ..
* أعلن المريخ ان مهرجانه سيشارك فيه (شيبوب) الذى وصل الخرطوم فجر أمس الاول ..
* ومجلس المريخ طلب من الجمهور الحضور المبكر للمهرجان من اجل استقبال شيبوب في المهرجان..
* مهرجان بـ(العاء) ..
* مهرجانكم ده (تأبين) ساكت ..
* والله صحى ..
* والمريخ اصلا محتاج (تأبين) وليس مهرجان ..
* والوضع الانتو فيهو يدعو لـ(النياحه) و(العويل) والعودة للأصول ..
* طبعا يا جماعة اى مريخابي في البلد دي الأصل بتاعو (هلالابي) ..
* ما تسمع الجعجعة دى ..
* كلهم هلالاب زعلانين ..
* وحال المريخ حاليا كفيل بأن يعيد هؤلاء الهلالاب الزعلانيين لتشجيع الهلال الذى هو (عالم جميل) ..
* المهم ..
* بدون شيبوب وبحضور (55) نفر أقام نادى المريخ إحتفاله أمس ..
* وعشان أكون اكثر دقة الإحتفال كان فيهو (57) نفر ..
* طبعا الـ(57) نفر ديل غير العازفين بتوعين طه سليمان وحسين الصادق وحرم النور ..
* يعنى لو حسبنا العازفين بيكون الحضور في المهرجان (82) نفر ..
* لا والله ما (82) ..
* الحضور (83) نفر لانو إتذكرت حبيبنا (بابكر) مدير أعمال طه سليمان كان حضورا رغم هلاليته ..
* قال ليك المدرب البلجيكي لما دخل الاستاد عشان يتابع المهرجان قال ليهم : يا جماعة إنتو قلتو انكم نادي جماهيري ؟؟ طيب وينو الجمهور ؟؟
* الجمهور راح مع شيبوب يا كوتش ..
* المهم .. أنا دايرك تعرف ..
* شيبوب بـ(الكسكتة) زي علاء الدين يوسف بـ(البصمة) ..
* شخصيا أنا لو كنت في محل شيبوب بقنع لي من (50) مليون وبشترى بيها (كسكتات) ..
* لانو واضح جدا (الكسكتة) ظابطة معاهو جدا ..
* قال ليك الكاردينال قدم (كسكتتو) هدية لشيبوب وشيبوب تقبل الكسكتة الرئاسية ..
* وإحنا بدورنا نطلب من الأخ شيبوب ان يقدم الكسكتة التى قدمها له الكاردينال هدية للأخ عادل ابو جريشة ..
* ابوجريشة في الايام الماضية (شرب برد) تقيل عشان كده محتاج ليهو لكسكتة عاجلة ..
* غايتو العملية دى يا الكاردينال ما سبقك عليها زول ..
* والله صحى ..
* الكاردينال رسل شيبوب جوبا ..
* قامو ناس المريخ (شلاقة ورشاقة) جابو شيبوب من جوبا عن طريق كينيا ويوغندا وبوركينافاسو ..
* زول كان في جوبا القريبة دى لكن ناس المريخ عشان حناطير ساكت قاموا جابوهو عن طريق بوركينافاسو ..
* وشيبوب بحمدالله وصل الخرطوم سالما بالصباح وحينما حان المساء وقع للهلال ..
* في الحتة دى بالذات المريخ بيذكرني بالطفل الأهبل ..
* طفل أهبل وما بيعرف يسوق عجلة ومع ذلك بيقول لناس البيت جيبوا لي عجلة ..
* ولما ناس البيت يجيبوا ليهو العجلة بيقوموا اولاد الحلة يركبوا عجلتو وهو المسكين بيتفرج عليهم ..
* نفس القصة المريخ ..
* المريخ غير يتفرج ما عندو حاجة تانية يعملها ..
* والله صحى ..
* حنطور ساكت ..
* كلمناكم وقلنا ليكم خلو الهلال في حالو وما سمعتو الكلام ..
* اها بعد كده جرجيركم غرق ..
* خليكم كده ..
* ان شاء الله الرشاقة والخفة دى تضوي ليكم ..
* والله يا جماعة المريخ ده بيعمل حاجات كده طوالى بتذكرني بـ(أخو العروس) ..
* انا ما عارف ليه لكن يشهد الله في حاجات كده بتذكرني أخو العروس ..
* واى زول طبعا حر في (تذكاراتو) ..
* هسه أقول ليك ..
* كونو المريخ يمشى يجيب شيبوب من جوبا ويوصلو لحدى الخرطوم ويسلمو للهلال .. عليك الله الحاجة دى ما بتشبه حاجات (أخو العروس) ..
* يعنى في موضوع شيبوب ده المريخ إشتغل لينا (ديليفري) ..
* اللاعب إختفى عن انظارنا والحناطير ديل جابو لينا لحدى عندنا ..
* ديليفري زي الديليفري يا مولانا ..
* غايتو جنس غايتو ..
* ما علينا ..
* قالو بكري المدينة رفض الحضور للمهرجان ..
* رفض يمشي ..
* يحتفل على شنو وهو عارف سلفا إنو الأحق بالمشاركة في الاحتفال هم اسامة عطا المنان وسمير فضل ومحمد سيد أحمد ..
* بكري المدينة (تربية الهلال) عشان كده مستحيل يشارك ليهو في مهرجان (صوري) ..
* بالمناسبة دى ..
* أخبار يوسف بلايلي شنو ؟؟
* نرجع ونقول ..
* (الكاف) تعامل مع الهلال معاملة الكبار فكان طبيعيا ان لا يلعب الفريق في التمهيدي ..
* والإعفاء من التمهيدي يتم بناء على تصنيف ومشاركات الفريق في الخمس سنوات الأخيرة..
* والهلال في الخمس سنوات الماضية كان هو البطل غير المتوج ..
* وبالنظر لمشاركات المريخ في الخمس سنوات الماضية فإنه تألق بشكل كبير في سيكافا وحوض النيل وحوض البط ..
* يبقى يا مولانا إعفاء المريخ من التمهيدي هو (صحبة راكب) ..
* اللهم إلا يكون (الكاف) إعتمد مشاركة المريخ في دورة (حوض النيل) وبموجبها سمح له باللعب ما بعد التمهيدي ..
* لكن لو الكاف إتعامل مع المريخ من واقع مشاركته في الابطال فإن المريخ كان يستاهل ان يلعب (تمهيدي مكرر كمان) ..
* ح تقول لي ما في حاجة اسمها تمهيدي مكرر ، وح أقول ليك أمثال المريخ المفروض يلعبو التمهيدي مرتين حتى بعد داك يتأهل لدور الـ(32) ..
* المهم .. انت كهلالابي انا دايرك تعرف إنو المريخ لن يلعب التمهيدي بفضل الهلال ..
* وعشان أوضح ليك اكتر : المريخ في دور الـ(32) صحبة راكب ..
* ولمزيد من الشرح : المريخ في دور الـ(32) حنطور ساكت ..
* والله صحى ..
* قلتو لي شيبوب ح يشارك في المهرجان ؟؟
* خلاص كويس ان شاء الله يكون شارك ..؟
* طبعا يا جماعة في اى (مدرسة اساس) لازم يكون في تلميذ بيأكل سندوتشات التلاميذ ..
* والتلاميذ في العادة بيخافوا من التلميذ البيأكل سندوتشاتهم ..
* بخافوا منو حتى لو قابلوهوا خارج الحرم المدرسي ..
* وفي الوسط الرياضي حاليا الكاردينال هو التلميذ البيأكل سندوتشات تلاميذ الوسط الرياضي ..
* على بالنعمة الكاردينال ده ما خلو ليهو سندوتش حايم ..
* كل سندوتشات أسامة ونسي الكاردينال ضربها ..
* واخر سندوتش هو (شيبوب) ..
* الكاردينال لما شطب عمر بخيت ناس المريخ قالو الكاردينال ح يفيد المريخ اكتر من جمال الوالى ..
* وجمال الوالى (عرف عزو) وهرب ، والكاردينال قبل على المريخ ..
* الكاردينال بحركة بحركتين خلى ليك المريخ في حتة ونجمة المسالمة في حتة تانية ..
* وانا والله العاجبني في الكاردينال إنو (بتخير في المواهب) ..
* الكاردينال كان ممكن يسجل الباشا وبله وكوفي وديدي ..
* كان ممكن يسجلهم في رمشة عين بنفس الطريقة التى سجل بها المريخ المعز محجوب وعمر بخيت ..
* لكن الكاردينال ما سجل ناس الباشا ..
* شال شيبوب من جوة الكشف..
* إحنا بنشيل صغار السن ..
* وبنخلي ليكم كبار السن ..
* ومن هسه خليكم جاهزين (2017) ح يجيكم مساوى ومعاوية فداسي ، و(2018) ح يجيكم نصر الدين الشغيل ، (2019) بيجيكم كاريكا ، (2020) بشة ، (2021) عبد اللطيف بوي ..
* ولو الله ادانا عمر صهيب الثعلب بيجيكم (2026) هو ومعاهو شيبوب على طريقة علاء الدين يوسف الشلناهو لحم ورجعناهو عضم ..
* عضم بـ(الساء) ..
* و..و..
* وعاينت وأنا عيان وممنوع من (حلاوة المولد) ..