• ×
الثلاثاء 3 أغسطس 2021 | 08-02-2021
حسن فاروق

عبدالتام يكشف فساد المريخ والاتحاد

حسن فاروق

 8  0  2675
حسن فاروق


عبدالتام راجل ثرثار ، بحب الطلة (البتمسخ خلق الله) ، ظهر فجأة في الوسط الرياضي وفي غفلة من الزمن وبامر التعيين الحكومي اصبح نائب الامين العام لنادي المريخ العظيم ، لاحظ نائب الامين العام وليس الامين العام ، ورغم انه مجرد (نائب) الا انه ومن كثرة الطلة والثرثرة التي لاتنتهي ، اصبح الامين العام والرئيس ونائبه ، باختصار صار اللجنة كلها كيف وليه ؟ مافي زول يقدر يقول تلت التلاتة كم ومع عبدالتام (مش ح تقدر تغمض عينيك) ، اسمع واقرا وشوف، تصريحات مقروءة ومسموعة ، والصور علي صفحات الصحف ، الجرايد خلا (بدل البلد خلا) وكل زول رايحة ليهو صورة بدل التصريح مية .
هناك بعض الحكم في احاديثنا السودانية منها يقولوا ليك ( الزول الكلامو كتير بغلط كتير) ، ولانه عبدالتام راجل ثرثار ورط المريخ والاتحاد (معا) في شبهة الفساد (المتهم بريء حتي تثبت ادانته) ، فساد اداري علني ، خرج به السيد عبد التام الثرثار الي الصحافة الرياضية وهو يؤكد وعلي الملأ (تسجيل اللاعب الوك اكيج غير صحيح) ، ولكن كيف قالها هذا (الكلمنجي) ، تعالوا نقرأ معا ماقاله لصحيفة (الزاوية) المحسوبة علي المريخ ، وسانقل ماذكره علي صفحة الصحيفة الاولي بالتفصيل لاهميته وخطورته ، فقد جاء الخبر علي النحو التالي: ( وجه المهندس محي الدين عبدالتام نائب الامين العام للمريخ رسالة مهمة لجماهير المريخ اكد فيها سلامة موقف المجلس من التعاقد مع اللاعب (الوك اكيج) ، وقال عبد التام ان مجلس ادارة نادي المريخ عبر لجنة تسجيلاته قام بالاتصال بادارة نادي الملكية جوبا لاخطارهم بخطوة التعاقد مع اللاعب (الوك) بعد ان اعلن رغبته الصريحة في اللعب للمريخ، وابدي عبدالتام دهشته من مايتردد عن اللاعب بقوله انهم قاموا بالتعاقد معه بجنسيته السودانية ورقمه الوطني مثلما فعل نادي المريخ كوستي وان الاتحاد السوداني اعتمد التسجيل بختم لجنته المختصة .. مشيرا الي ان المريخ سيطلب بطاقة اللاعب الوك من اتحاد الجنوب ، وفي حال عدم وصولها سيتم اصدار بطاقة مؤقتة له، واضاف عبدالتام انهم سيجلسون مع نادي الملكية جوبا للوصول الي اتفاق فيما يختص بعائد النادي من صفقة تسجيل اللاعب) انتهي حديث عبدالتام المندهش ، وهو المدهش، فالرجل اعلن علي الملأ كما ذكرت ان اللاعب لاعب الملكية جوبا وليس لاعب فريق المريخ كوستي ، ولانه الكل في الكل في المريخ والمسؤول المباشر في لجنة تسجيلات اللاعبين بالنادي يعتبر العالم بالطريقة التي يتم بها تسجيل اللاعبين لذا عندما يرد علي لسانه: ( وابدي عبدالتام دهشته من مايتردد عن اللاعب بقوله انهم قاموا بالتعاقد معه بجنسيته السودانية ورقمه الوطني مثلما فعل نادي المريخ كوستي وان الاتحاد السوداني اعتمد التسجيل بختم لجنته المختصة .. مشيرا الي ان المريخ سيطلب بطاقة اللاعب الوك من اتحاد الجنوب) انتهي .. فهذا يعني ببساطة ان التسجيل تم بالاتفاق مع الاتحاد السوداني لكرة القدم وان الطرفين جزء من (طبخة) كريهة الرائحة ، ضحيتها حتي الآن فريق الرابطة كوستي ، اما الاخطر في حديث عبدالتام الثرثار ولم يقله بشكل مباشر ان اللاعب (الوك اكيج) يحمل في هويته الكروية (كرتين او بطاقتين)، واحدة موجودة بطرف الاتحاد السوداني لكرة القدم تقدمه كلاعب وطني سوداني من منطقة ابيي لعب لمريخ كوستي ، والاخري باتحاد جنوب السودان تقدمه كلاعب اجنبي يلعب لنادي الملكية جوبا، اما الاغرب في هذا السيناريو ان المريخ اشتري اللاعب من مريخ كوستي (كلاعب وطني بكرته الموجود في الاتحاد السوداني) ودفع مقابل ذلك مبلغ مالي للاعب والنادي ، وسجله اول امس كلاعب اجنبي ينتظر بطاقته انتقاله من اتحاد الجنوب .. روائح كريهة عادت لتملأ المكان ، والاصح انها لم تغادره حتي تعود لتملأه .. وياسلام ياعبد التام.. اواصل
امسح للحصول على الرابط
بواسطة : حسن فاروق
 8  0
التعليقات ( 8 )
الترتيب بـ
الأحدث
الأقدم
الملائم
  • #1
    وطن الجمال 12-09-2015 08:0
    المدهش بصراحة هو أنت لانك ولاول مرة أسمعك بتقول كلام جاد في حق المريخ وتكشف حالهم والتبجح المسيخ. ما خلاس الوالي ترك وانزاح اسرحو وامرحو الساحة بقت براح.
  • #2
    Mahir 12-09-2015 07:0
    والله اسواء حاجه فى هذه البلد انو الصحفيين يفتو و(يثرثروا) بدون فهم فى القوانبن فى حين انهم اولا الناس ان يتبحروا فى القوانين بما انهم مصنفين كصحفيين رياضيين بدل تتحدث عن الفساد واتهام الناس بالباطل ورينا نحن كقراء من الناحيه القانونيه هل التسجل صحيح ولا خطا مع الدليل فى كل الحالتين وورينى وين الفساد اذا كان تسجيل اللاعب مسؤلية ناديه بالله كيف تحكمون
  • #3
    الوليد ابراهيم عبدالقادر 12-08-2015 06:0
    يا استاذ حسن فاروق "الدقيساب" اقصد "الضليلاب" ديل ما تديهم راسم خليهم في تخديرتم دي .. خصوصا المدعو عبدالله الصادق دا..ســـــــــــــلام..
       الرد على زائر
    • 3 - 1
      عبدالله الصادق 12-09-2015 11:0
      لعلمك يا وليد انا اتحدى كل صحفيو الهلال فى موضوع فهم قوانين الرياضة علمآ بأن الكثيرون منهم فاهمين القوانين لكن شغالين تضليل فى الزيك .. الوك لو ما لعب للمريخ بقانون الفيفا ابقى قابلنى .. ودى ما زى بتاعة شوبير
  • #4
    محمد ابراهيم 12-08-2015 04:0
    اخطفوا اي لاعب مسجل في فريق آخر وسجلوه بدون شطب وبعد ذلك اطلبوا كرته ولو رفض ناديه اعملوا ليه كرت العملية سهلة جدا.
  • #5
    محمد ابراهيم 12-08-2015 03:0
    السوأل كيف سجله المريخ من الملكية بدون ان تشطبه لك وبعدين شفنا بالصورة الفلوس التي استلمها مريخ كوستي ، الاستاذ عبد التام كلما تحبوا تصلحوا الطبخة تبوظوها زيادة.بالفهم ده اي فريق ممكن يخطف لاعب مسجل في فريق آخر ويسجلوا عنده .غايتو جنس غايتو .
  • #6
    اسيياد 12-08-2015 03:0
    ههههههههههههه حسن فاروق ياعجيييييب ، الدقسات ديل براهم بيقعوا ههههههه ألوك الصبر أنا
  • #8
    عبدالله الصادق 12-08-2015 02:0
    والله ياحسن فاروق كلكم ما فاهمين القوانين وما فاهمين حتى تفهموا كيف يا خى راجع كلام الرجل مرة اخرى لا فيه شق ولا طق انتو عليكم جهزوا شكاواكم وانتظروا المساخر
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019