• ×
الجمعة 29 مارس 2024 | 03-28-2024
بابكر سلك

هي وينا الشخصيه !!!!

بابكر سلك

 8  0  3437
بابكر سلك

*ايها الناس
*قلناها مرارا
*مجتمع المريخ يتعامل مع انتخابات الاتحادات ولجان الاتحادات باهمال كبير
*حتي ولو رشحنا شخصيه مريخيه خبيره لتلك المناصب
*لا لشئ سوي ان نضمن ان ياخد كل انسان حقه
*وان نوقف قصة يخطئ ولا يظلم دي بالذات
*وان نوقف حكاية الحكم اليوغندي نسي وشال التقرير معاهو يوغندا
*والاشياء المشابهه
*لي ده كلو نرشح زول يعتذر
*والبعتذر ده اول زول بهيج ويتنفض لما تحصل حاجه من داخل تلك الاتحادات
*المهم
*الاهمال استمر
*واستراتيجية الاهله التي وضعها الطيب عبدالله تؤتي اكلها سنويا
*الا ان اصبحت لجنة يخطئ ولا يظلم تخطئ وما وفي اتجاه واحد
*كل اخائها في حق كل الناس الا ناس معينين
*وده سببو نوم مجتمع المريخ في العسل
*ايها الناس
*بالطريقه دي بنفقد شخصية المريخ
*بنبقي ناس ساي
*وبغشونا بي قصة انت الكبير
*ومعليش
*ومافيها شئ
*وتاني مابنخليهو يعمل كده
*المهم
*حتي في تعيين مجلس التسير
*كانت شخصيتنا ضعيفه
*الامر الذي جعل الاخ اليسع ما يكترث كتير
*وحتي في الاضافه
*لا ادري لماذا اصر الوزير علي تعيين سوداكال عضو ساي
*في حين ان مدني الحارث كان مصرا حسب علمنا علي تولي سوداكال منصب نائب الرئيس
*واهل المريخ يقبلوا باي شئ
*وهاهم اهل المريخ يفشلون في دعم لجنة التسيير
*قروش عطرون والوك ماقادرين يساهموا فيها
*في حين ان آدم كان سيغنيهم عن الجرسه دي
*ولكن اهل المريخ
*ولانهم دائما يبدون بتلك الشخصيه الضعيفه
*كان القرار الوزاري علي هواهو
*ايها الناس
*سمعنا عن تمنع بكري بشير
*قالوا رافع القزاز ومعلي سعرو
*دحين بكري ده موش كان لاعب يوم ادينا هلال الابيض خمسه ؟؟؟
*يبقي لاعب عادي جدا
*الكبير كبير يا بكري
*انت ما الكبير
*المريخ الكبير
*والرأي عندي انو نحنا زاتنا نرفع القزاز
*اللاعبون في البلد دي مستوايتهم متقاربه جدا
*بس البجي القمه منهم بكون محظوظ
*ما عشان مستواهو افضل من غيرو
*لا ترفع قزاز يا بكري
*ولا تظلل بدون تصديق
*اربعميه زاتها كتيره
*المهم
*حقوا نعمل علي اظهار شخصيتنا الحقيقيه القويه
*كفانا مسكنه يا ناس
*اها
*قال ليك واحد ود ميكي
*التلاته تسعات قابلتو تلاته صباحا
*داقي السيستم والتي شيرت
*كابي الجل
*يتراقش زي فستان السهره
*جماعة التلاته تسعات وقفوهوا
*بطاقتك
*قال ليهم بطاقة شنو يا جنابو ؟؟
*قالوا ليهو بطاقة شخصيه
*صنقع ونقر وقال ليهم
*هي وينا الشخصيه الدايره ليها بطاقه
*ايها الناس
*حقو نمرق الشخصيه القويه
*ونطلع البطاقه القوميه
*ونقدل حمرة عين كده
*خلاف كده بنبقي زي صاحبنا ابو سيستم داك
*ايها الناس
*اذا اتبع مجلس التسيير الفكر
*فانه سينجح في وضع اسلوب حكم المريخ
*يختوا لبنة كيف نحكم المريخ
*وبعدها لن يهمنا من يحكم المريخ
*اذا عملوا دي يبقي سطروا اسمائهم باحرف من نور علي ذاكرة التاريخ
*المهم
*خرج المنتخب من سيكافا
*وكسب اطهر وابراهوميه
*وحقو بعد ده نهتم بالمنتخب من اعلي المستويات وانت نازل
*الخامات علي شاكلة ابراهومه واطهر كتيره
*محتاجين استقرار واجهزه فنيه خبيره
*واعداد ممتاز وتجارب وديه دوليه كتيره
*عشان نعلن عن ميلاد المنتخب البشرفنا
*المهم
*كان نرضي كان نابي
*رفع سقف اسعار اللاعبين كان سالبا علي الكرة وعلي الانديه
*الواقع اعاد الامور نحو نصابها
*وسعر الولار خلانا نفكر في السنيه والمواهب المحليه البلديه
*وفي اطعم من البلديه !!!!!
*منقة جنوب افريقيا كان طارت السما
*ما زي منقتنا المحليه
*قلب التور والسمكه والتيمور
*والهنديه مجازا السودانية منشئا
*منقتنا
*بقليل من الاهتمام بتبقي عالمية وبنصدرها
*اسي ماشفتو المنقه السمكه في سوريا عزيزه كيف !!!
*ايها الناس
*المنتديات والمجموعات والقروبات المريخيه منارات تضيئ سماء التوهج دوما
*الشباب ديل قاموا بادوار كبيره
*ونفذوا مشروعات عظيمه
*حقوا ياخوا نصيبهم الادبي
*حقو الناس تعرفهم وتعرف انجازاتهم
*شخصيا
*حاتناولها واحده واحده
*والبدايه حاتكون بي قروب الصفوة العالمي
*اصبروا لي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*يوم واحد الجو فرض نفسو علينا
*الحله قامت كترابتها والدخان ارتفع لينا
*دخان الشيات والشعيريات والسكسوكانية حلالالاته تعاين لينا
*والبسمات اتوزعت علينا
*الشله لمت صحابتها والصواني اتطاقشت فينا
*تاني يوم يا والينا
*الحله كلها اتلطمت لينا
*نزلات شديده ما متعودين جو زي ده يجينا
*انتوا زاتكم كيف خليتوهوا يجينا !!!!
سلك كهربا
ننساك كيف والكلب قال البخاف الله مفروض يعرف الله سبحانه وتعالي اول خوف بدون معرفه ما بنفع
والي لقاء
سلك

امسح للحصول على الرابط
بواسطة : بابكر سلك
 8  0
التعليقات ( 8 )
الترتيب بـ
الأحدث
الأقدم
الملائم
  • #1
    عزالدين محمد بشير احمد 12-05-2015 09:0
    والله الجماعة ناس سلك وعمك مزمز ما شاء الله بقوا ناس نصيحة ساكت وكل القالوه رمو بيهو عرض الحائط ويادوب عرفوا ضعف المريريخ والقائمين على امرو وحالتن بقت تحنن . يا ناس خالد عزالدين كفاية مرمضة بالجماعة اياهم وخليكم ناس وطنيين واقيفوا مع المريريخ بالراي والدعم خلاص فقدوا التوازن .
  • #2
    سعيد لورد 12-05-2015 10:0
    قلت يختوا لبنة كيف نحكم المريخ

    انت اللبانة ما ختيتة براك

    البحكم المريخ يكون زي الوالي أو أقل زي سوداكال

    الما بدفع لو بقوه عضو ساكت لازم يكون الرئيس أو النائب عشان يدفع
    و ليه منتظرين جماهير المريخ تدفع بدون مناصب و الله حتعينوهم في مجلس الإدارة

    يا زول ها كلامك بقى موزون تب

    انت ضارب الخضراء

    و الله دي العين الحمراء

    بتاعت الضارب الخضراء
    ننساك كيف يا نائبنا
    و يا هارشنا و يا دارشنا
  • #3
    Kamal M. Ahmed 12-05-2015 08:0
    الاخ / سلك لا اعرف ةجهة نظرك شنو في مزمل ابو القاسم لكن اتمني أن يرتفغ مستواه في الكتابه الصحفيه ليكتب كصحفي مريخي وليس مشجع مريخي متعصب لان اسلوبه اسلوب ردح وكلمات لا تليق بمن يمتلك صحيفتين لا مانع من المناكفه اللطيفه التي لا تكون سببا في ادخال الوسط الرياضي في مشاكل تقود للفوضي والتعصب الاعمي ، اعرف انك مريخي مشاكس جدا لينا نحن الهلالاب لكن ذلك لا يمنع من قراءة ما تكتب والاستمتاع به لانني اراه يحمل جزء كبير من الحقائق والطرافه ومزمل مفروض يعمل ليهو شخصيه مقبوله للجميع هلال ومريح عشتن نعمل ليهو بطاقه شخصيه وهذا الكلام لمزمل موجه ايضا للكتاب الهلالاب فالرياضه أحلي عندما يتعشي المهزوم مع الغالب ولك تحياتي سلك
  • #4
    عبد الهادي عبد المطلب 12-05-2015 07:0
    اها يا سلوكتنا اخبار الوك شنو .... استلمتوا كرته وله لسع ... انتبهوا لا تقعوا وتعملوا اليوم افراح وتقوموا تسحلوا ... الحكاية كبيرة قابلوا ابو كسكته
  • #5
    عادل 12-05-2015 12:0
    نت فكرك الكروي فكر استحماري دافوري متخلف انتهازي، بكري جريتوا وراهو وغلبكم عديل كدهتجي تقول كان لاعب ساعة اديتو هلال الابيض خمسة، لو بتفهم كورة كان عرفت مهما علا مستِوي اللاعب لا يستطيع فعل شي وحده في ظل 10 اخرين اقل مستوي. هي لعبة جماعية يعني مسي مع منخب الارجنتين لا يبين له مستوي في ظل سلبية البقية، لكن تفس ميسي مع البارسا شي اخر. فهمت دي ولا ابسطهالك. انت محامي والاستاذ كمال الجزولي ايضا محامي.
  • #6
    عادل 12-04-2015 11:0
    انت فكرك الكروي فكر استحماري دافوري متخلف انتهازي، بكري جريتوا وراهو وغلبكم عديل كدهتجي تقول كان لاعب ساعة اديتو هلال الابيض خمسة، لو بتفهم كورة كان عرفت مهما علا مستوي اللاعب لا يستطيع فعل شي وحده في ظل 10 اخرين اقل مستوي. هي لعبة جماعية يعني مسي مع منخب الارجنتين لا يبين له مستوي في ظل سلبية البقية، لكن تفس ميسي مع البارسا شي اخر. فهمت دي ولا ابسطهالك. انت محامي والاستاذ كمال الجزولي ايضا محامي.
  • #7
    bushar 12-04-2015 08:0
    أنتو الفلس بخلي الواحد عاقل كدا في كتاباته الله يجازيك بالوالي خلايت ناس زعيط ومعيط بقو فلاسفه ويقولوا كلام عقل لوك الصير ياأبوصلعه بالمناسبة أخبار ألوك شنو
  • #8
    لبن الطير 12-04-2015 06:0
    زمان ياديك العدة لمن البرير قال نعمل معاكم اتفاقية ال جنتل مان ونحدد سقف لاسعار اللاعبين اصابكم الغرور وقلتم لا والف لا . اها ياابا الاسلاك الدينا ادارت ظهرها عليكم .لكن مامشكلة تواضعوا وتعالوا لعمكم ابوكسكتة واقعدوا معاهو واحيوا اتفاقية الجنتل مان ولسة قدامنا التسجيلات التكميلية استفيدوا منها.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019