• ×
الخميس 28 مارس 2024 | 03-27-2024
بابكر سلك

الحوار الوطنيالتعايش السلمي والمأذون آخر من يعلم

بابكر سلك

 4  0  2403
بابكر سلك


*كردنه واعلام كردنه بضحكونا لمن نتفنقل
*بقينا نخاف يضحكونا نقوم نتفنقل نورم صلعتنا دي
*ياخ الناس ديل لليوم بتكلموا عن قضيه عادله للهلال
*وبتكلموا عن سعيهم لتثبيت ان الحاكميه للقانون
*وهم يساندون الانسحاب مخالفة للقانون
*يخالفون القانون لتثبيت الحاكميه للقانون
*والله دي ود ابرق ما يفهمها
*حيرتونا
*وفطومه اختي قالت قربت تنسحب
*دايره تخلي الكتابه
*الكتابه ما بتتخلي يا فطومه يا اختي
*اكتبي كلو يوم
*اكتبي اي شئ
*ان شاء الله تكتبي الهلال يخالف القانون وينسحب لتثبيت الحاكميه للقانون
*اكتبي يا اختي
*اكتبي قولي زعيم امة الهلال افصح العرب
*قولي هو الكلام بقروش
*اكتبي
*اكتبي عن الماده خمسه وتمنين وسبعه وتمنين
*سته وتمنين زاتها ما تخليها كيتا عليها كدي
*اكتبي
*اكتبي عن (الفقره) تلاته وتمنين القالها كردنه يوم مهرجان العداله
*ماده فيها تلاته وتمنين فقره ؟؟؟
*سلسله فقريه يا ربي ؟؟؟
*كدي النسألك
*يوم مهرجان العداله جبتوا تاتشرات ولا احتفلتوا ساااااي ؟؟؟
*قال عداله قال
*ايها الناس
*ماخرجت به الجمعيه العموميه للاتحاد من قرارات ملزم
*وبرغم انه استثني البعض ورفع العقوبات عنهم وحماهم من عقوبات تودي التوج
*الا ان القرار كان مشبعا ( بضم الميم وفتح الشين ) بروح القانون و مشبعا ( بسكون الشين وكسر الباء ) للمصلحه العامه
*لذا نجد انه
*محققا للوجدان السليم و مرضيا لقواعد العداله
*لذا لم نتمسك ولم تتمسك الجمعيه العموميه بالتطبيق الحرفي للقانون
*فاستعملت الجمعيه سلطاتها التي منحها لها القانون لتحقق روح القانون وغاية المصلحه العامه
*افرض اتبعنا القانون ونزلنا الهلال
*جماهير الهلال ذنبها شنو تتكركر نص النهار جماعات وفرادي تمشي علي اللليق ؟؟؟
*وفيهم ناس فوق للسبعين
*الشمس دي ما بتحملوها
*وفيهم ناس سكانين بعيد وشغالين بره الولايه
*ديل لما يجوا بلقوا ابو الهل درن مع الصبابي الشمس بره
*لذا كان القرار عاقلا
*اكتبي يا فطومه
*اكتبي ان مخالفة القانون ممكن يكون فيها سعي لارساء قواعد حاكمية القانون
*اكتبي
*المهم
*مجلس التسيير برغم المال القليل
*الا ان الفكر يبدو كبير
*الاكتفاء باجنبي بعد دراسة القصه والامكانيات جيدا شئ جميل
*ولكن هل تراوري بدينا ؟؟؟؟؟
*ادي منو قبل كده ؟؟؟؟؟
*حقو الاعتماد علي هذا التراوري ما يكون كبير
*الزول ده بنط
*وبغيب
*وبتمرد
*بكري مكسب زي بكري
*وقالوا فقري كمان
*والوك ود ابيي وود قلبها مكسب كبير
*بس الشطب والاستغناء حقو يكون عن المجرب وما قدر يقدم شي
*يجب ان لايصل المقص للناس المالقوا فرصة اثبات الذات
*ايها الناس
*الخطاب اليومين دي عن الحوار الوطني والتعايش السلمي
*حقيقة فترنا من الخلافات والاختلافات
*فترنا من المداولات والمناقشات
*فترنا من القعاد في الدوحه وفي اديس وفي كينيا وفي نيجيريا
*فترنا من اتفاق يقود الطرف الآخر للقصر الجمهوري الي حين
*ثم يخرج ليعلن خلاف بعد الاتفاق وبرضك الي حين
*فنسمع باتفاق مع غير الطرف الآخر يقود ذلك الغير للقصر
*وهكذا
*دايرين اتفاق واحد
*دخول القصر ما شرط فيهو بس شعارو القصر للجميع
*دايرين اتفاق اطرافو يتكلموا عن اهلنا في الجبال وفي التلال وفي الصحاري
*ماداير تقسيم سلطه وثروه
*دايرين العمل علي زيادة الثروه مع الايمان بان السلطه تكليف وليست تشريف
*الدايرنو كتير
*دايرين اعتراف يالآخر واحترام للكل
*دايرين اي سونكي يبقي مسطرينه
*دايرين المال العام يبقي في خزينه امينه
*دايرين مواصلات تتوفر وحافلات جديده وسنينه
*علي جنيه تودينا حتي لو تلاته صباحا جينا
*ودايرين غاز يكفينا
*دايرين اي تاتشر تبقي حاصدة قمح لينا
*دايرين اي دبابه تقيف في الحدود تحمينا
*ما دايرين مدفع حقنا يترفع علينا
*وما دايرين صرف كتير اربعين موتر وسارينا
*دايرين العالم يشهد لينا
*ايها الناس
*التعايش السلمي ما جديد علينا
*في ام درمان تجسيد للمعني بدون شعارات بدون بهارات بدون عناء
*في ام درمان مابنلقي قبليه
*لافيها حلة جعليه ولا فريق شايقيه
*في ام درمان النصاري ونحنا جيران
*ممكن وحصلت
*جارك النصراني يعزمك فطور رمضان
*يحترمك ويحترم دينك
*ونحترمو ونحترم دينو
*وممكن وحصلت
*تلقانا في كل مناسباتهم اهل وحبان
*في ام درمان كان النفاج
*نفاج العفه
*نفاج اخو البنات
*نفاج التواصل بدون نت
*تواصل النفاج شغال اربعه وعشرين ساعه
*لاشبكه ضعفت
*ولا رصيدك كمل
*ولا هذا المشترك لا يريدك حاليا
*المشترك يريدك دوما ويحبك من قلبو
*هكذا كنا
*وكانت الطاقه
*طاقة التكافل والتراحم وتبادل الثروات من مفروك وطبيخ
*ومن امدرمان ظهرت لغة الوسط اللمتنا وربطتنا وجعلتنا وحده واحده لا قبليه ولا جهويه ولا حزبيه ولا حاجات غير مرئيه
*يبقي قصة نتعايش سلميا في محبه ممكنه وحصلت وبتحصل
*كنا كده ,,,وكدا ,,,, وكده ,,,, وكدا
*يلا خلوها جد تحصل في كل السودان
*زمان واسي الناس فكرت تمرق تخلي البلد
*اسي البلد فكرت تمرق تخلي الناس
*من عمايلهم
*ياريت المرق من البلد وخلاها لينا يكون آخر المارقين وان شاء الله ما يمرق الباقي
*ايها الناس
*دايما نسأل البلد دي عملت لينا شنو ؟؟؟ قدمت لينا شنو ؟؟؟ موديانا وين ؟؟؟
*لكن حقو نسأل البلد دي عملنا ليها شنو ؟؟؟ قدمنا ليها شنو ؟؟؟؟ مودينها وين ؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الشجر القصوهوا لينا
*لسه في شارع العرضه مجدع ولافي زول شغال بينا
*-وكان شفت يا والينا
*المصرف المحفور لينا
*برضك في شارع العرضه يا والينا
*لي اسي مقفول وعفن ومليان باعوض يعضينا
*وناس المخالفات شايلين اوامر قبض علينا
*وطايحين فينا
*حقو لو ما بتخجلوا مننا وما بتخجلوا لينا
*تخافوا الله فينا وتحنوا مرة علينا
سلك كهربا
ننساك كيف والكلب يضحك ..قال زمنكم ده حيرنا . المأذون آخر من يعلم !!!!
والي لقاء
سلك
امسح للحصول على الرابط
بواسطة : بابكر سلك
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    الفاضل السيد 12-01-2015 08:0
    الاخ بابكر سلك ،،،لك التحية ،،اصدقك القول انني لا احب قراءة مقالات تحمل في طياتها كلمات التجريح والتهكم والسخريه والانتماء المتعصب الاعمي ،،كلمات واسلوب كتابه غريب،،وغريبه الدنيا،، لست ادري ما قصد كثيرا ممن يكتبون في الرياضه وفي غيرها،،هل الهدف مفقود ،،لا اظن ذلك فهم اذكياء وسودانيون ،،فالسوداني افضل من يستطيع فهم لغة الضاد اكثر ممن ينصبون نفسهم اهلها،،ولكن اظن واعتقد ان بعض الكتاب موجهون بفعل فاعل كان والدوافع ما اكثرها،،ولكني اخلص الي ان الكاتب في كل المجالات وجب عليه ان يفيد دون ان يكيد ،،ودون المزايدة والمزاوده والمزيد،، فكيل الشتائم وطعن الناس في ظهورهم وبطونهم والنيل منهم حتي في اعراضهم واخلاقهم وقيمهم ليس من الحق في شئ ،،فلكم تخرج علينا الصحف الرياضية ويوميا بالكثير ولا ينفع يضر اولا كاتبه،،ويسمم افكار قارئه،، ويحزب الناس ويزيد عصبيتهم ويقتم الوانهم ،،كما يرد من كتاب الاحمر والازرق،، والهدف المفقود الذي غيب عن قصد من الكتاب ،،ان نكتب ما ينفع الناس ولا يضرهم ويجمعهم ولا يفرقهم ويؤانسهم ولا يحزنهم،،اليس الكتاب خير جليس،، بلدنا كرة القدم هي رائدة الرياضات ،،لكنها تلعب وتشكل علي صفحات صحفنا مع انعدام الوسطية والعقلانية والتادب في الحديث وفي سرد الكلام ،،اصلا لا تشرق شمسا او تغيب الا وينهمر سيل الاتهامات والشتائم والمكايد وحجار تمطرنا بالدسائس والاحقاد،،، اتركوا العباد لرب العباد والخلق للخالق ،،علموا الناس المحبه ،،واقرأوا الكل السلام،،هي في النهاية كوره،،لكن خليتوها مشتوره ،، خلوا فاطمه في حالها ،، ان اردت ان تصف عربتك فاترك مساحه للآخرين،،وما اظن الاخت فاطمه الصادق ستترك الكتابة فمستحيل،،فقط لا تحاولوا تكميم افواه الغير واسكاتهم فهذا تجني،،،ليتك والاخ مزمل تكتبون عن التركة المثقله التي خلفها مجلس المريخ المستقيل،،وقال عنها من مجلس التسيير انها خفيفه هنا وهناك كما قال ،،ودي عايزه منكم ايضاح،،وكذلك فيما يخص المنتخب والكلام الذي يجتره ناس الاتحاد ووالوزاره في الدعم وزي كل مرة،، واخر مره وكيل الوزاره قال هم دعموا وعايز مواجهة معاهم،،،ومنتظرين نحن وما عندنا غير الانتظار ،،لكن كل زول بجيك مطلق يدينو مع ان الكلام في القروووش عايز ورق،،واظنه فرك،،واتفرك،، لك التقدير ومنتظرنكم
  • #2
    حسن الامين 11-30-2015 11:0
    يا سلك لا تتحدث عن فطومة وتذكر المأذون في نفس الوقت
    اين العدالة ؟؟؟؟؟؟
  • #3
    حسن الامين 11-30-2015 11:0
    يا سلك لا تتحدث عن فطومة وتذكر المأذون في نفس الوقت
    اين العدالة ؟؟؟؟؟؟
  • #4
    طارق 11-30-2015 04:0
    اديهم في المليان رغم انهم مابحسوا بقوا زنااااااااطير ساكت
       الرد على زائر
    • 4 - 1
      Hajjam 12-01-2015 02:0
      زناطير ياحناطير وللمجموعات بجاه سيد البلد مقاطير.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019