• ×
الإثنين 18 يناير 2021 | 01-16-2021
شوربجي

فتح عينك ايها الاتحاد الهلال صاحي ليك

شوربجي

 12  0  1850
شوربجي


((())) يا جماعه فهمونا :

هل هناك قانون رياضي او ليس هناك قانون رياضي ؟

فقد قال رئيس اتحاد بورسودان محمود صالح وعضو الجمعيه العموميه في قناة الشروق ان قرارات الجمعيه العموميه مطبوخه

ماذا يعني هذا الرجل بمطبوخه ؟

الم يلجأ الاتحاد بعد فشله في كل الحلول الي الجمعيه العموميه

وهل الجمعيه العموميه تمتلك القانون وتطبيقه ام انها تطبخ او تتلقي طبخات جاهزه لتفرضها علي الناس

يعني جبتك يا عبد المعين تعيني لقيتك اسخم مني

بالعربي ( الكسيح ) لا يوجد قانون رياضي في السودان انما هي حبيسة الخزائن والدواليب

ما كان معتصم يخرج علينا ليخدعنا وكأننا سذج بأن هناك قانون يحكم اللعبه

القوانين لا تحكم اللعبه تحكمها الجوديه

الجوديه التي رفضها المريخ هي قوانين اهل السودان

ولو كان الكاردينال محسوبا علي النظام لحدث ما يفرح جماهير الهلال

وما نضحك علي بعض


((())) قولوا استدراج قولوا غشامه المهم الهلال كشف الفساد :

الهلال هو حامي القوانين والهلال هو ناصر المستضعفين وان خسر

ولانهم تعودوا علي حياة اللف والدوران والغش والخداع خرجوا علينا ليقولوا ماذا كسب الهلال من هذه الزيطه والزمبليطه

نقول لهم بالفم المليان الهلال كسبان ويكفي الزول ينام مظلوم ولا ينام ظالم

ويا حظ من نام مظلوما لانه سينوم قرير العين هانيها

الحر ينام قرير العين في سجنه
والطاغية تخنقه الكوابيس على فراش وثير في قصره

و راع صاحب كسرى أن رأى عمرا**** بين الرعية عطلا و هو راعيها

و عهده بملوك الفرس أن لها **** سورا من الجند و الأحراس يحميها

رآه مستغرقا في نومه فرأى **** فيه الجلالة في أسمى معانيها

فوق الثرى تحت ظل الدوح مشتملا **** ببردة كاد طول العهد يبليها

فهان في عينه ما كان يكبره **** من الأكاسر والدنيا بأيديها

و قال قولة حق أصبحت مثلا **** و أصبح الجيل بعد الجيل يرويها

أمنت لما أقمت العدل بينهم **** فنمت نوم قرير العين هانيها

عظمة الهلال انه اصطف مع الحق

وما بالنا بمن اصطف مع الباطل وهو يتقلب علي فراشه تهدده الكوابيس

عظمة الهلال اخوتي في قاعدته الجماهيريه العريضه التي تحرك كل الاحداث

وحتي الحكومه تجاهلت الاحداث و الحروب والحوار الوطني و ازمات الغاز والخبز وغيره

وانشغلت وحتي الثماله بقضايا الرياضه وانسحاب الهلال والاتحاد العام واخطاء لجنة الاستئنافات

وتدخلات علي مستوي رئاسة الجمهوريه متمثلة في الرئيس والنائب الاول والثاني ووزير الرياضه والبرلمان وجهاز الامن والمخابرات

واجتمع الجميع وتوافقوا واتجهوا سويا نحو الجمعية العموميه وبكل البنود

المشكله ان الجمعيه العموميه هي من تعرضت لضغوط من اتحاد معتصم فتجاهلوا قيام مباراة قمه بين الهلال المتصدر والمريخ المتأخر

وابي الظالم الا ان يتمادي في ظلمه للهلال

فصدر فرمان الهلال معلنا استمرار سلاح الانسحاب الرادع

وكردنه وراكم حتي تستقيم الامور

وكدي ورونا الدوري بدون سيد البلد


((())) نعم الهلال بعبع للاتحاد :

قال لي متعجبا ماذا كسبتم من الانسحاب

قلت ليهو كسبنا المستقبل ودخلنا الخوف في نفوس المرجفين

قال الدوري والكاس ما كان اخير لانه هو البيتسجل في التاريخ

قلت فليسجله التاريخ للمريخ فماذا يضير الهلال

قال زيو زي اي دوري او كاس وحيقولوا المريخ جمع ما بين البطولتين في ٢٠١٥

قلت ما مشكله لان ما يهم الهلال تقويم المسيره وايقاف كل المتلاعبين بالقانون وارساء العدل

قال ما بتقدروا لان المريخاب ماسكين كل مرافق الرياضه

قلت قدرنا وهم من فشلوا في عقوبة الهلال ورئيس الهلال

قال هل سيستمر الهلال في الانسحاب

قلت ربما يستمر حتي تنصلح الامور وان حدث اي خطأ آخر في التسجيلات او ان حدثت اي سمكره لصالح المريخ فتلك الطامة الكبري

قال يعني الهلال اصبح بعبع يخيف الاتحاد

قلت نعم وما زالت الكثير من الاوراق في يد الهلال وممكن يوصلها لوزان

قال ماذا ستقولون في لوزان

قلت هناك قضية بكري المدينه والتي لم تحسم بعد وهناك الفساد المالي في الاتحاد

قال هؤلاء محصنون وجاهزون لاي طارئ

قلت ستري كيف تكون معاملتهم للهلال في ٢٠١٦ ستكون احسن ما يكون

قال كيف ستكون

قلت سيحترمون الهلال كثيرا لانه الزعيم وسيد البلد وكبيرها ولن تتكرر اخطائهم


((())) كوارث الرياضه من القانونيين :

كلما اطلت ازمة قانونية برأسها قالوا يا ابو القوانين وكنا نتجه صوب اناس بعينهم نقول عنهم انهم اكثر العارفين بالقوانين

لذا ظلت رياضتنا متخلفة وبجهل هؤلاء الاشخاص الذين يفصلون القوانين ويفسرونها كما يشاءون

والمادة كذا قالت كذا والماده كذا يجب ان تكون كذا

ومن فشل الي فشل كان يقودنا الاستاذ محمد الشيخ مدني

والذي اسماه المنتفعون بابو القوانين

رغم ان القوانين لا اب لها ولا ام

تدهورت الكرة كثيرا معمثل هذه المسميات

وما حدث في الجمعيه العموميه من سمكرة وتلفيق الا دليل علي فشل ابو القوانين وام القوانين والعارفون بهذه القوانين

يا اخي ريحونا من امثال هؤلاء البشر

السودان به شباب واعي وفاهم وممكن يقود المسيره القانونيه افضل من هؤلاء الديناصورات التي شاخت وهرمت واصابها الزهايمر

وعليكم الله اقرأوا هذا اللقاء مع ابو القوانين :

اكد الاستاذ محمد الشيخ مدني الشهير بابو القوانين عن ان اتحاد الكرة محق في اضافة أعضاء للجنة الاستئنافات العليا والتي كانت سبب في أزمة الموسم وقال محمد الشيخ ان الإضافة صحيحة لان الطلب اتي من رئيسها بعد الظروف الموضوعية التي أدت الي نقص أعضاء اللجنة ال ٦ لان قرارها لا يصبح ساريا الا بموافقة ال ٦ وبالتالي فان العمل تعطل كثيرا في ظل عدم اكتمال النصاب وقال محمد الشيخ مدني في حوار أجراه مع الزميل نصر الدين الفاضلابي ان اللجنة أصبحت عاجزة عن اتخاذ اي قرار شرعي طالما لا يوجد نص يمنع صدور ذلك القرار واشاد ابو القوانين بصعود نادي النيل شندي للممتاز قائلا انه النادي الوحيد الذي سوف اتحدث عنه عاطفيا ووالدي كان اول رئيس لهذا النادي موضحا ان وجود النيل والأهلي سيخلق الموازنة المطلوبة بين جماهير الرياضة بالمدينة واضاف ان العالم كله الان يقوم علي التشجيع الجغرافي وقال في ختام حديثة الذي تنقله (سودانا فوق) لا اُذيع سرا اذا قلت انه خلال العامين القادمين سيصل منصة تتويج الدوري الممتاز فريق اخر غير المريخ والهلال


((())) اين ذهبت اموال الاتحاد العام منذ مجئ معتصم جعفر ؟

ظني ان المحامي الشاطر عماد الطيب قد يكون ملما بكل التجاوزات الماليه في الاتحاد العام ونحن في انتظار فتح ذلك الملف وتلك التجاوزات التي نسمع عنها

وكم استلم الاتحاد من الفيفا منذ سنين طويله

واين صرفت هذه الاموال الكثيره والاتحاد يدعي انه مفلس وغير قادر علي الصرف وتركه للمنتخب يتيما

والحكايه واضحه فالفيفا تمول كل الاتحاد باموال ضخمه وتشترط عليهم صرفها في تطوير الرياضه

وطبعا لم تتطور الرياضه في السودان

تطورت الانديه بفضل رؤسائها الاغنياء

والمنتخب ومنذ ان تقلد معتصم جعفر وصحبه مقاليد هذا الاتحاد لم يحرز نصرا يثلج صدور السودانيين

فأين ذهبت هذه الاموال المتلتله ؟؟؟؟؟؟؟؟؟



محمد حسن شوربجي


امسح للحصول على الرابط
بواسطة : شوربجي
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    Ali yas 11-29-2015 03:0
    الدكتور شوربجي ألف سلام ، بس للتذكير ناس معتصم جعفر ديل لو كتبوا وناقشوا قوانين الرياضيات والنظريات يفبركوها من جديد ، حتى نظرية فيثاغورس ناس الجاكومي يطبقوها خطأ ويقولوا للعامية طبقنا القانون والنظرية بس التطبيق الخطأ وبالنسبة لهم صح . بالاضافة الى الصحافة الحمراء التي دوشتنا المريخ يصفع الهلال بتسجيل ألوك وفي الفه الأخيرة طلع فالسو .
  • #2
    Ali yas 11-29-2015 03:0
    الدكتور شوربجي ألف سلام ، بس للتذكير ناس معتصم جعفر ديل لو كتبوا وناقشوا قوانين الرياضيات والنظريات يفبركوها من جديد ، حتى نظرية فيثاغورس ناس الجاكومي يطبقوها خطأ ويقولوا للعامية طبقنا القانون والنظرية بس التطبيق الخطأ وبالنسبة لهم صح . بالاضافة الى الصحافة الحمراء التي دوشتنا المريخ يصفع الهلال بتسجيل ألوك وفي الفه الأخيرة طلع فالسو .
  • #3
    الاسر جمالك 11-29-2015 01:0
    لعلمك كردنة ضرب الشوربة مع مجدي و بعدين اكل اللقيمات مع اسامة اه رايك
  • #4
    نصرالله 11-29-2015 12:0
    يا جحا ما قلتوا ما معترفين بالاتحاد وما بتتعاملو معاهو وبتحلوه الحصل ايه جائي منكسر وتحزر فيهوا
  • #5
    Mustafa Ali 11-29-2015 09:0
    أخيرا قنعت يا شوربة بأقل الخسائر بعد ما كنت تتوعد الاتحاد بالويل والثبور؟ قلنالكم قبيل ما تطلقوا التصريحات الرعناء وكفاية عنتريات أهو السواها فيكم الاتحاد النجار في الخشب ما سواها والبطولتين للمريخ لأنه ببساطة إعتمد على القانون وانتم إعتمدتم على الصياح والنباح و في النهاية النتيجة إنبطاح. قال ايه الواحد أحسن يكون مظلوم ما يكون ظالم يعني انت الوقت ده كله كان هدفك تتطلع مظلوم؟ صدقناك.
  • #6
    جلابي - الدوحة قطر 11-29-2015 08:0
    كلام عجيب ..ان دل علي شي ..انما يدل علي
    ان ادي اشي......
  • #7
    صلاح محمد حسن الشيخ 11-29-2015 08:0
    تهضرب بالليل وتقوم مفزوع ياربى هوضوع بكره شنو ايووووووووووواه اراجع الارشيف واخد سطر اوسطرين واحشى باقى المقال باى حاجه اتم بيه اصحى يا شوربه مكانك سر خلاص لوزان زاتو كجنكم الدفاتر القديمه مابتحلك وتقول لى الكردنه قال اعيدو لى الكوره تانى ولو اعادوها برضو حينسحب لان الاتحاد ما اتفرتق ولا لجنة الاستئنافات ما اتحلت تنومو وتصحو تلقو نفس الملامح والشبح نهى نهى نهى هو الامل ورئيسو اداكم ضهرو وتقول لى كسبان واتحداك طبق كلامك وانسحب تانى ال4 الكبار متربصين لاجوديه ولا برلمان ولا الفيفا اين المفر المره الجايه الليق زاتو يفتح الله والحل الوحيد تسيبو الهلال لاهله للكبار للعقلاء مش لقيمات وعنتريات واوهام وسب والكايبوى زمنو ولى واطور لتطور الزمن يعنى خليكم فى المدرجات الشعبيه وشوفو الهلال بثوبه الجديد ...ادهب الى فرعون انه عصى الخ الايات ....اين العقل
  • #8
    جعفر صالحين 11-29-2015 08:0
    ماذا كسب الهلال من دس انفه فيما لا يعنيه ... هاهو كردنة يلف ويدور ويشحت الجماعة عشان يعيدوا ليه مباراة المريخ والهلال ... ألم يقسم كردنة بالله ان فريقه لن يلعب أى مباراة طالما هذا الاتحاد موجود ... والله انبراشة بايخة وفضيحة !!!!!!
  • #9
    العمدة 11-29-2015 06:0
    يا أستاذ شوربجي الكاس بتاع 2015 دا ألصقنا عليه إسم (كاس دوري اللقيمات2015)(أوكاس السمكره)(أو كاس البرلمان) أو(الكاس الملح)
  • #10
    osama 11-29-2015 03:0
    الموسم المنصرم كشفت عوارات كثيرة كانت مستترة امثال ابو القوانين ومولانا والمسئول الاول عن الرياضة والمسئول الاول في البرلمان والمسئول الاول عن البلد وقالوا هلالابي ..مع ان المريخاب كلهم تكتلوا مناصروا الظلم . الفريق الاحمر تقول قائد الجيش السوداني كل المسئولين رفعوا تعظيم سلام. الله فضحهم جميعاً.
  • #12
    الدابروى 11-29-2015 12:0
    اصحى يا بريش انت لسه عائش فى الخيال الواسع؟
    صاحبكم كرداكير {على قول الارباب} اكل اللقيمات وشرب {ابو جمل }كمان عند اسامه من زمااااااااااااااااان كخ كخ كخخخخخخخخخخخخخ
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019