• ×
الجمعة 29 مارس 2024 | 03-28-2024
محمد الطيب الامين

تبقى لي في الريده مجرم عادى ممكن أبقى داعش !!

محمد الطيب الامين

 4  0  2746
محمد الطيب الامين

* (الحق) بحتاج للشجاعة ..
* لو ما عندك شجاعة ما بتقدر تقول (كلمة حق) ..
* و(الباطل) بحتاج لـ(صحن لقيمات مُصلح) ..
* عشان كده ساهل جدا تضرب (اللقيمات) وتقول (كلمة باطل) ..
* ولكن نحن على ثقة ان المفوضية لم تضرب (اللقيمات) ولذلك تستطيع ان تقول (كلمة حق) ..
* ورد في الأخبار ان (نعسان غادر غرفة المريخ) ..
* وأنا خوفي يكون نعسان طلع من الغرفة وقبل ما يصل البيت (نام) في غرفة الهلال ..
* نعسان على (حس النعسان ده) ما بقدر يصل (بيتم) عشان كده أحسن ينوم في غرفة الهلال وصباح الله بخيرو ..
* صباحاتو بُيض ..
* في افريقيا هنالك أكثر من (يوسف بلايلي) ولكن عيون (الكاف) عميانه ..
* لجان (الكاف) لو ركزت حبة كده ممكن تلقى (12) يوسف بلايلي ..
* القصة قصة تركيز بس ..
* إحنا زمان كنا مفتكرين افريقيا فيها مازيمبي واحد ..
* ولكن بعد ما ركزنا إكتشفنا إنو في افريقيا في (جوز) مازيمبي ..
* مازيمبي في الكنغو ومازيمبي في المناقل ..
* وكل المطلوب من (الكاف) التركيز حتى لا يكن يوسف بلايلي وحده بينما بلدنا دى كلها يوسف بلايلي ..
* الكاردينال من دبي مشى السعودية ومن السعودية ماشى دبي ومن دبي جاي الخرطوم ..
* أما أسامة ونسى فهو من بيت ناس أمير كمال مشى بيت ناس راجى ومن بيت ناس راجى ماشى بيت ناس مصعب ..
* شغال تحانيس تقيلة ..
* والله قلوبنا مع الرجل الهلالابي الاصيل أسامة ونسى الذى اختارته الحكومة رئيسا للمريخ ..
* نطلب من الهلالابي الكبير اسامة ونسى الصبر وبأذن الله الأمور بتمشى ..
* غايتو جنس غايتو ؟؟
* بالأمس (ضبح) ولاء الدين (تور) كرامة بمناسبة تسجيله في الهلال ، وكذلك فعل أبوعاقلة العاقل ..
* والتور الضبحو ولاء الدين ممكن يكفى المريخ شهر لقدام ..
* تور عديييييل ..
* ده بزار والله ..
* تمن التور ده ممكن يسجل عطرون للمريخ ..
* عطرون بـ(الثاء) ..
* عمر بخيت لما كان شاب تشكيلة الهلال بتكون (عمر بخيت واى عشرة لاعبين) ..
* وعمر بخيت بعد ما شاب ومشى المريخ بقى اى تشكيلة يلعب فيها المريخ بيخسر ..
* كج عجيب ..
* تبقت ستة ايام لعمر بخيت في المريخ ومن بعد ذلك عليه ان يعود للجريف كابتنا وقائدا ..
* (13) سنة في الهلال ضيعها عمر بخيت بستة شهور في المريخ والسبب حب المال ..
* قروش (عزو) دى بتكمل يا عمر لكن الهلال ما بكمل ..
* يلعب منتخبنا في (كريمة) خوفا من جمهور الخرطوم ..
* وتحويل المباراة إلى كريمة إعتراف من قادة الإتحاد بظلم الهلال وباقى اندية الممتاز ..
* هم عارفين الجمهور ممكن يعمل مشاكل في مباراة المنتخب زي ما حصل في مباراتنا امام يوغندا ..
* والجمهور ما بعمل مشاكل لو ما حس بالظلم ..
* والظلم بقى محسوس وعندو ريحة ولون كمان ..
* ريحة الظلم هى اللقيمات ولون الظلم هو لون اللبن ..
* لكن السؤال البيفرض نفسو : لمتين الاتحاد العام ح يقعد يُرحل مباريات المنتخب كده ؟؟
* ترحيل مباراة المنتخب لكريمة ما عندها علاقة بجمهور كريمة بل ان الترحيل سببه خوف الاتحاد من الجمهور الذى طرد محمد سيد أحمد في مباراة يوغندا ..
* وأنا حقيقة بحب كريمة جدا لكن كان عندي مقترح صغير كده..
* كنت بقترح إنو مباراة منتخبنا تُلعب في (المناقل) ..
* هكذا بقترح ..
* واى زول طبعا حر في (مقترحاتو) ..
* لكن ما مشكلة .. مباراة المنتخب الجايه ودوها المناقل ..
* المناقل في قلوبنا جوة يا خوه ..
* بكرى المدينة بقى يتمرن يوم ويغيب يومين ..
* وعلاء الدين يوسف وقف عدييييل من التمارين ..
* أما ايمن سعيد على طريقة الحضرى سافر وما كلم زول ..
* والله العظيم انا لحدى الأن لما اتذكر العملو الحضرى في المريخ بزعل ..
* هل تصدق إنو الحضرى وصل مرحلة أجبر فيها الجهاز الفنى يعمل التمرين عصرا عشان هو يسافر القاهرة بعد المغرب و(يبيت) مع أولادو ؟؟
* والله صحى ..
* ياخى الحضرى قال : (عزو ما كان بيحلم يسلم لي في يدى) ..
* مش قال كده ؟؟ وبعد ده ما في زول سألو ولا في زول وقفو ..
* الحنطور ده ما عندو كرامة ..
* المريخ والكرامة ما بتلاقو ..
* عشان كده اى حاجة تخطر في بالك الحضرى عملها في المريخ ..
* مرة ناس المريخ شالو جواز الحضرى ومسكوهو لمجاهد القدال ..
* قام الحضرى (شرد وسافر) بالجواز المصرى ..
* ناس المريخ بدل ما يحاسبو الحضرى قامو استغنو عن مجاهد ..
* والله صحى ..
* ديل حناطير تتوقع منهم اى حاجة ..
* عشان كده هسه ايمن سعيد (رجااااااله كده) سافر وما في زول بقدر يسألو ..
* بوابه بدون بواب ..
* بكرى المدينة زهجان ومستاء وبطنو طامه ..
* لكن يا بكوري الهلال تانى إلا تشوفو في (جبهة عريس) ..
* لو عندكم عريس في حلتكم شوف (جبهتو) يوم الجرتق بتلقى الهلال ..
* انت ومعاك صلاح ادريس ..
* اقصد (الملحن) صلاح أدريس ..
* بالمناسبة دى ..
* ألحان صلاح ادريس زي (السليقه البارده) ..
* والله صحى ..
* او في الحقيقة هى زي (ملاح أم رقيقة البايت) ..
* صلاح إدريس لو ركز مع اهلى شندي وتجويد الألحان بيكون مية مية ..
* عموما نرجع ونقول لبكري المدينة ..(اهو ده العزاب وإستحملو) ..
* ما قلنا ليك المريخ حنطور قاسي ومسيخ من اولو ..
* وما رضيت كلامنا ومشيت براك يا هو ده الفلس إستحلمو !!
* المهم ..
* واحدة من أهم اسباب (البكا) في المريخ الآن الأستقرار الذى يشهده الهلال ..
* مرات الزول لو قلبو ما نضيفو بتجهجه لما يشوف نجاح غيرو ..
* عندك مثلا البنات ..
* البت البايره كل ما تسمع صوت (دلوكة) الدنيا دى بتمسخ ليها ..
* اى بت بايره داير (تخرب مزاجها) قول ليها : صحبتك فلانه ديك عرسها يوم الجمعة ..
* لو قلت ليها كده البت دى نوم ما تنوم ..
* ح تشوفك (عشرة عشرة) ..
* حتى لو مخطوبة برضو بتزعل لما تعرف في واحدة من صحباتها عايزة تعرس ..
* الحاجة دى الآن تنطبق في المريخ ..
* البكا في المريخ سببو نجاحات الهلال واستقراره الكبيرة ..
* وجرايد الهلال كل يوم تتحدث عن (محترف قنبلة) يقترب من الكشف ..
* لو داير تخرب ليك مزاج واحد من الحناطير قول ليهو : (الهلال إستقبل محترف الليلة الصباح) ..
* لو قلت ليهو كده بتلقى ملامح وشو إتغيرت ..
* اى حنطور بيزعل لنجاح الهلال اكتر من زعلو بفشل المريخ ..
* والله صحى ..
* لجنة (التسير) التى كونتها الحكومة قامت بتكوين (لجنة) من اجل الجلوس مع غارزيتو ..
* واللجنة التى كونتها لجنة التسير يجب ان تنبثق منها (لجنة) ..
* أهم حاجة اللجنة دى تنبثق ..
* غارزيتو لو ما لقى اللجنة منبثقة ما بجدد معاكم العقد ..
* الإنبثاق في اللجان أهم حاجة يا اولاد الحلال ..
* إنبثاق بـ(الناء) ..
* وتبقى لي في الريدة مجرم عادى ممكن أبقى داعش !!
امسح للحصول على الرابط
بواسطة : محمد الطيب الامين
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    Hajjam 11-08-2015 06:0
    متي سيخرج الطيشاب من قاع التمهيدي ومستنقعات سيكافا. مائة عام والمحصلة صعود واحد لدوري الأربعة بصحبة راكب وبعد ده الخشم بليلة والحيلة قليلة.
  • #2
    أبو ناهد 11-08-2015 10:0
    الاستاذم محمد الطيب، صباح الخير،

    أنا بعشق اسلوبك لانه قريب جدا من اسلوب الكاتب الساخر الفنان المثقف محمد عبد الماجدز

    سير على هذا المنوال واتنمى لك التوفيق والنجاح
  • #3
    11-08-2015 08:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟؟؟ ربما بعد أن يطير النعام
  • #4
    Hajjam 11-08-2015 12:0
    الحنطور بجاه سيد البلد مقطور وبعد ده الحيلة قليلة والخشم بليلة. الهلال توقف مباراتين من الدوري الممتاز وبعد ده الوصيف الضعيف ومع إكرامية لجنة الاستئنافات ماقادر يعتلي صدارة الممتاز.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019