* الناس بتعرف (خايب الرجا) لكن كثير من الناس ما بعرفو (الرجا الخايب) ..
* وخايب الرجا والتعيس أولاد خالات ..
* لكن الرجا الخايب هو : المريخ المسيخ ..
* يعنى لو في زول سألك من تعريف (الرجا الخايب) طوالى تقول ليهو هو (المريخ) ..
* والدليل على إنو المريخ (رجا خايب) ما حدث بمدينة المناقل أمس ..
* وبالمختصر المفيد نقول : المريخ تجاوز مرحلة (خايب الرجا) وأصبح (رجا خايب) ..
* ولعل حاله يشبه حال (حُصان السبق) الذى كلما إقترب من نهاية السباق تجده يتوقف حتى (يتبول) ..
* حُصان بيكون جاري كويس وبدون مقدمات يتوقف لـ(يتبول) ..
* حُصان زي ده بحساباتنا إحنا بنسميهو (رجا خايب) ..
* وأنا طبعا اسف لانني أطلقت تشبيه الحصان على المريخ بينما واقع الحال يقول ان المريخ (حنطورا) وليس حصانا ..
* ولذلك بنعتذر للحصان ..
* المهم ..
* هنالك وجه شبه كبير ما بين لوممباشى والمناقل ..
* فبخلاف ان الحنطور عاد من لوممباشى بثلاثية وعاد من المناقل بربع دستة فأن الشبه واضح على مستوى (الشعار) وعلى مستوى (الزنقة) ..
* زنقة لوممباشى كانت (عصر) وزنقة المناقل برضو (عصر) ..
* والزول (البيزنقك) والشمس فوق ما زي الزول البيزنقك بعد المغرب ..
* والله صحى ..
* الليل بغطى الجبال عشان كده (زنقة العصر) ما حبابا ..
* في لوممباشى لعب المريخ المباراة قبل النهائيه في دورى الابطال ولكنه وقف لـ(يتبول) فكان ساماتا وما ادراك ما ساماتا ..
* وفي المناقل لعب المريخ المباراة قبل النهائيه في الممتاز ولكنه وقف لـ(يتبول) فكان نادر عطا وما ادراك ما نادر عطا ..
* أعلام المريخ قبل مباراة الأمس قالو : (المريخ سيحتفل باللقب من المناقل) ..
* وأعلام المريخ قبل السفر للومممباشى قالو : (شامين ريحة مطار) ..
* وما بين (ريحة المطار) و(أبو قنفد المناقل) إحنا متنا من الضحك والضحك كتلنا ..
* وإذا كان المريخ قد خسر بـ(7) أهداف أمام الوحدات الأردني بسبب (البرد) فأن المريخ خسر بثلاثية أمام اهلى مدني بسبب (أبو القنفد) ..
* كل لعيبة المريخ كانو مشغولين بـ(القنفد) فظهر لهم نادر عطا الذى لا يرحم ووراهم (عادم الركشة بى ورا ولا بى قدام) ..
* وده كلو من (الشعار) ..
* يا جماعة الزول لو شاف (عيون) بتشبه عيون محبوبته سابقا بتأثر شديد وبكون ما مركز ..
* مرات (تشابه البقر) بيعمل ليك (رجفه) ..
* والجماعة ديل الشعار إتشابه ليهم ..
* وبصراحة كده المفروض لجنة الإستئنافات يكون عندها رأى واضح في حكاية الشعار دى ..
* ما صاح فريق سوداني يلبس شعار فريق كنغولي ..
* (الفيفا) لو عرفت الحكاية دى ممكن تحرم السودان من التمثيل الخارجى يا اسامة يا عطان المنان ..
* وأعتقد ان النص في القواعد العامة واضح جدا ..
* النص بيقول : (إذا ثبت للجنة المنظمة ان هنالك فريق محلى يلبس شعار فريق افريقي يجب اعتباره مهزما ومع غرامة مالية وإلزامه بتغيير الشعار) ..
* النص ده موجود في القواعد العامه المادة (125 ب) ..
* وهذا النص يسمى (إحتيال شخصية) ..
* يعنى أهلى مدنى إحتال شخصية مازيمبي وهذه مخالفة صريحة بنص القواعد العامة ..
* ولو كمان المريخ داير يصعد القضية اكتر ممكن يشتكى نادر عطا باعتباره منتحلا لشخصية حبيبنا ساماتا ..
* يعنى اهلى مدنى خالف القانون في حاجتين اتنين .. الحاجة الاولى : انتحال شخصية فريق افريقي ، والحاجة التانية : لاعب محلى انتحل شخصية لاعب افريقي اسمو ساماتا ..
* والفيفا في الحاجة دى ما بهظر نهائى ..
* قبل كده في (مورتانيا) في فريق لبس شعار الأهلى المصرى وغلب ولكن طبقو عليه القانون فهبط للدرجة الرابعه ..
* كل المطلوب من المريخ يتقدم بشكوى ويمكن ان يستعين اهل المريخ بـ(مريخاب الجنوب) او مريخاب الدمازين ..
* وبعد يستكملو ملف الشكوى لابد من (صحنين او تلاتة صحن لقيمات) لزوم اجتماع وكده ..
* واللقيمات أهم من مستندات مريخاب الجنوب ..
* والله صحى ..
* عموما ..
* أنا بتوقع بكره (المُلحن) صلاح أدريس يكتب لينا عن الحاجة دى ..
* لكن في حاجة انا نسيتها ..
* إحنا إتكلمنا عن وجه الشبه بين الاهلى ومازيمبي وعلينا ان نتحدث ايضا عن وجه الخلاف بين (الرحلتين) الرحلة إلى لوممباشى والرحلة إلى المناقل ..
* المريخ سافر المناقل بدون بودى قاردات وبدون طباخين وفنيين بتوعين فحص هوا ..
* وده أكبر غلط طبعا ..
* إنتو طالما عارفين إنو الاهلى بيلبس نفس شعار مازيمبي كان تسوقو معاكم بودى قاردات وطباخين ..
* ما بعيد يكون ناس الاهلى ديل عملو ليكم (مخدر) في المكيف ..
* كل شي وارد ..
* وبصراحة إنتو غلطتو والله ..
* المفروض الفنيين بتاعين الهوا ديل تسوقوهم عشان يفحصو ليكم الهوا حق المكيف ..
* والله فعلا حناطير ..
* غايتو جنس غايتو ؟؟
* هنالك ملاحظات مهمه في مستوى المريخ الفنى والبدني ..
* المريخ يا جماعة بدون مقدمات حصل هبوط كبير في مستواه البدني ..
* بدون مقدمات مستوى المريخ البدني هبط مع إنو مدرب اللياقة ما إتغير ..
* والهبوط البدني حصل اعتبارا من دور الاربعة لابطال افريقيا الذى بلغه المريخ لاول مرة في تاريخه (صحبة راكب) ..
* وانا قبل ما اواصل الحديث عن اسباب تراجع مستوى المريخ البدني عندي سؤال واحد ..
* بسأل عن اخبار (يوسف بلايلي) لاعب الاتحاد الذى تمت معاقبته بسبب المنشاطات ؟؟
* بس .. ده سؤالي ..
* وبتمنى إنو السؤال ما يكون محرج ؟؟
* كده خليك من يوسف بلايلي والمنشطات .. ما هو سبب تراجع مستوى المريخ بدنيا ؟؟
* طبعا المريخ فنيا ما عندو مستوى اصلا لكن انا بتكلم عن المستوى البدني الهبط بدون مقدمات ..
* على فكرة .. سؤالي عن يوسف بلايلي ما عندو علاقة بهبوط مستوى المريخ ولا عندو علاقة بأى حاجة فهو سؤال وجاني وانا حر ..
* ياخى فريق إحنا إنسحبنا ليهو عدييل وخلينا ليهو الدورى ومع ذلك داير يجى التانى ..
* مرمي الله ما بترفع وكان رفعو بقع ..
* الجماعة ديل قدر ما يرفعوهم بـ(اللقيمات) بقعو تانى ..
* واوع تقول لي : كرة القدم والخسارة وارده والحنك ده ..
* تخسر ااااى لكن ما بتخسر بالتلاتة امام فريق ولائي تصنيفه ليس مميزا ..
* دى ما حصلت ..
* الهلال ما حصل إتغلب في الممتاز بالتلاتة ولا ح يحصل ..
* ودى فضحية يا حناطير ..
* إحنا صحيح ممكن نخسر افريقيا بهذه النتيجة لكن محليا مستحيل ..
* خسرنا امام مازيمبي بالخمسه وإنتو خسرتو امام الوحدات الاردني بالسبعة ..
* عليك الله وبالذمة في فريق محترم بيخسر في (الأردن) ؟؟
* الاردن غير (البنسلين) ما فيها حاجة ..
* عموما نرجع ونقول : يوسف بلايلي لما وقفو افريقيا كلها بقت تعمل حسابها من المنشطات ..
* والحاجة دى ظهرت في مستوى فرق كثيرة منها الاهلى المصرى والترجى وانيمبا النيجيري ..
* الاهلى المصرى قبل حادثة يوسف بلايلي كانت لياقة لاعبوه ماشاء الله تبارك الله ..
* وبعد حادثة يوسف بلايلي لياقة لاعبو الاهلى المصرى بقت منتهيه ومستواهم البدني هبط عديل ..
* وعلينا نحن أهل الهلال ان نتقدم بجزيل الشكر للكابتين يوسف بلايلي الذى (توقف) ولكنه (طهر) افريقيا من المنشطات ..
* أنا ما داير اشغل الناس بموضوع يوسف بلايلي لانو دى (ما مناسبتو) لكن حبيت اذكركم بس ..
* وتبكو بس عين (قطره) وعين (مس) ..
* قالو (الضاق الثعبان بخاف من جر الحبل) ..
* وإحنا يا الكاردينال السنة الجايه دى دايرين شعار احتياطي نفس شعار مازيمبي ..
* ان شاء الله نتمرن بيهو ..
* غايتو ناس الهلال ديل بالجد حقارين ..
* الهلال (خرب) للناس الموسم وإنسحب ومع ذلك حتى اللحظة محتفظ بحظوظه في اللقب ..
* الليلة الهلال لو فك الانسحاب ورجع بيشيل الكاس ..
* شوف العظمة دى ..
* 17 يوما الهلال وقف نشاطو وسرح لاعبيه ومع ذلك لو رجع برررررضو بيشكل الكاس ..
* أنا قلت ليكم طول ما الحنطور ده قاعد الهلال ما بتجى عوجة ..
* واعتبارا من الموسم الجايه الهلال ما ح يلعب كل المباريات ..
* بس كده ..
* ح نلعب مباراة و(نفط) مباراة ..
* وما في زول بقدر يسألنا ..
* ولو بتقدرو يا محمد سيد احمد نزل الهلال الدرجة الاولى ..
* نتحداكم لو بتقدرو ؟؟
* الهلال انسحب وخرب ليكم الموسم وبعد ده السنة الجايه بيلعب في الممتاز وبيشارك في الابطال ولا كتر خير معتصم جعفر ..
* وكضابين ما بتقدرو تعمل حاجة ..
* وكل موسم لو حسينا مجرد احساس إنكم جاملتو المريخ طوالى بننسحب ..
* ولما تقدرو (تمسكو هوا الله) تعالو نزلو الهلال يا محمد سيد أحمد ..
* وتبكو بس عين (قطره) وعين (مس) ..
* و..و..
* وعندي كلمة أحب اقولها (ابوقنفد حقنا طلع انثي وليس ذكر) !!
والله كلام
يديك الف الف عافيه