• ×
الخميس 28 مارس 2024 | 03-27-2024
بابكر سلك

شكوي بالبروبوسيشن

بابكر سلك

 19  0  3057
بابكر سلك
*الاهله مقتنعين بانو للهلال قضيه
*هي شنو
*كردنه زاتو ما عارفها
*المهم عندهم قضيه
*ووصل الحال الي ان البعض يطلق الكذبه
*وبعد شويه يصدقها
*اولاد جحا
*زمان قالوا جحا كان خاتي ليهو كرسي في خشم الباب
*الناس ماشه وجايه في الشارع
*عمك جحا قال امقلب ليك الناس ديل
*بقي اي زول يجي ماشي
*جحا يقول ليهو في حفله ف الشارع التاني داااك
*الاشاعه انتشرت
*وكبرت كذبة جحا
*والناس بقت تتدافع نحو الشارع دااااك
*جحا لما شاف الناس كلها ماشه الشارع داك
*دخل الكرسي وقال
*يمكن صحي في حفله في الشارع داك
*صلح طرطورو ولحقهم
*طلع الكذبه وصدقها
*وده حال اخوتنا الاهله
*ياخد مجراهو يا ناس
*ومجراهو خور ابو عنجه البودي دار الرياضه ام درمان
*يا اما تقولوا الروووووووب
*حل تالت مافي
*ايها الناس
*عجبتني قصة الشكوي ام بروبوزيشن دي
*قال ايه
*الحكم قال اللاعب بصق علي وجهه
*ماقال بصق في وجهه
*والفرق بين في وعلي كبير
*شكوي بالبروبوزيشن يا عمك
*دي جديده
*لكن بيني وبينكم
*(اوفر) over بتختلف عن (اون)on
*زي ما (ان ) in بتختلف عن ( بوتوم ) bottom
*in الشئ بتختلف عن in the bottom of الشئ
*بالطريقه دي ما نستبعد يوم يجونا يقولوا لينا
*القانون قال ان يوجه اللاعب الاساءه الي الحكم
*ماقال ان يوجه الاساءه للحكم
*والي بتختلف عن (ل) في المعني
*(الي) بتشترط ان يوجه اللاعب اثناء الاساءه قدومو لي اضان الحكم مباشرة لما يصلو رايش
*ويستندوا في ذلك الي الآتي
*لا ليا ولا عليا
*عند استخراج الطباق كمحسن بديعي من السطر اعلاه
*نجد ان معظم الطلاب يقولون ان الطباق بين ليا وعليا
*ولكن الصحيح يكون الطباق في اللام من (ليا ) وعلي من عليا
*وهذا في حد ذاته يظهر الفرق بين في (وجه الحكم ) وعلي (وجه الحكم )
*بقيتوا اساتذة عربي يا روشا
*والله تباروا المريخ ده تبقوا فقهاء عديل كده
*الزول يا روشا بشلخوهوا علي وشو ولا في وشو ؟؟؟؟
*انا بعرف ناس مشلخين في وشوشهم وناس مشلخين علي وشوشهم
*اسي يا روشا
*يجيك زول يقول ليك قلت لي اسعد (توف) علي وشك
*لما يجيك اسعد بقول ليك الزول ده (تفه ) لي علي وشي ولا (تفه ) لي في وشي ؟؟؟؟
*ولا الفرق ده نسأل منو في القضارف ؟؟؟؟؟
*والله تتابعوا علي وفي ديل يجرنكم يودنكم الاولي
*ديل حروف جر بجرن من زمن الجاهليه ما يجرنكم انتو ؟؟؟
*ياخد مجراهو بس
*ايها الناس
*ابو القنفت اليومين دي طالع في الكفر
*طلعوا الكسكته وجيبوا ليكم تلاته مليون ابو قنفت ضكر شوكو يقول يا غربتي لو دايرين امير
*لكن ابو القنفت لو دخل جوه الكسكته بعمل عمايل
*واتقنفتي
*ايها الناس
*اليس من السهل جدا ان تلتزم روابطنا بالخارج بشير دولاري شهري لمرتب المدرب ؟؟؟
*القصه ساهله جدا
*وناس الروابط عملوا اكتر من كده
*فقط اتصال وتنسيق وتنظيم
*والخيال يبقي واقع
*فروابطنا بالرياض وجده ومكه والمدينه والمنطقه الشرقيه ودبي والشارقه وابو ظبي والدوحه وامريكا وغيرها
*تستطيع ان تساهم في نهضة السودان خليك من مرتب مدرب
*سامعني يا ونسي !!!!
*ايها الناس
*غرزه مدرب شاطر
*وان كان البعض يري انه يتمدد في مساحات لا تخصه
*العقد بحدد ليهو مناطق وحدود تمددو
*حقو نفكر قبل نقرر
*وفي المريخ توجد بعض الفوضي
*وهي التي تسمح لغرزه بالتمدد
*علي الاقل ليضمن توفر المعينات التي يطلبها
*الجيش الجرار في القطاع الرياضي ودائرة الكرة مافي ليهو داعي
*موظف واحد يستطيع ان يقوم بكل الالتزامات بصورة ممتازه
*ويتبع ذلك الجيش الجرارا بالمكتب التنفيذي
*المكتب التنفيذي يحتاج لعدد بسيط جدا من الموظفين المتخصصين
*لا علاقه لهم بالمجلس سوي وصفهم بانهم موظفين
*وبكونوا ثابتين في كل المجالس
*الناس ديل لا مع ولا ضد
*موظفين يقوموا بواجبهم الوظيفي تجاه مؤسسه يعملون لديها
*لا مع ولا ضد
*ولا في ولا علي يا روشا
*ايها الناس
*ضربة بكري المدينه هي التي قادت الجماعه لهذه البطبطه
*ولكن القانون ياخد مجراهو
*خور ابو عنجه يا عمك
*والعزاء اننا حانشوف ابداعات ولدنا ميسي في دار الرياضه عصرا
*في دار الرياضه الصحيح ولا علي دار الرياضه يا روشا ؟؟؟؟
*ولا في حفلة في الشارع التاني يا فطومه ؟؟؟
*ايها الناس
*محاباة الاتحاد يمكن لاي انسان ان يتحدث عنها
*الا الاهله
*هل نسوا لجان يخطئ ولا يظلم ؟؟؟
*هل نسوا الصلوي وغابيتو وعدم معرفة اللغه البرتغاليه ؟؟؟
*هل نسوا آفة التجنيس ومن ادخلها لنا ؟؟؟؟
*ام تناسوا ؟؟؟؟
*ابو عنجه يا عمك هو مجراهو
*المهم
*كاسين في دنقلا
*مبسوطين شديد
*ايها الناس
*لو دايرين امير كمال جيبوا ابو قنفتكم
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*قررتو توقفوا الركشات عن العمل بعد اطناشر قالوا لينا
*ان صحه الكلام ده يا والينا
*يبقي مافكرتوا فينا
*منو البقدر يركب تاكسي ولا امجاد بالنهار خلي بالليل يا والينا ؟؟؟؟
*ولما يحوم بالليل الواحد فينا
*موش بكون مغرووووض ولي ضروره يا والينا ؟؟؟
*لو الساعه واحده صباحا زول عيان لدينا
*وكل العندنا خمسطاشر جنيه يا والينا
*كان ممكن نركب ركشه بي عشره للمستشفي تودينا
*والخمسه جنيه تقعد رواب في الجيب من الفقر تحمينا
*لكن في الحاله دي يا والينا
*نضرب تلاته تسعات تجينا
*ولا نحتسب الزول العيان لدينا ؟؟؟؟
*ممكن بعض الركشات تكون شغاله في الفارغه يا والينا
*توزع الممنوع وترجع اللافي فينا
*لكن عشان شوية اجرام تعمم القرار علينا
*الغلطان يقتل وتصادر ركشتو يا والينا
*لكن الشر ما يعم لينا
سلك كهربا
ننساك كيف والكلب كان ماشي البطري داير ليهو ركشه تاني امجاد يا بوبي
والي لقاء
سلك



في السلك - بابكر سلك
امسح للحصول على الرابط
بواسطة : بابكر سلك
 19  0
التعليقات ( 19 )
الترتيب بـ
الأحدث
الأقدم
الملائم
  • #1
    baco 11-05-2015 11:0
    كدي شوف لينا حل لموضوع الثلاثة بتاع شفوت مدني
    الشكوي في استاد المناقل
  • #2
    alyyas 11-05-2015 03:0
    انت كتاباتك كلها شخابيت لا تضيع وقتك يا ابوصلعة ونعلم الصلعة لها احتمالان اولهما الزكاء وخاصة في تخصصات الفيزياء والاحتمال الآخر هو قمة الغباء والاستهزاء لغير العلميين . فانت اكيد في الاحتمال الاول وبجدارة و ونحن نلوم ناس كفرووتر الصحيفة الالكترونية المحترمة التي تسمح بشخابيت على صفحاتها . في العام 2014 ما كنا نشوف خذعبلاتك هذه لأنها لا تخدم المريخ المتورط ماديا وكادر بشريا امثالك ولا كورة السودان انتم من افسد كورة البلد بسبب اساليبكم الضعيفة هذه . اللهم اصلح حال بلادي وابعد عنها ضعاف العقول و اانفوس .
  • #3
    أبومتوكل 11-05-2015 02:0
    كان شفت يا والينا أب كسكتة للنوم حامينا وكان شفت يا والينا عليك أبوك ترجع لينا وكان شفت يا والينا مع أب كسكتة ما فى تسجيل لينا حى وووووب ووبين علينا .
  • #5
    موبادون 11-05-2015 02:0
    بختك يا سلك الصفيراب هم الاكثر قراءة و تفاعلا مع مقالتك ....
    اخبار صقر قريش شنو ....؟؟
    اخبار جوبا شنو .....؟؟
    اسعار الكحول كم اليومين دي ....؟؟
  • #6
    19 /7/1996 مباراة زيكو الهرب بالكورة 11-05-2015 12:0
    كان قلبتها حصة قرامر ولا حصة بلاغة

    ياكم مزورين مزورين وفي الميدان مهزومين ولي عرق الفرق سارقين
  • #7
    اسيياد 11-05-2015 11:0
    ألعب بعيد تقليد محمد عبد الماجد جعلك كالغراب الذي نسي مشيته ، عمك تنقو شخبط شخابيط ، طلسم طلاسيم
       الرد على زائر
    • 7 - 1
      وطن يا ربي تتعافى 11-05-2015 02:0
      دا لو مقالات ود الماجد عملوها محاية وشربوها ليهو ثلاثة مرات في اليوم لمدة تلاتة سنة ما يكتب سطر واااحد زي ود عبد الماجد ولو أعانه عليها قومه وزمرته من أهل مزمزة وشيبنا وكبكبة
  • #8
    محمد علي يحيي 11-05-2015 09:0
    يا زوول انتو الصحفيين سبب البلاوي كلها وانتقاد رئيس الجمهورية لم يأتي من فراغ ...
  • #9
    بكرى النحاس 11-05-2015 09:0
    ياخى نفسى اعرف انت شاغل نفسك بالهلال ليه نحن رضيانين بكل شىء حتى ولو كان الدرجة الاولى انت هاميك شنو .والله لو الهلال نزل للاولى او الروابط انت ومزمل وكابو وابوشيبه الا نلقاكم فى الصوانى حقة المرور او جنب الجوامع والمستشفيات .
  • #11
    11-05-2015 08:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟؟؟ ربما بعد أن يطير النعام
  • #14
    كردفانى 11-05-2015 01:0
    والله شحتة كمان للفريق العالمى ياخ قوم لف شوف ليك صاج لقيمات
  • #15
    Hajjam 11-05-2015 01:0
    البراميل الفارغة تحدث ضجيجا اكثر والحيلة قليلة والحشم بليلة. فريق عمره قارب المائة عام والمحصلة صعود واحد فقط لاغير لدوري الأربعة الكبار. استحي ياسلوكة.
  • #16
    ابو مازن 11-04-2015 11:0
    خلاص بقيتوا تشحدوا في الروابط يا عم تنقو بعد ده حق فواتير الكهرباء في تلتله، الله يتلتلكم ويبهدلكم وما تلقوا حق المويه ان شاء الله.
       الرد على زائر
    • 16 - 1
      نصرالله 11-05-2015 10:0
      ياخي حرام عليك تسب وخلي روحك رياضية واذا ما ما بتتحمل ما تقرأ مقاله وتحرق دمل وترفع ضغطك .






      ا
    • 16 - 2
      طارق 11-05-2015 01:0
      والله يهدكم اكتر من هدكم ويفشفش مرارتكم ويخليكم في صفركم ده ابد الابدين باذن الله
    • 16 - 3
      Hajjam 11-05-2015 12:0
      أمين يارب. اللهم أشغلهم بأنفسهم.
  • #17
    عزالدين تنزانى 11-04-2015 11:0
    للاسف الشديد ياعم تنقو انك قالوا قانونى ياربى القانون درستو فى مدرسة ست فله ولا شنو ولا انت برضو دست القانون القالوا درستو برجليك ومشيت عليه .رجل القانون يا عم تنقو مفروض يكون امين مع نفسه قبل غيره وماتنسى انك حالف قسم وانت عارف قبل غيرك ان الاتحاد ولجانه داسو على القانون بارجلهم النتنة وطوعوه لاجل عيون الوالى لان فرق الست نقاط كثييييييرة ياصلوعى لا يمكن للمريخ ان يجيب هذا الفرق الكبير الا من تحت الطرابيز وداخل المكاتب لانو عجز فى الميدان .وبعدين ياخ مابتخجلوا تخموا فى الكاسات الفطيس بدون عناء وبدون مشقة .ياخ اخجلوا ما قلتوا العالمى وزى ما عارف الاسد مابياكل الجيفة والفطيسة الهلال بفترس فريسته فى الميدان بعرق جبينه ويلتهمها وبترك لكم باقيها ترعوا فيها .لو كان عندك الشجاعة المهنية يا سعادة الافوكاتو كان قلت الحقيقة المرة ولكن خوفكم من عرابكم هو الذى الجم افواهكم .للهلال قضية وللامل قضية ولهلال الجبال قضية ولكن هلال الجبال ارهب لذلك جر واطى وخاف على روحو لكن هلال الساجدين له رجال واعلام يهز الارض اعلام ممكن يرهب حكومة وبلد بحالها .وطبعاً انا ليس باعلامى ولكن هناك من يرد على عمودك الفارق والله اقل صحفى من منظومة الهلال يستطيع ان يرد لك بعض شعيراتك الطارن منك ديل يا عم تنقو 000
       الرد على زائر
    • 17 - 1
      طارق 11-05-2015 01:0
      لو القانون ماخد مجراهو فريقكم ده دار الرياضه زاتو ما بتقبلو استحوا
  • #18
    Hajjam 11-04-2015 10:0
    دائماً منتسبي نادي التزوير تاخذهم العزة بالاثم وعاوزين يتمسكوا بالباطل رغم علمهم بانه باطل. مابني علي باطل فهو باطل. ورينا الفرق بين اعتداء بجري المدينة علي الحكم وبين اعتداء عمر عثمان ولماذا اختلفت العقوبة من اتحادكم المسير بالوالي ومرشدكم ابو الاحقاد. نسال الله ان يُرينا فيكم عجائب قدرته.
       الرد على زائر
    • 18 - 1
      طارق 11-05-2015 01:0
      تزوير 2/12 الدولي القال عليهو يرحمه الله زعيمكم الطيب عبدالله بانه وصمه عار في جبينكم ولاتزويرات التحكيم ولا السمكره ولا حدد لنا يالاخو
  • #19
    Hajjam 11-04-2015 10:0
    لسع حمي الصعود لدور الأربعة ماطارت من رأسك. الله يشفيك من الوساوس والهلوسة ياصحافي الغفلة. الله يورينا فيكم يوم زي يوم مازمبي.
       الرد على زائر
    • 19 - 1
      طارق 11-05-2015 01:0
      مازنبي ابو الخمسات جووووه الدار ولاغيرو يا الاخو
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019