* الآن نعيش في زمن أغبر.. اختفت ملامحه تماماً.. والحكاية بقت هايصة وجايطة.
* الصاح شنو ما عارفين.. والغلط وين ما مهم.
* هم عاوزين لينا كده.. ونحنا راضين..
* لأن الأشياء تكاثرت علينا ولم تعد نفرق الصاح من الغلط الصادق من الكضاب..
* وأهو ما شين ومصدقين..
* ويتوب علينا ربنا.
* وكل الأشياء اتلخبطت.. أي حاجة لو ما فيها لف ودوران ما بتمشي.
* تكون صادق يقول ليك. بالله شوف المسكين ده..
* تحاول تتخذ قرار يقولو ليك ده زمن قرارات.
* حقيقة بتنا نعيش في زمن الفهلوة والشهلوب واللعب بالمقلوب والضحك على الدقون.
* زمن أغبر ضاعت فيه كل الأشياء الجميلة.
* اللون الرمادي بقى هو سيد الساحة.
* الناس نست زماااان الابيض والأسود.
* زمن خلي من الحب والتوداد والتعاضد فحلت التكشيرة مكان الضحكة.. والغبينة مكان الحب والحقد والكراهية مكان التسامح والكذب والنفاق مكان الصدق والخلاف بدلاً من المحبة والحرب بدلاً من السلام.
* الكل بات يكذب ويبحث عن مصالحه..
* لا في قوانين تردع المنفلتين ولا حتى تطبق.. والناس ماشة.
* ويتوب علينا ربنا.
* وكل حاجاتنا اتغيرت وما في حاجة زي زمان ويا حليل أيام زمان وغنى زمان.
* هسة الغنى بتاعنا بقى دقا الباب وجانا وجريت ليهو حفيانا.
* وزمان كان لو شوش صوت الريح في الباب يسبقنا الشوق قبل العين.
* وظهر الفنان علي كبك وهو يغني فكيني منك ومن عواليقك وجنكخلي حركات العباطة وراعي لي حجمك وسنك
مرة شوفتك حايمة ساكت ،، سارحة زي موس الحلاقةومرة لمن كنتي صلعة كنتي في جواي علاقة
* أي حاجة اتغيرت وبقينا ماشين لوراء غنانا لوراء ورقيصنا لوراء..
* وبقينا نجري وراء الفقراء والاناطين ونسينا الخالق عز وجل.. يا شيخي اديني فاتحة عشان اغلب أو اعرس.
* عشان الخزعبلات والنتيجة بقينا شعب يعيش على الأوهام.
* وبقينا هائمين وماشين بين تماسيح السوق وتماسيح القوانين.
* وكل يوم كلام ووعود وسراب.
* ويتوب علينا ربنا.
* وحياتنا تغيرت وماشين وما فاهمين اي حاجة والحاصل شنو.. أهو ماشين.
* وتساءل أي زول يقول ليك هو الحاصل شنو.
* وبقينا زي الاطرش في الزفة.
* كل يوم كلام جديد وكل يوم خبر وكل يوم تصريح متضارب وملقوم.
* ومافي حاجة واضحة.. كل الأمور ضبابية وما في أمل.. وكلنا نطارد خيط دخان.
والمشكلة أننا بنحلم بالمستحيل.
* ومشكلة قانونية ليها شهور وشهور وما تتحلا وكل واحد يشرع على كيفو وكل واحد يفتي والقانون واضح وصريح.
* وطيب ليه ما يطبقوا القانون!!
* لو طبقوا القانون البحصل شنو.
* وليه ما نحاسب المخطئ.
* مش قلتا ليكم بنحلم بالمستحيل.
* ويتوب علينا ربنا.
* الأمور جايطة.. الحال يغني عن السؤال.
* والقضارف الآن في الساحة.. ويا سمسم القضارف.. الود صغير ما عارف.
* وأمس في أحدى المواقع كان صاح كان كضب.
* جاء ما يلي.
* كشفت مصادر مقربة عن اختفاء مستندات مهمة تخص قضية الموسم للاعب عمر عثمان لاعب الأمل من داخل مكاتب الاتحاد تخص لجنة التحكيم. وتباينت الآراء حول اختفاء المستندات مما أدى لتدخل سكرتير لجنة التحكيم واستفساره لبعض حكام القضارف على خلفية اختفاء مستندات مهمة.
* اذا كان الخبر صحيحاً.. أين اختفت المستندات ومن الذي قام بأخفائها.. ومن الذي يقف وراء ذلك.. ولمصلحة من اختفت هذه المستندات.
* طبعاً أنا بسأل أسئلة لوجه الله.
* ويتوب علينا ربنا.
آخر المشاوير!
* المريخ يعاني من أزمة مالية بدليل أنه كل يوم توصل لاتفاق مع اللاعب امير كمال وأنها ساعات ويوقع اللاعب في الكشوفات.
* والساعات بقت أيام.. وقالوا اللاعب داقي جرس وعايز الكاش.
* وطبعاً الايام دي الكاش معروف وين وعند منو.
* شفتو الدنيا دي دوارة كيف.
* زمان تقول لأي لاعب تعال الهلال بقول ليك كدي اشوف المريخ.
* هسي أي لاعب يقول ليك لو الهلال قنع مني.. برجع لناس المريخ.
* والمريخاب مقلقين ما عارفين يسجلوا منو ولا يخلو منو.
* يعني بالواضح كده المريخ ما أظن يسجل ليهو لاعب جديد.
* كدي سجل امير كمال وراجي.. والباشا وبلة وديل ما عندهم مشكلة.
* ويرجعوا عنبكة ويجددوا لكوفي.
* والله المريخ حالتو صعبة.
* طبعاً ناس المواقع الاسفيرية عندهم المحن واحد رسل لي مايلي.
* وردنا للتو من مصادرنا بأن هناك نفرة كبرى من قبل نادي المريخ ومشجعية في البحث عن القنفد حتى يتسنى لهم قيد امير كمال واخوانه بعد أن فاوضهم الكاردنيال.. وجعل اللاعبين يسرحون ويتوهمون في المبلغ المقدم لهم من الكاردينال في اعلى صفقة لاعب محلي حيث بلغت قيمتها الثلاثة مليار و٢٥٠ الف والطريف في الأمر أن بلة جابر وضفر وعلي جعفر هم من يقودون حملة البحث عن القنفد.
* وفي حال عثور المريخ على كم أبو القنفد يمكن له اعادة قيد تسجيل هؤلاء اللاعبين والتجديد للمدرب غارزيتو وابنه.
* الهلالاب ماشة معاهم باسطة ومرتاحين (٢٤) قيراط لا شايلين لا هم ولا غم.
* كردنة منومهم في العسل.
* يعني السنة دي ما في محترفين للمريخ.
* طيب لحل المشكلة يا مريخاب ما تزعلوا من كلامي.
* طابق شاخور اعملوه صالة افراح.. وستدر عليكم عائد مادي كبير.. لمدة عام واحد فقط.
* يعني السنة الجاية ممكن تسجلوا أي لاعب عاوزينو..
* والسنة الجاية لوربنا احيانا ما عندكم لاعبين مفكوكين يعني علي جعفر والريح علي ديل ناس ساهلة وبحبوا المريخ ونحنا بنحيهم.
* أكد مولانا الفاتح مختار أن الهلال لن يتنازل عن شكواه المقدمة بشأن شكوى الهلال في مستندات اللاعب عمر سليمان.
* عماد الطيب يواصل عمله مع الهلال بكل اخلاص وتفاني واستطاع انجاز العديد من الملفات الهامة والحاسمة وقاد المفاوضات مع اللاعبين الذين لتم تسجيلهم بالهلال.
خبر طازج: تسجيلات ابو القنفد!!