* هل الهزيمة والفضيحة امام يوغندا كانت وراء هذه الثورة الغاضبة والتي جعلت الكثيرين يتحسرون على ما يحدث في وسطنا.
* وهل هذه الهزيمة كانت السبب وراء هذه الثورة الاحتجاجية.
* واهم ومخطئ من يظن او يعتقد ان هذا السقوط بسبب هاتين المباراتين.. بالهزيمة (رايح جاي).
* بل أن كرتنا سقطت من زمان ولكننا لم نفق لاننا كنا مخدرين ومبنجين.. ما عارفين الحاصل شنو.. مغيبين تماماً وعايشين في غيبوبة.. فنحن نستحق اكثر من الهزيمة والضرب على القفا.
* لاننا سمحنا لجهابزة الاتحاد العام أن يفعلوا ما يريدون دون أن يقول أحد من المسؤولين لهؤلاء العباقرة كفاية عبثاً.. وما فعلتوه بكرتنا.
* فالاتحاد يتعامل بقوانين بالية زيها وزي شوارع الخرطوم كلها حفر ومطبات.
* فنحن لا نتطور ولن نتقدم خطوة للامام لاننا لا نعرف قوانين ولا نظم ولا لوائح ما دام يوجد هناك ترزية يجيدون التفصيل والحياكة.. على ما يريده هؤلاء الجهابزة.
* وللأسف لا يوجد حساب او مساءلة.
* وبمناسبة المحاسبة ماذا فعلت حكومتنا ووزيرنا الهمام بسبب هذه الهزيمة والفضائح.
* فماذا تم في لجنة التحقيق في قضية مساوي قيت وماذا وماذا.. وماذا كان!!
* لم نسمع من أي مسؤول أن هناك مسألة ستتم.
* أو حتى استدعاء لمعرفة أسباب الهزيمة.
* والله نحنا متنا بالمقصة عديل كده.. عليكم الله ان شاء الله غشونا وقولوا لينا عملنا لجنة تحقيق والموضوع لن يمر دون محاسبة او تحقيق.
*يعني بس الغش والكذب بقى حرام لما تقولوا كده عن فضائحنا.. وهزائمنا المتلتلة.
* ومشاكلنا المتعددة والتلاعب بالقوانين وعدم تنفيذها.
* يعني شنو كذبة بتفوت ولا حد يموت.
* ما الناس كلها بتكذب.. وحياتنا بقت وعود وجري وراء السراب.
* ماكل حياتنا نجري وراء المواصلات والمعيشة الغالية والاسعار جارية ونحنا جارين وراها.. زي علي جعفر لما يجي جاري وراء المهاجمين وما يقدر عليهم.
* صدقوني أن الاسوأ لم يأت بعد اذا لم ننتبه ونحرر انفسنا من القيود التي كبلونا بها وخلونا ما عارفين أي حاجة.
* اتحاد عام ضعيف.. وجهاز فني تعبان ولاعبين مسخرة.
* الفجوة كبيرة بيننا وبين العالم المتقدم فنحن سقاط متاع او تمامة جرتق او عدد ليس لدينا وزن على الخارطة الكروية بايدينا وليس بايادي غيرنا.. وليس بايادي اعدائنا..
* لقد غرقنا في الخلافات.. وفي الفجور في الخصومة.
* سقط المنتخب وسيسقط الجميع في المستقبل لانه مظلم ولا يوجد بارقة امل تجعلنا نتفاءل وفي شنو البخلينا نتفاءل.
* والله يا جماعة انحنا بنهظر.. وعشان كده بنتبهدل.
* واتذكروا لما كان الجاكومي عندو مشكلة مع ناس الاتحاد قبل ما يعود شهر العسل بينهم قال الاتحاد العام عايز ليه جبهة ثورية.
*اذا كان محمد سيد احمد مساعد رئيس الاتحاد يقول زي الكلام ده.. طيب المشجعين يعملوا شنو.
*وقالوا لجنة الانضباط ستقوم باستدعاء قطب الهلال ياسر الجعلي باثارته للشغب في مباراة السودان ويوغندا.. ولو عايزين تستدعوا الجعلي مفروض تستدعوا كل الشعب الرياضي لانو زهجان وقرفان منكم.
* والله يا جماعة شبعنا ضرب على خدودنا وبكاء وعويل ونواح على مستوانا.. وناس الاتحاد ماجايبين لينا خبر ولا شغالين بينا الشغلة.. بس شغلتهم الوحيدة السفر.
* ونحنا نبكي وما عندما غير البكاء.. وتبكي بس.
* لم نفرح يوماً مع جيل النكسة واتحاد الغفلة.
* بتنا اضحوكة والعوبة بين الدول ننهزم بره وجوه والمسؤولين يتفرجون..
* والقانون في يدهم وما عايزين يطبقوه..
* بدل تطبيق القانون كونوا لجنة جودية.
* ما ده ذاتو الجننا.. وجننن عبدالقادر.
* سيدي الوزير نفذ القانون.. وحاسب المسؤولين ووريهم العين الحمراء.. وخلي عينك حمراء وشرارة.. شوف كان تاني في واحد غلط ولا قال بقم.
* يا جماعة والله نحنا نمتثل للقوانين ما للجودية.
*ولجنة الجودية قالت فشلت.. اها الحل شنو.
* تاني حتعملوا لينا لجنة للجودية.. ولا تعملوا شنو.
* ما عندكم حل غير اللجوء للقانون.
* ما في داعي للف و الدوران في حلقة مفرغة.. تمشوا وتجوا للقانون وطبقوا القانون.
* ما تقتلوا في الشعب الكروي روح الأمل بمستقبل نضر.
* وبرضوا الامل غاب.. وانا ما بقصد الامل العطبراوي.
* غياب الامل هو الشؤم الاكبر على الامم غياب الامل هو الفيروس الذي لا يمكن السيطرة عليه والوباء الذي يطيح بالضمائر والافئدة ويسحق الحاضر والمستقبل.
* والناس مصبره روحها بالامل.. وعليكم الله ما تقتلوا الامل في روح هؤلاء المتفائلين بغد مشرق.. رغم ويلات الصراعات والخلافات.. والروح الانهزامية للكثيرين الذين اصبحوا مجرد فراجة يتفرجون على ما يحدث وكأن شيئاً لم يحدث وخلو الامر على الظروف.
* والله الكتابة غلبتنا وما عارفين نكتب شنو ولا نقول شنو.
آخر المشاوير
* الكاردينال سافر الامارات وعندو مفاجآت.
* والمدرب الكرواتي في الطريق.. وهو مدرب شاطر وسيرته عطرة وصاحب نجاحات.
* وناس المريخ قعدوا وقاموا وقعدوا وتاني قاموا لما نفسهم قام.. وامير كمال قال خلاص بقعد معاكم.. ووضع شروطه ووافقوا عليها.. وهو قاعد مع ناس المريخ وناس الهلال منتظرين.
* شنو يعني اداري يقول للاعب نحنا بنأمن ليك مستقبلك.
* ونحنا ما عارفين التأمين ده شنو قراية ومافي.. أهو الا بيت وعربية وقروش كتيرة في البنك.
* والقروش بقت مشكلة.. وغارزيتو معصلج والدولار طار فوق.
* والمفوضية لم تتخذ القرار.
* واعضاء الاتحاد خارج البلاد..
* والناس زهجانة وقرفانة.
* والمسؤولين قاعدين يعاينو..
* وبلة جابر مصيرو مجهول..
* وراجي في الانتظار والباشا زهجان.
* واتير ما مشطوب من الهلال..
* وصلاح الجزولي كراع جوه وكراع بره.
* واندريا سافر وشكر جمهور الهلال.
* وأمين مال الهلال ما معروف منو ويا حليلك يا عصام كرار الهلالي الأصيل.
* والفاضل حسين في القطاع الرياضي..
* ومواسير المريخ بتنقط.
* وكل اللاعبين عايزين الهلال. والمحترفين في الباي باي
* وكل الأمور جايطة.
* خبر طازج: الله يكضب الشينة..
وهليلى حليلو فى الاولى مقيلو
الهليلاب الورانيش لما تغلبم الحيلة يرجعوا للوراء 86 عاما وهو عمر الصفر الدولى
ولجنة الاستئنافات ومسوغاتها باصدار تلك الاحكام وتكون نتيجة قرار تلك اللجنه ملزم لجميع الاطراف بما فيها لجنة الاستئنافات التي عليها اصدار قرار يلغي القرار السابق واتستبداله بالقرار الجديد حتي وان كان أشد قسوه علي تلك الانديه التي تقول انها متضرره وهو الخل الوحيد الامثل لانه يمثل القانون الذي يدعي الجميع المطالبه به
الامل سجل لاعبه مثار الشكوي وخاطب الاتحاد الذي رد علي الامل بأن اللاعب طرد بالكرت الاحمر للمرة الثانيه خلال الموسم ويتم ايقافه لثلاث مبارياتنفذ ايقاف واحد فبل التسجيل للامل وباقي ايافه مباريتين وقام الامل بايقافه لمبارتين حسب خطاب الاتحاد ، فاذا تم اكتشاف ان هناك خطأ يحاسب اللاعب وليس النادي
بالنسبه لشكوي الامل تشابه شكوي المريخ لكن الاختلاف با، لاعب المريخ بكري المدينه كان يفرض الانظام عليه التوقف لمدة اسبوع ليمثل اما لجنة المساءله التي تصدر العقوبه واذا لم يتم ذلك خلال اسبوع يمارس نشاطه عاديا حتي يتم استدعائه فهو لم يتوقف لمدة اسبوع بل الادهي أن يرسل سكرتير الاتحاد للمريخ بناء علي طلب المريخ خطابا يقرر فيه الغاء الايقاف لانه المريخ لديه مباراة هامه وشوفوا اول المخالفات أتت من الاتحاد اما لاعب الامل توقف اكثر من اسبوع ولم يتم استدعتؤه ومارس نشاطه حسب منطوق القانون حتي يتم استدعاؤه والمصيبه حتي هذه اللحظه لم يتم استدعتؤه فما هي نظرة القانون لاعادة مباراة الامل واين المخالفه في هذه الحاله سواء من الامل او اللاعب مثار الشكوي وناس الاتحاد العام واتحاد القضارف كانوا نايمين وين أما لاعب هلال كادوقلي تقدم لهلال كادوقلي باوراق ثبوتيه ورقم وطني من منطقة ابيي والاتحاد نفسه اعتمد هذه الاوراق وقام بتسجيله لهلال كادجوفلي فاذا اتضح عدم صحة هذه الاوراق فالامر يعود لمحلية ابيي وفي كل الحال يوقف اللاعب أو يشطب لا يهم لكن أن تنتزع نقاط المباراة وتعطي هديه للمريخ بأي حق هل كان هلال كادوقلي لاعبه موقوفا وأشركه بالمباراة وهل حتي بعد هذا القرار الظالم الذي لا يستند علي أي قانون تم محاسبة هلال كادوقلي أو اللاعب والتحقيق وهل اللاعب الان تم شطبه من قبل الاتحاد من كشوفات هلال كادوقلي لم يتم أي شي من ذلك لانه الكطلوب كان النقاط للمريخ فقط ولا يهم بعدها شي