* فوز الهلال ببطولته المحببة هي مسألة وقت ليس إلا..
* وهذا الوقت يحتاج لشوية (جكة) يعني ما نفرط في التفاؤل شديد كده.
* لأننا نتحدث عن جنون.. وعن كرة قدم مدورة ممكن تدور بينا وما نعرف روحنا وين ولا واقفين ولا قاعدين.. ولا طايرين في الجو..
* وهي لو ما مجنونه تخلى المريخاب يقولوا هم الأقرب للفوز بكأس أفريقيا.. وهم الأبطال وهم الثالث في الترتيب..
* الا يكون اعتمدوا الترتيب بالهزيمة بثلاثية من مازيمبي.
* المهم ما علينا يالمريخاب لانو الايام دي حالتهم تحنن بعد عمك غارزيتو وراهم وش الككو.. وقال ما عايز أي زول يجيني في الميدان وطبعاً المستثني من هذا القرار الدكتور جمال الوالي أما البقية يقعدوا او يصنقروا زيهم وزي الجماهير.
* يعني لا همت ولا متوكل تاني يكونوا جوه الميدان.
* علي جعفر والريح علي جوه الميدان وهمت ومتوكل بره الميدان.. والله ده كلام غريب.
* آخر شائعات المريخاب قالوا الهلال عايز يسجل الباشا وراجي وبلة جابر.. والله المريخاب ديل حالتهم تجنن مش تحنن.
* الحمدلله ما قالوا الهلال عايز علي جعفر والريح علي.
* يعني هسة الوالي لوخلى المريخ تاني التسجيل في المريخ لاغلى لاعب (١٠٠) مليون.. وما حنشوف محترفين بالكوتة في المريخ.
* وأي لاعب تقول ليهو تمشي المريخ يقول ليك نهي زندقي.. هلال بس..!!
* وشنو يعني المريخاب ساكين والي الدين كده يا أخي اعملوا ليكم شخصية براكم مافي داعي طوالي تكونوا ساكين الهلال والله خائف واحد هلالابي يقول فاوضنا عمرابي وشجرابي وشخصي السمين ناس المريخ يجو يفاوضوني.
* طيب يا جماعة نعود لموضوعنا الاولاني او حبيبي الاولاني.. وهو الهلال.
* فنحن لا نقرأ الفنجان.. ولا نضرب الرمل ولا نرمي الودع.. ويا حليل ست الودع لما كانت بتكشكشو.. هسة ظهر سحرة ومشعوذين ودجالين وبتاعين كجور والعياذ بالله.
* نقول أن الهلال بات الأقرب للفوز ببطولة الدوري الممتاز.
* نقول ذلك لثقتنا في لاعبي الهلال وأنهم على قدر التحدي والمسؤولية.
* ويعرفون أن متبقي مباريات الممتاز لا فيها تهاون ولا تخاذل.
* بل ابطال ياكلون النار داخل الملعب ويسعدون جماهيرهم في المدرجات.
* فهذه الجماهير ستكون حضوراً في الاستادات تأتي لتهتف وتصفق للاعبين وهي تشاهدهم يبدعون ويرسمون اللوحات الكروية الرائعة الجميلة في الملعب.
* يعني لو الهلال لعب متبقي مبارياته بنفس وتيرة الشوط الثاني.. فصدقوني لا يستطيع أي فريق أن يقف امامه.
* æيكفي فرحة الجماهير التي خرجت سعيدة ومنتشية بهذا العرض القوي والمموسق والأداء البطولي للاعبين.
* فالأهلة يريدون هلال الشوط الثاني أمام الفرسان في مقبل مباريات الفريق.
* والجماهير سعيدة وتزحف اليوم نحو كوستي والهلال يواجه الرهيب.
* في مباراة حساباتها كثيرة ومعقدة فالهلال سيواجه أكثر من عدو خلال هذه المباراة والكل منتظر تعثر الهلال في هذا اللقاء لذلك فعلى لاعبي الهلال عدم الركون للاداء امام الفرسان أو الفوز الكبير الذي تحقق فلكل مباراة ظروفها.. واحداثها ومتغيراتها..
* الجماهير التي ستكون حضوراً في الاستاد ستكون خلف اللاعبين وهم يغنون بقيادة وروابط الهلال وسيكون في المدرجات الالتراس.. الطوفان.. النصر.. الاشاوس الموج.
* وسيكون صوت ابوروف وونيس ومن معهم من جماهير اوفياء عالياً وهم يرددون هلال هلال..
* يغنون وهم مستمتعون بلمسات رائعة وجميلة من نصر الدين الشغيل ووليد والثعلب وتسديدة قوية من المدفعجي بويا واداء قوي لمساوي وانطلاقات واهداف لكاريكا وظهور مميز لمن غابو مؤخراً.
* اليوم هو يوم الهلال.. والاداء القوي والبطولي سيكون ديدن اللاعبين خاصة وان من يمسك بعصا المايسترو هو المدرب الشاطر والمميز الكوكي الذي يعرفي كيف يختار اعضاء الفرقة الموسيقية للاداء على مسرح استاد كوستي.. ومن خلفه داهية التدريب المعلم خالد بخيت.
* انها مباراة ينتظرها شعب الهلال لأن الفوز يعني مضي الهلال قدماً نحو منصة التويج.
* جماهير الهلال الوفية ستكون خلف ابطالها.
* وهي توجه تحذيراً شديد اللهجة لطاقم التحكيم الذي سيدير لقاء اليوم بعيداً عن الانحياز السافر والانتماءات الضيقة والعمل على ايقاف انتصارات الهلال.
* الحذر ثم الحذر يا حكام!!
* جماهير الهلال لن تسكت على اي ظلم يتعرض له الفريق.
آخر المشاوير
* أصحاب المرارات والنوايا السيئة والنفوس الخربة ينتظرون هزيمة الهلال اليوم.
* المطلوب من فيصل موسى ونيلسون أن يراجعا حساباتهما جيداً.
* استطاع الكوكي أن يجهز اكثر من بديل.
* والشباب هم مستقبل الهلال.
* التحركات التي تقوم بها البعض من أجل اغتيال الديمقراطية بالهلال انكشف امرها.. وتم رصدها.
* المحاولات مستمرة من أجل ايقاف مسيرة الهلال والاجتماعات مكثفة هذه الايام.
* كل يغني على ليلاة.. وبعضهم يراهن على أن مجلس الهلال بأي بأي.
* عزيمة الرجال وتوحدهم سيكون الرد الشافي لكل متآمر على الهلال.
* جماهير الهلال قالتها بالفم المليان وداعاً يا ظلام الهم على ابوابنا ما تعتب.
* فلن يعود الظلام للهلال وكل الأهلة قلوبهم مليئة بمستقبل مشرق للهلال.
* الزول ده شفت ومقرم.
خبر طازج: غير الشفت ما في زول بحلكم..!!