* خسائر المريخ الماليه (خارج الملعب) ربما هى تفوق خسارته بثلاثيه داخل الملعب ..
* (10) بودى قارد ، (5) طباخين ، (4) فنيين فحص هوا المكيف ، وطياره خاصه وما (خفيه أعظم) ..
* هذه خسائر تفوق خساره (التلاته حلاته) ..
* وحينما تجتمع (خسارة خارج الملعب) بخسارة (داخل الملعب) فأن الكسبان الوحيد هو (ساماتا) ..
* والله صحى ..
* أعلن رئيس نادى الهلال الكاردينال انه سيتعاقد مع (محترفين اتنين) من (العيار الثقيل) لقيادة الهلال في الموسم الجديد ..
* و(العيار الثقيل) بحسابات الكاردينال هو مثل عيار (جوليام واندريا وكيبي) ..
* وطالما العيار الثقيل هو بحجم (كانوتيه وبتاكو) فنحن نطالب الكارينال بأن يتعاقد مع محترفين (ما من العيار الثقيل) عسى ولعل ..
* يا الكاردينال العيار الثقيل بتاعك إحنا عرفناهو كده جيب لينا عيار ما ثقيل يمكن يكون افضل من العيار الثقيل ..
* قالو لينا بوتاكو (من العيار الثقيل) ومع الايام إكتشفنا إنو بوتاكو (دمو تقيل) ..
* الله يدينا خير التسجيلات ويبعد عننا شر السماسره ..
* عندما تأهل المريخ لدور الاربعه (صحبه راكب) صرح غارزيتو بأنه يتمنى مواجهة مازيمبي ..
* وربك رب الخير حقق لغارزيتو امنيته ..
* أمنية غارزيتو ذكرتني زمان ..
* زمان لما كنا اطفال لو رسلوك (الدكان) بعد المغرب بتشيل ليك (حجر) في يدك و(بتغنى وبتصفر) وتعمل فيها ما خايف ..
* تغنى بصوت عالى عشان البيشوفك في الشارع يقول الزول ده ما خايف ..
* يقول الزول ده شجاع وما خايف ..
* وانت في الحقيقه بتكون من الخوف (قلبك مقطعو) ..
* لكن بتتظاهر بالاغانى والصفافير ..
* غارزيتو نفس الشى قال بتمنى مازيمبي على طريقة (الغنا بعد المغرب) ..
* واول ما قابل مازيمبي طار زي طيران (صُباع الأمير من كعب شبشب العروس العالى) ..
* غايتو جنس غايتو ..
* والبعض من اعلام المريخ اتهم غارزيتو ببيع المباراة لرئيس مازيمبي ..
* قالوا (تبديلات غارزيتو) ما منطقيه ، وكمان قالوا غارزيتو منح اللاعبين راح قبل مباراة الذهاب وكان يقصد هزيمة المريخ وقالو غرزه إتمنى مقابله مازيمبي عشان (يقبض) ويبيع المريخ ..
* في الحتة دى انا عايز اقول حاجة وياريت الناس ما تزعل مني ..
* لو إفترضنا غارزيتو (بااااااااع) المباراة يبقى المريخ كسبان وغارزيتو برضو كسبان ..
* وأوريك المريخ كسبان كيف ..
* المريخ وصل المربع الذهبي لاول مرة في تاريخه هذا العام وتحت قيادة غارزيتو ..
* وده إنجاز غير مسبوق للحنطور ..
* يبقى لو غارزيتو (باااااااااع) ما مشكلة عمل ليكم انجاز وبااااااع ..
* يعنى إنتو استفدتو ببلوغ المربع لاول مره وهو استفاد قبض دولار وهنا الفائده مشتركه ..
* اسألوا اى زول من (اولاد السوق) يقول ليكم (الفائده مشتركه) ..
* والله ما خسارنه معاكم ..
* كونو (يبيع) ويوصلكم المرحله دى ما خسارنه معاكم ..
* لكن إنتو دائما بتنكرو الجميل ..
* كل سنة زي الوكت ده (كدراتكم بتطاقش مع كدارت ناس القطن التشادي في سيكافا) ..
* (البيعه) بتاعت غارزيتو لو (باااااااع) يبقى بالجد ما خسارنه معاكم ..
* عشان كده أنا شايف ما في سبب بيخلى اعلام الحنطور يزعل ..
* انا شايف كده ..
* واى زول طبعا حر في (شوفو) ..
* غايتو متنا من الضحك والضحك كتلنا ..
* والله صحى ..
* قرر الإتحاد السودان لكره القدم إقامه (حفل تكريم كبير) للهلال والمريخ بمناسبه بلوغهما المربع الذهبي ..
* الإتحاد إعتبر تأهل القمة إنجاز يصب في مصلحه الكره السودانيه ..
* وقد قرر الاتحاد توجيه الدعوة لقادة (الكاف) لحضور الحفل ..
* ده اكتر خبر سخيف انا شفتو في حياتي ..
* معقولة معتصم جعفر بقى يفكر بالطريقه دى ؟؟
* كل سنة الهلال قاعد يصل المربع الذهبي ما حصل الاتحاد عمل ليهو تكريم او حفله ..
* إشمعنا المره دى دايرين تعملوا لينا حفله ؟؟
* ولا عشان الحنطور إتأهل ؟؟
* معليش إحنا اذكى من ذلك ..
* الحفله بتاعتكم دى اعملوها للحنطور لانو قبل كده ما وصل المرحله دى ..
* إحنا المرحله دى ما غريبه علينا ولا بنعتبرها إنجاز لكن بالنسبة للحنطور ده يعتبر انجاز لان وصوله لهذا الدور (صحبه راكب) هو الاول في تاريخه ..
* نطالب مجلس الهلال بأن لا يشارك في هذا التكريم ..
* التكريم ده مقصود بيهو جمال الوالى الشهير بـ(عزو) ..
* عايزين يبيضو (وش جمال) قدام الحكومه ..
* والله العظيم يا معتصم جعفر تعمل الاحتفال ده الناس بيضحكو فيك والله ..
* ده سخف وهبل ..
* افريقيا بتضحك فينا لو عملت الحاجة دى يا معتصم ..
* والهلال في افريقيا ليس (اضحوكه) ..
* عشان كده لو داير تعمل الاحتفال ده وتقدم الدعوة للكاف اسحب اسم الهلال من الاحتفال ..
* قول لناس الكاف عايزين نعمل احتفال للمريخ لانو اول مره يصل المرحله دى ..
* اوع تجيب سيرة الهلال يا معتصم ..
* كرم عزو ده بعيد بعيد مننا ..
* فعلا والله مرات نبكى من كفرنا ومرات كفرنا يبكى الكافر ..
* حاجة تكسف ..
* غارزيتو قال : (محسن سيد ما بعرف يرص العلامات) ، ومحسن سيد قال : (المريخ جاب لبن الطير لغارزيتو ولكن الفرنسي متعرجف وفاشل) ..
* ده (متعرجف) وداك (ما بعرف يرص العلامات) ولكن هذا لا يقلل اطلاقا من حجم إمكانيات ساماتا ..
* لو غارزيتو متعرجف ولا ما تعرجف ساماتا لعاااااب ، ولو محسن بيعرف يرص العلامات ولا ما بعرف برضو ساماتا لعاااااااب ..
* بمناسبه (رص العلامات) ..
* عندي سؤال بدون مناسبه .. لماذا (هبط مستوى مصعب وايمن سعيد وبكوري المدينة) ؟؟
* سؤال لوجه الله ..
* وأنا اقصد هبوط المستوى من ناحية (اللياقة والنشاط والحيويه) ..
* الناس ديل كانو (نشيطيين) وبدون مقدمات فارقو النشاط ..
* ليه ؟؟ أنا زاتي ما عارف ..؟
* بس الحاجة الوحيده الأنا متأكد منها هى (بلايلي وقفو) ..
* دى الحاجة الأنا متأكد منها ..
* كل البعرفو إنو بلايلى وقفو وغير كده ما بعرف حاجة تانيه ..
* المهم .. نرجع ونقول : سنة (89) لما مانديلا كان عندو (حبه قريشات) عمل ليهو (دوره تنشيطيه) اطلق عليها (كاس مانديلا) ..
* والفرق الكانت مشاركه في (الدوره دى) زي سبع فرق كده ..
* الحنطور لعب مباراتين والمباراه التالته شال كاس دوره مانديلا التنشيطيه ..
* طبعا اعلام المريخ ح يقول ليك البطوله نظمها الكاف ومانديلا ما عندو بيها علاقه والحنك البيش داك ..
* وكلامكم ده تقولو لزول ما عندو (جيوب أنفيه) ..
* شوف ليكم زول حنطور وقول ليهو الكلام ده ..
* لكن إحنا اولاد تسعه ودافننو سوا ..
* مانديلا كاس زي كاس بن ياس لا اكتر ولا اقل ..
* هسه أنا عايز اقول ليكم : حال جمهور المريخ بيحنن والله ..
* بقو مساكين شديد ..
* عشان كده بنقترح جمال الوالى يعمل كاس زي كاس مانديلا ويطلق عليه اسم (كاس عزو) ..
* وجيبو (عزام التنزاني) و(عبير الكيني) و(القطن التشادى) وألعبو معاهم لانكم اصلا بتشبهو بعض ..
* والله اكبر غلط إنو المريخ يخش الابطال ..
* الحاجة دى من الاول كانت غلط والسبب في الغلط ده ناس الهلال ..
* بسبب تصنيف الهلال الحناطير دخلو الابطال ..
* والغريبه مش دخلناهم الابطال بتصنيفنا ؟؟ بعد ده ما قدرو يستمرو في الابطال إلا بعد ما سجلو مشاطيبنا ..
* وما حفظو لينا الجميل ..
* قدمنا ليهم السبت لكن إتراشقو وجرو المطار استقبلوا مازيمبي لما جا يلعب معانا وقدمو ليهو الفواكه ..
* اصلو ما بحفظو الجميل ..
* والحركة بتاعت نكران الجميل دى هسه دايرين يعملوها في غارزيتو ..
* غارزيتو وصلهم مرحله ما كانو بيحلمو بيها ولما ساماتا ضربهم قالو غارزيتو بااااااااع ..
* باااع بـ(البخاء) ..
* شوف .. إحنا كنا كويسين جدا وعندنا وطنيه لكن في حاجتين اتنين خلونا نكفر بالوطنيه في الرياضيه ..
* على المستوى الشخصي انا تانى في الرياضه ما عندى وطنيه ..
* والحاجة دى ما بدسها ..
* والسبب حاجتين اتنين : الحاجة الاولى : استقبال جمهور المريخ لمازيمبي لما جا يلعب مع الهلال ، والحاجة التانيه الشغل العفن الاشتغلو بعض المنسوبين للمريخ ضد الهلال في مباراته امام الاتحاد الجزائري بامدرمان ..
* والله العظيم لو جمهور الهلال عرف الشغل العملو الجماعة ديل ضد الهلال في مباراة الاتحاد الموضوع ح يبقى بورسعيد عدييييييييل ..
* بس احسن إحنا نسكت ..
* عموما .. ألف مبروك لمازيمبي الشقيق هذا الفوز (البسيط) الذى تحقق ونتمنى ان يحقق البطوله فهو يستحق ذلك ..
* قلتو لي مازيمبي ضعيف ؟؟
* خلاص كويس ..
* ضعيف والله فعلا ..
* لو ما ضعيف كان اعاد لينا ذكرى (الحبيب تكعيب) شلبيايه ..
* ما كل (المدردم ليمون) وما كل (الفرق علمه) يا حمام إنتو ..
* بالمناسبه .. كده اسألو (مريخاب زيمبابوي) يمكن يكون عندهم معلمه (تحت تحت) عن مشاركه ساماتا ..
* و..و..
* ومجبور قلبي يتعلم بعد ولف عليك ...(يرجع سيكافا) .
في محلو حامل الصفر الدولي
في محلو حامل الصفر الدولي