* مثلما هنالك (مُنشطات) توجد ايضا (مُكسلات) ..
* ومن اشهر (المُسكلات) عندنا : (الفول والفول) ..
* (فول الحاجات) و(الفول المصري) ..
* والشعب السودانى الحمدلله شبعاااان من الفول ده والفول داك ..
* يعنى الكسل عندنا (وراثه) ..
* والله صحى ..
* وفي ظل الكسل الوراثي ده لما تلقى (مجموعة) مننا وفينا (نشيطه وما كسلانه) طوالى تعرف الموضوع فيهو (دفره) ..
* واعتقد ان الكاردينال كان ذكيا عندما طالب (الكاف) بكشف المنشطات ..
* الكاردينال طلب الكشف لانو شاف في فرق في الابطال (شبعاااانه فول) ومع ذلك (نشيييطه) ..
* يعنى بالمختصر المفيد .. بلايلي كان زينو مفروض (هناي) يبل رأسو ..
* بلايلي (الجفل خلو أقرعو الواقفات) ..
* كثير جدا من جماهير الهلال سافرت للعيد مع الاهل في الولايات المختلفه وهذا من حقهم ..
* ولكن من حق الهلال ان يجدنا في هذا التوقيت الصعب ..
* نعم هذا هو العيد الكبير ولكن علينا ان نتذكر ان هذا هو الهلال الكبير ايضا ، يجب ان (نقسم الاجازه) قسمين ..
* يومين مع الاهل ويومين مع الهلال ..
* الزول بدون اهل ما ببقى ، (عيدو) مع اهلكم واعرفو إنو الهلال بالنسبه لينا اهل برضو ..
* وزي ما غني التاج مكى : (ما لينا غيرك اهل وانت الاهل لينا) ..
* يبقى من تانى يوم كل جماهير الهلال تتحرك من الولايات عشان (تحرر الانتصار) في ام درمان بأذن الله ..
* وأبقو الصمود ما تبقو خوف ..
* في المدرسه لما التلميذ يكون (ما حافظ) وينجلد بيقوم يطير (القرايه من رأس الزول الحافظ) ..
* الزول الحافظ وما واثق من إنو حافظ لما يشوف في تلميذ إنجلد قدامو بيقوم هو زاتو (بيبخر الحافظو) من شدة الخوف ..
* هسه نفس الحاجة دى حصلت مع بلايلي وخلت ناس كتااااااااار ما حافظين وشغالين كبكبه هسه ..
* بلايلي إنجلد والناس الحافظين (نص نص) الكوره طارت من عقولهم ..
* يعنى لما (الكاف) يجى داخل الفصل يا تسمع ويا تنجلد زي بلايلي ويا كمان تشوف ليك دوله عربيه تمشى ليها وتعمل نفسك عيان ..
* والله صحى ..
* والدباره نان كيفن يا جنا ؟؟
* لا نتدخل في عمل الكوكى ولكن مشاركة كيبي على حساب محمد عبد الرحمن في لقاء الاتحاد القادم فيها ظلم للهلال وظلم لحمد عبد الرحمن ..
* ميدو سيكون هو من مفاتيح النصر بأذن الله ولذلك امنياتنا ان نشاهده اساسيا بجانب (كاكا) ..
* اليوم الثلاثاء يوافق اليوم الرابع لفريق مازيمبي بالسودان ..
* الناس ديل طولو معانا هنا ..
* بقو ناس بيت عديل ..
* أمبارح شفت (كالابا) خالط في حدائق حبيبي مفلس و(سامتا) لافى في (سوق 6) وكديابا سايق (ركشه في السبيل) ..
* بقو يأكلو (الخدره والفشار وملاح النعيمه) ..
* وعليه .. أنا اقترح ان نمنح الجنسيه السودانيه لنجوم فريق مازيمبي ..
* بقترح كده ..
* واى زول طبعا حر في (مقترحاتو) ..
* ما في زول بيقدر يقول لي : ليه اقترحت كده ..
* قبل كده قالو (عزو) منح الجنسية للاعب (مخستك كده) في الطياره فوق ..
* حسب ما تردد ادوهو الجنسيه قبل ما الطياره تنزل ..
* يبقى في حاله زي دى من حقي اطالب بمنح الجنسية لنجوم مازيمبي لانو طيارتهم نزلت من يوم السبت ..
* داك ادوهو الجنسية قبل الطياره تنزل وحبايبنا ديل طيارتهم نزلت من السبت الفات ..
* هسه عليكم الله بالذمة البيستاهل الجنسيه منو ؟؟ اللاعب بتاع عزو داك ولا ناس مازيمبي ديل ؟؟
* بالمناسبه ..
* والله العظيم أنا في (5) حاجات ما قادره انساها نهائي (3) هى : شلبايه ومبينزا ..
* مبينزا ده كان بيلعب في مازيمبي قبل تلاته سنوات ..
* قام جمال الوالى الشهير بـ(عزو) فاوضو ..
* ومبينزا جا الخرطوم وعزموهو عشا في النادى الالماني وقبض الدولار الحار ..
* وتانى يوم مبينزا جا إتحاد الكره ووقع (ابداء رغبه) والجماهير حملتو على الاعناق والصور اتنشرت في (صحيفة الزعيم) ..
* هل تصدق وتؤمن بالله إنو مبينزا ده مشى وما جا تانى ؟؟
* يشهد الله أنا لحدى الان لما اتذكر منظر جماهير المريخ في جريدة الزعيم وهى تحمل مبينزا على الاعناق ، لما اتذكر اللقطة دى الدنيا بتمسخ لي ..
* والله صحى ..
* معقوله (تحملو ليكم لاعب على الاعناق) وهو جاي الخرطوم يقبض الدولار ويتعشى ويرجع ؟؟
* يعرفوك حناطير كيف عليكم الله ؟؟
* غايتو جنس غايتو ؟؟
* البيان الذى اصدره سعادة الفريق عبد الرحن سر الختم رئيس نادى الهلال الأسبق قبل يومين يدل على (نيه بيضا وقلب حليب) وهو بيان حوى كلمات عميقه وغير مستغربه من (عكسرى) عشق الهلال وعشقته جماهير الهلال واصبح من اكثر الشخصيات حبا عند الجماهير ..
* لو إكتفى سعادة الفريق بسفره الى مدنى ومفاوضته للنجم (ولاء الدين) لكفاه ذلك ولكن الرجل زادنا من كرمه بيانا كان بمثابه (درس عصر) في الحب والريده والنُبل ..
* شكرا سعادة الفريق على هذه المشاعره الغير مستغربه ..
* ادعى (بلايلي) بأنه قد شرب (كحول) في عيد ميلاد صديقه وعند (الفحص) تحولت هذه الكحول إلى (منشطات) ..
* طيب كان تبلع (منشطات) في عيد ميلاد صديقك عشان في (الفحص) تطلع كحول ..
* وبما ان كحول الجزائر بقت منشطات فأن (قهوة السودان الحبشيه) ممكن برضو تطلع كحول ..
* وخاصة (القهوه البيشربها في الرحله) ..
* القهوة البيشربوها في (الرحله) بتخلى الزول (يرقص) و(يهز كتفو) زي هدى عربى في (اغانى واغانى) ..
* والله صحى ..
* وافتكر الناس البيهزو الكتف في (رقيص الرحله) معروفين جدا ..
* معروفييييين يا حبيبي ..
* مدرب الحنطور غارزيتو قال : (لو فزنا على مازيمبي بهدفين سنضمن التأهل) ..
* صااااااااااح ..
* طيب والمغرب التطواني الخمسه الادوها ليهو هناك دى كانت أقوان ولا شوالات فحم ؟؟
* قال هدفين قال ؟؟
* وإنتو زاتكم فرقكم شنو من تطوان المغرب ؟؟
* تسمعو كلام غارزيتو ده والله هدف بعينك ما تشوفو ..
* الزول ده قبل كده لقى ليهو (خاتم دهب) مدفون في الفاشر قال خلاص بجيب الابطال ..
* مش قال كده ؟؟
* طيب ما في مشكله كده لو راجل لعب لينا على الريح وبله جابر وسيلا وعلى جعفر امام مازيمبي ..
* مش قلت لقيت خاتم ؟؟ قال اااى ..
* مش قلت بـ(الخاتم) ده بتشيل الابطال ؟؟ قال ااااى ..
* طيب لعب لينا ناس بله وورينا بتشيلها كيف ؟؟
* انت لو بتجيب هدفين يا غارزيتو ناس مازيمبي ما بيجو الخرطوم من عيد رمضان والمباراة في عيد الضحيه ..
* ناس جو قبل اسبوع تقوم تقول ليهم هدفين وخاتم دهب وكلام فارغ زي ده ؟؟
* غارزيتو بلسانو ده بجيب ليكم هوا مع الجماعة ديل ..
* والله صحى ..
* اصلا الهوا جايكم جايكم لكن الجماعة ديل لو سمعو بحكايه الخاتم بزعلو شديد والله ..
* غايتو الأنا متأكد منو ميه الميه إنو السنة دى يا متنا من الضحك يا كمان الضحك كتلنا ..
* هسه إحنا لما شفنا جرستكم بعد (ورطه بلايلي) قربنا نموت من الضحك ..
* بلايلي إتعاقب إنتو متجرسين مالكم ؟؟
* والله انا مستغرب انتو خايفين منو شنو ؟؟
* معقوله تحزنو اكتر من جمهور الاتحاد ؟؟
* بلايلي لاعب ما عندو اخلاق ويستاهل يقيف انتو زعلانين ليه ؟؟
* زعلانين ولا خايفين ؟؟
* اقول ليكم حاجة ..
* المجموعة بتاعتكم دى انا من شفتها ما هضمتها ..
* ما عجبتني والله ..
* مجموعة كيف كيف كده ..
* ياخى مجموعه فيها (العلمه) اول مره تلعب في الابطال وفيها (حنطور سيكافا) اول مره يصل المربع ..
* والعلمه دى إحنا سمعنا بيها قبل شهرين بس ، اما بالنسبه للمريخ سمعنا بيهو بعد بقينا كبار ..
* والله (هانت الزلابيه) زمان زي الوكت ده (كداراتكم) تتطاقش مع كدارات ناس القطن التشادي في سيكافا ..
* هانت اللقيمات والله .. كتر خير الهلال الدخلكم الابطال وكتر خير الاتحاد الجزائري الجابكم المرحله دى (صحبه راكب) ..
* راكب بـ(الضاء) ..
*و..و..
* ومنايا ليك ما وقف وإتمنيت أنا (يحصل ليك الحصل لبلايلي يارب) ..