* (حش) الزرع بـ(الدقن) يعنى فشل المحصول الزراعي ..
* يقول ليك : (حشاش بدقينتو) ..
* يقعد يمد رقبتو ويقول : (بكره ح احش الزرع من هنا لحدى هناااااك) ..
* وبكره لما تجى يكون لا (حشه هنا ولا هناك) ..
* وفي السودان عندنا (الحشاشين بالدقن) كتااااااار شديد..
* ومن اشهر الحشاشين بالدقن في البلد دى هو السيد جمال الوالى الشهير بـ(عزو) ..
* والله صحى ..
* جمال الوالى 13 سنة مع المريخ شغال حش بالدقن ..
* يبحث عن بطولات وانجازات دون جدوى ..
* فعل كل الممكن وبعض المسحيل ولكن في النهايه المريخ مريخ ..
* وصيف وضل وحنطور طوال سنين الوالى ..
* اجتهد جمال الوالى في سبيل ان يجعل المريخ (هلالا) ولكنه فشل لان (الصورة عمرها ما بتبقى اصل) ..
* اى حاجة تخطر على بالك جمال الوالى عملها عشان المريخ يبقى هلال ..
* يخسر المريخ في تسجيلات كل موسم حوالى (20) مليار ونهاية كل موسم يحافظ المريخ على موقعه كوصيف دائم وضل وتابع للهلال ..
* المريخ في كل تسجيلات يدفع للاعبين (الداخلين الكشف ويدفع للاعبين المارقين من الكشف) ..
* وهذه من عبقريه (عزو) ..
* تتشطب من المريخ بدوك قروش (مخالصه) توازي قروشك لما سجلوك ..
* القروش الصرفها جمال الوالى في المريخ كان ممكن تتم طريق الانقاذ الغربي وممكن تعمل مستشفى حديث في كل قريه وممكن تعمل المطار الجديد وممكن تكمل المدينة الرياضيه ..
* على الاقل كنا بنستفيد من القروش دى في حاجات تنفع البلد ..
* هسه صرفتوها في المريخ ، والمريخ ما بنفع البلد ولا بنفع روحو ..
* خسارة مال وبس ..
* فريق بيأكل اكل السوسه والعافيه المدسوسه ..
* المهم ..
* اجتهاد جمال الوالى في سبيل افشال صفقة (ولاء الدين) رغم علمه بأن الهلال اكمل الصفقه هو شي غير مستغرب بالنسبة لرجل ادمن الفشل ..
* حقق جمال الوالى نجاحا منقطع النظير في الفشل ولذلك ما يقوم به من (فرفره) تجاه ولاء الدين غير مستغرب ..
* لا نستغرب هذا الفعل من جمال لان للرجل سوابق كثيره تبرر له ما يفعله الأن ..
* الاعتياد هو (عدو الدهشه) ..
* الفعل لما يبقى عادى بكتل الدهشه ..
* وصراحة جمال الوالى بقى ما عندو حاجة مدهشه حتى في الفشل والتخبط والتقليد ..
* ويكفى ان جمال الوالى الشهير بـ(عزو) هو الذى ادخل ثقافة مفاوضة النادى لـ(خال اللاعب وأبو اللاعب وزوجة عم اللاعب) ..
* يقول ليك اللاعب ده جمال الوالى انتهى مع راجل أختو ..
* هذه الثقافة ادخلها جمال الوالى في التسجيلات ..
* لو الهلال داير يسجل لاعب جمال الوالى بيمشى يشوف (خطيب أخت اللاعب) وبتكلم معاهو وبقولو ليهو انا بكمل ليك عرسك بس انت اقنع لي فلان ده يجى المريخ ..
* الحاجة دى دخلها عزو ..
* عشان كده تانى إحنا ما بنستغرب لو رسل محسن سيد للمنتخب الاولمبى او لو رسل وفد لنادى الاهلى مدني ..
* الشئ من معدنه لا يستغرب ..
* وده كلو نقص في النهايه ..
* ولكن أنا اقول ..
* نحن لا نريد ان يصبح الكاردينال (حشاش بدقنو) ..
* ولا بنقبل رئيس الهلال يكون ما عندو كلمة ..
* وهذه دعوة للكاردينال ان يصحى ويصحصح ويحمى مكتسبات الهلال ومواهب الهلال ..
* في موضوع بكرى المدينة الكاردينال قال بالحرف : (انا لو اخلى كرسى الهلال ده ما بخلى بكري) ..
* الكلام ده إتقال في لقاء جماهيري في نادى الهلال وانا اشهد عليه لانني كنت حضورا ..
* وطبعا الكاردينال ترك بكري ولم يترك الكرسي ..
* والموضوع ما موضوع بكري ولا ما بكري ..
* الموضوع موضوع إنك تكون صادق وتفعل ما تريد مهما كانت العراقيل ..
* تقاتل عشان كلمتك ما تقع واطه ..
* لانو الراجل لسان ..
* تقول كلمة تبقى قدورها طوالى ..
* ما بتقدر تبقى قدر كلمتك ما تقولها ..
* ولاء الدين ده حق الهلال ودى قضيتنا مع جمال الوالى يا الكاردينال ..
* الزول ده يا شهر حداشر نشوفو لابس رقم (9) وجاري مع ناس كاريكا وبشه ويا كمان بعرفك انت ما قدر كلمتك ..
* والموضوع ده بالذات ما فيهو هظار ولا فيهو مجامله ..
* لحدى الان اهلى مدنى يتعامل مع الهلال تعامل رجال ..
* والشي العرفتو انا إنو في مبلغ مالي المفروض الهلال يدفعو لاهلى مدنى عقب مباراة سموحه ..
* نتمنى إنو المبلغ ده يكون إندفع ..
* رجالات اهلى مدني يستحقون الاحترام فهم يتعاملون تعامل رجال ..
* رفض رئيس اهلى مدنى فتح باب التفاوض مع المريخ رغم المغريات لان الموضوع اتحسم لصالح الهلال وهذا موقف يؤكد ان اهلى مدنى كبير بهذه الاخلاق ..
* وهذا الموقف يشبه موقف الامل عطبرة فيما يتعلق بصفقة نزار حامد والتى اطلق عليها البرير (البرق الخاطف) ..
* في موضوع نزار حامد وفد المريخ ماشى عطبرة قامو نزلو في شندي ضربو (شيه) ولما وصلو عطبرة لقو نزار حامد وصل الخرطوم وقاعد يتعشى في قاردن مع البرير ..
* الكارينال لازم يعرفو إنو التسجيلات دى ما دايره حش بالدقن ..
* ولا دايره ونسه ..
* تسجيلات الصحف دى اضرت بالهلال ضرر لا يعلم به إلا الله ..
* تسجيلات على صفحات الصحف ..
* من زمن صلاح ادريس الهلال بيسجل على صفحات الصحف ..
* نفاوض لاعب المريخ بيجرى عليهو ..
* الآن ناس الهلال لازم يعرفو إنو المريخ ما عندو شخصية ولا بيعرف يسجل ولا فيهو زول بيعرف كوره اصلا ..
* عشان كده الهلال يشتغل في السر ..
* سبب واحد بيخلى الهلال يعلن عن صفقة ولاء الدين في الصحف قبل (3) شهور من التسجيلات ما في ..
* معقولة ما قادرين تكتمو سر الصفقه دى ؟؟
* طيب طالما ما قادرين تكتمو السر يبقى لازم تبقو قدر كلمتكم ..
* عشان الناس ما يقولو رئيس الهلال كضاب ..
* تخسر الوراك والقدامك عشان تبقى قدر كلمتك او كمان بلاش تعلن الصفقات في الصحف ..
* من هسه مجلس الهلال لازم يعرف إنو إدارة المريخ ما دايره تجيبها البر ..
* وطالما هم اختارو هذا الطريق إحنا بنكملو معاهم ..
* ندفع جنيه جنيه ونستعد لمعارك عدم الاخلاق والغدر والخيانه ..
* شوف يا حبيبي انا اقول ليك حاجة ..
* المريخ هو اول نادى سودانى (يبصم) إنابه عن لاعب ..
* واول نادى يستقبل الحكام في صالة كبار الزوار ..
* واول نادى يخسر بسبب البرد ..
* واول نادى في كل مباراه عندو ضربه جزاء ..
* واول نادى يحدد للاتحاد العام حكام معيين يديرون مبارياته ..
* واول نادى يتأهل للمربع الذهبي صحبه راكب ..
* واول نادى عصام الحضري يقول لرئيسه (ما كنت بتحلم تسلمى لي في يدى) ..
* واول نادى يجلب الاساءة لدارفور حيث قال رئيس النادى الجزائري قبل سنوات : (المريخ عرضنا علينا اموال مقابل الفوز ولو عرض علينا اراضى دارفور لما وافقنا) ..
* واول نادى يقتل صحفى تنزاني ويقول ده جمهور سيكافا ..
* اول نادى ينظم سيكافا مرتين في سنة واحدة واحدة وما يشيل كأسها ..
* اول نادى رئيسه يقول : (قال الله تعالى : العارف عزو مستريح) ..
* واول نادى يتبول (لعيبته في القارورات) باستاد الحصاحيصا ..
* واول واول ما ليها اخر ..
* يبقى ده المريخ ..
* ده جزء من المريخ وما خفيه اعظم ..
* يلا لازم تعرف انت بتتعامل مع نادى بالمستوى ده ..
* عشان تكون صاحى ..
* والموضوع ما خطير ..
* الليلة بعد صلاة المغرب يتحرك وفد من الهلال يمشى بيت ناس امير كمال ..
* الوفد يكون شايل معاهو شنطة فيها دولارات وفيها جنيهات ..
* القروش تكون (4) مليار ..
* لو لقينا امير قاعد في البيت خير وبركه لو ما لقيناهو بنقلى عمو كمال ..
* وعلى فكرة امير كمال رفض التجديد في شهر سته لانو ما ادوهو عرض كويس وهسه قال الباب مفتوح لمن يدفع اكتر ..
* يعنى امير قال : الحشاش يملأ شبكتو ..
* والله العيظم وكتابه الكريم انا اكون رئيس الهلال اصل مع امير كمال ده لحدى عشرين مليار واسجلو وما يلعب ..
* لانو جمال الوالى تطاول على الهلال ويجب ان يعرف حجم الهلال ..
* وبرضو الهلال المفروض صباح باكر يرسل وفد لفريق الاشانتي بخصوص كوفى ..
* نخلى جمال الوالى بدل يسك ولاء الدين يحرس لعيبتو ديل ..
* والسنة دى امير كمال ما بيلعب ليكم كوره ..
* وإنتو في وإحنا في ..
* و..و..
* ويا ريت كل زول تايه يلاقى ..(مازيمبي) في دربو ..