• ×
الجمعة 29 مارس 2024 | 03-28-2024
هيثم صديق

الحوار يكفيك عنوانو

هيثم صديق

 0  0  12009
هيثم صديق

امس جريدة قون سبقت الجميع وحاورت مدرب الاتحاد الجزائري
المريخ لعب ضد الاتحاد مباراتين مدربو مافي زول حاورو
نحن البحاور عندنا كوفي واوكرا بس
ناس قوون حاوروا ميلود وجابوا العناوين
المانشيت الكبييير بيقول
(مستوي الهلال لن يخدعني)
يعني شنو الكلام
يعني مستوي الهلال ده فشنك
لو ما الميك اب والفتوشوب بتاع الجرايد الهلال ده ما بتقابل
زي قصة الود الماشي مع خطيبتو في المطرة
المطرة نزلت كل الاصباغ
والود مدخل يديهو في جيبوبو ويتكلم
عامل نفسو شاروخان
الود اتلفت بعد مسافة وقال (ادريس عليك الله جيب سفة)
افتكرها صاحبو ادريس
قالوا ليك مستوي الهلال ده في احوال طقس الكاف تحت سطح التنافس
منخفض
وادي
خور
العنوان التاني لميلود
(ساكون كالاسد الجريح امام المريخ او مازيمبي)
انا قلت بيكون علي المركزين التالت والرابع
العنوان بيوحي بي كده
غايتو وما طالبني غايتو
مستوي الهلال ده ما بيخدع زول
مستوي ناس اتير ما بحتاج لخبير
اتير ده مع البلايلي الا يتير
انا خايف يسوقوه اسير
اول مرة في تاريخ كرة القدم فريق منافس ياخذ اسيرا من منافسه
الزول ده بخش مستسلم
الزول ده تعبان الا تخلو جمعة جنبو
مش جمعة للراحة
ينوم للفطور
مستوي الهلال لن يخدعني
لا بالله
انت يا ميلود فاكرهم كانوا لاعبين بالصف التاني واللا شنو
وغلاوتك ديل لعبوا ضد سموحة بالغالي والنفيس
ده التعادل جابو الشغيل يا ناس
الزول البثبت الكورة بالساق
الشطبواالمريخ خمسة مرات
الطشاش البقي هناك شوف
والله الناس ديل منهم خوف
مستوي الهلال لن يخدعني
مستوي الهلال ما بيخدع اي زول
هل تعلم يا ميلود
انه استاد الهلال افضل مكان لتعلم صافرات الاستهجان
صفر وصفافير
::::::::::::::::::::::::::::::::::::
*ويعيش المريخ هذه الايام اجمل الايام
وهو يقدم للجميع الدهشة والرعشة
كلما تفتق جرح اخاطه
وكلما امتد بحر خاضه
وخاصرت يده الجزائر
وللجزائر له عودة
ولذلك تبقي مباراة العيد للقريب والبعيد
للمريخ السعيد
**
اغرب حاجة انه الدماعة يريدون تخويف المريخ بخماسية مازيمبي
الخماسية دي بتخوفهم هم
لانهم ذاقوها
كما يخاف الملدوغ من مجر الحبل
او من شوكة العقرب
اي المثلين اقرب
التطواني هزم الهلال ومازيمبي هزم التطواني
والهلال هزم مازيمبي
هذا حال المجموعة الاضعف التي تزيلتها سموحة المفضوحة
في فضيحة اكتر من الطيش كمان
ولذلك يبقي تخويف الدماعة مجرد شماعة
*لن نخوف احد بالبلايلي والاتحاد لان الاتحاد يبقي فريقا عاديا
علي الاقل بالنسبة للمريخ
ونحن قياسنا بالمريخ
وهو قياس صعيب
فلقد قيل ان الاسد قد كان يتونس مع مجموعة من الحيوانات في الغابة
فاعتذر منهم للانصراف
فتشالق التيس وقال للاسد(خايف منالمدام والا شنو)
فمط الاسد فمه ساخرا وقال (ايوة خايف انتي قايلني معرس لي غنماية)
*ايها الاحباب هناك مريض يحتاج الي جهاز اوكسجين وفي غرة الايام البيض ندعوكم لتفرجوا كربته فانما ترحمون بضعفائكم اقرضوا الله قرضا حسناواجزم انه حاجته ستقضي اليوم كما تعودنا منكم فلقد سبق ان ناشدنا في هذا المكان قبل اعوام القراء بالتبرع بالدم لاحد المرضي من اصحاب الفصيلة النادرة فاكتشفنا ان النادرين بالمئات وقال لي هويشكرهم والله لو احتجت لصهريج لملوه
ملاكم الله عافية
امسح للحصول على الرابط
بواسطة : هيثم صديق
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019