*مشينا كورة الختام ضد الإتحاد وقعدنا خالفين رجل فوق رجل وماشايلين هم
نشيل هم لي ولشنو احنا متأهلين من عصراً بدري ومنتظرين البجينا في مربع
الذهب عشان نوريهو البطل منو.
*اها عرفتو البطل منو ما أظن في ناس بتحب الغلاط وديل كتااار وحبايبنا
كمان ديل هم العايزين نوريهم البطل منو عشان ما إتغشو ويكونو قدر التحدي
الراجيهم في مربع اللهب الأحمر الراجيهم في الرد كاسل.
*هسي ناس الجزائر كلهم عارفين البطل منو وناس تونس عرفو وقبلهم ناس
انغولا وفي ناس قالو انتو أبطال السنة دي ديل ناس تنزانيا.
*بتتذكرو جروج نيسمبي لمن قال احنا خرجنا علي يد البطل أها نسيمبي ده حقو
يسمو سيد العارفين الزول ده بعرف الأبطال كويس وبشم (ريحة المطار)كمان زي
ما شاميها الحبيب سلك من زمااان زمن سيكافا ون ودبي الذهبي ومانديلا
وسيكافا تو وسيكافا3 وجاي عليهم اللقب القاري البعرفنا وبنعرفو كويس مازي
حبايبنا الطيبين البسمعو بيه وبشوفوه وماحصل لمسوه.
*يلمسو كيف عاد اللمس ده للبطل بس اما غيرو محتاج يوروه البطل منو ومحتاج
يفهمو كيف تبقي بطل وكيف تقنع الكل قبل ماتشيل الكأس إنك بطل طبعاً
الكلام ده بزعل وبممغص شديد اي والله بممغص بذات لمن يكون البطل القادم
بقوة قاعد معاهم جوة وبجيب بطولاتو من برة بالجو بالمطار بالطيارة تتذكرو
طيارة مانديلا لمن العلم الأحمر الباهي الزاهي كان برفرف من كابينة
الكابتن اها الكابتن هسي لو سألوه بكون عارف البطل منو بس انتو روقو عشان
تعرفو وتعالو عشان تعرفو فضلتو لينا انتو بس الما عارفين هسي افريقيا
واسيا واروبا كل الفيها عارفين قولو لي كيف ناس بي ان سبورت مش عندهم
محللين ومذيعين من اسيا قالو المريخ بطل ناس فرانس 24 الفرنسية قالو بطل
الأبطال السنة دي المريخ وناس افريقيا اسياد العارفين بس انتو الما
عارفين تعرفو كيف والمكابرة راااقدة تعرفو كيف وانتو بتقولو المريخ خايف
يلاقينا في دور الأربعة تعرفو كيف وانتو شايفين انتصارات المريخ خبط
عشواء تعرفو كيف وانتو ما عايزين تعرفو. *بس صدقوني هتعرفو قريب وان
شاءالله تجونا قبليها عشان تعرفو البطل منو وتاني عاد ما بنقوليكم احنا
بنخلي الفرنسي يقول وبنخلي بكري يقول وبنخلي كوفي وجابسون وايمن ينضمو
وبنخلي جمال سالم صامت جمال ده صامت ومابعرف تفاهم وجنو وجن النضم الزول
ده في الرد كاسل بسكت وبخلي علاء وامير يتكلمو بالنيابة عنو هسي من كترة
سكاتو الجزائر كلها ماقالت معاهو كلمة ولا حتي بالغلط جمال صعب وشباكو
نضيفة ونضمو قليل والبلاقيهو بطلع صامت ساي.
وهج اخير:-
*ليلة رائعة من ليالي المريخ الخالدة عشناها بكل التفاصيل كيف لا ونحن من
اكلنا بيدنا وكتبنا مصيرنا بيدنا لولا فضيحة الحكم ممادو لجلس المريخ في
مكان منافسه الجزائري في صدارة المجموعة.
*تخوفنا من الدفع بعناصر لديها بطاقات صفراء لكن خوفنا ذهب مع تناقل
لاعبي المريخ للكرة بأناقة معتادة في المحفل الأفريقي الذي ظل يبرهن فيه
المريخ علي سطوته التي تساقط امامها الخصوم تباعاً ولم يكن إتحاد العاصمة
الجزائري كغيره بعد ان اسقطه المريخ عنوة وإقتدار ليصعد بكبرياء البطل
وليؤكد ان شخصية البطل لايرتديها المريخ هذا الموسم عبثاً ولايتسلبط
عليها كما يفعل البعض ممن لايدركون ان البطل له شواهد وله جوانب لابد ان
تتوفر فيه وهذه الجوانب يكتنز بها الجلباب الأحمر بكثرة فائضة فالمريخ
خلال مسيرته هذا الموسم كان واضح انه مختلف وكان واضح كلما تقدم انه
يذداد إختلافا عن مامضي من سنوات كان الحديث فيها عن جلب الألقاب القارية
يشع بالعاطفة ويغلفه فيض التمني، لكن الذي نراه الأن يختلف عن السابق
بسنوات ضوئية وسر هذا الإختلاف يعود الي مدرب إندمج سريعاً مع عناصر
فريقه وظل يشكلها بريشه فنان حتي أبهرتنا لوحاته التي يقدمها في معرض
الأبطال الرد كاسل الذي ظل يشهد علي لوحات جمالية يصعب وصفها ويكون
التفاعل معها ملهب للأكف وخانق للحناجر التي يصعب عليها كبت الهدير
المزلزل الذي ينتزع منها بفضل اللوحات الإبداعية للاعبي المريخ الذين
باتو في الرد كاسل وخارجه اساطنة في تقديم السحر الحلال عبر أقدامهم
العازفة لسيمفونيات يختلط فيها كل ماهو بديع ورائع.
*انتصرنا علي الإتحاد لنؤكد من جديد اننا في قلب المعركة القاصدة لجلب
الأميرة السمراء التي اشرنا لها بصباعنا من قبل عندما اطحنا بالترجي
وتحركت عليها جحافلنا بقوة من قلب الجزائر التي شهدت القضاء علي الكماشة
الجزائرية وها نحن نواصل تقدمنا الذي سيصعب علي اي خصم ايقافه هذا العام.
*الفوز علي الإتحاد رغم حسم الصعود مبكراً يعتبر فوز مهم ويرسل به
غارزيتو رسائل للتعرف علي البطل فغارزيتو هذا مدرب يعرف كيف يدير معاركه
خصوصاً الأفريقية لهذا لم نستغرب مجازفته بذج عناصر كان يمكن ان يتم
إيقافها ان نالت الإنذار الثاني لكن الرجل لم يعير كل ذلك ادني اهتمام
لانه يريد ان يوضح ان فريقه بطل قادم وعلي الحالمين بتحاوزه ان يفيقو من
احلامهم فمن يسقط افضل اندية أفريقيا لايصعب عليه اسقاط الأقل منها
فالمريخ حتي اللحظة تفوق علي افضل مدرستين في شمال أفريقيا وهما تونس
والجزائر وسيكون أمر تجاوزه لمنافسه القادم أسهل بلا شك من مما سبق من
منافسين ينتمون للكرة المغاربية.
*هزمنا التيحة بهدف ديديه الفنان وفي الإنتظار علي المدار صعود حبايبنا
من قلب الأسكندرية.
*غداً سنعود للقاء بشئ من التفصيل.
غايتوا ربنا يستر عليكم نحنا مازيكم ومابنفرح لهزيمتكم زى ما انتو بتفرحوا وطوفوا الشوارع مبسوطين لهزيمتنا نحنا معاكم قلباً وقالباً فى الحلوه والمره (ناس فى المرة جافونا وبكره الحلوة بتجيان وبتجينا)
فى زول جاب سيرة تطوان هسة؟