* تمنى غارزيتو مواجهة مازيمبي في المربع ..
* وتمنى الكوكى مواجهة المريخ في المربع ..
* وما بين أمنية الكوكى وأمنية غارزيتو تظهر عظمة الهلال ..
* الهلال منو خوف وجرى يومين ..
* الناس كلها بتخاف من الهلال ..
* حتى غارزيتو لا يريد مواجهة الهلال ويفضل مواجهة مازيمبي رغم انه يعلم ان خط دفاعه لا يصمت دقيقتين امام هجوم مازيمبي ..
* ناس المريخ لو عليهم يواجهو العلمه في المربع الذهبي ..
* إتعودو على (الميته) عشان كده لا دايرين يقابلو الهلال ولا دايرين يقابلو مازيمبي ..
* دايرين العلمه تااانى الجماعة ديل ..
* وعلى العليهم الكاردينال تم الناقصه ..
* الكاردينال في تصريح قوى جدا قال : (سنطالب الكاف بفحص المنشطات في دور الاربعه لاننا لن نقبل الفوز على الهلال بواسطه المنشط) ..
* والكلام ليك يا المنطط عينك ..
* الكلام القالو الكاردينال ده خطير والله ..
* كونو رئيس نادى الهلال يقول كلام زي ده معناها عندو معلومات مؤكده بأن هنالك فريق معين وصل هذه المرحله بواسطة المنشطات ..
* ولكن مشكلة الكاردينال ما ورنا المنشطات فرنسية ولا إيطاليه ولا شنو بالضبط ..
* لكن المنشط الفرنسي بيظهر في (جريت اللاعب) ..
* اللاعب من جريتو بتعرفو بالع منشط فرنسي ولا ايطالى ..
* والحكاية دى زي (ملاح الخدره) ..
* زمان في المدرسة لما نمشى درس العصر اى زول متغدى بملاح خدره بكون ظاهر ..
* لانو الخدره بتترك اثر في (الاظافر) و(السنون) و(كم القميص) ..
* والمنشط الفرنسي برضو ظاهر ..
* وإحنا على بالنعمة عارفين اى حاجة ..
* وعارفين كمان الطيارة الخاصة السافر بيها المريخ للجزائر كان فيها شنو ..
* إحنا اولاد تسعه ودافننو سوا ..
* المهم ..
* تانى فحص بس ..
* اى فريق في الممتاز حقو يعملو ليهو جهاز فحص منشط ..
* اى فريق يعمل ليهو جهاز زي الجهاز بتاع (اورنيك 15) العملتو الحكومة للإيصالات الماليه ..
* إحنا غايتو لو قابلنا المريخ ده في الدورة المدرسية ما بنلعب معاهو إلا بعد كشف المنشطات ..
* لو قابلناكم في شارع الله ده ما بنسلم عليكم إلا نفحص ليكم المنشطات ..
* فريق في الدورى يحتل المركز الرابع وخسر مباراتين في عشرة ايام وعلى الصعيد الافريقي بلغ دور الاربعه ..
* دى تجى كيف دى يا عزو ؟؟
* كترت (التنشيط) بيضعف الشبكه ..
* شبكه بـ(الصاء) ..
* اليوم يلتقى (الراكب) بـ(صاحبه الحنطور) في مباراة اراد لها فريق إتحاد الجزائر الشقيق ان تكون وديه ..
* مباراة لا بتدودى ولا بتجيب ..
* وغدا يلتقى كبير البلد بفريق سموحه المصرى في مباراة لا تهم سموحه ولكنه يقاتل من اجل شرف المنافسه ..
* رغم ان سموحه خارج دائره التنفاس إلا انه يلعب مباراة الغد وكأنه يبحث عن صدارة المجموعة ..
* ولذلك المباراة تبدو خطيرة وصعبه وتحتاج لتعامل خاص من قبل نجوم الهلال ..
* يجب ان لا يهمل الهلال الجانب الدفاعى لان سموحه لا يملك ما يخسره وستكون شهيته مفتوحه على الهجوم بحثا عن نصر يبيض تاريخه ويحفظ به ماء الوجه ..
* والفوز على الهلال هو شرف يبحث عنه سموحه لانه سيضاف لانجازاته دون شك ..
* إذا كان تأهل سموحه للابطال هو إنجاز فأن فوزهم على الهلال إنجاز يضاهى إنجازهم بالمشاركه في الابطال ..
* الحذر واجب امام فريق بلا (أمل) ..
* وسيرة اى (أمل) في الايام دى بتعقد الحناطير ..
* الحناطير بقو عندهم عقده من اسم (امل) ..
* اى حنطور كان خاطب ليهو واحده اسمها (امل) فسخ الخطوبه ..
* بت هديه ورضيه تلقى خطيبها الحنطور فسخ خطوبتها لمجرد ان اسمها امل ..
* يعنى (رزاق) ده خرب بيوت ناس عديل ..
* المهم ..
* اليوم لازم تكون عندنا وطنية ..
* ولازم نتابع المباراة دى من باب الوطنية ..
* مباراة الراكب وصاحبو ..
* على المستوى الشخصي سوف اقوم بتشجيع (الراكب) ..
* قناعتي بتقول لي شجع (الراكب) وليس (صاحب الراكب) ..
* قناعتي كده ..
* واى زول طبعا حر في (قناعاتو) ..
* والله أنا لو كنت محل جمهور المريخ ما بقدر ادخل مباراة اليوم ..
* ما بدخل ..
* بكون خجلان ..
* عيني بتكون مكسور ..
* قلنا فريق الاتحاد الجزائري بالنسبة للمريخ زى (ابو النسب) ..
* والنسيب عين شمس ..
* وعين الشمس ما بتقدر تملأ منها ود عينك ..
* عشان كده الليلة الحنطور حالو بكون زي حال (اخو العروس) ..
* اغرب حاجة إنو فريق الاتحاد هو الذى اوصل المريخ لدور الاربعه ومع ذلك المريخ يفكر في عملية (تواطؤ حلال) كما اسماها الاعلام الاحمر السالب ..
* الناس ديل ما بخجلو والله ..
* مفكرين يظلمو فريق الاتحاد رغم انه صاحب الفضل في وصولهم لهذه المرحلة ..
* الاتحاد الجزائري ابعد وفاق اسطيف وابعد العلمه واختار الحنطور ليتبعه إلى المربع الذهبي ومع ذلك الحنطور يفكر في (نصر غير برئ) اليوم ..
* الجماعة ديل والله ما فيهم فايدة (تمد ليهم يدك بعضوك فيها) ..
* حناطير ساكت ..
* قالو دايرين المباراة تنتهى تعادل وبدون كروت ..
* طيب ما تلعبوها بدون حكم وتريحو نفسكم ..
* متلتلين الحكام ليه ؟؟
* وكت دايرنها تعادليه وبدون كروت ما كان يجى حكم اصلا ..
* المريخ وصل مرحله إنو يتفق مع الخصوم عشان تتعادل معاهو في استاده ..
* ياخى هسه الاتحاد الجزائري ده لو قال عايز يغلبكم (سبعه) زي بتاعت الواحدات الاردني المفروض توافقو على طول ..
* المفرو توافقو لانو لو ما هم إنتو ما بتصلو المرحله دى ..
* عدم الاحترام ما كويس ..
* وكلامكم البتقول فيهو ده عدم احترام لفريق اصطحبكم معاهو زي الاطفال لمربع الكبار ..
* لو ما فريق الاتحاد كان زى وكت تكون في تنزانيا مشاركين في سيكافا ..
* لكن كتر خير فريق الاتحاد الساقكم معاهو دور الاربعة زيكم وزي اى حنطور ..
* فريق زي كده يفترض تحترمو ..
* ويفترض إنو جمال الوالى الشهير بـ(عزو) بعد المباراة يكرم بعثة الاتحاد ويهدى عليهم تلفونات (جلاكسى ومراكيب نمر) ..
* لابد من احترام فريق الاتحاد يا حناطير ..
* وإحنا في السودان تربيتنا بتجبرنا نحترم صاحب كل فضل علينا ..
* المجتمع السودانى ما بينكر الجميل وبيقدر اصحاب الفضل ..
* ولا إنتو خلاص بقيتو (داعش) ؟؟
* معقولة بقيتو للدرجة دى ؟
* حتى الفريق الساقكم معاهو صحبه راكب عايزين تشترطو عليهو المباراة تنتهى تعادل وبدون كروت ؟؟
* عيب عليكم ايها (الدواعش) ..
* قال شنو ؟؟
* قال ظلم المريخ يقود البلاد لداعش جديدة ..
* صااااااااااح ..
* صدقناكم ..
* والله إنتو (د) من داعش ما تقدرو تعملوها ..
* جعجعة ساكت ..
* شكوى ورفضوها ومباراة قررو إعادة وكده نشوفكم بتعملو شنو يا عزو ..
* وبعد ده نقابلكم في المربع نطقطقكم زي (اصابع يد العريس الخجلان) ونقابلكم في الممتاز نخلى ريحتكم طير طير ..
* لا بنعرف داعش ولا تنظيم القاعدة ..
* بس يا الله بكره ننتصر على سموحه ونقابلكم ..
* بكره لو فزنا على سموحه اول حاجة بنفكر فيها هى (جهاز كشف المنشطات) ..
* عليك الله يا الكاردينال بعد الفوز ان شاء الله قبل ما تدى اللاعبين الحوافز تمشى تشترى لينا جهاز الكشف ده ..
* يجب لينا الجهاز ده عشان اى حنطور يطلع شجرتو ..
* الناس بقت ما عندها اخلاق ولذلك لابد من الجهاز ..
* غايتو جنس غايتو ؟؟
* ما تنسو .. لازم تطبعو على فنايلكم كلمات تقول : (المريخ في المربع صحبه راكب) ..
* و..و..
* و(الحنطور) داخل البص على مسؤولية (الاتحاد) ..