• ×
الجمعة 5 مارس 2021 | 03-04-2021
هيثم صديق

عرس جماعي

هيثم صديق

 0  0  11066
هيثم صديق

الحلة كانت جايطة شديد اليوم داك لما قالوا انه حايكون في عرس جماعي بعد اسبوع وفي ناس متكفلين بكل اللازم من شيلة واثاث ومهور وبخور وغداء وعشاء وفطور
الامات والبنات بقن ما بنومن دي فرصة ما بتتعوض والاولاد والاباء في اجتماعات متواصلة
حاجة حرم قالت لبتها علوية :والله يا علولو انتي مرتاااحة السر عاقد عليك واهو جاتكم حاجات زيادة ساي ..علوية قالت لامها والله ما اخلي حاجة البشيلنهن التانيات كله اشيلو..صحي السر ضمني لكن برضو
في منزل فتحية كان الامر مختلفا ففتحية التي فاتها القطار او كاد وجدت ان هذه الفرصة قد لا تتكرر مرة اخري ولذلك كان كل افراد اسرتها معها
-المشكلة في العريس
-يعني حايكون في شنو ما لينا مية سنة مشكلتنا في العريس
(هنا البنت تبكي)
-معليش ما تبكي بنلقي لينا حل والله لو نشتري عريس
هنا اخذ بكا البنت يتعالي وهي تقول
انا عايزة عريس عديييل المرة الفاتت زورتوا لي قسيمة وانكشفت لامن بقيت عبرة للناس
اريتني لو زي علوية(ضااامنة ومرتاحة)
قبل العرس بيومين اقيمت حناء جماعية للبنات اللائي يملكن قسيمة زواج فتفاجأن بفتحية وهي معهن وسري الهمس
-انتي فتحية دي عريسها منو؟
-بري..ما عارفة ليها عريس
-ونان شنو الجابها هنا؟
انا خابرة
ولكن علوية رفعت صوتها وهي تتحدث في التلفون
ايوة يا مجدي يا حبيبي ..قلت لي جاي متين توصل بالسلامة انشاء اللهوالله اهلي قالوا احسن اسافر ليك لكن مع اصرارك ده رضخواههههه وتاني هههه
نظرت كل البنات لبعضهن وقد اخرجن في حركة مدروسة قسائم زواجهن واخذن يهببن بها
وهنا مسكت فتحية ام هله هله وصرخت باعلي صوتها (يمااااااااااااااااا) ودخلت امها تهرول منزعجة وسرعان ما اكالت السباب للبنات ..والله بتي دي تساويكن كلكن ومش القسيمة دي بتعملها بكرة دي لما يجي عريسها من مصر..هو عاد عريس ساي ده بي رجالكن كلكن ده مسعول كبير في جامعة الامم المتحدة والله قال حا يسوي ليها حاجات تخليكن تتبكن باقي عمركن..اتحنني يا فتحية وارسمي مسعلة وكت ويعقدو عليك
وانتن يا سجم ما عقدوا عليكن صدفة من جمالكن واللا من مالكن..فتحية دي الرفضتهم يملوا قندراني لو عايزة تعرس عريس مشلهت كان هسي بوليداتها
وهنا تدخلت والدة احدي البنات
والله غيرة طولة لسانكن ده مافي حاجة مودياكن لي ورا..اسألي بتك دي مش انا وهي قرينا سوا في فصل واحد اهي بتي عاقدين عليها وبتك تتحنن ولا ضامنة عريس
وفي الخارج كان الحديث الرجالي في ذات الاطار
والله يا علي اخوي فتحية وامها ديل غير يفضحني ما يسون حاجة هسي البت بتتحنن وعريس مافي ..اخوانا مرقوا يفتشوا لي عريس زي العندهم خروفا رايح الله يجيب العواقب سليمة غايتو
و
وللقصة بقية
امسح للحصول على الرابط
بواسطة : هيثم صديق
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019