• ×
الجمعة 29 مارس 2024 | 03-28-2024
بابكر سلك

بوليس سري

بابكر سلك

 19  0  3809
بابكر سلك
*امس كتب الحبيب جدا مزمل عن التقرير السري
*واستصحب معاهو المطار السري
*طبعا التقرير السري هو الشتله التي شتلها جنانية الزمن ده
*الجناينية الشغالين في جنينتنا
*جنينتنا البتدينا الثمار سنويا
*آخر ثمارها اليانعه كانت منقة المدينه
*منقه قدر ده
*قطعه وااااحده
*تخلط منها عصير بالطريقه التنزانيه
*وعصير بالطريقه الانجوليه
*ولما عملنا منها عصير منقه بالطريقه التونسيه
*الجناينيه يادوبك عرفو قيمة المنقه
*ولون المنقه
*والشايل المنقه
*لكن لما قطعنا من شرائح المانجو علي الطريقه الجزائريه
*اشكال وانواع
*منقه العلمه الطوال طوال
*ومنقة الوفاق المدورات مدورات
*ومنقة الاتحاد كلو شريحتين سوا
*لما قطعنا منها شرائح علي الطريقه الجزائريه
*الجناينيه الحسد كتلهم
*ياخ فيهم جنايني بتاع شتل
*بقي يزرع الشتله
*يادوبك عمرها ساعه وطولها سنتمرات
*يجيب سلمو وجبادتو راجي الثمار
*خايف مننا نشيل ثمرها
*وما ناقش اننا ما بنقطع ثمرة شجره
*بنرجاها تنجض في امها
*وبوردولوب تقع براااااها
*اسي منقة المدينه دحين مانجضت في امها وبوردلوب براها وقعت !!!!
*المهم
*تحدث ميزو عن شتله ترشيح الهلال ومازيمبي للبطوله
*والغريبه الاتنين لي اسي مادخلو المربع الذهبي
*حايمين بي بره زي كلاب الجزاره
*وكلب الجزاره تلقاهو حايم بره الجزاره وقايل روحو جوه الجزاره
*كان كسروا لحمه يقول ليهو
*كان قطعوا لحمه يهز ضنبو
*كان كومو كمونيه يلحس شنبو
*ويكمل لحم الجزاره وهو واقف قايل روحو جوه الجزاره
*ومسكين ما ليهو في الطيب نصيب
*المهم
*التقرير قالوا سري
*تخيلوا تقرير سري هم عارفنو
*سري للغايه خلي بالك
*قصة سري دي ذكرتني واحد زمان
*-شغال في المباحث
*الوكت داك المباحث بسموها البوليس السري
*قاموا نقلوهو الدويم
*عشان مافي زول بعرفو من ناس الدويم
*وبي كده يقدر يشتغل صاح
*المهم صاحبنا نفذ النقليه
*مشي واجر ليهو بيت ورحل الاولاد
*في باب الشارع علق لافته كتب عليها
*عبدالله كمال بوليس سري
*الدويم كلها عرفتو بتاع مباحث
*تقريهم السري ده يا مزمل زي البوليس السري بتاع الدويم خلي بالك
*ايها الناس
*خبر الشوم خبر الروم لو اتناقلنو الحروم
*ببقي خبر شوم ما سري
*وخبر روم واضح جدا
*اقول ليك خبر سري يا مزمل ؟؟؟؟
*لكن ما تكلم زول
*جيب اضانك
*قال ليك الجماعه ب ي ات نشس اورلا بببب يسيس أأأ ق
*والله العظيم
*ماتكلم زول يا ميزو
*الخبر ده سري
*لكن يا مزمل
*يظهر انو الكاف خشمو خفيف
*بطلع اسرارو براهو
*اسي في داعي التقرير السري بتاع الهلال بشيل كاس افريقيا ده يطلعوهوا لو ما خشمهم خفيف ؟؟
*غايتو ناس حياتو ديل لسانهم خفيف خلاص
*ما بتبلي في خشمهم صفر يا مزمل
*اقول ليك سر تاني ؟؟؟؟
*كورة سموحه بدون جمهور
*والله العظيم
*لكن اسالني منو المستفيد من القصه دي ؟؟؟
*بالتاكيد سموحه
*لانو الاتحاد المصري لما قرر ان الكورة تتلعب بدون جمهور
*كان عارف انو سموحه ما عندو جمهور
*رئيسهم اهلاوي
*وامين المال زملكاوي
*وحتي الامين العام ود الاسكندريه وود قلبا
*بشجع الاتحاد السكندري
*سموحه يخربها
*جمهور ماعندها
*لكن الجاليه السودانيه في مصر
*اكبر من الجاليه السودانيه في السودان
*لو فتحوا باب الجمهور سموحه بكون غريب في وطنو
*عشان كده الاتحاد المصري المفتح قال تتلعب بدون جمهور
*وعلي كل البره الجزاره كتار
*كلها اسبوع وينكشف السر يا ميزو
*لكن سرك باتع يا اتحاد يا افريقي يا كاف انت يا ولد
*المهم
*ماتعرضنا له منهزه في الاداء محمده
*علي الاقل ابرزت بعض السلبيات
*ويمكننا تلافيها
*فمع جمال لا مستحيل تحت الشمس
*ومع غرزه العلاج ساااااهل
*ومع الشفوت نضرب موعدا بالمطار
*ريحة المطار فاحت
*وعمت القري والحضر
*زي سر الكاف المشرور في اي مكان اي زمان
*ايها الناس
*بالقرآن مريخنا مصان
*وكتائب الردع القرآنيه المريخيه واصله
*شغاله جهرا وسرا
*برضو الصلاه فيها الجهر والسر
*بس ما زي سر الاتحاد الافريقي
*سر الاتحاد الافريقي ده بذكرني سر السماسره
*السمسار يسوقك من الطرف التاني من يدك بعيييييييييد
*ويقول ليك اقعد
*الصلاه فيها الجهر والسر
*الكلام البقولوا ليك كسر
*يقولوا كلو للطرف التاني كسر
*بعد شويه تلقي الدلاله كلها عارفاهو
*وبتعاملوا معاهو كسر
*قصة السر دي ذكرتني صاحبي من الجامعه
*اسمو امير خض
*اسي مفتش ضرائب قدر الكتله
*كنا شله قوامها خمسه وعشرين واحد
*نحب بعضنا حبا جما
*الواحد بحب اصحابو اكتر من نفسو
*امير لو زعل من زول
*بسوقوا بعيد
*ويقول ليهو
*اقول ليك سر !!!!
* انت عارف انا في اتنين بحبهم شديد في الشله دي
*انت وفلان
*بعد فترة اكتشفنا انو شيخ امير قال الكلام ده للخمسه وعشرين عضو في الشله
*ولسه بتعامل علي انو الموضوع سر
*سرك في بير يا كاف
*بير حاضنه الصفر الدولي
*بير الزناطير
*اشهر بير
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*السحاب يتلملم والمطر مابجينا
*الحلم يعظم والحظ مابينا
*الجسد منحول والشمس تهرينا
*نعطش لو لقينا مويه نلقاها بي طينه
*واقفين للمواصلات تزعجنا سارينا
*المسئول المتهنقط ورا السارينا
*رافع القزاز ومظلل خالي الشمس تهرينا
*دايرين يفتحوا ليهو الشارع يا والينا
*تقول مستعجل ماشي يخنق الاسعار وينزلها لينا
*البلد كلها تكورك يا والينا
*يا اسعاف يا كشه يا سارينا
*ونحنا يانا نحنا يا والينا
سلك كهربا
ننساك كيف والكلب بضحك علينا لما نهتف تسقط تسقط الامطار
والي لقاء
سلك
امسح للحصول على الرابط
بواسطة : بابكر سلك
 19  0
التعليقات ( 19 )
الترتيب بـ
الأحدث
الأقدم
الملائم
  • #1
    محمد علي يحيي 09-06-2015 12:0
    استغفر الله العظيم ..ده صحفي معقول.. لا اله الا الله ..ز ذي كلام النسوان في بيت السماية.. الله يقطع اربعاتكم يا قرف... والله المشكلة فينا نحن البنقرأ لكل من هب ودب ..ايه اللي يا مزمز ... مزمزك بلاء يوديك الابيض
  • #4
    عادل بشرى 09-06-2015 03:0
    كدي سيبك من التقرير السري الكلام الفاضي ده شايقك ما جبت سيرة الجماغة والشكاوي لغير الله مزلة الرنك والقضارف والضرب في عطبرة وقنقليز الابيض الحصدو في جنينتكم خبرو شنووو خلبك شجاع واتكام غلى تيمك يا مستجد النعمة...... عجبي ....
  • #5
    essam jeddah 09-06-2015 12:0
    مافي داعي لكسير التلج لمزمل وبعدين شمارات والي الخرطوم دي عليك الله كفاية منها .. تكرار ممل وتقليد لنفس موضوعات مزمل ... حاول تبتكر ياخي انت راجل كبير عشان ما تفضل تدور في حلقة مفرغة .. والله انا كنت معجب بكتاباتك لكنك كترت التكرار وما في جديد مما جعل كتاباتك الأخيرة مملة ومكررة
  • #6
    ابو الياس USA 09-06-2015 12:0
    يا سلوكه إنت مالك بتفنجط من أسع، الهلال عنده تلاته إحتمالات 1: إما بهزم سموحه ويبقي بطل المجموعه وينتظركم في أم درمان 2: إما يتعادل ويخلي مازمبي ينتظركم في الكنغو 3/ وإما ينهزم ويخرج من الأبطال، ودي طبعا بسعدكم كتير؟ خلي عندك شوية صبر لحدي يوم 12/9... وبا الله ما تنسي وصل تحياتنا لحكم الترجي بتاع البلنتي
  • #7
    بابكر عوض الشيخ 09-05-2015 09:0
    ياتنقو نسيت منقة عطبرة الجاية من الباوقة ونسيت منقة شندي الجاية من ود بانقا ونسيت القنقليز حق الأبيض البشبه المنقة لكن مازال طعمه حامض
  • #8
    ود الشيخ 09-05-2015 08:0
    انت انسان مريض الله يشفيك كيف تصف الهلال بالكلب خارج الجزاره والله وصفك ده يدل علي انك جاي من تربيه واطيه ويدل علي انك سخفي وليس صحفي
  • #9
    ابو مازن 09-05-2015 06:0
    بالله عليك الله انت قريت جامعه يا عم تنقو اظنك الخلوه ما عديتا بعدين احترم نفسك تشبه اسيادك بالكلاب ولكن هذا يظهر معدنك الواطي يا واطي.
  • #10
    zain 09-05-2015 05:0
    الزول ابوصلعه الكتابتو زى جري مشى النمله فى الحر دا درس وين وفى اى جامعه
  • #11
    ياسر 09-05-2015 05:0
    انت فيلسوف كبير يا سلك بكرة اكتب لينا عن صفقة والى الدين .وعن والى الجمال الوالى الطوالى .
  • #12
    Hajjam 09-05-2015 05:0
    عليك الله ياسلوكة في كلب اكتر منك؟؟هسع تكشيرتك دي غير الكلب السعران في ليها وصف تاني؟؟طبعا الخلاكم تسعروا هو دولارات العارف عزو...انت وصاحبك (جانا كلب سنونو صفر)..اقصد مزمز ابو الاحقاد كفانا الله شركم........
  • #13
    essam 09-05-2015 05:0
    يا زنطور قوم اركب ليك حنطور وامشى لى جماهيركم واتحادكم الكرور وشفو ليكم نقطة او نتقطين عشان توصلو سيدكم المسرور
  • #14
    بكرى النحاس 09-05-2015 05:0
    اتمنى من كل المعلقين الهلالاب تسفيه هذا الرجل بعدم التعليق على مايكتب فهو لايستحق التعليق على مايكتب والظاهر انه بيفرح لمن ترد عليه لذلك ماتدوه هذه المتعه وقاطعوا كتاباته لانه اقل من ان يترده عليه ربنا يهديه.
  • #15
    natge 09-05-2015 04:0
    المشكلة يا شفت الشتول دة مزروعة فى قيف البحر والطوفان الايام دة هايج وبشيلوا الهدام والهدام رامى الى شمال الوادى يعنى مصر فيها عصر السد العالى لمن يفيض النيل مابقدر يسبتو لانوا بواصل جرينو لحدى البحر الابيض المتوسط يعنى بمر بالاسكندرية والله يستر ناس اولاد فطومة معا اولاد سموحه بيحصل تبخير لمياة وبجنا الخريف وبتصوب المطرة وتانى يبداء موسم زراعة الشتل والحصاد وبالمنسبة دة فريق الرديف بتاع الزعيم الاسمو الهليل يجهز اللعيبة ونسجلوم اقصد نصعدوم وتانى نشيل بيهم الابطال لمرة التانية حصريا للزعيم افريقيا وشكرا ولد الزعيم بن الاحمر
  • #17
    Hajjam 09-05-2015 04:0
    قمت تاني علي السخف والهبالة التي باتت صفة ملازمة لك ياسلوكة....نسال الله ان يشفيك من الوهم....
  • #18
    الامين محمد نور 09-05-2015 03:0
    دايما غرقان في هذه البركى الاسنة يا منحط يا سافل يا كذاب .يا امعة مزمل قال .
  • #19
    عزالدين تنزانى 09-05-2015 03:0
    سلامات ياعم تنقو وين انت من ضربة قوات الامل الجوية اختفيت ومن رشة هلال الابيض لا شفناك لا شفنا عرابك المتاثر بيه .انا اول مرة اسمع لى بواحد شارف على سن المعاش وصلعته ذى استاد النقعة يكون متاثر وتبعى لعرابه مفجر القنابل الفشنك ومسوؤل الاعلام السالب .اول حاجة شوف حالة فريقك الهلكان البترشه جوا وبرا ويستنجد بالاتحاد ويطالبه بالبت فى الشكاوى و المشكلة ان الاتحاد استجاب لطلبكم وقرر اليوم يبت فيها مع العلم ان الامل لديه شكوى شارفت على السنة والاتحاد عامل نايم ما جاب ليها خبر سااااكت وهناك شكوة الاهلى الخرطوم المضمونه نايمه فى الادراج .المهم مبروك مقدماً نقاط الامل وهلال الجبال عليكم وبكرة نشوف البحصل شنو يا عم تنقو
       الرد على زائر
    • 19 - 1
      مصطفي 09-06-2015 12:0
      الشتله السريه دي بتكون جابتامصادر الهلال في الاتحاد الافريقي غايتو مصادر الاتحادالافريقي دي يوم بتكتل ليها زول
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019