• ×
الجمعة 29 مارس 2024 | 03-28-2024
حسن عبدالرحيم

اتحاد عام غرق

حسن عبدالرحيم

 3  0  1672
حسن عبدالرحيم

* الجماعة قعدوا... فكروا.. وخططوا... ودبروا.
* ضربوا اخماس في اسداس.
* لقوا ما في طريقة.. مشوا لست الودع قالت ليهم طريقكم مظلم.. قارئة الفنجان قالت ليهم مستقبلكم سجم ورماد.
* ما خلوا فكي ولا انطون... كلهم قالوا ليهم هالتكم صابة ومصيركم مجهول.
* جابوا كديسة سوداء ما نفع ضب اعور ما في فائدة.. قرد اشول الحال ياهو ذاتو الحال.. ضبحوا خروف اسود برضو زي ما هم ما في جديد.
* سافروا برة السودان لقوا واحد شاطر قال ليهم عايزين النصيحة سكتكم مظلمة وما تخسروا قروشكم ساي.
* جو راجعين ووشهم حاجة تانية ونفسيات تعبانة اها يا جماعة الحل شنو.
* الجماعة ديل البوقفهم شنو لازم نشوف لينا سبب لابد من تدخل سريع عملوا مشاكل ما نفع.. هددوا وما نفذو ما نفع.. شكاوي ما نفع.. كورة واتغلبوا..
* علي جعفر والريح علي ضحايا ما نفع.. اجتماع مع غارزيتو طلعوا بحلة حمد ومرقوا بحلة خوجلي.
* الامور بايظة.. التخديرات للجماهير كملت.
* قالوا ما عايزين المحلي.. نحنا الافارقة وهمنا كأس افريقيا.. وعاينوا لمستوى فريقهم كل واحد بخت يدو في رأسو ويقول الليلة.
* غلبهم يسوا شنو ولا شنو.
* مشوا الاتحاد عاوزين يعرفوا مصير الشكاوي المقدمة فيهم وليهم.. ما لقوا رد.
* طبعاً ناس الاتحاد ديل ما بقصروا قالوا عاوزين يحسموا الشكاوي.
* طيب لو حسموا الشكاوي كلها لصالح المريخ الوضع برضوا ما يتغير.
* اهلي الخرطوم قاعد يتفرج.. وهلال كادوقلي واثق من نفسه.. والامل عطبرة منتظر ورزاق على احر من الجمر ومعاودو الحنين لشباك المريخ واي لاعب عايز يلعب ضد المريخ.
* وهلال الابيض جاهز.. والمريخ في حالة من الخوف.. صاروخ في جمال سالم ويغيرو ويجيبوا زغبير.. ما أصلوا المعز سافر مع المنتخب.
* والمريخ حالتو تحنن.
* والاتحاد في ورطة.. واذا جامل المريخ فانه يقرر نسف الموسم وده دايرو المريخ عشان الهلال ما يشيل الكأس شفتوا الحسادة دي كيف.
* زمااااان، لما كان المريخ متصدر ناس الاتحاد أي شكوى يحسموها بسرعة زي المس كول.
* لكن هسة بقت في الفتى المدلل.
* وامل عطبرة يستعجل في تحديد زمن اعادة المباراة.
* وناس هلال كادوقلي يضحكوا في شكوى المريخ لانهم اتبعوا الطرق الصحية في تسجيل اللاعب والدليل اختياره في المنتخب الأولمبي.
* ولو فرضنا أن هناك خطأ فلن يعاقب هلال كادوقلي بل ربما تمت معاقبة اللاعب.
* مجاملة ناس الاتحاد.. وعدم حسمهم للأمور جعل الفوضى تستشرى في الميادين وده كلو بسبب تهاون الاتحاد في اتخاذ القرارات الحاسمة.
* والله في مباراة المريخ وهلال الابيض لما شفتا ابو جريشة وحاتم عبدالغفار في صورة كده وخلفهم مجموعة من الناس وهم يداهمون الحكم (قلبي قال شح) وخفتا على الحكم المسكين والحكم لو ما كان جامل المريخ كان عملوا ليهو شنو.
* ولجنة التحكيم ساكتة.. وهي تشاهد الحكم معتز طريح الفراش بسبب الاعتداء الذي تعرض له في احد مباريات الدرجات.
* كل الفوضى الحاصلة سببها ضعف الاتحاد العام وانحيازه وتخوفه من اتخاذ قرارات قوية ضد اي عابث او متلاعب.. وهذا التهاون سيحول كرتنا لبورسعيد أخرى.
* وقال عضو بالاتحاد اننا لا نتعرض لضغوط وننفذ القانون.. ده كلام برضو.
* والاتحاد الحمدلله به عدد من الترزية الذين يستطيعون تفصيل القوانين حسبما يريدون.
* ناس الاتحاد قالوا مافي قوة في الأرض تهددنا ونحنا ننفذ القانون.
* طيب من الممكن أن تصدر القوانين التي لا تخر مويه وان يتم اعداد اللوائح حتى تخلو من الثغرات وان توضع الضوابط والقواعد على الورق زي الفل.. ولكن لا شئ يتحرك خطوة واحده للامام لأن السلوك خربان والاداء عرجان.. ومن ثم أي قرار في خبر كان.
* وكل هذه القرارات تعبانة زي دفاع المريخ لما يكون فيه الريح وعلي جعفر.
* والله ديل حلوين حلا.
* وناس المريخ زعلانين ليه.
* بدل ما يهاجموا اللاعبين ديل... حقوا يهاجموا عنبكة.. فريد.. ورزاق.. القائمة تطول واقول واقول منو واخلي منو شدة ما كتار.
* ببساطة كده المريخ ولجت شباكه (11) هدفا.. رزاق عندو هدفين يعني في (9) لاعبين وصلوا الشباك المريخ وديل اتوقعوهم في كشوفات المريخ.
* مش غارزيتو قال الناس حتفرح.
* يعني اي لاعب جاب قوون في المريخ حيسجلو في اطار شعار المريخ للموسم الجديد(تبقى شباكنا خالية منكم يا هدافين).
* ونسينا المريخ عندو كم مباراة من ضمنها مباراة الهلال يعني (الشكية لي اب ايدن قوية).
* والله المريخ حالتوا تحنن.
* والاتحاد عشان يرضي المريخ لابد من نسف الموسم.
* لانوبشكل المريخ ده السادس صعب يلمو فيهو.
* أتمنى ان نرى هيبة الاتحاد وقوته وشجاعته في اعادة الهيبة له..
* وترانا منتظرين نعاين ،،،.
آخر المشاوير
* مباراة الهلال اليوم امام النسور لن تكن سهلة هي من المباريات الصعبة.
* جماهير الهلال ستقوم بوداع اللاعبين احسن وداع.
* الطوفان الأزرق اعدت العديد من المفاجآت قبل سفر البعثة للاسكندرية.
* ياربي الريح علي جعفر يكون أساسيين في مباراة هلال التبلدي.. والله عاوزين نستمتع ونضحك والعجب لو جابو بلة وبخيت خميس دي حتكون حاجة ما تخلص.
* الهلال يعاين وفي انتظار قرار الاتحاد بشأن الشكاوي.
* اليوم يخوض (سعد اليتيم) منتخبنا الوطني مباراته امام الجابون واعتقد ان الكثيرين لا علم لهم بهذه المباراة..
* هذا للتذكير فقط.
*مقال رائع للدكتور الاديب الاريب ود ام درمان الاصيل والهلالي القح دكتور يحي التكينه يزين الصفحة الثامنة لعالم النجوم .
*التعازي للهلالي الغيور سامي الفاضلابي في وفاة ابن خاله.
* ازيك يا الزاكي التجاني وينك مختفي وغائب.
* اليوم متعة الكرة الحقيقية.
* الهلال في احسن حال.
* المريخ مالو تعبان.
الحل شنو.
خبر طازج: اتحاد عام غرق
>>>


امسح للحصول على الرابط
بواسطة : حسن عبدالرحيم
 3  0
التعليقات ( 3 )
الترتيب بـ
الأحدث
الأقدم
الملائم
  • #1
    صلاح محمد حسن الشيخ 09-06-2015 07:0
    ماخليت حاجه بس نسيت حاجه الست نقاط راجعه راجعه بشكوى او اعاده وتعال قابلنى بعد تاخد المعلوم ولو حكمت انت المباراة انتو اغلب نقاطكم بسبب حكام اخر الزمن والدليل اخر لفاء اولو ماعندك عين تشوف اسال طفل ينورك وتاخد الحقيقة الاليمه واغلب بطولاتكم مسروقه فى وضح النهار ولو عندك شحاعه وانصاف الفرق الاخرى قل الحقيقه بدون تجريع وهضم حق الاخرين والشماتها واخريها صغغغغغغغغغغغغغغغغغغغغغغغغغغغر كبير السبب نبتك انت وامثالك الما بغيد الهلال حتى ولو لعب نهائى بطول قاريه الف مره قلوب مليانه حقد استغفروا الله عسى ان يصلح الحال ونحن الصفوة نريد للهلال احراز كاس او اكثر وهدا غاية الامانى وهكدا تشتد المنافسه الشريفه من اجل وطن مسطر بالدهب فى اروقة الاتحادات القاريه والبطولات المحليه لاتودى ولا تجيب واصحى ياتايم وعاين لى غوف للسما طول السنه والعمر كله سترى نجوم متللئه ماليه السما
  • #2
    صلاح محمد حسن الشيخ 09-06-2015 07:0
    ماخليت حاجه بس نسيت حاجه الست نقاط راجعه راجعه بشكوى او اعاده وتعال قابلنى بعد تاخد المعلوم ولو حكمت انت المباراة انتو اغلب نقاطكم بسبب حكام اخر الزمن والدليل اخر لفاء اولو ماعندك عين تشوف اسال طفل ينورك وتاخد الحقيقة الاليمه واغلب بطولاتكم مسروقه فى وضح النهار ولو عندك شحاعه وانصاف الفرق الاخرى قل الحقيقه بدون تجريع وهضم حق الاخرين والشماتها واخريها صغغغغغغغغغغغغغغغغغغغغغغغغغغغر كبير السبب نبتك انت وامثالك الما بغيد الهلال حتى ولو لعب نهائى بطول قاريه الف مره قلوب مليانه حقد استغفروا الله عسى ان يصلح الحال ونحن الصفوة نريد للهلال احراز كاس او اكثر وهدا غاية الامانى وهكدا تشتد المنافسه الشريفه من اجل وطن مسطر بالدهب فى اروقة الاتحادات القاريه والبطولات المحليه لاتودى ولا تجيب واصحى ياتايم وعاين لى غوف للسما طول السنه والعمر كله سترى نجوم متللئه ماليه السما
  • #3
    صلاح محمد حسن الشيخ 09-06-2015 07:0
    ماخليت حاجه بس نسيت حاجه الست نقاط راجعه راجعه بشكوى او اعاده وتعال قابلنى بعد تاخد المعلوم ولو حكمت انت المباراة انتو اغلب نقاطكم بسبب حكام اخر الزمن والدليل اخر لفاء اولو ماعندك عين تشوف اسال طفل ينورك وتاخد الحقيقة الاليمه واغلب بطولاتكم مسروقه فى وضح النهار ولو عندك شحاعه وانصاف الفرق الاخرى قل الحقيقه بدون تجريع وهضم حق الاخرين والشماتها واخريها صغغغغغغغغغغغغغغغغغغغغغغغغغغغر كبير السبب نبتك انت وامثالك الما بغيد الهلال حتى ولو لعب نهائى بطول قاريه الف مره قلوب مليانه حقد استغفروا الله عسى ان يصلح الحال ونحن الصفوة نريد للهلال احراز كاس او اكثر وهدا غاية الامانى وهكدا تشتد المنافسه الشريفه من اجل وطن مسطر بالدهب فى اروقة الاتحادات القاريه والبطولات المحليه لاتودى ولا تجيب واصحى ياتايم وعاين لى غوف للسما طول السنه والعمر كله سترى نجوم متللئه ماليه السما
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019