((()))هلال سموحه :
انه لقاء السحاب ما بين هلال السودان وسموحه المصري
مباراة لا تقبل القسمه علي اتنين
مباراة يجب ان يفوز فيها الهلال ليتصدر المجموعه الحديديه
مباراة تؤكد للمشككين ان الهلال سيظل مع كبار افريقيا
الهلال في حاجة ماسة لمباراة قويه اعداديه قبل هذه المباراة
علي ادارة الهلال ان تهيئ اللاعبين بعيدا عن الشائعات التي تعج بها الساحة
شباب الهلال هم مفتاح النصر في هذه المباراة الهامه
وكم نحن سعداء بعودة جكسا وبويا وجوليام وكيبي
والنصر للهلال
((())) وغارزيتو طابور ازرق :
ويا قرن شطه ما بالغت عديل وجبت للمريخ الكفيه
برشلونه مره واحده والله بالغت
صديقي المريخابي ضرب كفا بكف وقال : اجزم ان غارزيتو هلالابي وطابور خامس ازرق
هزائم وتعادلات وهو وولده قاعدين يلهفوا في الدولارات
ورغم كل ضربات الجزاء ما لاحقين الهلال
قلت ليهو ليه ما تقدموا شكوي ضد هلال التبلدي
لتشابه شعار الفريق بشعار الفريق الاب
فتيمكم خاوي وتموها شكاوي
وقال ايه المريخ نظرته افريقيه
وقال ايه المريخ مشروع بطل قادم
يا جماعه حرام عليكم لقد اضعتم المريخ
و عنكبه انتقم من المريخ وليهو حق
اخوتي التراجع المريخي اصبح مخيفا ومريعا
وجمال سالم طلع ماسوره يوغنديه
ومن رباعية الاولمبي المصري اتفتحت كل الشوارع
ودفاع المريخ هو الآخر مهلهل وقد يجلب فضيحه سودانيه كبري في المربع الذهبي
والجمهور مشاغب ويقذف الملعب بالقوارير
وابو جريشه داير يضرب الحكم
وهمد داير يضرب غارزيتو
ومشجع مريخي داير يضرب الحكم
وكل المريخاب مندهشين لعدم تعاون حكم معهم
والكثيرون يتساءلون اين هي ضربات الجزاء المتفق عليها
فالمريخ مفروض يحصل علي ٣ ضربات جزاء علي الاقل وحسب الاتفاقيه السريه والرسميه
ومن قبل انتقم حسن كمال من المريخ والآن ينتقم عنكبه من المريخ
الدوري الآن في قبضة الهلال مهما شاء ام ابي مزمل ابو القاسم
وهل ياتري ريحة المطار لسع فايحه عند سلك
و دي تجي كيف يا سلك و الحمام ميت ومنتهي
ماذا حدث للمريخ العالمي ايها الاخوه
وما ردة فعل العارف عزو مستريح
هل هي بداية النهايه لهذا الفريق العريق
ام ان المريخ سينتفض ويفوز بالكاس الافريقيه والدوري والكاس وسيكافا والانديه
لا اظن اخوتي فالمريخ بهذا المستوي الهزيل لن يقوي علي مجابهة كبار افريقيا
منظر قبيح لادارة المريخ وهي تهم بمهاجمة حكم المباراة بطريقه همجيه
فلم يتبقي الا ان يضعوا لافته مكتوب عليها (هنا كان فريق اسمه المريخ )
شرف الدين احمد موسي اصبح متخصصا في هزيمة المريخ
((())) مؤامره حمراء في الطريق :
شكاوي بالجمله لعلاج نزيف النقاط
شكوي ضد الامل وشكوي ضد هلال الابيض
وما لم يتحصل عليه المريخ باقدام لاعبيه قد يتحصل عليه عن طريق العارف عزو مستريح
وقد فات علي المريخ ان هناك مباراة مؤجلة مع الامل عطبره
وان هناك ٣ نقاط قد يفقدها المريخ
الامين عام لنادي الهلال جذر من مؤامره خطيره يحيكها المريخ في الاتحاد العام
والله يستر
محمد حسن شوربجي
فبفضل الله ثم بفضل المريخ العظيم أصبح امثالك صحفيين.
نهاية المريخ الفريق العريق (كما ذكرت) تعنى إغلاق باب رزق لك ولعيالك.
فأرفعوا أيديكم أن يحفظ الله المريخ العريق العظيم.
وربنا يديم عليك المريخ الموضوع الدائم لأغلب ما تكتبه.