شاهد مباراة الهلال والنسور واحصل على (دهشة) وطلب سمك (مجانا)
محمد عبد الماجد صحيفة الموسم
"""""""""""""""""""""
مباراة الهلال والنسور سوف تعيد (الصفوف) للاستادات..وتاني ح يرجع قصب السكر، والقنقر، ويا عسكري الزول دا ما واقف في الصف
""""""""""""""""""""""""""""""""
مباراة الهلال غداً أمام التطواني.. لن نطالب بالنقاط فقط ..ولن نسأل عن الأهداف وحدها..مطامعنا بقت أكبر
""""""""""""""""""""""""""""""""""
عشان كدا كانت المتعة أكبر، وكان (الشاي) مدور في استاد الخرطوم من القون للقون
""""""""""""""""""""""""""
عاوزين مع (النتيجة) العرض..عاوزين مع (الاهداف) الأداء ..تاني ما بنقبل ليكم بي هدف وهدفين
""""""""""""""""""""""""""""
في البداية كنت عاوز اختصر ليكم الحكاية في (الدهشة) فقط.
لكن عرفتكم ح تقولوا لي نحن (الدهشة) نعمل بيها شنو مع (الفلس) دا؟.
الفلس لمن يدخل على(الأفكار) بخليها زي (العضام) لا جدوى منها.
العضام الزمن دا ذاتها بقت مشكلة.
عشان كدا، قصدت أن أدخل ليكم مع الدهشة (طلب سمك)، حتى أحفز فيكم الرغبة وأحرضكم على مشاهدة مباراة الهلال والنسور.
تاني مباريات الهلال لو ما مشيتوا ليها الاستاد ..ح اطلّعوا ليها (التلفزيونات) في الحوش من عصراً بدري.
أعرف أن مشاهدة مباراة الهلال والنسور ما محتاجة ليها (طلب سمك)، ولا عاوزة ليها (تحريض)، فهي أحلى من كل (الأسماك).
إن شاء الله الكهربة ما تقطع!!.
لكن قصدت أن أقول إن الفرجة في المباراة بتجيب احساس (طلب السمك)..باعتبار أن (الدهشة) عندما تمتد بتجيب ليها (سمك).
الموضوع فيه سمك.
عليكم الله اطلعوا لينا شوية من القرع والعدس والبامية المفروكة.
المهم، ومهم جداً أن تشاهدوا مباراة الهلال والنسور، إن شاءالله مقاطع منها، شاهدوا ما تيسر.
ح تطلعوا بالدهشة وطلب سمك...غير (السلطات) والموية الباردة.
ح تتملوا بالدهشة ..لمن (جركاناتكم) تدفق (لبن).
مباراة الهلال والنسور من أهم مكاسبها غير النقاط الثلاث، وهذا أمر معتاد، وغير العرض الرائع إنها أعادت الجماهير.
رجعت الناس للكورة.
وخلت الجمهور كل مرة يعاين في الساعة، خايف الزمن ينتهي.
اذا استمر الهلال بهذا الشكل والأداء، الجماهير ح تدفق في (الكباري).
وح نسمع تاني بي إن كوبري الحلفاية مقفول.
ليه مقفول؟.
عشان الهلال عندو مباراة الليلة.
الكباري كلها ح تتقفل - الفتيحاب - المنشية - توتي- حتى الكباري التي هي تحت الإنشاء.
والهايسات ح تضاعف التذاكر من الحلة للاستاد والعكس.
مباراة الهلال والنسور سوف تعيد الصفوف الى (الاستادات)..وتاني ح يرجع قصب السكر، والقنقر، ويا عسكري الزول دا ما واقف في الصف.
لو ضمنا عروض(سينمائية) بهذا الشكل، ح تدفق شوارعنا بالفرح ..وح يكون فوق رأس أي بيت علم للهلال.
الشفع ح ينتشروا في (الأزقة) وهم يلبسون شعار الهلال.
والعصاري والأماسي ح تزين بالجلاليب البيضاء مكوية.
الليلة وين من العصر كدا؟.
والله الهلال عندو مباراة.
لاحظنا في السنوات الأخيرة، إن المدرجات أصبحت خالية ...خاوية إلّا من بعض الناس.
حتى الذين يدخلون مباريات الهلال مع تعصبهم وحبهم للهلال يظلوا في حالة سكوت دائم (90) دقيقة.
التسالي الناس خلوه في المباريات.
ح ترجع الحركة تاني والونسة في المدرجات ..وح نسمع (ثرثرة المعالق) من جديد في استاد الهلال، وأينما يلعب الهلال ويوجد.
رجع لينا العرض الجميل، واللعب الممتع، وبقت المدرجات تتضحك وتفرح وتشجع.
هذه أشياء كانت غائبة عننا.
لينا زمن من الحاجات دي.
الموضوع ليس قصراً على شباب الهلال وحدهم الثعلب وبشه الصغير ومحمود محمد محمود والشعلة..الموضوع أكبر من كدا.
الروعة بدأت من أهداف نزار حامد البتشق الليل.
وأقوان اندرزينهو التى تأتي من (كنبتو).
الموضوع بدأ من بشه الكبير وكاريكا الفنان ..ومكسيم الحارس الذي جعلنا نطالب أن يلعب الهلال بدون دفاع.
ولا محتاجين لي مدافعين في وجود مكسيم.
لكن دعونا نقول للحق إن شباب الهلال أو رديفه أمام النسور قدموا الأداء الجماعي والعرض الكلي.
لخصوا الحكاية كلها في الفريق ككل.
عشان كدا كانت المتعة أكبر، وكان (الشاي) مدور في استاد الخرطوم من القون للقون.
مباراة الهلال والنسور وضعت لاعبي الهلال أمام فرضية واحدة، وهو أن يقدموا لنا عرضاً مماثلاً في مباراة الهلال والتطواني.
مباراة الهلال غداً أمام التطواني لن نطالب بالنقاط فقط ..ولن نسأل عن الأهداف وحدها.
مطامعنا بقت أكبر..عاوزين مع (النتيجة) العرض ..عاوزين مع (الأهداف) الأداء ..تاني ما بنقبل ليكم بي هدف وهدفين.
ما تمّوها لينا (كشافات)، وإضاعة زمن ..ودخول وخروج للنقالة.
ألعبوا لينا كورة.
اتحرروا من الضغوط ، الجماهير منتشية قدموا العرض الجميل، الأهداف بتجي واحدة.
الجمهور بيسعدها الأداء قبل الأهداف.
عشان كدا بكرة متعوا الجمهور، اشبعوه بالأداء الرائع والجميل.
اجبروهم على التشجيع ...الجماهير ما عندها مشكلة اذا انتشت ح تشجع بقوة.
ح تشجع (90) دقيقة.
مباراة الهلال والنسور أكبر خدمة قدمتها للهلال هو التدافع الكبير الجماهيري الذي سوف يكون في مباراة الهلال غداً أمام المغرب التطواني.
عرض الهلال وروائعه التى قدمها أمام النسور سوف تكون سبباً في العودة لاستاد الهلال.
لذلك على لاعبي الهلال أن لا يردوا هذه الجماهير ولا يرجعوها إلّا بعرض أروع وأداء أجمل.
خلوهم يطلعوا من الاستاد ما عندهم سيرة غير المباراة.
نسوهم هموم المعيشة ..وقروش المدارس وقطوعات الكهربة والموية وقدموا لهم عرض ينسيهم ذلك.
نتوقع أن يكون الأداء جميلاً وأن يكون الحضور الجماهيري.
نعرف أن إمكانيات لاعبي الهلال كبيرة، اذا تخلصوا من الضغوط ولعبوا من أجل أن يمتعوا هذه الجماهير.
تسجيل الأهداف سوف يكون أمراً سهلاً ...والخروج بالنقاط الثلاث ليس أمراً عسيراً اذا قدم الهلال العرض الرائع.
عندها سوف تشجع الجماهير وسوف يكون أي مشجع في استاد الهلال بمدرج كامل.
فقط مطلوب (الأداء الجميل).
والأداء الجميل لا يأتي إلّا بالروح القتالية، اذا غابت الروح فلن ننتظر أداءً جميلاً.
ومثلما تصدر لجنة المباراة مجموعة من اللوائح والتعليمات تنصرف نحو أسعار التذاكر وزمن بداية المباراة وإغلاق الأبواب...نحن برضو عندنا لوائح.
عاوزين من الجماهير تشجيع (90) دقيقة ..ما تنقدوا لاعب..ولا تحبطوا زول...(الاحباط) بنتقل من مشجع لي مشجع ..ومن مدرج لي مدرج لمن يعم الاستاد كله.
وينعكس بعد ذلك على أداء اللاعب في الملعب.
الأداء الرائع والجميل ببدأ من (المدرجات).
ناس مساوي ومكسيم وكاريكا ونزار وبشه سوف يكونوا في الموعد.
صلاح الجزولي ذاتو ما ح يخذلكم.
المباراة في ظني سوف تكون مباراة صلاح الجزولي.
انتظروا صلاح الجزولي غداً، سوف يكون في الموعد؛ لكن بعد ما تساندوه وتشجعوه وتقيفوا معاه (90) دقيقة.
ما تقصروا مع هلالكم.
اعلموا أن طريق البطولة يمر يشترط الروح الرياضية، والروح القتالية في نفس الوقت.
.........
الكهربة قطعت.