• ×
الجمعة 29 مارس 2024 | 03-28-2024
محمد كامل سعيد

عندما يعتقد الطبّال أن جميع الذمم تُشترى بالمال..!!

محمد كامل سعيد

 36  0  4332
محمد كامل سعيد
عندما يعتقد الطبّال أن جميع الذمم تُشترى بالمال..!!

* أبدأ بالحمد لله والشكر لله على نعمه التي لا تحصى، وأعلن من هنا أن قناعتي بمقولة (دوام الحال من المحال) ستبقى راسخة ما حييت.. وقديماً قالوا لكل مجتهد نصيب، ولو دامت الشهرة، التي تجعل صاحبها يفتري على الناس، لغيرك لما آلت لك..!!

* قبل شهور عديدة تلقيت اتصالاً من الأخ العزيز راشد مكين المقيم بأمريكا حدثني خلاله عن تجاوزات عديدة وإساءات توجه إلى شخصي في العديد من القروبات التي انتشرت خلال الفترة الأخيرة عبر الفضاء الإسفيري..!!

* وطلب مني الدخول، ولو باسم مستعار، حتى أرد أو أوضح للجميع حقيقة ما روج له بعض ضعف النفوس عني ولونيتي الرياضية وحقدي وكرهي و.. و.. الخ.. في بادئ الأمر رفضت الفكرة لأسباب عديدة احتفظ بها لنفسي..!!

* وقبل أيام معدودة قررت الدخول لأحد القروبات، أحتفظ باسمه لنفسي وحفاظاً على المجموعة الرائعة التي تنشط من خلاله بحثاً عن المصلحة العامة.. واستجبت لرجاءات إخوة أعزاء أكن لهم كل التقدير والاحترام ودخلت باسمي..!!

* انضممت إلى القروب يوم الثلاثاء وخرجت منه لجمعة بعد جدل غريب من أحد الأعضاء، لن أمنحه شرف ذكر اسمه في هذه المساحة، ذلك بعدما انحرف الحوار عن مساره وثبت أن كبير الطبالين قد تدخل وشرع في ممارسة هوايته المفضلة..!!

* نعم لأنه لا ولن يرضى بالاعتراف بالرأي الآخر فقد قام بتمليك (حووصة موديل 2015) بعض المعلومات البائسة عني، وعلى ذات الطريقة التي يمارسها مع الشرفاء من الأقلام المريخية القوية بمحاربتهم وحرمانهم الكتابة في الصحف السيارة..!!

* اتهمني (حووصة موديل 2015) بالانتماء للهلال وقال إن معلومته تلك توصل إليها من والدي كامل سعيد شخصياً..!! ولا أدري كيف يريد أن يقنعني ذلك المخدوع أن له علاقة بوالدي لدرجة أنه علم منه حقيقة انتمائي..؟!!

* ثم عرج للقول إنني تعرضت للطرد من الصدى لأني كنت لا أقوم بواجبي في عملي، وهنا فإن الله هو الشاهد لأنه إذا كان يقصد إهمالي في عمل آخر غير المهنية فإنه يكون قد أصاب لأنني رفضت القيام بدور (الموصلاتي)..!!

* نعم لقد رفضت الانصياع لأوامره بنقل تفاصيل ما يدور عنه بين الزملاء مقابل حفنة دنانير في حين وافق غيري على القيام بدور (حووصة) كل في مكتبه ينقل إليه الونسات التي تدور بين الزملاء مقابل الحصول على الأموال..!!

* الغريبة أن سياسة المطبل الأكبر ظلت كما هي منذ عشر سنوات لاعتقاده أن استجابة ضعاف النفوس لسياسته تلك والمتعلقة بالإغداق على المتآمرين بالأموال هي الأنسب واعتقد واهماً أنه بالمال يمكن أن يشتري كل الناس..!!

* لا والله لست من ضعاف النفوس أولئك الذين تنتهي أعمارهم الافتراضية بمجرد الانتهاء من مهمتهم وساعتها يكون النسيان والاحتقار هو النهاية الحتمية لهم والأمثلة التي أمامنا كثيرة ولا حصر لها..!!

* تخريمة أولى: اليوم شرعنا بتوضيح جزء من الأحداث لتكون مقدمة كان لابد منها على أن نبدأ من الغد الدخول في تفاصيل الأكاذيب التي روج لها المُطبّل الفرحان وصدقها وصار ينشرها حتى في القروبات..!!

* تخريمة ثانية: إذا كان هناك كلمة شكر لابد أن نبعث بها للإخوة الأعزاء المريخاب الأصلاء حسام، وعلاء، وبازرعة، ومجاهد، وحافظ، وأحمد ود المهندسين، وراشد وغيرهم من الذين لم تسعفني الذاكرة بأسمائهم..!!

* تخريمة ثالثة: اعتباراً من الغد سنبدأ سرد تفاصيل القصص المثيرة عن خروجي من الصدى وانتقالي إلى الأهرام اليوم وما كان يحدث من مؤامرات ودسائس ضدي وضد العديد من الزملاء الشرفاء..!!
امسح للحصول على الرابط
بواسطة : محمد كامل سعيد
 36  0
التعليقات ( 36 )
الترتيب بـ
الأحدث
الأقدم
الملائم
  • #1
    hf, uf] hggi 06-09-2015 10:0
    السلام عليكم الاخ محمد كامل انا كنت بقراء ليك لكن توقفت لسبب انك لا تعرف غير الانتقاد غي النقد الرياضي ياخي عمر النقد الرياضي لم يكن هو فقط اساءه واظهار عيوب اللاعبين فقط ياخ من العدل في النقد الرياضي انك تظهر المساؤي والمحاسن للشخص الانت داير تنتقده يعني لو احسن تقول احسنت ولو اساء قل اساءت لكن انت ما عندك غير اساءت ياخي كلتشي احسن مهاجم مره علي المريخ بدليل عدد الاهداف التي احرزها للمريخ في الفتره القصيره التي قضاءها فيه مع ذلك لم نراك الا مسئاء له حتي لو جاب 3 اقوان في مباره وكان احسن زول برضو بتنتقده تقول بطئ اناني وغيرها عشان ما تقول الليله كان احسن بعدين كل الصفيين الشفناهم في الدنيا بيطوا القاب جميله للعبي الفريق من باب رفع المنويات الا انت ياخ ما بتعطي زول لقب الا اسواء الالقاب مااذكر اني قريت ليك اشاده باحد في المريخ طوالي اساءت اصلو نظرك ده ما بقع في حاجه سمحه
  • #2
    واحد كدة 06-09-2015 08:0
    الراجل ده مظلوم وعايز يبري ساحته ده كل ما في الموضوع انتو أسي الواحد فيكم لما يبهتو بي كلام ما فيهو برد ولا بسكت
  • #3
    ياسر الشيخ 06-09-2015 01:0
    بيان من قروب ملتقى الصفوة الرياضي


    قال تعالي:

    بسم الله الرحمن الرحيم
    "يا أيها الذين آمنوا إن جاءكم فاسق بنبإ فتبينوا أن تصيبوا قوماً بجهالةٍ فتصبحوا على ما فعلتم نادمين"

    صدق الله العظيم

    يتابع كل الصفوة الكرام ومنذ زمن بعيد تحول مقالات الصحفي محمد كامل سعيد إلى ما يشبه العداء المستحكم ضد المريخ وهو الذي يدعي ولاءه للنادي ولبس ثوب الخائف على الكيان والمصلح الأوحد له وذلك من خلال ذرع الألغام في مقالاته تماشياً مع قول أمير الشعراء أحمد شوقي:

    برز الثعلب يوماً في ثياب الواعظينا ..
    فمشي في الأرض يهدي ويسب الماكرينا ..

    ولكل ما سبق ، طلب أعضاء قروب ملتقى الصفوة دعوة الصحفي محمد كامل للانضمام حتى يستطيع الأعضاء التحاور معه مباشرةً وتحديد أسباب عدائه المستحكم للمريخ حيث انه لا يرى فيه شيئاً جميلاً ، وبالفعل تمت دعوته عن طريق إخوة كرام فاستجاب وكان ذلك يوم الثلاثاء 2 يونيو ، والحقيقة أنّ منذ لحظة انضمامه حدثت حاله من الهرج باعتباره صحفي (مشاتر) ، واعُتبر ذلك الجدل الذي حدث بمثابة إستفتاء أصغر لمكانة هذا الصحفي المرفوض لدي الصفوة.

    تم اقتراح حوار معه وبالفعل تحاور معه كل الأعضاء بشكل حضاري حول نهجه التحريري العدائي ولا ننكر أنّ بعض الأسئلة جاءت ساخنه جداً قابلها بكل برود ، وجاءت إجاباته تحمل استعلاءً وخبثاً غريباً وايحاءً بأنه حامل أختام الإصلاح المريخي الأوحد دون سواه ولم يخرج الجميع من هذا التحاور سوى بمزيد من الانطباع السلبي تجاهه مما زاد عليه حدة التهكم والسخرية من مقالاته ولم يثبُت لنا اننا نتحاور مع شخصيه اعلاميه بل مع رجل يحمل حقداً يبثه علينا من خلال إصداره هلاليه لا تتواني في إظهار عدوانها للأحمر ورئيسه ومجلسه وكتّابه وجمهوره ..

    توجه إليه أحد الإعلاميين الصفوة المشهود لهم بالكتابه الصادقه ببعض الاسئله رد عليها محمد كامل بكثير من الاستفزاز مما جعل ذاك الصحفي الشاب أن يرد عليه بذات بأسلوبه وهذا اثار الكثير من الأعضاء الذين لم يتقبلوا أسلوبه الغير حضاري وتوالت عليه الاتهامات بأنه هلالي مندس وهذا سبب فصله عن العمل بالصدي والاهرام اليوم فلم يكن لديه تجاهها دفوعات سوى قذف الناس بالباطل وأنهم مأجورين ومدفوعون من جهات يعلمها هو ، إلى أن تم التصويت بالإجماع بإزالته وقد كان ذلك يوم الجمعه 5 يونيو ومنذ ذاك الحين اعتبرنا انّ الموضوع قد سلف وانتهى إلى أن جاء علينا الصحفي محمد كامل في مقاله بالصحيفة الهلاليه اليوم الاثنين 8 يونيو يحدثنا بنبأ (كذباً) عن مغادرته لقروب ملتقي الصفوة بسبب تحريض أحدهم ضده مُصيباً قوماً كرام بجهالةٍ واعتبر بعضنا طبّالين يقف وراءهم أحد اعلاميي المريخ الأفذاذ وهو لا يدري بذلك إن تطاول عليه فسيصبح من النادمين ، وحدثنا عن آخرين (أُصلاء) لأنهم التزموا الصمت والحياد ، واخبر قراءه عن نية سرده في حلقات قادمة أسباب تركه العمل بصحيفتي الصدي والأهرام اليوم والعقبات التي اعترضت مسيرته الصحفيه بهما هو وبعض زملائه ولا ندري ما سبب ذلك وما علاقة القروب بهكذا روايات من بنات اوهامه يريد بها أن يشف غليلاً كامناً مستعراً داخله مستخدماً هذا القروب الصفوي كمخلب قط وهو الذي كشف زيف ادعاءاته وزيف مريخيته حيث فشل فشلاً ذريعاً من خلال التحاور معه في تقديم أي دليل على عدد من الموضوعات التي أثارها في مقالاته مثل غضب الكابتن علاء يوسف بسبب انضمام اللاعب الكبير عمر بخيت للمريخ كما يزعم ومثل قيمة صفقة تجديد عقد المصري أيمن سعيد والتي زعم أنها بلغت مليون دولار ، كذلك أسباب إثارته الفتن بين لاعبي المريخ ... إلخ ، وطفق يتحدث بهتاناً عن تبعية المريخ للهلال بسبب تسجيله عدد من لاعبيه وأراد أن ينفث فينا سموم ميوله الزرقاء ولم يبد لنا تبريراً مقبولاً عن لفظ كل الصحف الحمراء له واتجاهه للكتابه بنهج تحريري تحريضي ومدفوع وممسكاً العصا من نصفها في صحيفة زرقاء متطرفه تجاه المريخ ، كشفناه أمام نفسه وعرينا حقيقة زرقته عندما قال له أحد الأعضاء الكرام انّ والده (كامل سعيد) يشهد على هلاليته ما جنّ جنونه وكال السباب إلى أن تمت إزالته ..

    عليه ، نحن قروب ملتقي الصفوة الرياضي والذي يضم عدداً مقدراً من المريخيين الكرام من شتى المناحي نكذب كل ما جاء تلفيقاً وبهتاناً في مقال هذا الصحفي الأزرق وكل ما سيأتي تباعاً في هذا الخصوص ليس إلا من باب تخمينه الشخصي الموهوم وأنّ القروب برئ من كل ما قاله وسيقوله وأنّ كل الأعضاء مريخيين (اصيلين) وما قاموا به تجاهه ليس إلا من باب الحب والدفاع عن كيان المريخ وليس من باب التحريض كما أراد أن يشيع كذباً .. ونرد عليه بنفس أبيات أحمد شوقي:

    فأجاب الديك عُذراً يا أضلّ المهتدينا


    ما زلنا نحتفظ بكل السباب الذي كاله هذا الصحفي بالقروب وكذلك نحتفظ بكل ما أرسله في الخاص من سباب واتهامات لمن يعتقد أنهم مُحرضون ونقول له:

    1. ارفع قلمك المسموم عن المريخ.
    2. كُف عن التلفيق والتخمين المريض

    إنهم قالوا وخير القول قول العارفينا..


    وعشت يا مريخ موفور القيم ،،
    والله من وراء القصد ..


    إشراف قروب ملتقى الصفوة الرياضي
       الرد على زائر
    • 3 - 1
      بكرى النحاس 06-09-2015 11:0
      اشك ان الكاتب الكلام ده كاتبه على لسان مزمل ابوالقاسم ياخى اتقوا الله وكفانا عبث ممكن تحدثنا عن اسباب ترك عبدالمجيد عبدالرازق الله يرحمه للصدى ولااظن انكم سوف تشككوا فى مريخيته ايضا دى كلها اقلام محايده لايمكن ان تكمموها باساليبكم الرخيصه ...
  • #4
    جلابي الدوحة قطر 06-08-2015 11:0
    نحن علينا بالظاهر والباطن يعلمه الله ...والظاهر كل مقالاتك تهاجم المريخ في شخص مزمل واي كان الخلاف بينكم فالمريخ انقي واطهر من مهاتراتكم وتصفية حساباتكم ..وكتبت اليك مليون مره بانك تضمر لشخص ما في قلبك ولا تستطيع البوح بذلك لذلك تحاول تحطيم فريق كامل من اجل تصفية حساباتك ..وللاسف يا سيد لقد سقطت من حساباتنا من مده طويله وازيدك بان السيد مزمل ابو القاسم ان مس المريخ سيسقط من حساباتنا نهائيا فلا كبير علي المريخ ..وما تحمله بداخلك من ميول معتم لانصياعك وراء احقاد تخص شخص وليس كيان ..ولكن حاربت الكيان في صورة الشخص ..وما بينكم لا يعنينا بل يعنينا المريخ ..ولم تكن بحاجه للاشتراك في منتدي لتعرف راي الجمهور بك فكما اري هنا الكل يكتب وبصراحه في شخصك حتي اخوتنا الهاالاب قالو الراي الصريح وحذروك من الانزلاق وراء الاحقاد والانتقام ..
    اتقو الله انت ومزمل وغيركم اتقو الله وحكمو ضمائركم واعلو صوت الحق وسطرو ما يفيد ..الي متي نظل نلهس وراء الفشل ..
       الرد على زائر
    • 4 - 1
      بكرى النحاس 06-09-2015 04:0
      كلام اجمل من جميل ويعبر عن ادراك وفهم احييك ياخى جلابى اتمنى ان نستمر فى السير على هذا المنوال وشكر
  • #5
    كفاح علي ابو القاسم 06-08-2015 11:0
    في الحقيقة انا مريخي الهوى واعشق الكيان حد الجنون ولا علاقة لي بالاداريين او الصحفيين ولا اتمنى ان تكون لي معهم علاقة.
    الصحفي محمد كامل رجل صاح في الزمن الغلط هذا الزمن الذي تفرعن فيه امثال مزمل طريد الخليج هذا الشخض لا يملك اي مؤهلات صحفي محترف ومحترم يميل دوما للهمز والقمز والاساءة واساليب المشاطات والقوالات .
    الحرمان والعدم مشكلة وعندما يجري المال في ايدي المحرومين هكذا يتفرعنو
    ولولا الحماية التي يجدها من ولي نعمته الوالي والذي ييجد الحماية بدوره من السلطة التي جعلت البغاث من الطيور تهاجم الاسود الضارية ولكن حتما لكل بداية نهاية .
    وانا اتعجب لاهلي من القبيلة الحمراء دفاعهم عن هذا النكرة والذي لم ياتي البلاء والانهيار والضعف والهوان للزعيم الا بعد طهوره في مسرح احداثه ولكن ان غدا لناظره قريب واصل اخي محمد كامل واضرب الجرذان حتى تعود الي جحورها خائفة ومرتعدة.
  • #6
    سامى 06-08-2015 09:0
    يا جماعة..هو الانتماء للهلال االعظيم تهمة..الجماعه واقعين فى محمد كامل هﻻﻻبى هﻻﻻبى..اريتو كان هﻻﻻبى...وما كان مع الفئة الباغية..
    نحن نتشرف بيهو..وكنا عملنا ليهو تمثال فى مدخل النادى..وهسع لو عايز يتوب ويترك الصهاينة..ويدخل فى ملة من رضى عنهم ربهم فمرحبا به..
    انا بعتقد الهﻻل اصﻻ يشبه محمد كامل..ﻻنه دوغرى ونضيف ونزيه..مرحبا بالكاتب الصنديد.
    رسول الله صلى الله عليه وسلم رفضه اهله..اهل مكه..واحتضنه الانصار..
    ان بقيت على جماعتك..فانت محمد كامل..الكاتب الرائع ايضا..نحبك دونهم..فاصبر واحتسب
    على ظلم اولى القربى..فهو اشد الظلم واكثره ايﻻما..
    وان رايت ان تتحول..وﻻ اظنك فاعﻻ ..فالدار ترحب بك
    نعرف انك تحب الاحمر..حبك اياه يجعلك تنتقده..ولكن من يفهمك؟
    اصبر عليهم..فهم مخدرين..لعل الله ان يخررج من اصﻻبهم من يفهمك ويقدرك
       الرد على زائر
    • 6 - 1
      ياسر الشيخ 06-09-2015 12:0
      محاضره جميله و بتوري انك طوالي بتحب تقرا للحق و الزول البنور البصيره بي العيوب ... لاحظ للعيوب.. بالله انت و معك كل هلالابي يشكر ود سعيد ... ادونا كاتب هلالاي واحد يكتب عن الهلال كما يكتب ودسعيد عن المريخ...

      عشان ما تلعبو لينا بي البيضه و الحجر و تعملو لينا فيها صحابه و بتحبو الصراحه و الوضوح و الصدق و الكلام الرنان ده...
  • #7
    عماد محمود 06-08-2015 06:0
    اشتهرت با الاساءة للمريخ ده نهج بيسير عليه اى ناقص مهنيه الليله جابت ليه مكنه جديده فى ناس برشوك وقاصدنك يا شيخ روح .
  • #8
    موسى عمر 06-08-2015 04:0
    الفيلم دا طويل جداً جداً
    إسمه الطبال والعارف عزو مستريح
    بس ماعايزين نهايته تكون سريعه كدا .. لسه كمان على الأقل 5 سنوات تانى على الأقل حتى يقضوا على الأخضر واليابس فى الوصيف
    مالك مستعجل كدا يا محمد كامل أخوى ..
    الله يعينك
  • #9
    mohad 06-08-2015 01:0
    الآن الامور كلها وضحت وضوح الشمس محمد كامل رغم كتاباته الغريبه ونشاز آرائه التى اراد بها الدخول فى مهاترات مع الصحفيين الكبار ولكن لم يجد من يعبره وذلك كان اقصى ما يتمناه ولكن خطته فشلت وهذه الخطه ((ب )) يجيب لنا مواضيع فى قروبات خاصه كان يفترض ان ترد عليهم فيها هناك لكن بدون اى مناسبه ولا مبرر عاوز تفتح نافذه هنا وبرضو ما حا يعبروك ... وبعدين انت لو صحفى صحى العلاقه شنو بين انك تكون هلالابى ولا مريخابى ؟؟
       الرد على زائر
    • 9 - 1
      فيصل 06-08-2015 03:0
      خليك صادق مع نفسك يامهاد انت هسي ماقريت العمود بتاعو ده انا متاكد اكثر صحفي يجد قراء في السودان لمصداقيته وعنفوانه
  • #10
    Mars 06-08-2015 12:0
    هذا هو حال السودان كل من يختلف مع الآخر التهمة جاهزة

    1-الحسد 2-مصلحجى 3-مؤتمر وطنى 4- أمنجى 5-غواصة 6-طابور خامس 7-نسوانجى8-شفعجى 9-شاذ 10-سكرجى 11-مسطولجى لذا لن تقوم لنا قائمة
  • #11
    صالح عثمان سعيد 06-08-2015 12:0
    اديهم على راسهم وافضحهم لانهم مفتكرين سكوتك ضعف شربهم نفس السم المتعودين يسقوه للناس الغلابه المحترمين ديل ناس ما بنفع معاهم الا الضرب فوق الحزام تحت الحزام ما يهم المهم تورينا كل البحصل في صحف الغثاء والقرف والرديح .
  • #12
    ممدوح عبد الوهاب 06-08-2015 11:0
    الاستاذ محمد كامل لك التحيه
    بصراحه انا من اشد المعجبين بعمودك وعمود الاستاذ شجرابى ولا اعرف هل انت هلالابى ام مريخابى لانك تضع يدك على الجرح وتتحدث بكل شجاعه وتتكلم بشفافيه ودائما هناك اعداء للنجاح فنصيحتى لك دعهم يتحدثون لانهم لن ينالو منك شيئا واذا بدات الرد عليهم تاكد انك قيمتهم وهم لا يستحقون ذلك اكتب عن المفسدين وعن الذين يداهنون وسوف يرجفون من قلمك
  • #13
    نعم 06-08-2015 11:0
    استاذ محمد كامل هنالك اشياء لابد للرجل عن يتحملها في سبيل عملو وقناعتو بنفسو وعشان خاطر ناس غالين بالنسبه له ،اخي انا حسب تحليلي لمازكرت بان الشخص الذي هاجمك وقام باتهامك باشياء غير حقيقيه شخص لا يملك اي معلومه عنك ولا عن عملك الصحفي شي وانا اشك في انو هلالابي وداير يكشف معلومات عن تجربتك مع الصدي والاسباب التي ادت الي ذهابك من الصدي ..اخي انا واحد من المريخاب المتعصبين واري في المريخ كل شي جميل ولا اشك في انك مريخابي لكن مهنتك هي التي تجعلك بان لا تتعامل بالعاطفه مع الاشياء عكسنا تمامآ ..اخي ارجو من حضرتك بان لا تفسح مجال لاحد لا يعلم الفرق بين الحق والباطل في كتاباتك ..واعلم جيدآ اخي محمد اي حرف تقوم بكتابتو اتجاه هذا الشخص قد يرفع من اسهمو وبلا شك يتباهي بذلك 'لذلك ارجو منك وحفاظآ علي مكانتك في قلوب اعزاء كثر بان لا تتطرق لمثل هذه التفاهات مستقبلآ.
    وربنا يعينك في مسيرتك الصحفيه
  • #14
    Idris 06-08-2015 11:0
    من كتاباتك واضحة انو عنو عند مشكلة شخصية مع بعض إعلامى المريخ مسألة انك بتكتب بحيادية مافى واحد بصدقها وثانيا هل من الزوق وآداب الزمالة مهم مدى الاختلاف أن تعنت زميل بالطبال كنت اتمنى أن ترتقى فى اختيار كلمات مناسبة
  • #15
    ابو محمد 06-08-2015 11:0
    الأستاذ/ محمد كامل،

    تحية يسبقها احترام،،،

    أضم صوتي للأخوة المعلقين الذين نصحوك بعدم الرد على الشامتين والحاقدين الذين هم من جرفوا الصحافة الرياضية إلى هذا المستنقع الآسن. دعهم ولا تلتفت إليهم، أسفهم ليكون السفهم ردا فاحما لهم. كما أنصحك بعد الاهتمام بتعليقات بعض المتعصبين من أبناء جلدك المريخاب.
  • #16
    البازووكا 06-08-2015 11:0
    نحن المريخاب مقتنعين انك مريخابيى شريف ونزيه ... اضرب المغرورين السمساره اللذين يتاجرون باسم كياننا العظيم
  • #17
    عابر سبيل 06-08-2015 11:0
    مزمز والصدأ لن يتركوك ، لأنهم استفادوا من الوضع المائل ، ومن مصلحتهم أن لا يكون هنالك رؤية جديدة في العمل الإداري ولا في العمل الفني ، ولن يتركوك أن توضح للوسط الرياضي تجارب الدول المتقدمة في الأندية ولا في الاتحادات ، وهم يعلمون أن كلامك هو ( كبد الحقيقة) ، هؤلاء الصدأويون نحن لا نعلم حقيقة تكوينهم السلوكي من بداية نشأتهم وهل كانت تربيتهم فيهاكانت فيها خطأ، ومن حقك أن تدافع عن نفسك وتوضح الحقائق للوسط الرياضي ، ولكننا لا نريدك أن تنجرف من خطك المهني
  • #18
    ابو خالد الدمام 06-08-2015 10:0
    يا استاذ كامل الرخيص رخيص والسفيه سفيه والاشكال دي والله مفروض ما تضيع وقتك الغالي معهم هؤلاء متسولون على مائدة الاخرين .. امثال مزمل وهو ايضا يوصل معلومات المعارضة الي الوالي مقابل الدولارات وكل اهل الرياضة عارفين تفاهة هذا الرجل ...
  • #19
    سامى 06-08-2015 10:0
    الاخ محمد كامل.. كل من يملك المال والسلطة مع عدم الخوف من الله هذا هو نهجه..يعميه الشيطان عن الحق..ويملا راسه غرورا..ويقول انما اوتيته على علم من عندى..يفترى على خلق الله..يمﻻ كتابه ذنوبا..المال جمعه بالحرام سواء ان كان مصدره بيعا للكذب او هدايا من اموال الشعب المنكوب..ثم بعد ذلك يستقل المال الحرام ويصرفه فى الحرام..بدفع المال لمن ينفذ له طلباته فى ايذاء خلق الله..لكن اين الله..اتراه يغفل عن كل هذا..؟ ييسمع دبيب النملة السوداء على الصخرة الصماء فى الليلة الظلماء..هو الحق والعدل..لم يجعل بينه وبين دعوة المظلوم حجاب وﻻ واسطة..دعوة المظلوم ليس بينها وبين الله حجاب..قم فى الثلث الاخير لليل..حيث ينزل الله الى السماء الدنيا ويقول اﻻ من داع فاستجيب له..
    لكا ظالم نهاية..وان تاخرت..امهل الله فرعون عشرات السنين وهو يقول انا ربكم الاعلى ..ثم اخذه..وامهل قارون عشرات السنين..ثم خسف به وبداره الارض..وامهل الشيطان الى يوم القيامة..نعم لكل ظالم يوم..اللهم بعدلك انت الحق وبقوتك وجبروتك..يا من ﻻ يعجزه شئ فى الارض وﻻ فى السماء..
    يا قاهر تلاحزاب ومجري السحاب..يا ناصر المظلومين ويا رجاء المستضعفين..يا من وعدت المظلومين بنصرك ولو بعد حين..يا قهار ياجبار يا قوى يا رافع السماء بغير عمد نراها..انصر محمد كامل على من بغى علية..اللهم من اراد بمحمد كامل سوءا فاجعل الدائرة عليه واخزه فى الدنيا قبل الاخرة وارنا فيه يوما اسودا ..آمييييين
  • #20
    الزيدابي - الجزيرة ام طرفة 06-08-2015 10:0
    حووصه موديل 2015 اي المشاطه موديل 2015 كانت كل امنياتها في الدنيا ان يمتضي عبارة (البنطون) من الضفة الشرقية للضفة الغربية من نهر النيل) واليوم اصبح في لمحة بصر يمتضي السيارات الفارهة والعمارات الشاهقة بسبب فهلوته وكذبه وتضليله ونفاقة ومسح الجوخ للرئيس الطوالي .

    اضرب بيد من حديد يااستاذ محمد كامل ولا تاخذك رحمك في هذا الارزقي والمحتال على نفسه .. افضحه وافضح الاعيبه ودهنسته .
  • #21
    Abu Ahmed 06-08-2015 10:0
    الأستاذ محمد كامل السعيد
    تحية واحترام أنت جدير بهم
    كتاباتك ربما لا تعجب 90% من المريخاب، ليس لجهالة فيهم وأنما لجهلهم لقاعدة "أنصر أخاك ظالماً أو مظلوما" فهمهم للنص أن تأيد المريخ "ممثل في إدارته ولاعبيه" مهما كان موقفهم صائباً أم مخطا ، أنت تنظر لبعيد ومعظمنا لا يرى أبعد من أرنبة أنفه، أنت أخترت الوقوف ضد التيار ومعظمهم أرتبطت مصالحه بالسباحة معه حتى ولو قادهم إلى حتفهم، كل القضايا التي خالفت فيها ا"المطبلاتية" أثبتت صحة وجهة نظرك من هيثم وما قبل هيثم وحتى اليوم .. بالأمس تطرقت لمسألة جري المريخ خلف لاعبي الهلال، وتناولها أحد المطبلاتية في عاموده بالأمس مرددا نجاح علاء الدين وبكري ونسي موضوع هيثم رغم أن علاء يعتبر لاعب المريخ أصلا والقياس هو في انتقاله للهلال ، أما موضوع بكري ومدى نجاحه أو فشله فهو أولا وأخيرا ليس من الرموز الهلالية ومازال الوقت مبكر للحكم عليه كلاعب بالفشل أو النجاح ، لكن اعتداءه على الحكم في مباراة أهلي شندي كان يتطلب إدارة مريخية قوية لمحاسبته قبل أن يحاسبه الاتحاد العام ، وهو في ظني فعل ما فعل عمداً حتى يتوقف حتى نهاية الموسم، أراد التوقف هرباً من الضغوط التي مورست عليه من قبل الإعلام الهلالي، فهو كلاعب محترف يعلم بالقوانين واللوائح التي تحكم اللعبة لكن ما لم يكن يعلمه هو ضعف الاتحاد العام ومدى نفوذ الإدارة المريخية، التي تستأسد على الاتحاد وتتحداه بالحق والباطل وتتحول إلى "معيز" أمام اللاعبين خاصة القادمون من العرضة جنوب، أستاذي العزيز أنت تقف في الجانب الصحيح من التاريخ ، واصل كتاباتك وتمسك برأيك وحتى ولو جافاك الحاضر فالمستقبل معك ، ورحم الله أمي لها قول مأثور أقولها لجماهير وإداريي وإعلاميي المريخ " اسمع كلام الببكيك ولا تسمع كلام البضحكك"
       الرد على زائر
    • 21 - 1
      ياسر الشيخ 06-09-2015 12:0
      @ سامي... هو انت لسه ما فهمت انو الكاتب السنين الفاتت دي كلها قاصد على قولك الكاهن مزمل؟ ياخ بتبالغ... محمد كامل ده يكتب ليك بي ياتو لغه عشان تفهم النقطه دي بعد المقال الطويل و عريض ده؟ هههههه .... صحي شر البيله ما يضحك... اقرا و افهم و اسال الناس قبل ما تعلق عشان منظرك قدام الامم المتحده...

      بعدين الرشيد و مزمل زملاء مهنه و لديهم فهم متقدم في فنون الصحافه... و قاعدين يردو على بعض ... بس شكلك ما قاعد تقرا لي مزمل بي نفس الفهم لي الرشيد... لانو التداول المكاواه بينهم موجود بين الفتره و الاخرى...
    • 21 - 2
      سامى 06-08-2015 09:0
      يعنى محمد كامل الكان بكتبو من سنين كلو كان بقصد بيهو الكاهن..ده معقول..ولو كان بقصدو ما كان يذكر اسمه صراحة..
      ده رايكم يا اتباع المعبد والكاهن الاعظم؟
      غايتو العملو فيكم الكاهن تانى ما بطلع منكم..عشان كدة ربنا حرم السحر..
      ما ياهو ده الرشيد سيف الهلال البتار يومى بسلخ الكاهن وواليهو..قدر يوم واحد الكاهن يرد عليهو..
      يا جماعه..كاهنكم دا اضعف مما تتصورو..وهو من زمان لو كان فيهو ما تعتقدون كان رد على محمد كامل..
      لكن هو ما برد..ليه..ﻻنو الكاهن اعقل منكم ..مصالحو قدام عينو..وهى همه الاكبر..محمد كامل عارف اسرارو..
      عشان كده..لو بتحبو كاهنكم بى جد..ابعدو من محمد كامل..
    • 21 - 3
      ياسر الشيخ 06-08-2015 08:0
      ابو احمد.. الكاتب ده بنجر من راسو ساي.. نظره شنو و بعد شنو؟ حسي انا غالبني اكتب ليك انو الماشي يحصل شنو في موضوع البطوله الافريقيه و انو فرقنا ح تطلع من المولد بدون حمص وانو الفريقين غير مؤهلين للفوز بي البطوله و انو التخطيط الاستراجي للفريقين صفر و انو الاعب السوداني ينقصه الكثير لكي يقارع الانديه القويه و انو بكري اتسجل بي ملبغ كبير و هو السبب في جعل رمضان عجب يسجل بي ملبغ مقارب ... ده كلام اي زول عاش مع الكوره السودانيه دي شهرين بس ممكن يقولو لانو اكيد كلام ح يطلع صاح .. يعني زي الزول البقول ليك بكرا يوم التلاتاء و السنه الجايه 2016 .. يعني بتحداك في شي اكيد ح يحصل و ده ما بعد نظر في كل الاحوال...

      بعدين حكايه الجري ورا لعيبه الهلال دي العيب في شنو بي الضبط؟ و ليه مافي عيب من جري الهلال ورا لعيبه المريخ؟ كلام غريب صراحه .. لانو التنقل ده من زمان و مافي شي يعيب .. ابو العائله رمز مريخي و كان هلالي و قاقرين من اعظم اللعيبه الهلاليين و كان مريخي.... الكلام لازم يكون بي اثباتات.. مش كلام و السلام.. و بعدين الكاتب لمن كان بكتب الكلام ده كان و لازال يكتب عكس ما يكتبه مزمل و ده ظهر الان بعد ما فكا اخرو .. يبقى بعد ده لو في زول كان بحترمو يراجع احترامو ليهو لانو وضح انو كان بكتب بي ياتو فهم ... و مدام الكتابه مقصود بيها شخص محدد معنها انو الراس فاضي و القلب مليان حقد لاغير...
  • #22
    ابوالفاضل 06-08-2015 10:0
    يااخوي نحنا عارفين منو المريخابي الاصيل من التقليد يعني مافي داعي لكلامك ده والشئ اللي بيثبت الكلام ده انظر الي الاشادات في حقك كلها من بني زرقان.
  • #23
    omer 06-08-2015 09:0
    الآن ظهر الحق
    عندما كنا نقول ان محمد كامل له احقاد وغبائن ومشاكل مع مزمل كان ينبري لنا المدافعين عنه ويطالبوننا ان نتقي الله وهل دخلنا في قلبه .
    مشاكل محمد كامل مع مزمل كانت واضحة في كتاباته وتتحكم في الخط الذي ينتهجه علي حساب مصلحة المريخ و لكن لم يحدث ان تحدث عنها بمثل هذا الوضوح من قبل وهذا ماكنا ننادي به منذ سنيين وفي كل مرة نطلب منه ان يبتعد عن اسلوب الهمز واللمز وان يكون شجاعا ويتحدث عن مزمل والوالي بصورة مباشرة .
    نحن الان في صف محمد كامل طالما اختار هذا الاسلوب الذي طالبنا به ولم نكن في يوم من الايام في صف مزمل وانما كنا ضد محمد كامل فحسب .
    اصبرو شوية كمان وح تتضح لكم حقيقة الخلاف مع جمال الوالي ونقعد جنب الحيطة ونسمع الزيطة ههههههه .
    نطالب جماعة المدافعين عن محمد كامل بالاعتذار لنا .
       الرد على زائر
    • 23 - 1
      ياسر الشيخ 06-09-2015 12:0
      @ سامي... شغال تسكت لي الناس ساي شايفك... ي عزيزي عندك كلام مفيده زي ما الناس بتكتب و تقول حقايق خير و بركه ما عندك يبقى انت التنقط الناس بي سكاتك لانك بتكتب كلام ماعندو معنى...
      شنو امشي انوم و سكوت دهب... اظرف شي كتبت... صم خشمك و نحن فاهمنك و مضمون كلامك وصل... عربي ده ي مرسي؟ .... يعني تعلقي مفهموم و عندو مضمون لكن اسكت عليه!!!! بالله عندك تعليق مفيد قولو او اقرا و انت ساكت...
    • 23 - 2
      سامى 06-08-2015 09:0
      ياسر الشيخ..والله كان مشيت نمت احسن ليك..مش قالو ليك اذا كان الكﻻم من فضة فالسكوت من ذهب..
      بطل الهضربة البتسوى فيها دى..اقعد فى الواطة وقول بسم الله..
      انت عاوز تقول شنو..مرات الواحد يحاول يقول حاجة..اسلوبه يكون بطال ..المعنى يروح والناس بتفهمو غلط.
      نفس الشخص..ممكن يسكت ويصم خشمو ورسالتو تصل للناس ويفهموهو..
      صم خشمك..انت بترتاح..ونحن فاهمنك..كتر خيرك..مضمون كﻻمك وصل..نشوفك بعد رمصان..الفكرة وصلت
    • 23 - 3
      ياسر الشيخ 06-08-2015 07:0
      يا سلام عليك ي عمر ابدعت والله... زمان قلنا الكلام ده شبكونا نحن بنكره الراجل عشان بقول الحق .. حسي ظهر ليهم على حقيقتو انو بكتب و قلبو مليان حقد و ضغينه على الطرده من الصدى...
      قلنا الكلام ده كتير بس الناس ما بتعرف تقرا بين السطور ... الان اتضح انو كاتب فاقد للاهليه و غير جدير بي الاحترام و كل ما كتبه كان نابع من حقدو على مزمل و ما يكتبه مزمل..
      اظرف مافي الموضوع انو قريبنا فتر من انو مزمل ما طراه بي سطر بعد الهجوم اليومي ده .. حسي عشان زول عادي في قروب زنقو قال ما بديهو الشرف انو اذكر اسمو... ههههههههه ... اذا انت زول عادي غلبك تمنطقو و ابيت تذكرو في المقال عايز مزمل يذكرك في مقالو ولو بي الغلط؟ اكيد لا ي عزيزي...

      ود سعيد ...بعد ما دقستا و جبت اخرك اذهب فانت من الطلقاء...
  • #24
    oaltahir 06-08-2015 09:0
    الاخ العزيز محمد كامل سعيد

    اتمنى ان لا تجاريهم فليس لديهم شئ يخسروه لا في الدنيا و لا الاخرة
    لكن عندك النفس الابية و الخلق القويم... يعني ايه ان تكون مريخابي او هلالابي.... المهم ان تكون نفسك !!! احترام النفس هو الذي يصنع الرجال...
    ام مزمز و من على شاكلته من الذي يعلقون على هذا العمود فهم فتات الموائد و بقاياها.... من يعطيهم اعتبار؟؟؟ اتمنى ان لا تعطيهم اكثر مما يستحقون.... التجاهل.... نحن هلالاب و لكن نقرأ عمودك باستمرار و نعرف ما ترمي اليه ... امااصحاب النفوس المريضة فانهم يفسرون كلامك على هواهم!!!! و كما قلت لك تجاهلهم فالتجاهل هو الذي سيحرقهم و يحرق سيدهم لانهم جميعا اصواتا لسيدهم
    رجاء لا ترد و لا نريد ان نعرف اي شئ عنهم فانهم حثالة
  • #25
    أبو عبد العزيز 06-08-2015 09:0
    أخي الفاضل لقد جعلت لك لونية خاصة ما ندر أن توجد في هذا الزمان الذي غاب عنه الأستاذ عبد المجيد الذي كان عين الصحافة الرياضة بقلمه الميزان الذي يوزن به الأمور وينصف بدون طمس للحقيقة .. أنا من الذين يتابعون كتاباتك رغم هلاليتي وعشقي للهلال .. ولا أجد في نفسي شيء عندما تداعب أحرفك الهلال بالنقد أو الإشادة .. لذا تعجبني لونيتك التي تجعل الهلالاب يصنفوك مريخيا والمريخاب يصنفوك هلالي .. أرجو أن تحتفظ بقداسة قلمك من الوقوع في سواقط القول .. وأن تظل تحتفظ بقيمك بعيد عن سفاسف الأمور ووكل أمرك لله .. كن كما عهدناك أخي .. هذه نصيحة من أخ محب لك .. ودع الخلق للخالق .. أتمنى أن نظل متابعين لعمودك بجميل طرحك وتحليلك وأن تكون كلماتك أمل جوانا بعودة النقد الهادف ..
  • #26
    عابدين 06-08-2015 08:0
    انت هلالابي ودي ما عاوزة اي كلام .......بعد كدا اي كلام تقولو لا علاقة لنا به نحن المريخاب
  • #27
    sahir 06-08-2015 08:0
    تكون هلالابى تكون مريخابى تكون شريف ومابتبيع نفسك بحفنة دنانير كما ذكرت هذه اشياء تخصك ... تشترك فى المجموعات وتقبل بعد الراجاءات ماتشترك برضو شئ يخصك .... نحن مايهمنا مارنراه امامنا ومتابعة كتابتك فى الفتره الفاتت وبصراحه وبدون تعصب كتابتك عباره عن مسخ يفتقد لا لون له ولا طعم كل ما تقوم به آراء مشاتره بغرض لفت الانظار اليك ولولاها لما سمع بك احد ولكن السؤال كيف شخص مثلك يكون صحفى سواء ان كان فى الصدى او غيرها ؟؟؟
       الرد على زائر
    • 27 - 1
      واحد سوداني 06-08-2015 11:0
      احييك مليون تحية على السرد والتساؤل الموضوعي يا Sahir وفعلا محمد كامل يتبع اسلوب غريب... ولا مكان له وسط الصحفيين المميزين طالما اختار هذه الطرق... كما ان اسلوب التشهير بالناس والتهديد ليست من شيم الرجال.. لا يهمنا خلافه مع الاخرين أيا كانوا فمعظمكم: (الحال من بعضو) وهذه ليست ساحة لتصفية الحسابات... المباديء لا تتجزأ يا محمد كامل..
    • 27 - 2
      سامى 06-08-2015 11:0
      والله انا مستغرب فيكم شديد..الواحد لو ما مقتنع بالكاتب مالو اليوم كلو مصاقرنا فى الموقع ومضيق وقتو..
      موقع الكاهن والكﻻم اللذيذ www.alsadda.net
      وجريدة الزعيق www.alzaeemsd.com
      تجدو ما لذ وطاب عن العالمى وتنومو نوما سعيدا باحﻻم رائعة..
      ولمن يفك البنج وتلقو نفسكم فى الكوسة بعدين الله فى..
      بحلها الف حﻻل
  • #29
    تمبساوى 06-08-2015 08:0
    اقنعتنا يا ود كامل سعيد يا اخى الاحشتوا ماتو بربك انت مصنف نفسك صحفى مريخى انت لقبت رجال سكبوا العر ق فى الملاعب باب قلبا ميت واحد واب قلبا ميت 2 ليه غالبك اسم المطبلاتى وسؤال موجه لك انت لو صادق اصلا انك تنتمى للمريخ تكره المريخ بسبب مطبلاتى لدرجة استوب يا اخى اتقى الله وبكل شجاعة ان تعلن من انك هلاﻻبى عيب وﻻ حرام وبكل شجاعة اما فصلك من الصدا ما انت بس معاك عدد 5 اشخاص ﻻنكم كنتوا غير مؤهلين فى مجال الرياضة وهذا ما من تقليل شانك لكن فى صحفيين سياسين يجوا نا طين فى الرياضة وفى صحفيين اصلا حتى الشهادة السودانية ماعندهم ومنهم واحد كان يكتب فى هذة الصحيفة واﻻن مختفى فى ظروف غامضة اما دخولك فى قروب يوم الثلاثاء وخروجك يوم الجمعة دا دليل انك ما عندك شئ تقنع ناس القروب وهرووب على العموم يا ود كامل المطبلاتى رجل مثقف ومعه شهادة ماجستير ولديه دراية كاملة فى قوانين الرياضة عشان كدة العب بعيد
       الرد على زائر
    • 29 - 1
      سامى 06-08-2015 08:0
      يا تنقساوى..او تمبساوى..انت قلت الحق..الاختشو ماتو.
      طيب يا اخى ما تختشى..مزمز ياكل بى عقلك حﻻوة..
      ما كفاية البهدلة الانت شايفها فى علم وابوشيبة وكابو..
      ذلة ما بعدها ذلة..محمد كامل رفض العبودية لاكل العيش..
      نساعدو وﻻ نقيف مع المفترى مستجد النعمه الغاشم..؟
      الزول بقول ليك هو ترك مزمز عشان ممارساتو السالبة..
      بالله اسالك سؤال..مزمز وصلكم لى وين..القمة؟
      ما طول عمركم وصيف الهلال..فى الممتاز..ومافيشين فى التصنيف..
      اوعك تجيب لى سيرة البحر..وتقول لى سيخافا
    • 29 - 2
      بكرى النحاس 06-08-2015 02:0
      والله اشك فى كلامك ده منو العندوا ماجستير ده الايكون فخرى لان مثل الشهادات دى هانت وبتعطى لكل من هب ودب لاحسيب ولارغيب ياخى ده مما تغلغل فى الوسط الاعلام
      كانه قنبله زعزع كل شى كذب وافتراء وتزييف للحقيقة وما خفيه اعظم اكاد اجزم بانه ومن معه دسيسه من الانقاذ لتدمير الوسط الاعلام وذلك بدوره يعنى تدمير الوسط الرياضى كما دمر التعليم والفن وغيره حتى لايوجد من يقود الناس
      ضدهم ويصبح الكل يكره الكل واى واحد مع نفسه ولايهمه شىءوالدليل على كلامى ده ان تاركنهم حتى الان يفعلوا مايحلوا لهم .
  • #30
    عماد عثمان - جدة 06-08-2015 08:0
    الذى يقرأ مقالك يعتقد انك شخص مهم يستهدفه الناس ...
    يا راجل اذا كنت تعتقد ان لك قيمة أو مكانة فى قلوب جماهير المريخ فعليك مراجعة قواك العقلية و حالتك النفسية لأنك و فى استهدافك للمريخ و رئيسه تفوق الرشيد على عمر و أمثاله فى الكيد و دس الدسائس.
    ابتعد عن المريخ و ابحث لك عن عمل آخر فالكتابة مهنة لا تمتلك أدواتها.
       الرد على زائر
    • 30 - 1
      سامى 06-08-2015 08:0
      الكتابة مهنة..انت يا عماد تملك ادواتها..ايش رايك يا عماد تكتب كل يوم عمود..وانا بشوف ليك ناس كفر ووتر يشيلو ليك محمد كامل ويختوك محلو..
      ﻻنو محمد كامل حسب رايك ﻻ يملك ادواتها.
      يا اخى خسارة انت تعطى كل خبرتك ومواهبك لغير وطنك وتغترب..عد الى بلدك..سوف يستقبلك كل الشعب السودانى بالمطار..
      سوف نرفع اللافتات..مرحب بالكاتب والناقد الكبير..عماد عثمان..
      يا خى نحن ناقصين؟خليك مع ريالاتك وكفيلك..نحن كفيلنا الله عز وجل
  • #31
    ابو قصى الدمام 06-08-2015 08:0
    الاستاذ محمد كامل كثيرا ما اطالع عمودك و قلما اجد خروجا للنص و خطك الاعلامى اقرب الى فقيد القلم الحر و الذى كان يأتى بالحجة البيضاء ليلها كنهارها و الا هو عبد المجيد عبدالرزاق و الذى تعرض لبعض ما تتعرض له وذهب البعض بانه مزروع و سم مدسوس داخل البيت المريخى و قطعاالكلمة الصادقة الامينة هى رسالة لا يستطيع حملها الا اولى العزم و الارادةو نحن لا نطالبك بالقاء الاقلام و الصحف ولكن قد يرى البعض ضرورة التخفيف من حدةالنقد الساخر الذى قد يثير حفيظ الغير و اتباع سياسة اللبيب بالاشارة يفهم و بدلا من الكلمةالمصادمة و لا تكن فظا غليظا و لا تكن امعة و لا حمالا للحطب و اتخذ بين ذلك سبيلا وانتم ابناء لون واحد و نطالبك بنعدم نشر غسيل اخيك و لا تكن كاشفا لعورات سترها الله و احفظ عيوب اخيك مهما كان الثمن و تأكد اجلا ام عاجلا سوف يأتى الصبح ليحصحص الحق على رؤوس الاشهاد و نحن فى حاجة الى الاقلام النزيهه و المبراة من العيوب لا تكن بائعا و لا مشتريا لمبادىء تعكس قناعاتك . وشكرا ودمتم زخرا
  • #32
    ابو هشام 06-08-2015 07:0
    والله يا استاذ كامل نحن كهلالاب نحترمك ونحترم كلمتك مهما كانت جارحة لأنها كثيرا كانت تصيب (كبد الحقيقة) التي توارت عند بعض الكتاب ولكن نصيحتي لك كأخ كنت اتمني أن تكون لونيتك زرقاء أن لا تنصاع لمثل هؤلاء ودعهم لربهم ويا بخت من عفا وأصلح وأجرك عند الله أن شاء الله واترك قافلتك تسير ودع النباح للآخرين أو المطبلين كما يحلو لك دائما
  • #33
    سيد بلد وافتخر 06-08-2015 07:0
    اللييييييييييلة بس ما تكتر من الفضائح و شيل الحال !!!!!!!!!!! وبرد يا !!
  • #34
    تونجيلا 06-08-2015 07:0
    يعنى طلعت هلالابى مندس زى ما قالوا ناس كتار ...ما هو ظاهر فى الاستدلال فى كثير من المواضيع والمقارنة بين الهلال والمريخ" النفى ما بيحلك اعلنها.

       الرد على زائر
    • 34 - 1
      زاير 06-08-2015 12:0
      انت طبال جديد فى طريقك للظهور ...قدم نفسك للطبال الاكبر و لن يخذلك!!!!!
  • #35
    ابوهند 06-08-2015 07:0
    تحية طيبة الاخالاستاذ محمد كامل السعيد
    انا هلالابى حتى الثمالة ومن حزب الرجافة امثال الراحل المقيم عبدالمولى الصديق ,ولكنى اقرأ لكل كاتب رصين اديب صاحب مثل دون تحيز ولعلى ابدأ بعمودك قبل او بعد استاذنا شجرابى .
    وللحق لم اجد فى عمودك سواء الكلمة الرصينة الامينة متصديا لمشكل الرياضة عموما ومنتقدا مخلصا لفريقك المريخ ومنصفا مع الهلال .
    اتمنى استاذنا الا تنجرف وراء الحاقدين وتسعى للانتقام وعندها تسقط امام نفسك قبل غيرك (الا تتفق انك خرجت عن لغتك الى كلمات مثل حووصة لاتشبهك ابدا) ,فارجوك تريث واعفو وفوض امرك لله واعلم ان هذا مايريده اعداءك ان يخرجوك عن طورك فتنجرف الى حيث لاعودة , احقرهم بسكوتك.مثل كويتى
    (الحقران يقطع المصران) الحقران بلغتنا التطنيش واهمال الرد على المتطاول .
    اخوك الهلالابى ابوهند
    ابوظبى
       الرد على زائر
    • 35 - 1
      المهاجر 06-08-2015 09:0
      استاذنا محمد كامل اسمع كلام ابوهند فهو عين العقل .. نحن هلالاب ولكن نحترم قلمك بعد الراحل عبد المجيد عبد الرازق .. فلا تنجرف خلفهم وكما يقول المثل الشعبي احذر لسان ال ......! مع كامل احترامي
  • #36
    ودالمكى 06-08-2015 06:0
    افضحهم. يامعزبهم بى الله. المرشد. ماتخلى. ليهوا. صفحه. ينوم عليها. احسن. صحفي سير. وعين. الله. ترعاك
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019