((())) ولنعلن ان المريخ هو اقوي فريق في السودان :

تأهل المريخ بمجهود كبير وجبار امام فريق مغمور وضعيف اسمه عزام

وقفلوا الملعب وما تلفزوها وجابو ٣ اهداف ولا في الاحلام

وحفلات وجوطه وسهر للصباح وكأنهم في سيكافا بالتمام

طيب الهلال ما تأهل بسهوله وبأقل مجهود ومن غير دوشه ويا سلام

وبيقولوا المريخ افضل من الهلال لانه انتصر بثلاثيه

ونحن نقول الهلال افضل من المريخ لانه لعبها حسابيه

في حين ان نتائج الفريقين متساويه وهي واحد صفر اذا تم خصم اهداف الخصم برويه

الهلال غالب ٢ صفر في السودان ومغلوب ١ صفر في زنزبار (النتيجه ١ صفر للهلال )

والمريخ مغلوب في تنزانيا ٢ صفر وغالب في امدرمان ٣ صفر (النتيجه ١ صفر للمريخ )

اذن النتيجة واحدة وما في حد احسن من حد

بالعكس فوز المريخ افرز حالات اغماء وهستيريا وخوف ورجفه من فريق لا يستحق كل هذا المجهود

وجرسه استاند باي واستنفار لقطاعات الشباب واوهام وجواسيس وحديث عن تبرعات معلوماتيه لعزام

اما الهلال فقد تأهل بسهولة شديده علي الزنزباري الضعيف

ولم يكترث اي مشجع ازرق بهذه المباراة السهله وكاننا لاعبين ضد نيل الحصاحيصا

وقد ظهر ذلك جليا علي اللاعبين واستهتار واداء جنائزي

والالتزام التام بخندقة النقر ورغم ذلك سجل الزنزباري في مرمي مكسيم

وحقيقة ما يحيرني حقا هو استمرار احتفالات المريخ

وكأن المريخ قد فاز ببطولة افريقيا

اصحوا يا اخوانا انتو يا دوب اتخرجتوا من التمهيدي ورايحين الاساس

ويجب ان تعلموا انكم لعبتم مع فريق اسمه عزام من تنزانيا

وهو فريق مغمور غير معروف في افريقيا

ورغم ذلك فاز هذا الفريق علي المريخ في تنزانيا بهدفين

كذلك كي ام كي هو فريق ضعيف شديد

ولم يسمع به احد من قبل ولكنه فاز علي الهلال في زنجبار بهدف

الغريب ان المريخ قد قدم كل ما لديه امام عزام ولا ندري ماذا سيقدم امام كبار افريقيا ان استمر في البطوله ؟

وهل يملك المريخ اكثر مما قدم وفي الطريق توانسه وكنغوليين وانجوليين ومصريين وجزائريين وغانيين ونيجيريين

كذلك الهلال فلن يعبر الي دور ال ١٦بهذا المستوي الضعيف

وياريت نعلن المريخ كاقوي فريق في السودان ونكتب في الاعلان ( منحت هذه الصفه حسب رغبة طالبها )

واعلموا اخوتي ان الهلال هو فريق عادي جدا رغم ان النتائج متساويه والتأهل متشابه

واكيد ستستمر كل حفلات المريخ وصيوانته الحمراء والزغاريد واغاني انصاف مدني وفرفور

ومن غيرنا قد لوّن التاريخ بالذهب (مانديلا ماقبل التاريخ )

من غيرنا قد وهب الأفراح وما وهب (حفلات انصاف مدني)

من دوّخ الأبطال (عززيمووو)

نحن بين الناس صفوة (ومع البمبان جفوة )

نحن في الحياة قدوة (نزول لملعب المباراة)

نحن في المريخ أخوة نعشق النجم ونهوى( وآية قرآنيه من وحي خيال العارف عزو مستريح )

وبعد الفوز علي عززيمووو اكيد سينسي اهل المريخ الهزيمه الفاشريه السلطانيه وثورة البمبان

وواكيد سينسي اهل المريخ لاعبا اسمه حسن كمال مؤلف قصة (مسمار السلطان)

واكيد ستعجب اهل المريخ كلمات المصري المتفلسف ايمن سعيد (احنا كنا رجاله)

ياريت يا اخوانا يصدر قرار جمهوري يعلن المريخ بطلا لعموم اهل السودان



((()) حكاية بيت / الشاعرة داليا الياس

مُناي في الدنيا سُترة وبيت..

وأصل البيت حنان وأمان.. مودة وريد

محال البيت يكون بس طين.. وزنكي وحيط

ولا ممكن يكون سكر وصلصة وزيت

كلام البيت كلام تاني.. كلام إحساس مقدس وشرع رباني

وريد إنسان عزم وإختار

فتح باب قلبو لمّاني.. بني العش الصغير طمّني آواني

٭ ٭ ٭ ٭

بيوت الدنيا مختلفات وما كل البيوت واحد

في بيت داااافي.. وبيت باااارد

وبيت عمران هوى وتحنان.. وبيت جامد

بيوت مليانة فرحة وحب

وخير وأمان

بيوت عدمانة من الود..

زمن مسكونة بالأحزان

بيوت زااااهية.. وبيوت وااااهية

بيوت تديك سلام وأمان

عشان فيها النفوس صافية.. وفيها التقوى والإيمان

٭ ٭ ٭ ٭

بيوت متروسة مال وإثاث

وخالية من الأمل والناس

بيوت لا لمبة ولا بوتجاز

وناسا لُطاااااف حُنان ولُذاذ

في بيت عاااالي وحوشو كبير

وسيدو وزير خيرو وفير

وليهو غفير .. وبيت من طين

في راكوبتو بس فد زير

ورغم الساكنو زول مسكين

بس حقاني عندو ضمير.. بيوت البهجة عنوانا..

وطول اليوم ضحك وهزار

وبيوت طوالي حرقانة

مولعة زي تقول من نار

بيوت بتراعي حق الجار .. وفيه من الخيار أخيار

بيوت لا بتعرف الجيران..

ولا بتستطلع الأخبار

بيوت تمليك.. بيوت إيجار

وماااابتلقاها بالهين .. ولازم تكرم السمسار

وشوف في سكتك كم بيت .. وفي كل البيوت أسرار

٭ ٭ ٭ ٭

وفي بيت مسكون.. وبيت فاضي .. وبيت جاحد.. وبيت راضي

وبيت مشكلتو معروفة

ووصلت محكمة وقاضي.. عشان عُشرة سنين هانت

وكل واحد بقى في وادي.. وفي بيت حدادي مدادي

بس مافيهو غير إتنين.. وبيت ملياااان تقول نادي

٭ ٭ ٭ ٭

وفي بيت سكانو متآلفين.. على الحلوة وعلى المُرة

وبيت سكانو مختلفين.. ما بتفقوا بالمرّة

وبيت ستو مرة ضيفان.. مرة سُترة

ما بتستاهل الهجران.. ولا بتستاهل الضرة

بيت ستو دوام.. بتباري في النسوان

لا بتعرف تكرم الضيف.. ولا بتورِّق الخُدرة

٭ ٭ ٭ ٭

وفي بيت محروم من الأطفال

من ضحكة عيون حلوين

وكل يوم ناسو عند دكتوركبير.. أتعابو بالملايين

وبيت أطفالو زي عشرين .. ومحتاجين حق كراسة ما لاقين

وبس عايشين على الله.. ما قادرين يسدوا الدين

وناس تانيين.. مرتاحين.. وهَم في الدنيا ما شايلين

٭ ٭ ٭ ٭

وياما وياما تلقى بيوت .. بيوت صاخبة

وبيوت لا ليها حس ولا صوت .. وكل ناس البيوت بتموت

ويبقى البيت شبر واحد.. وبكرة تكون بيوتنا قبور

لا هم مويه لا هم نور .. ويبقى مُنانا في الجنة

وننسى حكاية السُترة.. وحكاية الريد

كأننا لحظة ما كنا.. ولا فتشنا يوم عن بيت

حليل البيت.. وهم البيت.. وناس البيت

حليل الدنيا بالفيها!! وكل الفيها لا ماليها ولا مكفيها



((())) تعليق : هذا احلي ما قرأت من قصيد عن البيوت



((())) ختام :

القمة لن تذهب بعيدا في بطولات افريقيا فلا يخدعنكم رجال وصحفيين حول الرئيس



محمد حسن شوربجي

© 2015 Microsoft Terms Privacy & cookies Developers English (United States)